Mga kasko sa mga Jaredite diha sa dagat

Ako Modala Kaninyo Pag-usab gikan sa Kinahiladman, ni Jonathan Arthur Clarke

Nobyembre 16–22

Ether 6–11

“Nga ang Dautan Mahunong”

Hinumdumi nga ang mga rekord nga anaa sa Basahon ni Mormon gisulat alang sa atong panahon. Samtang ikaw mag-andam sa pagtudlo, pangitaa diha niini nga mga asoy sa kasulatan alang sa mga baruganan nga mahimong makapalig-on sa mga sakop sa klase aron sa pag-atubang sa mga hagit sa ilang mga kinabuhi.

Irekord ang Imong mga Impresyon

pagpaambit nga icon

Dapita ang Pagpaambit

Aron matabangan ang mga sakop sa klase nga makapaambit og usa ka butang nga ilang nakita nga makahuluganon diha sa Ether 6–11, mahimo nimo silang dapiton sa paghunahuna nga kini nga mga kapitulo himoon nga pelikula, unsa nga mga pulong gikan sa Ether 6–11 ang ilang isugyot isip ulohan? Hatagi sila og panahon sa paghinuktok kabahin niini, ug dapita sila sa pagpaambit sa ilang mga ulohan ug ipasabut ngano nga ila kining gipili.

pagtudlo nga icon

Itudlo ang Doktrina

Ether 6:1–12

Ang Ginoo mogiya kanato latas sa atong mortal nga panaw.

• Ang latid karong semanaha diha sa Dali, Sunod Kanako—Alang sa mga Indibidwal ug mga Pamilya nagsugyot sa pagtandi sa biyahe sa mga Jaredite labang sa dagat ngadto sa atong panaw latas sa mortalidad. Hangyoa ang mga sakop sa klase kinsa nakasulay niini nga kalihokan sa balay sa pagpaambit og mga panabut nga ilang naangkon gikan niini nga pagtandi. Aron sa pagtabang sa mga sakop sa klase nga maghimo og dugang nga mga panagtandi diha sa klase, dapita sila sa pagtan-aw diha sa Ether 6:1–12 alang sa mga detalye kabahin sa biyahe nga mahimong adunay simbolikanhong kahulugan (sama sa nagsidlak nga mga bato, mga kasko ug ang mga hangin) ug ilista kini diha sa pisara. Dayon ang mga sakop sa klase mahimong mogahin og pipila ka minuto nga mobuhat nga magpares o sa gagmay nga mga grupo aron sa pagtuon sa mga bersikulo ug hisgutan unsa kaha ang girepresentaran niini nga mga simbolo sa atong mga kinabuhi. Pananglitan, unsa ang atong “gisaad nga yuta”? (bersikulo 8). Giunsa kita paggiya sa Dios diha sa atong panaw?

• Mahimo nimong gamiton ang Ether 6:1–12 aron sa pagdasig og panaghisgutan kabahin sa unsang paagi nga ang pagdangop ngadto sa Dios makatabang nato nga molambo isip resulta sa atong mga pagsulay. Pananglitan, ang kinutlo diha sa “Dugang nga mga Kapanguhaan” mahimong makatabang sa mga sakop sa klase nga matandi ang “mapintas nga hangin” nga gihisgutan diha sa mga bersikulo 5–8 ngadto sa mga kalisud sa kinabuhi. Unsa ang gibuhat sa mga Jaredite sa dihang sila “giliyokan sa daghan nga mga tubig”? (bersikulo 7). Ang mga sakop sa klase mahimong mopaambit og mga kasinatian sa dihang ang ilang mga kalisud nakatabang nila nga molambo. Giunsa sila pagtabang sa paagi nga ilang giatubang ang ilang mga pagsulay aron mouswag padulong sa ilang “gisaad nga yuta”? Giunsa man pagtabang sa Ginoo kanila sa ilang mga pakigbisog? Awhaga sila sa pagpakisayud ngadto sa mga pulong gikan sa Ether 6 samtang sila mopaambit sa ilang mga kasinatian ug mga hunahuna.

  Ang mga Jaredite nagbiyahe nga may kauban nga mga hayop

  Panaw sa mga Jaredite tabok sa Asya, ni Minerva Teichert

Ether 6:7–18, 30; 9:28–35; 10:1–2

Ang Ginoo mopanalangin kanato kon kita mapainubsanon.

