Ladawan ni Cristo iti panagparangna kadagiti Nephite ni Andrew Bosley

Oktubre 12–18

3 Nephi 20–26

“Annaknakayo iti Katulagan”

Bay-an a tarabayennaka ti Espiritu iti panagadalmo iti 3 Nephi 20–26. Tulongannakanto a mangilasin kadagiti pagbatayan a naipangpangruna a napateg kadagiti tao a sursuruam.

Isuratmo Dagiti Impresionmo

Yawis ti Panagbibinninglay

Kalpasan ti aggigiddan a panangbasa kadagiti balikas ti Mangisalakan iti 3 Nephi 23:1, mabalinmo a saludsoden kadagiti miembro ti klase no ania ti nasukisokda bayat ti panangbasada kadagiti nasantuan a kasuratan iti daytoy a lawas. Ania iti nasarakanda?

Isuro ti Doktrina

3 Nephi 20:25–41; 21:9–11, 22–29

Kadagiti maudi nga aldaw, agaramidto ti Dios iti naindaklan ken nakaskasdaaw nga aramid.

• Nagsarita ti Mangisalakan maipapan iti “naindaklan ken nakaskasdaaw nga aramid” (3 Nephi 21:9) nga aramidento ti Amana kadagiti maudi nga aldaw. Nalabit a makaibinglay dagiti miembro ti klase no ania ti nasursuroda maipapan iti dayta nga aramid bayat ti panagadalda kadagitoy a kapitulo iti pagtaengan. Dagiti saludsod a kas kadagitoy ti mabalin a mangparegta iti maysa a panaglilinnawag: Ania ti kinuna ti Mangisalakan a mapasamakto iti masakbayan nga aldaw? (kitaen nangnangruna iti 3 Nephi 20:30–32, 39–41; 21:22–29). Apay nga awaganna dagitoy a banag iti “naindaklan” ken “nakaskasdaaw”? Ania a pakakitaan ti makitatayo a maipatpatungpal daytoy nga aramid? Kasano a mairamantayo iti daytoy?

• Tapno matulongan dagiti miembro ti klase a mangkita no kasano a timmulong ni Propeta Joseph Smith a mangipatungpal iti naindaklan ken nakaskasdaaw nga aramid ti Apo, mabalinmo ti mangi-display iti maysa a ladawan ti Propeta ket awisem ti klase a mangbasa iti 3 Nephi 21:9–11, a mangsapsapul kadagiti balikas ken ragup ti balikas a mangipalagip kadakuada iti biag ken panangministro ni Joseph Smith. Kas pagarigan, kasano a ti Apo “intedna kenkuana ti pannakabalin a yegnanto ti [ebanghelio] kadagiti Gentil”? (bersikulo 11). Apay a napateg a maammuan nga impadto ti Mangisalakan ti panangmininstro ni Joseph Smith? (kitaen met iti 2 Nephi 3).

• Mabalin met a tulongam dagiti miembro ti klase a mangkita iti bagbagida iti naindaklan nga aramid a naipadto kadagitoy a kapitulo babaen ti aggigiddan a panangbasa iti 3 Nephi 20:25–27. No kasapulan, mabalinmo nga ilawlawag a no agaramidtayo kadagiti katulagan iti Apo, agbalintayo a bukel ni Abraham. Kas an-annabo ni Abraham kasano a maparaburantayo ti “amin nga agkakabagyan iti daga”? (bersikulo 25). Mabalin nga utoben dagiti miembro ti klase daytoy a saludsod bayat ti panangbasada iti palawag ni Presidente Russell M. Nelson iti “Dagiti Nainayon a Resources” ket ibinglayda dagiti kapanunotanda.

3 Nephi 23; 26:1–12

Tarigagayan ti Mangisalakan a sukisokentayo dagiti nasantuan a kasuratan.

