Mga Jaredite nga nagbiyahe latas sa kamingawan

Ang mga Jaredite Mibiya sa Babel, ni Albin Veselka

Nobyembre 9–15

Ether 1–5

“Mogisi Niana nga Tabil sa Pagkawalay Pagtuo”

Unsa nga mga kamatuoran ang imong nakat-unan atol sa imong personal nga pagtuon sa Ether 1–5 nga mahimo nimong mapakigbahin niadtong imong mga gitudloan? Unsa nga mga kahigayunan ang imong mahatag nila aron mopakigbahin sa unsay ilang nakat-unan?

Irekord ang Imong mga Impresyon

pagpaambit nga icon

Dapita ang Pagpaambit

Ikonsiderar kining mamugnaon nga paagi sa pagdapit og pagpakig-ambit: Ipasa ang mga bato ngadto sa 16 ka mga sakop sa klase, ug dapita ang pipila kanila sa pagpakigbahin og usa ka kamatuoran nga ilang nahinumduman gikan sa ilang personal o pamilya nga pagtuon sa Ether 1–5. Unsa man ang ilang buhaton tungod sa unsay ilang nakat-unan?

pagtudlo nga icon

Itudlo ang Doktrina

Ether 1–3; 4:8–19

Samtang kita padayon nga mangamuyo ngadto sa Ginoo, Iyang ipadayag ang Iyang kabubut-on.

• Kada usa kanato nakigbisog sa pagpangita og tubag sa usa ka problema o pangutana. Sa unsang paagi nga ang mga kasinatian sa igsoong lalaki ni Jared makatabang niadtong imong mga gitudloan nga makat-on unsaon sa pagpangayo og tabang gikan sa Ginoo? Tingali makadrowing ka og talaan diha sa pisara nga adunay mga kolum nga gisulatan og Ang pangutana sa igsoong lalaki ni Jared, Ang gibuhat sa igsoong lalaki ni Jared, ug Ang tubag sa Ginoo. Dayon mahimo nimong bahinon ang klase ngadto sa tulo ka grupo ug hatagi og usa ka kolum ang matag grupo. Ang matag grupo mahimong magtinabangay sa daklit nga pagpakli sa Ether 1:33–43 ug 2:16–3:6 ug isulat unsa ang ilang nakit-an diha sa gihatag nila nga kolum. Pagka human niana ang klase mahimong maghisgut og mga pangutana nga sama niini: Unsay atong nakat-unan kabahin sa nagkadaiyang paagi nga ang Ginoo mopili sa pagtabang kanato? Unsa ang atong nakat-unan kabahin sa atong tahas diha sa proseso sa pagdawat og pagpadayag? Tingali ang mga sakop sa klase mahimong mopaambit og ubang mga ehemplo gikan sa mga kasulatan nga nagtudlo og susama nga mga baruganan. Ang pamahayag gikan ni Elder Richard G. Scott diha sa “Dugang nga mga Kapanguhaan” maghatag og dugang nga mga panabut kabahin kon giunsa sa Ginoo pagtubag ang mga pag-ampo.

• Ang pag-ampo sa igsoong lalaki ni Jared diha sa Ether 3:1–5 mahimong makadasig sa mga sakop sa klase sa pagsusi sa ilang personal nga mga pag-ampo. Tingali ang mga sakop sa klase mahimong maghanduraw nga sila naghatag og tambag sa usa ka tawo nga mao pay pagkat-on unsaon sa pag-ampo. Unsa nga tambag ang ilang ihatag? Dayon mahimo silang mosiksik sa Ether 3:1–5 ug i-summarize ang matag bersikulo pinaagi sa usa o duha ka kasayuran o mga baruganan kabahin kon unsaon ang epektibo nga pag-ampo. Ikonsiderar ang paghatag sa mga sakop sa klase og pipila ka minuto sa paghunahuna kabahin sa ilang kaugalingon nga mga pag-ampo ug unsaon nila sa pagsunod ang ehemplo sa igsoong lalaki ni Jared aron sa paghimo sa ilang mga pag-ampo nga mas makahuluganon.

