Si Moroni nagsulat diha sa bulawan nga mga palid

Si Moroni Nagsulat diha sa Bulawan nga mga Palid, ni Dale Kilborn

Nobyembre 2–8

Mormon 7–9

“Ako Namulong nganha Kaninyo Ingon og Kamo Ania”

Iribyu ang mga impresyon nga imong girekord atol sa imong personal nga pagtuon sa Mormon 7–9 karong semanaha. Unsa nga mga tudling gikan niini nga mga kapitulo ang imong gibati nga labing makahuluganon nga iribyu kauban sa imong klase?

Irekord ang Imong mga Impresyon

pagpaambit nga icon

Dapita ang Pagpaambit

Aron matagaan ang mga sakop sa klase og kahigayunan nga mopaambit og usa ka butang gikan sa ilang personal o pamilya nga pagtuon, mahimo nimo silang awhagon sa pagbasa og daklit sa Mormon 7–9 og mopaambit og usa ka kapahayag (o bersikulo) nga sila mapasalamaton nga gipili ni Mormon o Moroni nga iapil diha sa mga palid.

pagtudlo nga icon

Itudlo ang Doktrina

Mormon 7:8–10; 8:12–22; 9:31–37

Ang Basahon ni Mormon adunay dako nga bili.

• Usa ka paagi sa pag-apil og panaghisgutan kabahin sa dakong bili sa Basahon ni Mormon mao ang pagsulti kabahin sa unsaon nato pagdeterminar ang bili sa usa ka butang. Sa unsang paagi nga ang pagkahibalo sa bili sa usa ka butang mousab sa paagi sa atong paggamit niini? Ang mga sakop sa klase mahimong mosiksik sa Mormon 8:12–22 ug ipaambit unsay gisulti ni Moroni kabahin sa bili sa Basahon ni Mormon (“kini nga rekord”). Mahimo usab silang mopaambit og personal nga mga kasinatian nga nagpakita nila sa bili sa Basahon ni Mormon. Unsaon nato pagpakita nga gitagaan nato og bili ang Basahon ni Mormon?

  mga kopya sa Basahon ni Mormon sa lain-laing pinulongan

  Ang Basahon ni Mormon mipatin-aw sa doktrina nga gitudlo diha sa Biblia.

• Aron matabangan ang mga sakop sa klase nga mailhan kon sa unsang paagi nga ang Basahon ni Mormon ug ang Biblia nagsuportahanay sa usag usa, mahimo nimo silang dapiton sa pagbasa sa Mormon 7:8–10 ug i-summarize ang paghulagway ni Mormon sa duha ka mga talaan diha sa ilang kaugalingong mga pulong (“ang talaan nga modangat ngadto sa mga Hentil gikan sa mga Judeo” nagpasabut sa Biblia). Ikonsiderar ang pagdrowing ug duha ka nagsapaw nga sirkulo diha sa pisara ug sulatan ang usa og ang Biblia ug ang lain ang Basahon ni Mormon. Ang mga sakop sa klase mahimong molista og mga pagkasusama tali sa duha ka basahon sa kasulatan diha sa nagsapaw nga seksyon ug ang mga kalainan diha sa lain nga seksyon. Isip puli, ikonsiderar ang paglista og pipila ka mga kamatuoran sa ebanghelyo diha sa pisara ug pagdapit sa mga sakop sa klase sa pagpangita diha sa Giya ngadto sa mga Kasulatan aron makakita og mga bersikulo gikan sa Basahon ni Mormon ug sa Biblia nga nakatabang nila nga masabtan ang mga kamatuoran.

Mormon 8:1–11

Mahimo kitang magmatinud-anon bisan kon kita nag-inusara.

• Ang ubang tawo sa imong klase tingali mobati nga nag-inusara sa ilang mga paningkamot sa pagsunod sa ebanghelyo. Unsa ang ilang makat-unan gikan sa ehemplo ni Moroni nga makatabang nila? Ikonsiderar ang pagdapit sa mga sakop sa kalse sa pagbasa sa Mormon 8:1–11 ug paghunahuna og mga pangutana nga gusto nila nga ipangutana ni Moroni aron makakat-on kon unsaon nga magpabiling matinud-anon bisan pa man sa iyang lisud nga mga kahimtang. Unsa ang nakapadasig nila kabahin sa iyang ehemplo? Samtang mopaambit sila sa ilang mga hunahuna, awhaga ang mga sakop sa klase sa pagpaambit og personal nga mga kasinatian sa dihang sila o ang uban nga ilang nailhan nagpabiling matinud-anon, bisan pa og mibati sila nga nag-inusara. Giunsa man pagtabang sa Ginoo kanila?

