Si Moroni nagsulat diha sa bulawan nga mga palid

Minerva Teichert (1888–1976), Moroni: Ang Katapusan nga Nephite, 1949–1951, oil on masonite, 34¾ x 47 inches. Brigham Young University Museum of Art, 1969

Disyembre 7–13

Moroni 7–9

“Hinaut Unta Nga Si Kristo Mobayaw Kanimo”

Ang imong katuyoan mao ang pagtabang sa katawhan nga mopaduol ngadto sa Dios, dili lang ang paghatag og leksyon. Pag-andam alang sa Sunday School pinaagi sa pagbasa sa Moroni 7–9 nga naghunahuna sa mga sakop sa klase, nga mangita sa mga baruganan nga makatabang kanila.

Irekord ang Imong mga Impresyon

pagpaambit nga icon

Dapita ang Pagpaambit

Dapita ang matag sakop sa klase sa pagribyu sa Moroni kapitulo 7, 8, o 9 ug sa pagpangita og usa ka kamatuoran nga makahuluganon kaniya. Ang mga sakop sa klase mahimo dayon nga mopakig-ambit sa kamatuoran nga ilang nakit-an ug giunsa niini sa pagpanalangin kanila.

pagtudlo nga icon

Itudlo ang Doktrina

Moroni 7:3–19

“Kana nga iya sa Dios nagdapit ug nagdani sa paghimo sa maayo sa kanunay.”

• Aron mahimong mga disipulo ni Jesukristo, kinahanglang makaila kita taliwala sa maayo ug dautan. Siguro ang paghisgut sa mga kamatuoran diha sa Moroni 7:3–19 makatabang sa mga sakop sa klase nga malikayan ang “sayop” nga paghukom (Moroni 7:18). Aron makaandam alang sa panaghisgutan, ang katunga sa klase mahimong mangita niini nga mga bersikulo alang sa tambag nga gihatag ni Mormon kon unsaon sa pag-ila unsa ang nagagikan sa Dios, ug ang laing katunga mahimong mangita kon unsaon sa pag-ila unsa ang nagagikan sa dautan. Mahimo na dayon nilang hisgutan unsa ang ilang nakit-an ug mopaambit ug mga pananglitan sa mga butang nga nagdapit kanila “sa paghimo sa maayo, ug sa paghigugma sa Dios, ug sa pag-alagad kaniya” (Moroni 7:13). Unsaon nato sa paggamit ang tambag ni Moroni diha sa atong inadlaw-adlaw nga mga desisyon? Unsaon nato sa paghimo og matarung nga mga desisyon ug makapakita gihapon og gugma niadtong mga anaa sa atong palibut kinsa wala mosunod sa ebanghelyo?

• Daghang mga tawo ang naghunahuna, “Unsaon nako sa pagkahibalo kon ang akong mga pag-aghat nagagikan sa Dios o gikan sa akong kaugalingong mga hunahuna?” Mahimo nimong isulat kini nga pangutana diha sa pisara ug dapita ang mga sakop sa klase pagpangita sa Moroni 7:13–16 alang sa mga baruganan nga mahimong makatabang sa pagtubag niini nga pangutana. Unsaon kaha niini nga mga bersikulo sa pagtabang kanato nga mailhan ang balaang inspirasyon? Mahimong makatabang nga ipasabut nga “ang Espiritu ni Kristo,” nga nailhan usab isip ang kahayag ni Kristo, mao ang usahay gitawag og ang atong konsensya. Ang pamahayag ni Presidente Gordon B. Hinckley diha sa “Dugang nga mga Kapanguhaan” ug sa video nga “Patterns of Light: Discerning Light” (ChurchofJesusChrist.org) mahimo usab nga makatabang.

Moroni 7:21–48

Ang mga sumusunod ni Jesukristo nangita og hugot nga pagtuo, paglaum, ug gugma nga putli.

• Aron matabangan ang imong klase nga mas masabtan ang mga koneksyon tali sa hugot nga pagtuo, paglaum, ug gugma nga putli, mahimong magpakita ka og bangko nga may tulo ka tiil (o hulagway sa usa) ug pangutan-a ang mga sakop sa klase sa pagkonsiderar kon giunsa nga ang hugot nga pagtuo, paglaum, ug gugma nga putli susama niining tulo ka tiil (tan-awa ang pamahayag ni Presidente Dieter F. Uchtdorf diha sa “Dugang nga mga Kapanguhaan”). Mahimo dayon nimo silang dapiton sa pagpili og usa niini nga mga hiyas ug mangita kon unsa ang gitudlo ni Mormon kabahin niini diha sa Moroni 7:21–48. Hisguti ang mga pangutana sama sa mosunod: Nganong kinahanglan nato ang hugot nga pagtuo ug paglaum aron madawat ang gasa sa gugma nga putli? Sa unsang paagi nga ang matag usa niini nga mga hiyas mokonektar kanato ngadto kang Jesukristo? Ngano nga kini nga mga hiyas kinahanglan alang sa usa ka disipulo ni Jesukristo? Unsa ang mahitabo kanato kon mawad-an kita og pagtuo? paglaum? gugma nga putli? Dapita ang mga sakop sa klase sa paggahin og pipila ka gutlo aron sa pagsulat sa ilang mga impresyon.