• Ania ti ipalgak dagiti pannakipulapol ti Mangisalakan kadagiti Nephite maipapan iti wagas a pakariknaanna maipapan kadagiti nasantuan a kasuratan? Tapno matulongan a maammuan dagiti miembro ti klase, mabalinmo nga idawat iti kagudua kadakuada a mangbasa iti 3 Nephi 23 ken iti sabali pay a kagudua a mangbasa iti 3 Nephi 26:1–12; kalpasanna mabalinda nga ibinglay iti tunggal maysa no ania ti nasarakanda. Mabalinda pay nga ibinglay dagiti kapanunotanda maipapan iti no kasano nga ipakita iti Apo a napateg kadatayo dagiti nasantuan a kasuratan. Kas pagarigan, ania ti pagdumaan ti panangsukisok kadagiti nasantuan a kasuratan ken panagbasa lang kadagitoy? (kitaen iti 3 Nephi 23:1).

3 Nephi 24:1–6

Ti Apo ket mayarig iti maysa nga apuy a manggugor.

• Mabalin a mangpasayaat dagiti tulong a ladawan [visual aids] iti panangilawlawagmo iti 3 Nephi 24:1–6. Kas pagarigan, mabalinmo ti mangipakita iti pirak a sensilio wenno sabon bayat ti panangbasa dagiti miembro ti klase kadagiti bersikulo tapno ammuen no kasano a mainaig dagitoy a banag iti Mangisalakan ken iti misionna. Mabalinmo pay nga ibinglay iti klase ti pannakailawlawag ti pirak a manggugor ken ti naingel a sabon iti “Dagiti Nainayon a Resources.” Wenno mabalinmo nga ipakita ti video a “The Refiner’s Fire” (ChurchofJesusChrist.org). Kasano a ti Apo ket “mayarig iti apuy a manggugor, ken kasla naingel a sabon”? (bersikulo 2). Ania ti isuro kadatayo dagitoy a pagarigan maipapan no kasano a patarnawennatayo ti Mangisalakan?

3 Nephi 24:7–18

Kaasian ti Dios dagiti agsubli Kenkuana.

• Mabalinmo nga ilawlawag a dagiti pannursuro maipapan iti apagkapullo iti 3 Nephi 24:8–12 ket sungbat iti saludsod iti bersikulo 7: “Ania ti pagsublianminto [iti Apo]?” Ania ti pagnaigan ti “[panangsubli] iti [Apo]’ ken panagbayad iti apagkapullo? Mabalin nga ibinglay dagiti miembro ti klase no kasano a naawatda dagiti bendision a nailista kadagiti bersikulo 10–12 gapu ta nagbayadda iti apagkapullo. Kasano a makatulong dagitoy a kinapudno iti maysa a tao a mangikarkarigatan nga agbayad iti apagkapullo?

• Ania ti ugali a nailadawan iti 3 Nephi 24:13–15 a masansan a masarakan iti lubong iti agdama? Allukoyem dagiti miembro ti klase no ania koma ti ibagada iti maysa a tao a makarikna a nalaklaka wenno nasaysayaat ti biag para kadagiti saan nga agtungpal kadagiti bilin. Segun iti 3 Nephi 24, kasano a bendisionan ti Apo dagiti agserbi Kenkuana? Mabalinmo pay nga allukoyen ida a mangsapul kadagiti pagarigan iti 3 Nephi 22. (Kitaen met iti Mosiah 2:41; Alma 41:10.)

3 Nephi 25:5–6

Nasken a maisubli dagiti puspusotayo kadagiti kapuonantayo.