Mormon 8:26–41; 9:1–30

Ang Basahon ni Mormon gisulat alang sa atong panahon.

• Samtang kamo nagkaduol sa katapusan sa pagtuon sa Basahon ni Mormon karong tuiga, tingali ang mga sakop sa klase makahinuktok ngano nga ilang gibati nga kini nga basahon gisulat alang sa atong panahon. Mahimo nimong sugdan ang panaghisgutan pinaagi sa pagbasa sa pamahayag ni Presidente Ezra Taft Benson diha sa “Dugang nga mga Kapanguhaan.” Ang mga sakop sa klase mahimo dayon nga mogamit sa mga pangutana ni Presidente Benson ngadto sa Mormon 8:26–41. Ngano nga ang Ginoo midasig ni Moroni sa pag-apil niini nga mga pulong diha sa mga talaan? Giunsa niini sa pagtabang nato sa atong panahon?

• Sama sa gitudlo sa latid karong semanaha diha sa Dali, Sunod Kanako—Alang sa mga Indibidwal ug mga Pamilya, ang Mormon 9:1–30 naglangkob sa mensahe ni Moroni agi og tubag sa kakulang sa pagtuo diha ni Jesukristo sa atong panahon. Tingali imong bahinon ang klase ngadto sa tulo ka grupo ug dapita ang matag grupo sa pagpangita og tambag nga labing makatabang nila diha sa mosunod nga mga bersikulo: 1–6 (ang mga sangputanan sa dili pagtuo diha ni Jesukristo), 7–20 (ang kamahinungdanon sa pagtuo diha sa usa ka Dios sa pagpadayag ug mga milagro), ug 21–30 (ang tambag ni Moroni kanato).

• Bisan kon ang Mormon 9:1–6 gisulat alang “niadto kinsa wala motuo kang Kristo,” kini makatabang kaayo alang kanatong tanan sa paghanduraw nga mobarug sa atubangan sa Dios sa umaabut nga adlaw aron pagahukman. Hangyoa ang mga sakop sa klase sa pagribyu niini nga mga bersikulo, nga mangita sa mga pulong nga naghulagway unsa ang bation sa mga dautan nianang adlawa. Unsa man ang atong mabuhat aron malikayan kini nga mga pagbati? Ang mga sakop sa klase mahimong makakita og makatabang kaayo nga mga panabut diha sa sugilanon nga giistorya ni Presidente Boyd K. Packer diha sa “Dugang nga mga Kapanguhaan.”

• Daghang mga tawo karon ang nagtuo nga mihunong na ang mga milagro. Unsaon nimo sa paggamit sa mga pagtulun-an ni Moroni aron sa pagtabang sa imong mga sakop sa klase nga motuo diha sa usa ka “Dios sa mga milagro”? Mahimo ka nga magsugod pinaagi sa paghangyo sa mga sakop sa klase sa pagribyu sa Mormon 9:7–26 sa pagpangita sa mga milagro nga si Moroni miawhag nga atong tuohan. Unsa ang atong makat-unan gikan niini nga mga bersikulo kabahin sa Dios ug sa Iyang gimbuhaton diha sa atong panahon? Unsa ang kinahanglan natong buhaton aron ang Dios mohimo og mga milagro? (tan-awa sa Mormon 9:20–21). Unsa nga mga milagro ang atong nakita?

pagkat-on nga icon

Awhaga ang Pagkat-on diha sa Panimalay

Ang mga sakop ba sa imong klase nakahunahuna kon unsaon nila sa pagpalambo sa ilang pagtuo diha sa Langitnong Amahan ug ni Jesukristo? Kon mao, dapita sila sa pagsiksik sa Ether 1–5 alang sa mga paagi aron matabangan nga molambo ang ilang pagtuo.

mga kapanguhaan nga icon

Dugang nga mga Kapanguhaan

Ang Basahon ni Mormon gisulat alang sa atong panahon.