Moroni 8:4–21

Ang pagsabut sa husto nga doktrina makatabang kanato sa paghimo og husto nga mga pagpili.

• Ang imong klase dili kinahanglan nga maghisgut nganong sayop ang pagbunyag sa mga gagmayng bata, apan ang mga pulong ni Mormon kabahin niini nga hilisgutan mahimong makatabang nila nga makita ang mga peligro sa sayop nga doktrina sa kinatibuk-an. Aron sa paghulagway kon sa unsang paagi nga ang Basahon ni Mormon “[mi]supak sa sayop nga mga doktrina” (2 Nephi 3:12), mahimo nimong dapiton ang mga sakop sa klase sa pagbasa sa Moroni 8:4–21 sa mga grupo o tinagsa-tagsa. Katunga nila mahimong mangita sa doktrina nga gibati ni Mormon nga wala masabti sa katawhan, lakip na ang Pag-ula ni Jesukristo (tan-awa sa bersikulo 20) ug pagka may tulubagon (tan-awa sa bersikulo 10). Ang laing katunga mahimong mangita alang sa mga sangputanan sa sayop sa katawhan. Ang matag grupo mahimo nga mopaambit ngadto sa klase kon unsa ang ilang nakit-an. Unsa ang gitudlo niini nga mga bersikulo kabahin sa kaimportante sa pagkat-on ug pagsunod sa husto nga doktrina? Asa man nato makita ang husto nga mga pagpasabut sa doktrina ni Kristo? Unsaon nato sa pagsiguro nga husto ang atong pagsabut sa doktrina?

• Mahimo nga ang imong klase makabenepisyo gikan sa pagsunod sa ehemplo ni Mormon sa pagtabang sa usa ka tawo nga makahimo og mas maayo nga mga pagpili pinaagi sa pagtudlo nila og husto nga doktrina. Mahimo nimo kining buhaton pinaagi sa pagdapit sa mga sakop sa klase sa paghunahuna og usa ka tawo gikan sa mga kasulatan kinsa mihimo og sayop nga pagpili. Unsa nga doktrinal nga kamatuoran ang makatabang niana nga tawo nga malikayan nga makahimo pag-usab nianang sayop nga pagpili? Hatagi ang mga sakop sa klase og pipila ka minuto aron mangita og mga kasulatan o mga pamahayag gikan sa bag-ohay lang nga kinatibuk-ang komperensya nga makatabang sa tawo nga masabtan ang doktrinal nga kamatuoran. Mahimo dayon nimong hangyoon ang mga sakop sa klase sa pagpakigbahin kon unsa ang ilang nakita.

Moroni 9:25–26

Makakita kita og paglaum diha kang Kristo bisan unsa pa ang atong mga kahimtang.

• Ang katapusang narekord nga mensahe ni Mormon ngadto sa iyang anak diha sa Moroni 9:25–26 makatabang sa mga sakop sa klase nga makakita og paglaum diha ni Kristo, bisan pa sa daw walay paglaum nga mga sitwasyon. Siguro mahimo kang magsugod pinaagi sa paghangyo sa mga sakop sa klase sa pagpaambit sa mga rason nga si Moroni mahimong mibati og kawalay kadasig. Dayon mahimo nilang basahon kini nga mga bersikulo ug ilista sa pisara ang mga kamatuoran nga si Mormon midasig nga maoy tutokan ni Moroni. Unsaon kaha niining sama nga kamatuoran sa “[pag]bayaw [kanato]” sa atong panahon? Ang mga sakop sa klase mahimong magpaambit sa mga sanglitanan sa “kalooy ug pagkamainantuson” sa Dios nga ilang nasaksihan. O mahimo silang magpaambit og mga ideya nga makatabang sa matag usa nga mohinumdom sa Manluluwas ug sa Iyang ebanghelyo “diha sa [atong] salabutan sa kahangturan,” bisan kon kita nag-atubang og kawalay kadasig (bersikulo 25).

pagkat-on nga icon

Awhaga ang Pagkat-on diha sa Panimalay

Aron sa pagdasig sa mga sakop sa klase sa pagbasa sa Moroni 10, mahimong mosugyot ka nga siguro kini ang maayo nga panahon sa pagpamalandong kon giunsa nila sa pagsinati og nabag-o nga pagsaksi sa katinuod sa Basahon ni Mormon samtang sila nagtuon niini karong tuiga.

mga kapanguhaan nga icon

Dugang nga mga Kapanguhaan

Nagagikan ba kini sa Espiritu?