• Bisan kon daghan sa mga sugilanon sa mga Jaredite ang naghulagway sa negatibo nga mga sangputanan sa garbo ug kadautan, naglakip usab kini sa mga higayon sa pagkamapainubsanon ug kabulahanan nga pwede natong makuhaan og pagtulun-an. Aron matabangan ang mga sakop sa klase nga makat-on gikan niini nga mga positibong ehemplo, mahimo nimo nga bahinon ang klase ngadto sa duha ka grupo ug pabasaha ang usa ka grupo sa Ether 6:7–18 ug 30 samtang ang laing grupo mobasa sa Ether 9:28–35 ug 10:1–2. Hangyoa sila sa pagpangita diha niini nga mga bersikulo alang sa ebidensya nga ang mga Jaredite mipaubos sa ilang mga kaugalingon—o nagmapainubsanon tungod sa ilang mga kahimtang—ug giunsa sila pagpanalangin sa Ginoo isip resulta. Kon ang mga sakop sa klase aduna nay igong higayon, dapita ang mga sakop gikan sa matag grupo sa pagpaambit unsa ang ilang nakat-unan. Sa unsang paagi nga ang pagkahimong mapainubsanon makatabang nga mas mapaduol kita sa Dios? Ang pagkanta o pagpaminaw sa usa ka himno kabahin sa pagkamapainubsanon, sama sa “I Need Thee Every Hour [Nagkinahanglan Ko Nimo sa Matag Takna]” (Hymns [Mga Himno], nu. 98), makadugang niini nga kalihokan.

Ether 7–11

Ang matarung nga mga lider motultol sa katawhan ngadto sa Dios.

• Bisan kadtong wala pa kahupot og pormal nga posisyon sa pagpangulo mahimong makakat-on gikan sa mga ehemplo sa matarung ug dautan nga Jaredite nga mga hari; kini nga mga asoy makatabang nato nga mahimong mas maayo nga mga lider diha sa atong mga balay, diha sa atong mga komunidad, ug diha sa simbahan. Tingali mahimo ka nga mosugod og usa ka panaghisgutan niini nga hilisgutan pinaagi sa paghangyo sa mga sakop sa klase sa paghunahuna kabahin sa usa ka tawo nga ilang gikonsiderar nga maayo nga lider. Dapita sila sa pagpaambit sa makadiyot og pipila sa mga hiyas niana nga tawo, ug paghimo og lista diha sa pisara. Dayon mahimo ka nga mosangon sa matag sakop sa klase sa pagkat-on kabahin sa usa sa Jaredite nga mga hari diha sa Ether 7–11. (Usa ka lista sa mga hari, uban ang mga pakisayran sa kasulatan nga naghulagway sa ilang paghari, ang makita diha sa latid karong semanaha sa Dali, Duol Kanako—Alang sa mga Indibidwal ug mga Pamilya.) Ang mga sakop sa klase mahimong mopaambit kon unsa ang ilang nakat-unan gikan niini nga mga hari kabahin sa pagpangulo, modugang sa uban pa nga mga hiyas nga ilang nakita sa lista diha sa pisara. Ang ubang positibo nga mga hiyas sa pagpangulo nakalista diha sa “Dugang nga mga Kapanguhaan.” Unsaon nato sa pagpalambo niini nga mga hiyas ug mahimong mga lider, bisan kon wala kitay piho nga gimbuhaton sa pagpangulo?

pagkat-on nga icon

Awhaga ang Pagkat-on diha sa Panimalay

Aron sa pagpukaw sa interes sa mga sakop sa klase sa pagbasa sa Ether 12–15, tingali imong isulti nga diha niini nga mga kapitulo si Moroni mipadayag ngadto sa Ginoo sa iyang mga pagduha-duha kabahin sa mga rekord nga iyang gihimo. Ang tubag sa Ginoo makatabang nato kon kita adunay susama nga mga pagbati sa pagka dili angayan.

mga kapanguhaan nga icon

Dugang nga mga Kapanguhaan

Ang atong mga pagsulay makaandam nato sa pagdawat sa kinabuhi nga dayon.

