1 Pudno, pudno, kunak nga inanamaek a rumbeng a limosanyo dagiti napanglaw: ngem agannadkayo ta saankayo nga agited iti limos iti sanguanan dagiti tao; ta no kasta awan ti gunggonayo iti Amayo nga adda sadi langit.

2 Ngarud, inton manglimoskayo dikayto pagunien ti tangguyob iti sangoyo, a kas iti ar-aramiden dagiti aginsisingpet kadagiti sinagoga ken kadagiti kalsada, tapno dayawen ida dagiti tao. Pudno kunak kadakayo, adda gunggonada.

3 Ngem inton manglimoskayo, saan koma a maammuan ti makanigidyo ti aramiden ti makanawanyo;

4 Tapno nalimed ti limosyo; ket ni Amayo a makakita a sililimed, gunggonaannakayonto.

5 Ket inton agkararagkayo saanyo a tuladen dagiti aginsisingpet, ta magustuanda ti agkararag a nakatakder kadagiti sinagoga ken kadagiti dalan, tapno makita ida dagiti tao. Pudno kunak kadakayo, adda gunggonada.

6 Ngem dakayo, inton agkararagkayo, sumrekkayo iti siledyo, ket inton nairikepyon ti ridaw, agkararagkayo ken Amayo nga adda iti nalimed; ket ni Amayo a makakita iti nalimed masansanto a gunggonaannakayo.

7 Ngem no agkararagkayo, diyo aramiden ti awan kapapayanna a panangulit-ulit, a kas iti aramid dagiti pagano, ta ipagarupda a mangngeganto ida gapu iti adu a sasaoda.

8 Diyo ngarud tuladen ida; ta ammon ni Amayo dagiti masapulyo sakbay a dumawatkayo kenkuana.

9 Kastoy ngarud ti panagkararagyo: Amami nga addaka sadi langit, madaydayaw koma ti naganmo.

10 Maaramid koma ti pagayatam ditoy daga kas sadi langit.

11 Ket pakawanennakami kadagiti ut-utangmi, a kas iti pammakawanmi kadagiti nakautang kadakami.

12 Ket dinakami yasideg iti sulisog, ket isalakannakami iti dakes.

13 Ta daytoy ti pagariam, ken bileg, ken gloriam nga agnanayon. Amen.

14 Ta, pakawanennakayto met ti nailangitan nga Amayo no pakawanenyo dagiti tao kadagiti nakabasolanda;

15 Ngem dinakayonto met pakawanen ti Amayo kadagiti nagbasolanyo no saanyo a pakawanen dagiti tao kadagiti nakabasolanda.

16 Kangrunaanna, saankayo koma a kasla kadagiti aginsisingpet inton agayunokayo, a naliday, ta baliwanda ti rupada, tapno agparangda a nagayuno kadagiti tao. Pudno kunak kadakayo, adda gunggonada.

17 Ngem inton agayunokayo, lanaanyo ti uloyo ket agdiram-oskayo.

18 Tapno di maiparang kadagiti tao nga agayunokayo, no di ken Amayo nga adda iti nalimed, ket ni Amayo a makakita iti nalimed, gunggonaannakayonto.

19 Saankayo nga agurnong iti kinabaknang nga agpaay kadakayo ditoy daga, a dadaelen ti sanga ken ti lati, ken takawen dagiti mannanakaw.

20 Ngem agurnongkayo iti kinabaknang sadi langit, a di madadael ti sanga ken ti lati, ken di takawen dagiti mannanakaw:

21 Ta no sadino ti yan ti kinabaknangyo, isu met ti yan ti pusoyo.

22 Ti mata ti silaw ti bagi; ngarud, no maipamaysa ti matayo kaniak, nalawagto ti sangabukel a bagiyo.

23 Ngem no maipamaysa ti matayo iti dakes, nasipngetto ti sangabukel a bagiyo. Ngarud, no nakudrep ti silaw nga adda kadakayo, anian dayta a kinasipnget!

24 Awan ti tao a makabalin nga agserbi iti dua nga appo; ta guraennanto ti maysa ket ayatennanto ti sabali, wenno sumurotto iti maysa ket guraennanto ti sabali. Diyo mabalin ti agserbi iti Dios ken iti Baknang.

25 Ket ita napasamak nga idi maibaga ni Jesus dagitoy a balikas kinitana dagiti sangapulo-ket-dua a pinilina, ket kinunana kadakuada: Laglagipenyo dagiti balikas nga imbagak kadakayo. Gapu ta adtoy, dakayo ti pinilik nga agserbi kadagitoy a tao. Ngarud kunak kadakayo, diyo panunoten ti biagyo, no ania ti kanenyonto wenno ania ti inumenyonto; ken uray ti bagiyo, no ania ti ikawesyonto. Saan kadi a napatpateg ti biag ngem iti taraon, ken ti bagi ngem iti kawes?

26 Imutektekanyo dagiti tumatayab iti tangatang, ta dida agmula, wenno dida agani wenno dida agurnong kadagiti kamalig: ngem taraonan latta ida ti Nailangitan nga Amayo. Saankayo kadi a nalalaing ngem dagitoy?

27 Asino kadakayo ti mangpanunot laeng ket manayonannan iti sangasiko ti katayagna?

28 Ken apay a pakakumikomanyo ti pagan-anay? Usigenyo dagiti lirio iti talon no kasano ti panagdakkelda; saanda nga agbannog, ket dida met mamabi;

29 Ngem kunak kadakayo, nga uray pay ni Solomon, a nalatak unay, saan a nakawesan a kas kadagitoy.

30 Gapuna, no kinawesan ti Dios dagiti ruot iti talon, a kas ita, ket maisungrod iti dalikan inton bigat, kasta met a kawesannakayonto, no saan a nakurang ti pammatiyo.

31 Ngarud dikayo agduadua, a kunayo: Ania ti kanenminto? wenno, Ania ti inumenminto? wenno, Yanna ti pagan-anayminto?

32 Ta ammo ti Nailangitan nga Ama a kasapulantayo amin dagitoy a banag.

33 Ngem birokenyo nga umuna ti pagarian ti Dios ken ti kinalintegna, ket mainayonto amin dagitoy a banag kadakayo.

34 Saanyo ngarud a panunoten ti masakbayan, ta tinto masakbayan ti makaammo iti banag a maipaay. Umdasen ti aldaw dayta a kinadakes.