Ang mga Nephite nakasaksi sa adlaw nga walay gabii

Usa ka Adlaw, Usa ka Gabii, ug Usa ka Adlaw, ni Jorge Cocco

Septyembre 7–13

3 Nephi 1–7

“Ihangad ang Imong Ulo ug Pagmaya”

Ang Espiritu Santo mahimong moaghat nimo sa pagtutok sa piho nga mga baruganan gikan sa 3 Nephi 1–7 diha sa klase. Tingali kadto mismo ang mga baruganan nga mopanalangin sa usa ka tawo nga nanginahanglan.

Irekord ang Imong mga Impresyon

pagpaambit nga icon

Dapita ang Pagpaambit

Aron matabangan ang mga sakop sa klase nga makapaambit unsa ang ilang nakat-unan sa balay, hangyoa sila sa pagsulat diha sa mga piraso sa papel sa pipila ka mga kamatuoran nga ilang nakit-an diha sa 3 Nephi 1–7 ug ang mga pakisayran sa kasulatan alang sa mga kamatuoran. Ibutang ang mga piraso sa papel ngadto sa usa ka sudlanan, ug paghulbot og pipila nga hisgutan isip usa ka klase. Samtang ang mga sakop sa klase magpaambit, ikonsiderar kon duna bay may kalabutan nga mga ideya niini nga latid nga makapalawom sa panaghisgutan ug makapaapil sa ubang mga sakop sa klase.

pagtudlo nga icon

Itudlo ang Doktrina

3 Nephi 1–7

Ang pagkakabig usa ka proseso nga nagkinahanglan og makugihong paningkamot.

• Ang 3 Nephi 1–7 naghulagway og katawhan kinsa nakabig ngadto ni Jesukristo ug sa Iyang ebanghelyo ug sa uban nga wala. Aron matabangan ang imong klase nga matino unsa ang nahimong kalainan tali niini nga mga grupo, pwede ka nga maghimo og tsart diha sa pisara nga aduna sa mosunod nga mga ulohan: Mga gituohan ug mga binuhatan nga makapahuyang sa pagkakabig ug Mga gituohan ug mga binuhatan nga makapalig-on sa pagkakabig. Bahina ang mosunod nga mga pakisayran sa kasulatan sa mga sakop sa klase, ug dapita sila sa pagpuno sa tsart sa unsay ilang nakit-an (mga sanglitanan nga gihatag alang sa unang pakisayran).

  • 3 Nephi 1:4–23, 29–30: Makapahuyang sa pagkakabig: wala magtuo sa mga pulong sa propeta ug magyaga-yaga sa matarung nga katawhan (mga bersikulo 5–6). Makapalig-on sa pagkakabig: adunay pagtuo sa mga pulong sa propeta ug pag-ampo alang sa tabang (mga bersikulo 8, 11).

  • 3 Nephi 2:1–3

  • 3 Nephi 3:12–16

  • 3 Nephi 4:8–10, 30–33

  • 3 Nephi 6:13–18

  • 3 Nephi 7:15–22

  Unsaon nato nga magpabiling lig-on ang atong pagkakabig bisan pa man sa mga oposisyon?

• Ang imong klase tingali interesado sa pagtuki kon unsaon sa pagpalig-on sa unsay gitawag sa 3 Nephi 1:27–30 nga “nagtubo nga kaliwatan.” Tingali imong hangyoon ang mga sakop sa klase sa pagpangita sa mga hinungdan diha niini nga mga bersikulo ngano nga ang batan-on nga mga Nephite ug mga Lamanite wala makalikay sa kadautan nga naglibut kanila. Mahimo kining mosugod og usa ka panaghisgutan kabahin sa pipila ka mga hagit nga giatubang sa nagtubo nga kaliwatan karon ug ang pinakamaayo nga mga paagi nga matabangan sila nga mopalambo og pagtuo ni Kristo. Ang ubang mga sugyot makita diha sa “Dugang nga mga Kapanguhaan.”

3 Nephi 1:4–21; 5:1–3

Ang Ginoo motuman sa tanan Niya nga mga pulong.