Aron sa pagtubag sa pangutana nga “Unsaon nato sa pag-ila sa mga pag-awhag sa Espiritu?” Si Presidente Gordon B. Hinckley mikutlo sa Moroni 7:13 ug miingon: “Dili ko motuo nga [kini] lisud kaayo, tinuod. … Nag-aghat ba kini sa usa ka tawo sa paghimo og maayo, sa pagbangon, sa pagbarug og taas, sa paghimo sa sakto nga butang, mahimong mabination, mahimong manggihatagon? Nan kana mao ang Espiritu sa Dios” (Teachings of Gordon B. Hinckley [1997], 260–61).

Hugot nga pagtuo, paglaum, ug gugma nga putli.

Si Presidente Dieter F. Uchtdorf mikomparar sa hugot nga pagtuo, paglaum, ug gugma nga putli sa bangko nga dunay tulo ka tiil, mipasabut nga kining tulo ka mga hiyas “makapalig-on sa atong mga kinabuhi bisan unsa pa kalisud ug kalibaong sa dalan nga atong maagian. …

“Ang hugot nga pagtuo, ang paglaum, ug ang gugmang putli magkauban sa usag usa, ug samtang ang usa naglambo, ang uban usab molambo. Ang paglaum moabut tungod sa hugot nga pagtuo, kay kon walay hugot nga pagtuo, walay paglaum. Sa samang paagi ang hugot nga pagtuo moabut tungod sa paglaum, tungod kay ang hugot nga pagtuo ‘ebidensya sa mga butang nga gilauman.’

“Ang paglaum kahugpong sa hugot nga pagtuo ug gugmang putli. Kon ang pagka masinupakon, kahigawad, ug paglangay-langay moguba sa atong hugot nga pagtuo, anaa ang paglaum nga motabang sa atong hugot nga pagtuo. Kon ang kapakyasan ug kawalay pailub mohagit sa gugmang putli, ang paglaum mopalig-on sa atong tinguha ug mopugos kanato sa pagtabang sa atong isigkatawo nga gani walay pagpaabut og ganti. Kon unsa kahayag ang atong paglaum, ingon usab kadako ang atong hugot nga pagtuo. Kon unsa kalig-on ang atong paglaum, ingon usab ka lunsay ang atong gugmang putli” (“Ang Walay Kinutuban nga Gahum sa Paglaum,” Liahona, Nob. 2008, 21, 23).

“Ang tiunay nga gugma ni Kristo.”

Si Elder Jeffrey R. Holland misugyot og duha ka posible nga kahulugan sa mga pulong nga “ang tiunay nga gugma ni Kristo”:

“Usa … mao ang matang sa maloloy-on, mapasayloong gugma nga ang mga disipulo ni Kristo kinahanglan nga aduna sa usag usa. …

“[Lain nga kahulugan mao ang] walay kapakyasan, kinatas-an, ug maulaong gugma ni Kristo alang kanato. … Kana nga gugmang putli—iyang tiunay nga gugma alang kanato—diin kon wala kini wala usab kita” (Christ and the New Covenant: The Messianic Message of the Book of Mormon [1997], 336).

Pagpalambo sa Atong Pagtudlo

Tabangi ang mga tigkat-on nga makapalambo og espirituhanong pagpaningkamot sa kaugalingon. “Samtang magtudlo ka, imbis nga mohatag lamang og impormasyon, tabangi ang [mga sakop sa klase] sa pagdiskobre sa mga kamatuoran sa ebanghelyo sa ilang mga kaugalingon. … Kon sila adunay mga pangutana, usahay mas maayo nga tudloan sila unsaon sa pagpangita og mga tubag sa ilang mga kaugalingon” (Pagtudlo sumala sa Pamaagi sa Manluluwas, 28). Sama pananglitan, mahimo nimong tudloan ang mga miyembro ngadto sa Gospel Topics sa topics.ChurchofJesusChrist.org, diin naglangkob og mga makatabang nga impormasyon sa nagkadaiya nga mga hisgutanan.