Nagraniag ti Lawag ti Rupana Kadakuada, ni Gary L. Kapp

Septiembre 28–Oktubre 11

3 Nephi 17–19

“Adtoy, Naan-anay ti Ragsakko”

Ti panagsaganam a mangisuro ket mangrugi koma iti bukodmo a panagadal kadagiti nasantuan a kasuratan. TiUmaykayo, Sumurot Kaniak—Para kadagiti Indibidual ken Pamilia ti mabalin a mangsuplemento iti panagadalmo, ket daytoy a balabala ti makaited pay kenka kadagiti kapanunotan a mangtulong kenka nga agsagana.

Isuratmo Dagiti Impresionmo

Yawis ti Panagbibinninglay

Iti 3 Nephi 17:1–3, inawis ti Mangisalakan dagiti tao nga agawid iti pagtaenganda ket “isaganada dagiti panunot[da] sakbay ti panangsublida a masursuruan manen. Mabalinmo a saludsoden kadagiti estudiantem no kasano a nakapagsaganada para iti panaglilinnawag ita nga aldaw ken no ania ti inutobda.

Isuro ti Doktrina

3 Nephi 17; 18:24–25, 28–32

Ti Mangisalakan ti naan-anay a pagwadantayo iti ministering.

• Addaantayo iti amin a gundaway nga agministro kadagiti dadduma, ken makapagbalintayo a nalalaing iti daytoy. Maysa a wagas a pakasursuruantayo iti pagwadan ti Mangisalakan iti ministering ket basaen laeng ti 3 Nephi 17 kas maysa a klase ket awisen dagiti miembro ti klase nga agkomento no sadino ti pakasarakanda iti maysa a banag a mangisuro kadakuada maipapan iti ministering. Ania ti masursurotayo maipapan iti kinatao ti Mangisalakan a namagbalin Kenkuana a naidaklan a pagwadan ti ministering? Ania dagiti kinapudno a masursurotayo maipapan iti ministering manipud iti pagwadan ti Mangisalakan. Mabalinmo pay ti mangsapul kadagiti nayon a nalawag a pannakaammo ken pannakaawat [insights] iti 3 Nephi 18:24–25 ken 28–32. Kalpasanna mabalin nga ilawlawag dagiti miembro ti klase dagiti naipangruna a banag a mariknada a naparegtada nga aramiden a mangsurot iti pagwadan ti Mangisalakan iti ministering.

  

  Adtoy dagiti Babassit nga Annakyo, ni Gary L. Kapp

3 Nephi 17:13–22; 18:15–25; 19:6–9, 15–36

Sinuruannatayo ti Mangisalakan no kasano ti agkararag.

• Tapno matulongan dagiti miembro ti klase nga agsursuro manipud iti adu a pagarigan ken pannursuro maipapan iti kararag iti 3 Nephi 17–19, mabalinmo nga isurat iti pisarra ti Asino? Kasano? Kaano? ken Apay? ket awisem ti klase a mangsapul kadagiti sungbat kadagitoy a saludsod bayat ti pananginaigda iti kararag kadagiti sumaganad a bersikulo: 3 Nephi 17:13–22; 18:15–25; ken 19:6–9, 15–36. Ania dagiti dadduma pay a nalawag a pannakaammo ken pannakaawat [insights] a magun-od dagiti miembro ti klase bayat ti panangbasada kadagitoy a bersikulo? Ti palawag ni Elder Richard G. Scott iti “Dagiti Nainayon a Resources” ket mabalin a mangnayon iti panaglilinnawag. Mabalinmo met nga awisen dagiti miembro ti klase a mangibinglay no ania ti aramidenda tapno agbalin a napatpateg dagiti bukod ken sangapamiliaan a panagkararagda (kitaen iti 3 Nephi 18:18–21).

• Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangisingasing kadagiti saludsod nga utoben maipapan iti kararag no agbasbasa kadagitoy a bersikulo. Mabalinmo nga idawat kadagiti miembro ti klase a mangibinglay kadagiti ania man a nalawag a pannakaammo ken pannakaawat [insights] nga addaanda maipapan kadagitoy a saludsod. Wenno mabalinmo nga awisen ti sumagmamano a miembro ti klase nga umay iti klase a nakasagana a mangilawlawag iti maysa a banag a nasursuroda maipapan iti kararag manipud iti 3 Nephi 17–19. Ania ti nakaparegtaanda nga aramiden tapno mapagbalin a napatpateg dagiti kararagda?