• Ang pagbasa sa mga saysay diha sa 3 Nephi 1:4–21 ug 5:1–3 makapalig-on sa pagtuo sa imong mga sakop sa klase diha sa mga saad sa Ginoo. Tingali ang mga sakop sa klase mahimong magdungan og basa sa 3 Nephi 1:4–7 ug ilista diha sa pisara kon unsa kaha ang ilang bation kon sila mao ang mga tumutuo nga gihulagway niini nga mga bersikulo. Mahimo usab sila nga maghunahuna og susama nga mga sitwasyon nga siguro atong giatubang karon. Unsay atong nakat-unan gikan sa 3 Nephi 1:8–21 ug 5:1–3 kabahin sa Ginoo ug sa Iyang mga saad? Aron sa pagpalambo sa panaghisgutan, mahimo nimong iribyu ang usa ka himno kabahin sa pagsalig diha sa Dios, sama sa “When Faith Endures” (Hymns [Mga Himno], nu. 128). Ang mga sakop sa klase mahimong mopaambit og mga kasinatian sa dihang ang ilang hugot nga pagtuo ug pagsalig sa Dios gigantihan, bisan pa sa mga oposisyon.

3 Nephi 1:4–15; 5:12–26; 6:10–15; 7:15–26

Kita mga disipulo ni Jesukristo.

• Si Mormon mipahayag, “Tan-awa, ako usa ka disipulo ni Jesukristo” (3 Nephi 5:13). Aron sa pagsuhid kauban sa imong klase unsa ang buot ipasabut sa pagkahimong disipulo, tingali imo silang dapiton sa pagsiksik sa 3 Nephi 1:4–15; 5:12–26; 6:10–15; ug 7:15–26, nga mangita sa mga kinaiya, mga gituohan, ug mga binuhatan sa mga disipulo ni Kristo. Ikonsiderar ang paghatag sa mga sakop sa klase og pipila ka minuto sa pagpamalandong ug pagsulat og usa ka butang nga ilang mabuhat aron mahimo nga mas maayo nga disipulo ni Jesukristo.

3 Nephi 2:11–12; 3:12–26; 5:24–26

Kon ang mga matarung magpundok, ang Ginoo mopalig-on ug mopanalipud kanila.

• Kabahin sa hinungdan ngano nga ang mga Nephite nakabuntog sa mga tulisan nga Gadianton mao nga sila nakig-alayon sa nakabig nga mga Lamanite ug misunod sa dinasig nga pasidaan ni Lachoneus nga “magpundok sa ilang mga kaugalingon” diha sa Zarahemla (3 Nephi 3:22). Unsa nga mga leksyon ang mahimong gitudlo niini sa imong mga sakop sa klase? Mahimo nimo silang hangyuon nga mopaambit og mga kasinatian sa dihang sila napalig-on tungod sa matarung nga mga tawo sa ilang palibut. Mahimo dayon nimong dapiton ang mga sakop sa klase sa pagribyu sa 3 Nephi 3:12–26, nga mangita sa mga hinungdan nga nagpundok ang mga Nephite ug ang mga panalangin nga ilang nasinati. Giunsa nato sa pagkasinati sa sama niini nga mga panalangin dihang kita nagpundok kauban sa atong mga pamilya o mga branch ug mga ward? Unsa pa ang atong makat-unan kabahin sa panagpundok gikan sa 3 Nephi 5:24–26?

• Ang pagbasa sa 3 Nephi 3 mahimong usa ka kahigayunan sa pagtabang sa mga sakop sa klase sa pagkakita kon unsa kita ka mas lig-on kon kita magkapundok diha sa katarung. Tingali makahunahuna ka og usa ka leksyon nga maggamit og butang nga magpakita kon giunsa nga ang usa ka butang nga huyang mahimong mas lig-on kon ihiusa sa ubang mga butang. Dapita ang mga sakop sa klase nga maghanduraw nga sila gihangyo sa pagkumbinser sa mga Nephite sa mga benepisyo sa panagpundok, sama sa gihulagway diha sa mga bersikulo 12–26. Tingali makabuhat sila uban sa grupo sa paghisgut unsaon kini sa paghimo, base sa unsay ilang nabasa diha niini nga mga bersikulo. Awhaga sila sa pagpaambit sa ilang mga ideya. Isip usa ka klase, mahimo dayon ninyong hisgutan ang mga pangutana nga sama niini: Unsa nga mga hagit ang atong nasinati nga siguro ikakumpara sa mga tulisan nga Gadianton? Unsaon nato sa paghimo ang atong mga panimalay ug atong mga ward nga mga dapit nga kadangpan?

