“Septiembre 21–27. 3 Nephi 12–16: ‘Siak ti Paglintegan, ken ti Silaw,’” Umaykayo, Sumurot Kaniak—Para iti Sunday School: Libro ni Mormon 2020 (2020)
“Septiembre 21–27. 3 Nephi 12–16,” Umaykayo, Sumurot Kaniak—Para iti Sunday School: 2020
Maikatlo a Nephi: Dagitoy Sangapulo-ket-dua a Napilik, ni Gary L. Kapp
Septiembre 21–27
3 Nephi 12–16
“Siak ti Paglintegan, ken ti Silaw”
Tunggal tao iti klasem ket nalabit a makasarak iti maysa a banag a naipangpangruna a napateg kadakuada iti adu a nabibileg a pannursuro ti Mangisalakan iti 3 Nephi 12–16. Paibinglay kadagiti miembro ti klase dagiti pagbatayan a napateg kadakuada.
Isuratmo Dagiti Impresionmo
Yawis ti Panagbibinninglay
Tapno maikkan ti tunggal maysa iti gundaway a mangibinglay no ania ti naadalda iti 3 Nephi 12–16, mabalinmo nga isurat dagiti numero a 12 agingga iti 16 iti pisarra. Kalpasanna mabalin dagiti miembro ti klase a mangsukisok iti maysa a bersikulo kadagitoy a kapitulo a masarakanda a napateg ket kalpasanna isurat ti numero ti bersikulo iti baba ti batog ti numero ti kapitulo iti pisarra. Pumili iti sumagmamano a bersikulo a basaen nga aggigiddan, ken paglilinnawagan no apay a napategda.
Isuro ti Doktrina
Ipakita kadatayo dagiti pannursuro ti Mangisalakan no kasano ti agbalin a pudno a disipulo.
-
Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangisingasing iti pananggupgop kadagiti binatog iti 3 Nephi 12–14 a mangkumpleto iti “Dagiti pudno a disipulo ni Jesucristo …” Mabalinmo nga idawat no asino man kadagiti miembro ti klase ti nangaramid iti daytoy nga aktibidad ket agtallugod a mangibinglay no ania ti nasursuroda. Wenno mabalinmo nga isurat ti saan a kumpleto a ragup ti balikas iti pisarra, kasta met dagiti reperensia kas kadagitoy: 3 Nephi 12:3–16, 38–44; 13:1–8, 19–24; ken 14:21–27 (wenno dadduma pay a binatog a masarakam iti bukodmo a panagadal). Mabalin dagiti miembro ti klase ti mangpili iti maysa a binatog a basaenda, ken mangisingasing iti wagas a mangkumpleto iti ragup ti balikas iti pisarra a maibatay iti no ania ti isuro dagita a bersikulo. Allukoyem dagiti miembro ti klase a mangutob ken nalabit a mangisurat no anianto ti aramidenda a mangsurot ken ni Jesucristo a napudpudno gapu iti nasursuroda manipud kadagitoy a bersikulo.
-
Tapno matulongan a maawatan dagiti miembro ti klase dagiti balikas ti Mangisalakan iti 3 Nephi 12:48, mabalinmo nga awisen ti maysa wenno ad-adu pay kadakuada a mangadal iti mensahe ni Elder Jeffrey R. Holland “Be Ye Therefore Perfect—Eventually” (Ensign wenno Liahona, Nob. 2017, 40–42) sakbay ti klase ken mangibinglay kadagiti nalawag a pannakaammo ken pannakaawat [insights] a mangtulong kadakuada a makaawat iti daytoy a bersikulo.
Mangiturong dagiti pampanunottayo iti tignay.