• Human mapakigbahin ang mapadayagon nga kasinatian sa igsoong lalaki ni Jared diha sa Ether 3, si Moroni mihatag og tambag diha sa Ether 4 kabahin sa unsaon nato pagkadawat og pagpadayag gikan sa Ginoo. Aron matabangan ang mga sakop sa klase nga makakat-on gikan niini nga tambag, mahimo ka nga magpakita og hulagway ni Jesukristo ug dapita ang mga sakop sa klase sa pagsiksik sa Ether 4:8–10 alang sa mga butang nga mahimong makapugong nato gikan sa pagdawat og pagpadayag o kamatuoran gikan sa Ginoo. Samtang ang mga sakop sa klase mopakigbahin unsa ang ilang nakit-an, pwede nimong hinay-hinayon sa pagtabon ang hulagway ni Jesukristo og usa ka panapton o piraso sa papel. Unsaon nato sa paglikay niini nga mga espirituhanong babag diha sa atong mga kinabuhi? Sunod, ang mga sakop sa klase mahimong mosiksik sa Ether 4:7, 11–15, mangita kon unsaon nato nga maangayan sa pagdawat og kamatuoran gikan sa Ginoo. Samtang ang mga sakop sa klase mopakigbahin unsa ang ilang nakit-an, tangtanga ang panapton o piraso sa papel. Unsa ang buot ipasabut sa “maghupot sa hugot nga pagtuo diha … sa Ginoo, gani ingon sa gihimo sa igsoon nga lalaki ni Jared”? (Ether 4:7; tan-awa usab sa Ether 3:1–9). Unsa ang buot ipasabut sa “mogisi [sa] tabil sa pagkawalay pagtuo” diha sa atong mga kinabuhi? (Ether 4:15). Sa unsang paagi nga makatabang kita sa uban sa paghimo sa sama niini? Ang mga sakop sa klase mahimo usab nga mangita sa mga kamatuoran kabahin sa personal nga pagpadayag diha sa mensahe ni Presidente Russell M. Nelson sa “Pagpadayag alang sa Simbahan, Pagpadayag alang sa atong mga Kinabuhi” ( Liahona, Mayo 2018, 93–96).

Ether 2:14–15

Pinaagi sa Iyang pagpanton, ang Ginoo midapit kanato sa paghinulsol ug pagduol ngadto Kaniya.

• Bisan ang usa ka bantugan nga propeta nga sama sa igsoong lalaki ni Jared nakadawat og pagpanton gikan sa Ginoo. Gani, usa ka bahin sa nakapahimo niya nga bantugan mao ang paagi nga siya midawat sa pagpanton. Aron matabangan ang mga sakop sa klase nga makakat-on gikan sa ehemplo sa igsoong lalaki ni Jared, mahimo nimo silang dapiton sa pagbasa og dungan sa Ether 2:14–15 nga magpares. Dayon hangyoa sila sa pagpakaaron-ingnon nga usa nila mao ang igsoong lalaki ni Jared ug ang lain mao ang usa ka tawo nga bag-o lang nakadawat og pagpanton gikan sa usa ka lider sa Simbahan o ginikanan. Pahisguti nila o i-aksyon kon unsa kaha ang isulti sa igsoong lalaki ni Jared kabahin sa iyang kaugalingon nga kasinatian aron matabangan kining tawhana. Unsa kaha nga tambag ang iyang ihatag? Unsa nga mga leksyon ang atong makat-unan nga motabang nato nga mas mapaduol ngadto sa Langitnong Amahan? Mahimo usab ninyong hisgutan kon sa unsang paagi nga ang pagpanton sa Ginoo ug ang pagdawat sa igsoong lalaki ni Jared tingali nakatabang aron maandam siya alang sa iyang kasinatian diha sa Ether 3:1–20. Ania pay uban nga mga kapanguhaan nga makatabang: ang mensahe ni Elder D. Todd Christofferson nga “Ako Nagabadlong ug Nagapanton sa Akong Gihigugma” ( Liahona, Mayo 2011, 97–100) o ang seksyon nga giulohan og “Disiplina” diha sa mensahe ni Elder Lynn G. Robbins nga “Ang Matarung nga Maghuhukom” ( Liahona, Nob. 2016, 96–97).