3 Nephi 3:1–13

Dili kita angay nga mahadlok ni Satanas.

• Ang epistola nga gisulat ni Giddianhi, ang lider sa mga tulisan nga Gadianton, usa ka pagsulay sa paghadlok ug paglingla sa mga Nephite. Tingali ang mga sakop sa klase makaribyu sa iyang mga pulong nga makita diha sa 3 Nephi 3:2–10 ug ikumparar kini sa mga paagi nga si Satanas mosulay sa paglingla kanato karon. Unsa ang atong makat-unan gikan sa reaksyon ni Lachoneus, ang labaw nga maghuhukom sa mga Nephite?

pagkat-on nga icon

Awhaga ang Pagkat-on diha sa Panimalay

Aron sa pagdasig sa imong mga sakop sa klase sa pagbasa sa 3 Nephi 8–11 alang sa klase sunod semana, sultihi sila nga ang 3 Nephi 11 naglangkob sa “madaugon nga hitabo” sa Basahon ni Mormon—ang kinaugalingon nga pagpangalagad ni Jesukristo taliwala sa mga Nephite (tan-awa sa pasiuna sa Basahon ni Mormon).

mga kapanguhaan nga icon

Dugang nga mga Kapanguhaan

Motabang sa pagtukod og pagtuo sa nagtubo nga kaliwatan.

Si Elder Valeri V. Cordón sa Seventy misugyot og tulo ka paagi sa pagtabang sa nagtubo nga kaliwatan nga magpabiling matinuoron sa ebanghelyo:

1. “Labaw nga Makugihon ug Mabuhaton diha sa Panimalay … Ang impluwensyal nga pagtudlo importante kaayo sa pagpatunhay sa ebanghelyo sa atong panimalay, ug nagkinahanglan kini og kakugi ug paningkamot. Kadaghan na kitang gidapit nga mag-anad sa inadlaw nga pamilya ug personal nga pagtuon sa kasulatan. Kadaghanan sa mga pamilya nga naghimo niini napanalanginan kada adlaw og dugang nga pagkahiusa ug mas suod nga relasyon sa Ginoo.”

2. “Lig-ong Ehemplo sa Panimalay. … Dili igo nga basta lang makig-istorya sa atong mga anak bahin sa kaimportante sa pagminyo sa templo, pagpuasa, ug pagbalaan sa adlawng Igpapahulay. Kinahanglan nga makita nila nga apil sa atong mga iskedyul ang pag-adto kanunay sa templo kutob sa atong mahimo. Nagkinahanglan nga makita nila ang atong pasalig sa regular nga pagpuasa ug pagbalaan sa tibuok adlawng Igpapahulay.”

3. “Mga Tradisyon. … Isip mga pamilya, gikinahanglan nga likayan nato ang mga tradisyon nga magpugong kanato sa pagbalaan sa adlawng Igpapahulay o sa paghimo og inadlawng pagtuon sa kasulatan ug pag-ampo diha sa panimalay. Kinahanglan natong sirad-an ang digital nga mga pultahan sa atong panimalay gikan sa pornograpiya ug uban pang mga impluwensya nga dautan. Aron masumpo ang mga kalibutanong tradisyon sa atong panahon, kinahanglang moggamit kita sa mga kasulatan ug panudlo sa atong modernong mga propeta para matudloan ang atong mga bata mahitungod sa ilang balaanong tawag, ang ilang katuyoan niini nga kinabuhi ug ang balaanong misyon ni Jesukristo” (“Ang Pinulongan sa Ebanghelyo,” Liahona, Mayo 2017, 56–57).

Pagpalambo sa Atong Pagtudlo

Apila kadtong nanglimbasug. Usahay ang nanglimbasug nga mga sakop sa klase nagkinahanglan nga maapil aron mobati nga gihigugma. Ikonsiderar ang paghangyo nila sa pag-apil sa piho nga paagi sa usa ka umaabut nga leksyon o pagsiguro nga sila makaadto sa simbahan. Ayaw paghunong kon sa primero sila walay buhaton sa imong mga paningkamot. (Tan-awa sa Pagtudlo sumala sa Pamaagi sa Manluluwas, 8–9.)