-
Ti panaglilinnawag iti 3 Nephi 12:21–30 ket makatulong kadagiti miembro ti klase a mangkita no kasano a makatulong kadatayo a mangkontrol kadagiti tignaytayo ti panangkontrol kadagiti pampanunottayo. Tapno mangrugi ti panaglilinnawag, mabalinmo ti agaramid iti tsart iti pisarra nga addaan kadagiti paulo kas iti Dagiti Tignay a Kayattayo a Liklikan ken Dagiti Pampanunot wenno Emosion a Mangiturong Kadagitoy. Kalpasanna mabalinmo nga awisen dagiti miembro ti klase a mangsukisok iti 3 Nephi 12:21–22 and 27–30 ket rugian iti panangpunno iti tsart. Ania dagiti dadduma pay a tignay ken pampanunot a mabalin dagiti miembro ti klase nga inayon iti listaan? Kasano a mabalin a “saan[tayo] a palubosan ti uray ania kadagitoy a banag a sumrek iti” puspusotayo.? (3 Nephi 12:29). Kasano a maparuartayo dagitoy no sumrekda? Kalpasan ti panangbasa iti balakad ni Presidente Ezra Taft Benson iti “Dagiti Nainayon a Resources,” mabalinmo ti mangaramid iti baro a tsart nga addaan kadagiti paulo a Dagiti Tignay a Kas ken ni Cristo a Kayattayo a Mapadur-as ken Dagiti Pampanunot a Mangiturong Kadagitoy ket punnuen daytoy kas maysa a klase.
Nasken a maaramid ti panagserbi ken panagdaydayawtayo para kadagiti umno a gapu.
-
Ti panagadal iti 3 Nephi 13 ket mangidatag iti gundaway tapno amirisen dagiti miembro ti klase no apay nga agaramidda kadagiti nasayaat a trabaho. Tapno mangirugi iti panaglilinnawag, mabalin nga aggigiddan a basaenyo dagiti bersikulo 1–2 ken 16 ket ibinglaymo daytoy a kaipapanan ti managinsisingpet: “Aginkukuna; ti balikas a Griego [a nausar iti Baro a Tulag] a kayatna a sawen ti ‘agak-akem iti drama,’ wenno ‘maysa a …mangilablabes iti maysa a paset’” (Mateo 6:2, footnote a). Nalabit a paggugusto ti maysa wenno dua a miembro ti klase nga aginkukuna wenno agakto a kasla mangmangtedda kadagiti napanglaw wenno panagayuno. Apay a ti panaginkukuna wenno panagakto ket maysa a nasayaat a metapora para iti panaginsisingpet? Kasano a masiguradotayo a ti panagserbi, panagkararag, ken panagayunotayo ket napudno ken nawaya manipud iti panaginsisingpet?
-
Kalpasan ti panangilasin kadagiti nasayaat nga aramid a nadakamat iti 3 Nephi 13:1–8 ken 16–18, mabalin nga ilawlawag dagiti miembro ti klase no ania dagiti gandat a mabalin a mangiturong iti maysa a tao a mangaramid kadagitoy a banag wenno dadduma pay a banag nga idawat ti Apo nga aramidentayo. Ania koma ti isaotayo iti maysa a tao nga agsaludsod kadatayo no apay nga aramidentayo dagiti nasayaat a banag? Allukoyem dagiti miembro ti klase a mangutob kadagiti bukod a mangtignay iti panagaramid iti nasayaat a kas kadagitoy. Kasano a mapatarnawtayo dagiti gandattayo?
No agdawattayo kadagiti “nasayaat a banag” manipud iti Nailangitan nga Ama, umawattayonto.
-
Tapno maawatan ti awis ti Apo nga agdawat, agsapul, ken agtuktok, makatulong a mangsukisok no ania ti kaipapanan dagitoy a balikas. Ania ti ipakaipapanan ti tunggal balikas maipapan iti no ania ti yawis ti Apo nga aramidentayo? Kasano nga agdawat, agsapul, ken agtuktoktayo? Kasano a naipatungpalen dagiti kari iti 3 Nephi 14:7–8 iti biagtayo? Mabalin met nga irebyu dagiti miembro ti klase ti balakad ni Presidente Russell M. Nelson iti “Dagiti Nainayon a Resources,” a mangsapsapul kadagiti saludsod a damagenna ken dagiti awis nga itedna. Mangted kadagiti miembro ti klase iti gundaway nga agutob ken mangisurat kadagiti sungbat kadagiti saludsod ken dagiti plano nga agtignay kadagiti awisna.