Si Presidente Ezra Taft Benson miingon:

“Ang mga Nephite wala gyud niini nga basahon; ni ang mga Lamanite sa karaang panahon. Kini gitagana alang kanato. …

“Ang matag usa sa mga nag-unang tigsulat sa Basahon ni Mormon mipamatuod nga siya nagsulat alang sa umaabut nga mga henerasyon [tan-awa sa 2 Nephi 25:21; Jacob 1:3; Mormon 7:1; 8:34–35]. …

“Kon sila nakakita sa atong panahon, ug mipili niadtong mga butang nga bililhon kaayo alang kanato, dili ba angayan lang nga ingon niana ang atong pagtuon sa Basahon ni Mormon? Kinahanglan nga kanunay natong pangutan-on ang atong kaugalingon, ‘Nganong gidasig man sa Ginoo si Mormon (o si Moroni o si Alma) sa paglakip niana sa iyang rekord? Unsa nga leksyon ang akong makat-unan gikan niana nga makatabang kanako sa pagpuyo niining panahona?’(“The Book of Mormon—Keystone of Our Religion,” Ensign, Nob. 1986, 6).

Makahimo kita nga walay lama.

Si Presidente Boyd K. Packer misaysay kabahin sa pagbiyahe og unom ka adlaw isip usa ka batan-ong lalaki nga adunay panon sa mga sundalo diha sa init, abugon nga tren nga pangkargamento nga walay higayon sa pagkaligo o pag-ilis og sinina. Sa usa ka hununganan sa tren, ang gigutom nga panon miadto sa usa ka kan-anan.

“Daghang tawo, ug mao nga miapil mi sa taas nga linya sa mga naghulat nga makalingkod. Nag-una ko, diha sa luyo lang gyud sa pipila ka mga babaye nga maayo og panamit. Bisan dili pa molingi, ang babaye nga maayo og panamit sa akong atubangan sa wala madugay nakabantay nga naa mi didto.

“Milingi siya ug mitan-aw kanamo. Unya mitan-aw siya nako gikan sa ulo hangtud sa tiil. Anaa nagbarug ko nga nagkadusingot, bulingit, nagkaabu, gum-os ang uniporme. Misulti siya sa tuno nga gihugawan, ‘Pastilan, pagkabulingit nga mga tawo!’ Ang tanan nanan-aw namo.

“Walay duda nanghinaut siya nga unta wala mi didto; parehas mi og panghinaut. Akong gibati ang kabulingit, ang pagkadili komportable, ug naulaw.”

Si Presidente Packer mikutlo dayon sa Mormon 9:4 ug gikumparar ang iyang kasinatian ngadto sa pagkahimong hugaw sa espirituhanong paagi diha sa presensya sa Dios. Nagpamatuod nga ang Pag-ula ni Jesukristo mao lang ang bugtong paagi nga siya mahimong limpyo sa espirituhanong paagi, miingon dayon siya:

“Nakahunahuna ba mo kon unsa ang akong gibati dihang sa katapusan akong makita nga kon akong sundon ang bisan unsang kondisyon nga gihatag sa Manunubos, dili na ko kinahanglan nga moantus sa kasakit sa pagkahimong dili limpyo sa espirituhanong paagi? Hunahunaa ang makapahupay, makapagawasnon, makabayaw nga pagbati nga moabut nimo kon imong makita ang katinuod sa Pag-ula ug ang praktikal nga bili niini diha kaninyo isip indibidwal” (“Washed Clean,” Ensign, Mayo 1997, 9–10).

Pagpalambo sa Atong Pagtudlo

Pag-ampo alang sa mga sakop sa imong klase. Aduna bay usa ka tawo diha sa imong klase nga nakigbisog? Sama nga ang Manluluwas nag-ampo alang kang Pedro (tan-awa sa Lucas 22:31–32), mahimo kang mag-ampo alang niadtong kinsa imong gitudloan aron mapalig-on (tan-awa sa Pagtudlo sumala sa Pamaagi sa Manluluwas, 6).