• Insuro ni Jesus no apay a nasken nga agkararagtayo a kanayon (kitaen iti 3 Nephi 18:15–18). Mabalin a makatulong ti maysa a banag nga adalen [object lesson] tapno maawatan ti klasem no ania ti insurona. Kas pagarigan, mabalinmo ti mangpunno iti maysa a container iti danum tapno mangibagi iti impluensia ni Satanas. Mangiseksek iti tisyu (a mangibagi kadatayo) a siiirut iti uneg ti maysa a tasa (a mangbagi iti panagkararag a kanayon). Baliktaden ti tasa, ket ikabil daytoy iti container ti danum. Nasken nga agtalinaed a namaga ti tisyu iti uneg ti tasa, uray pay no napalawlawan daytoy iti danum. Ania ti isuro daytoy a banag nga adalen ken 3 Nephi 18:15–18 maipapan iti kararag? (kitaen met iti DK 10:5). Ania ti kayat a sawen ti “kanayon nga agkararag”? Kasano a makatulong kadatayo ti kararag a mangliklik iti impluensia ni Satanas? Ibilang ti panangpalugod kadagiti miembro ti klase iti sumagmamano a minuto a mangisurat no ania ti nakaawisan ti riknada nga aramidenda a mangpasayaat kadagiti kararagda.

3 Nephi 18:1–12

Mapnuantayo a naespirituan no makiranudtayo iti sakramento.

• Tapno mangirugi iti panaglilinnawag maipapan kadagiti pannursuro ti Mangisalakan iti sakramento iti 3 Nephi 18, mabalinmo a bingayen ti klasem iti kada grupo ken ikkam ti tunggal grupo iti maysa kadagiti sumaganad a nasantuan a kasuratan a basaen ken paglilinnawaganda: Mateo 26:26–28; 3 Nephi 18:1–12; ken Doktrina ken Katulagan 20:75–79; 27:1–4. Kalpasan ti panangbasada iti naidutok kadakuada a binatog wenno bersikulo, mabalin nga agpanunot ti tunggal grupo iti maysa wenno dua a saludsod maipapan iti sakramento a masungbatan kadagiti bersikulo a basaenda ket isuratda dagiti saludsodda iti pisarra. Kalpasanna mabalin nga agsukisok ti dadduma pay iti klase kadagiti nasantuan a kasuratan para kadagiti sungbat kadagiti saludsod. Mabalin met nga ilawlawag dagiti miembro ti klase no kasano a maaddaanda iti napatpateg a padas iti pannakiranud iti sakramento.

• Ania ti kayat a sawen ti “nabsog” no makiranudtayo iti sakramento? (kitaen iti 3 Nephi 18:4–5, 9; 20:9). Ibilang ti panangawis kadagiti miembro ti klase a mangilawlawag iti daytoy a saludsod iti kada paris bayat ti panangbasada iti 3 Nephi 18:1–12 nga aggigiddan. Mabalinmo met nga awisen dagiti miembro ti klase a mangutob iti maudi a gundaway a nariknada a naespirituan a “nabsogda” bayat ti pannakiranud iti sakramento. Nalabit a mabalinda nga ilawlawag dagiti banag a mabalin a manglapped kadatayo iti panagbalin a “mabsog” iti sakramento ken ibinglay dagiti kapanunotan maipapan iti no kasano a maparmek dagita a tubeng.

3 Nephi 19:9–15, 20–22

Ikarigatan a gun-oden dagiti disipulo ni Jesucristo ti sagut ti Espiritu Santo.

• Ibilang ti panangidawat kadagiti miembro ti klase a mangpanunot iti maysa a banag a tartarigagayanda unay. Ania ti natallugodda nga aramiden tapno umawat iti daytoy? Daytoy ti makaiturong iti panaglilinnawag maipapan no ania ti “kangrunaan a tinarigagayan” dagiti sangapulo-ket-dua a disipulo kas nailadawan iti 3 Nephi 19:9–15 ken 20–22. Apay a mabalin a napateg unay daytoy kadakuada? Apay a napateg daytoy kadatayo? Segun kadagitoy a bersikulo, kasano a sipapasnektayo a mangikarigatan a manggun-od iti panangkadkadua ti Espiritu Santo?