Ether 5

Tulo ka saksi mipamatuod sa kamatuoran sa Basahon ni Mormon.

• Ang pagkat-on og dugang sa panagna ni Moroni kabahin sa Tulo ka Saksi mahimong makatabang nga mapalig-on ang mga pagpamatuod sa mga sakop sa klase sa Basahon ni Mormon. Tingali katunga sa klase ang mobasa sa Ether 5 ug ang laing katunga mobasa sa “Ang Pagpamatuod sa Tulo ka mga Saksi” (sa sinugdanan sa Basahon ni Mormon) ug mopakigbahin sa usag usa unsa ang ilang gibati nga maoy katuyoan sa Ginoo sa pagtugot sa Tulo ka Saksi nga makakita og anghel ug sa mga palid. Mahimo usab silang maghisgut og uban nga mga higayon diin daghan nga mga saksi ang mipalig-on sa kamatuoran (tan-awa, pananglitan sa, Mateo 3:13–17; 18:15–16; Juan 5:31–47; D&P 128:3). Unsa nga mga saksi sa atong mga kinabuhi ang nakapadasig nato sa pagtuo? Sa unsang paagi nga “ang gahum sa Dios ug usab sa iyang pulong” “[na]pakita” nganha kanato diha sa Basahon ni Mormon? (Ether 5:4).

pagkat-on nga icon

Awhaga ang Pagkat-on diha sa Panimalay

Dapita ang mga sakop sa klase sa paghanduraw nga ang ilang mga lider sa politika nagpadayon sa pagdakop ug pagpatay sa usag usa. Diha sa Ether 6–11, ilang mabasahan kon giunsa kini pagkahitabo ngadto sa mga kaliwatan ni Jared ug sa iyang igsoong lalaki. Makakita usab sila og mga pasidaan nga makatabang nila nga malikayan ang mga problema nga giatubang sa mga Jaredite.

mga kapanguhaan nga icon

Dugang nga mga Kapanguhaan

Pag-ila og mga tubag sa pag-ampo.

Si Elder Richard G. Scott mitudlo:

“Kon kita mopasabut og usa ka problema ug ang gitanyag nga solusyon, usahay motubag Siya og oo, usahay dili. Kasagaran Iyang pugngan ang tubag, dili tungod kay kulang sa pagpakabana, apan tungod kay nahigugma Siya kanato—sa hingpit. Gusto Siya nga atong gamiton ang mga kamatuoran nga Iyang gihatag nato. Aron kita molambo, kinahanglan kitang mosalig sa atong abilidad sa paghimo og sakto nga mga desisyon. Kinahanglan natong buhaton unsay atong gibati nga sakto. Sa saktong higayon, Siya motubag. Dili Siya mopakyas kanato. …

“… Gusto siya nga molihok kita aron maangkon ang gikinahanglang kasinatian:

“Kon motubag Siya og oo, kini aron sa paghatag kanato og pagsalig.

“Kon motubag Siya og dili, kini aron mapugngan ang sayop.

“Kon Siya mopugong sa pagtubag, kini aron kita motubo pinaagi sa hugot nga pagtuo diha Kaniya, pagsunod sa Iyang mga sugo, ug kaandam sa paglihok sumala sa kamatuoran. Gipaabut nga kita modawat sa pagkamay-tulubagon pinaagi sa paglihok sa usa ka desisyon nga nagsubay sa Iyang mga pagtulun-an nga wala pay kumpirmasyon. Dili kita maglingkod lang nga maghulat o magbagulbol tungod kay ang Ginoo wala mosulti. Kita kinahanglang molihok” (“Learning to Recognize Answers to Prayer,” Ensign, Nob. 1989, 31–32).

Pagpalambo sa Atong Pagtudlo

Dangup una sa mga kasulatan. Ang mga kasulatan kinahanglan mao ang nag-unang tinubdan alang sa imong pagtuon ug pagpangandam. Ayaw kalimot nga ang mga pulong sa modernong mga propeta misuportar sa sumbanan nga mga sinulat ug mga kasulatan usab (tan-awa sa Pagtudlo sumala sa Pamaagi sa Manluluwas, 17–18).