Namulong diha sa usa ka kinatibuk-ang komperensya atol sa lisud nga mga tuig sa Ikaduhang Gubat sa Kalibutan, si Elder Charles A. Callis sa Korum sa Napulog Duha ka mga Apostoles miingon: “Kita gisultihan nga sa dihang ang mga Jaredite nga diha sa ilang mga kasko mibiyahe padulong niini nga gisaad nga yuta, mapintas ug makalilisang nga mga unos ang mipatigbabaw. Ang mga hangin mihuyop ug sila anaa sa nagsingabut nga kakuyaw samtang anaa niana nga peligroso nga panaw. Gitabangan sila sa Dios. Ug atong mabasa nga bisan og kini nga kusog nga mga hangin ug mga unos nagpadayon, nakamugna og kadaot nila, nga ang hangin nagpadayon sa paghuyop paingon sa Gisaad nga Yuta. Ug kini nga mga kalisdanan diin ato karon nga nasinati, kini nga grabe nga mga gubat ug tanan nga makalilisang nga mga butang nga mipatigbabaw, anaa sa gahum sa Dios. Mapahunong Niya kini kon Iyang pilion, kon ang Iyang balaanong mga katuyoan matuman na. Apan kinahanglan dili nato makalimtan nga pinaagi niini nga dagat sa kagubot, ang atong mga kalisdanan, ang mga kasinatian nga diin atong naagian ug diin himoon sa Ginoo nga molihok alang sa atong kaayuhan, kon kita motuman Kaniya—tanan kini mohuyop kanato padulong sa usa ka dapit nga luwas sa mga unos, ngadto sa usa ka mahimayaon nga kaugmaon, ngadto sa kinabuhing dayon” (sa Conference Report, Abr. 1943, 62).

Mga hiyas sa matarung nga mga lider.

“Sa gingharian sa Dios, ang kahalangdon ug pagpangulo nagpasabut sa pagtan-aw sa uban kon unsa gayud sila—sama sa pagtan-aw sa Dios kanila—ug dayon sa pagpaduol ug pagpangalagad kanila. Nagpasabut kini nga maglipay uban sa nagmalipayon, mohilak uban sa nagbangutan, mobayaw sa nag-antus, ug mohigugma sa atong silingan sama sa paghigugma ni Kristo kanato. …

“… Ang pagpangulo diha sa Simbahan dili kaayo kabahin sa paggiya sa uban kay sa atong kaandam nga giyahan sa Dios” (Dieter F. Uchtdorf, “Ang Labing Dako Kaninyo,” Liahona, Mayo 2017, 79–80).

“Ang mga maayo lamang ang adunay kapasidad sa pagtabang ug pag-awhag sa uban para sa mas dakong pagserbisyo, sa mas dakong kalampusan, sa mas dakong kalig-on” (Mga Pagtulun-an sa mga Presidente sa Simbahan: Ezra Taft Benson [2014], 294).

“Ang kalibutan nagtudlo nga ang mga lider kinahanglan gayud nga banggiitan; ang Ginoo nagtudlo nga kinahanglan gayud nga sila malumo. Ang kalibutanong mga lider makabaton og gahum ug impluwensya pinaagi sa ilang talento, kahanas, ug katigayunan. Ang Kristohanong mga lider makabaton og gahum ug impluwensya ‘gawas lamang sa pagdani, sa pagkamainantuson, sa kalumo ug kaaghup, ug sa tiunay nga paghigugma’ [D&P 121:41]” (Stephen W. Owen, “Ang Labing Bantugan nga mga Lider Mao ang Labing Bantugan nga mga Sumusunod,” Liahona, Mayo 2016, 75).

Pagpalambo sa Atong Pagtudlo

Awhaga ang pag-establisar og matinahurong palibut. Mibati ka ba nga tanan diha sa klase komportable sa pagpadayag sa ilang mga hunahuna ug mga gibati? “Tabangi ang imong mga sakop sa klase nga makasabut nga ang matag usa kanila makaapekto kon unsay bation sa klase. Awhaga sila nga motabang kanimo sa pag-establisar og usa ka bukas, mahigugmaon, ug matinahurong palibut aron ang tanan mobati nga luwas sa pagpaambit sa ilang mga kasinatian, mga pangutana, ug mga pagpamatuod” (Pagtudlo sumala sa Pamaagi sa Manluluwas, 15).