-
Mabalin a sumagmamano kadagiti miembro ti klase ti saan a masigurado ti kayat a sawen ti Mangisalakan idi kinunana, “Siasino man nga agdawat, makaawat” (3 Nephi 14:8). Apay a kasla saan a masungbatan ti sumagmamano a kararag, ken apay a no dadduma makaawattatyo iti sungbat a ditayo tarigagayan? Ti panangrebyu iti sumagmamano kadagiti sumaganad a nasantuan a kasuratan kas maysa a klase ket makatulong a masungbatan dagitoy a saludsod: Isaias 55:8–9; Helaman 10:4–5; 3 Nephi 18:20; and Doktrina ken Katulagan 9:7–9; 88:64. Allukoyem dagiti miembro ti klase a mangibinglay no ania ti masarakanda. Kasano a maapektuan dagitoy a nalawag a pannakaammo ken pannakaawat [insights] no kasano nga agkararagtayo?
Yallukoy ti Panagsursuro iti Pagtaengan
Tapno maparegta dagiti miembro ti klase a mangbasa iti 3 Nephi 17–19 iti pagtaengan, mabalinmo nga awisen ida a mangipapan no ania ti kayarigan ti dumngeg iti panagkararag ti Mangisalakan para kadakuada ken dagiti pamiliada. Kadagitoy a kapitulo mabasadannto ti maipapan kadagiti tao nga addaan iti daytoy a sagrado a padas.
Dagiti Nainayon a Resources
Makontroltayo dagiti pampanunottayo.
Insuro ni Presidente Ezra Taft Benson:
“Nayarig ti panunot iti maysa nga entablado a pagaktuan ti maysa laeng iti oras a mabalin nga ipabuya. Manipud iti maysa a bangir ti payak ti Apo, a mangipatpateg kadakayo, ket mangpadpadas a mangikabil iti entablado ti panunotyo dayta mangparaburto kadakayo. Manipud iti sabali a bangir ti payak ti sairo, a manggurgura kadakayo, ket mangpadpadas a mangikabil iti entablado ti panunotyo iti dayta mangilunodto kadakayo.
“Dakayo ti mangimatmaton iti entablado—dakayo ti maysa a mangikeddeng no ania a panunot ti mangokupa iti entablado. … Agbalinkayonto iti no ania ti pampanunotenyo—no ania ti agtultuloy nga ipalubosyo a mangokupa iti entablado ti panunotyo. …
“No aramidennatayo dagiti panunottayo iti no aniatayo, ken agbalintayo a kas ken ni Cristo, nasken nga agpanunottayo kas kadagiti pampanunot ni Cristo” (“Think on Christ,” Ensign, Abr. 1984, 10–11).
Tarigagayan ti Dios a makasaritanakayo.
Kinuna ni Presidente Russell M. Nelson:
“Ania ti maluktanto kadakayo iti panagsapsapulyo? Ania a pagsiriban ti kurang kadakayo? Ania ti mariknayo a kasapulan unay a maammuan ken maawatanyo? Suroten ti pagwadan ni Propeta Joseph. Mangsarak iti naulimek a lugar a masansan a mabalinyo a papanan. Ipakumbabayo ti bagiyo iti sango ti Apo. Ibukbokyo ti pusoyo iti Nailangitan nga Amayo. Umasidegkayo Kenkuana para iti sungbat ken pannakaliwliwa.
“Agkararagkayo iti nagan ni Jesucristo maipapan kadagiti pakaseknanyo, pagbutbutnganyo, ken pagkapsutanyo—wen, dagiti mismo a tartarigagayan ti pusoyo. Ket kalpasanna, dumngngegkayo! Isuratyo dagiti pampanunot nga umay iti isipyo. Isuratyo dagiti riknayo ket aramidenyo dagiti tignay a nakaparegtaanyo nga aramiden. …
“Pudno kadi a ti Dios agtarigagay a makasaritanakayo? Wen! … Gutugotenkayo a padur-asenyo koma ti agdama a naespirituan a kabaelanyo nga umawat iti bukod a paltiing. …
“O, nakaad-adu pay ti kayat ti Amayo iti Langit a maammuanyo” (“Revelation for the Church, Revelation for Our Lives,” Ensign wenno Liahona, Mayo 2018, 95).
Panangpadur-as iti Panangisurotayo
Tulongam dagiti sursuruan nga agpipinnaregta iti tunggal maysa. “Tunggal tao iti klasem ket nabaknang a paggapuan ti pammaneknek, nauneg a pannakaammo ken pannakaawat, ken padpadas iti panagbiag iti ebanghelio. Awisem ida nga agbibinninglay ken agpipinnaregta iti tunggal maysa” (Panangisuro iti Wagas ti Mangisalakan, 5).