Yallukoy ti Panagsursuro iti Pagtaengan

Kinuna ti Apo, “Napateg dagiti balikas ni Isaias” (3 Nephi 23:1). Tapno maallukoy dagiti miembro ti klase a mangbasa iti 3 Nephi 20–26, mabalinmo nga ibaga kadakuada a kadagitoy a kapitulo, inlawlawag ni Jesus ti sumagmamano kadagiti “napateg” a balikas ni Isaias. Awisem dagiti miembro ti klase a mangutob no apay a napateg dagitoy a balikas ni Isaias. Allukoyem ida nga umay a nakasagana iti sumaruno a Domingo tapno mangibinglay iti no ania ti masursuroda.

Dagiti Nainayon a Resources

Ti pateg ti kararag.

Impaneknek ni Richard G. Scott maipapan iti kinapateg ti kararag:

“Agkararagtayo iti Nailangitan nga Amatayo iti sagrado a nagan ti Ay-ayatenna nga Anak, ni Jesucristo. Ti kararag ket kasamayan no ikarigatantayo ti agbalin a nadalus ken natulnog, nga addaan kadagiti nasayaat a gandat, ken natallugod a mangaramid iti no ania ti ipaaramidna. Mangisangbay ti napakumbaba, natalek a kararag iti direksion ken talna.

“Saankayo nga agdanag maipapan iti saan a napintas a pannakayebkas dagiti riknayo. Kasaritayo laeng ti manangngaasi, mannakaawat nga Amayo. Dakayo ti napateg nga anakna nga ay-ayatenna a naan-anay ken kayatna a tulongan. Bayat ti panagkararagyo, bigbigenyo nga asideg ti Ama iti Langit ken dumdumngeg Isuna.

“Ti tulbek iti napapintas a kararag ket agsursuro nga agdamag kadagiti umno a saludsod. Ibilang ti panangbalbaliw manipud iti panagkiddaw kadagiti banag a tarigagayam iti sipupudno a panangikarkarigatam a gun-oden a tarigagayanna para kenka. Kalpasanna kabayatan ti panangsursurom iti pagayatanna, agkararagka tapno maaddaankanto iti pigsa a mangipatungpal iti daytoy.

“No mariknam nga adayoka manipud iti Amatayo, mabalin nga adu ti gapuna. Ania man ti gapu, no agtultuloyka nga agpakaasi iti tulong, tarabayennakanto a mangaramid iti mangisublinto iti panagtalekyo nga Isu ket asideg. Agkararagkayo uray no awanankayo iti tarigagay nga agkararag. No dadduma, kas maysa nga anak, mabalin nga agduaduakayo ket mariknayo a saanyo a mayasideg iti Amayo ti maysa a problemayo. Dayta ti kanito a kangrunaan a kasapulanyo ti agkararag. Diyo kaano man marikna a saankayo a maikari unay tapno agkararag.

“Pampanunotek no talaga a maawatantayo ti dakkel a bileg ti kararag agingga a maipasangotayo iti mangrimrimbaw, a problema nga agkasapulan iti dagus a pangrisut ket maamiris nga awan bilegtayo a mangresolba iti daytoy. Kalpasanna umasidegtayto iti Amatayo kas napakumbaba a panangbigbig iti naan-anay a panagpannuray Kenkuana. Makatulong a mangsapul iti nalimed a lugar a sipipigsa a pangipeksaantayo kadagiti riknatayo no kasapulan.” (“Using the Supernal Gift of Prayer,” Ensign wenno Liahona, Mayo 2007, 8).

Panangpadur-as iti Panangisurotayo

Agkagumaan para iti ayat a kas ken ni Cristo. No adda maysa a miembro ti klasem nga agkasapulan a magayyem wenno makasinged, ibilang no kasano a matulongam a makarikna a kapaset isuna ti klase. Kas pagarigan, mabalinmo nga awisen ti sabali pay a miembro ti klase a makiabay iti tugaw daytoy a tao ken makigayyem kenkuana.