• Tapno mailadawan ti konsepto ti panangisubli iti puspusotayo kadagiti kapuonantayo, mabalinmo nga awisen ti maysa a miembro ti klase a tumallikud iti klase ket iladawanna dagiti miembro ti klase iti panunotna (no sadino ti pagtugtugawanda, no ania dagiti suotda a kawes, ken dadduma pay). Kalpasanna mabalinna ti sumango iti klase ket padasen manen. Ania ti maisuro kadatayo daytoy a pagarigan maipapan iti panangisubli iti puspusotayo kadagiti kapuonantayo babaen iti aramid iti templo ken family history? Kalpasan ti panangbasa iti 3 Nephi 25:5–6, nalabit a maibinglay dagiti miembro ti klase no kasano a naisublida ti puspusoda kadagiti kapuonanda. Mabalinmo met nga awisen consultant ti temple ken family history iti ward tapno mangyam-ammo kadakuada ti suamgmamano a ramit iti family history. Kasano a mainaig daytoy nga aramid iti panangummong iti Israel nga inladawan ni Presidente Russell M. Nelson iti “Dagiti Nainayon a Resources”?

Yallukoy ti Panagsursuro iti Pagtaengan

Iti 3 Nephi 27–4 Nephi mabasatayo maipapan iti “[kararagsakan] a tao kadagiti amin a tao a pinarsua ti Dios ” (4 Nephi 1:16). Isingasing iti klase a ti panangbasa kadagitoy a kapitulo ti makatulong kadatayo a makasursuro no kasano a masarakan ti ragsak para iti bagbagitayo ken ti pamiliatayo.

Dagiti Nainayon a Resources

Mabalin a pasetka ti maysa a banag a naidaklan.

Insuro ni Presidente Russell M. Nelson:

“Awan duadua a dagitoy ket dagiti ud-udina nga aldaw, ken padarasen ti Apo ti aramidna a mangummong iti Israel. Dayta a panagguummong ti kapatgan a banag a maipatpatungpal iti daga iti agdama. Awan ti sabali pay a maidasig iti kadakkelna, awan ti sabali pay a maidasig iti kinapategna, awan ti sabali pay a maidasig iti kinatan-okna. Ket no plilienyo, no kayatyo, makapagbalinkayo a dakkel a kapasetna. Makapagbalinkayo a dakkel a kapaset ti maysa a banag a dakkel, maysa a banag a naindaklan, maysa a banag a natan-ok!

No saritaentayo maipapan iti panaguummong, isasaotayo laeng daytoy a kangrunaan a kinapudno: tunggal maysa kadagiti annak ti Nailangitan nga Ama, iti agpada a bangir ti belo, ket maikari a dumngeg iti mensahe ti naisubli nga ebanghelio ni Jesucristo. …

“… Panunotenyo daytoy! Iti amin a tao a nagbiag iti planeta a daga, datayo dagiti makiraman iti daytoy maudi, naindaklan a pasamak ti panagguummong. Anian a nagragsaken dayta! …

“Nasken a kayat a sawen daytoy a panaguummong ti amin a banag kadakayo. Daytoy ket ti mision a nakaibaonanyo iti daga” (“Hope of Israel” [worldwide devotional for youth, Hunio 3, 2018], broadcasts.ChurchofJesusChrist.org).

Pananggugor ken panangpatarnaw.

Masarakan ti pirak a nailaok iti dadduma pay a mineral iti deposito ti landok. Idi un-unana, ti manggugor iti pirak ket mangikkat iti pirak babaen ti panangisebba iti landok iti urno a mapapudot ti nangato unay a temperatura. Daytoy ti mangigapu iti lati (dagiti rugit wenno di kasapulan a mineral) a tumpuar iti rabaw ti nalunag a landok. Kaskasen ti manggugor ti lati, a mangibati iti puro a pirak, a mabalin a mailasin babaen ti naidumduma a silengna.

Ti fuller [naingel] ket maysa a tao a mangdalus ken mangpapudaw iti lupot. Mayuper ti lupot iti danum a nalaokan iti “naingel a sabon,” a naisangrat a mangikkat iti lana ken rugit. Kabayatan ti pannakayuper ti lupot, maluen wenno paddakan ti fuller daytoy tapno maikkat dagiti rugit. (Kitaen iti “Refiner’s Fire and Fuller’s Soap,” New Era, Hunio 2016, 6–7.)

Panangpadur-as iti Panangisurotayo

Suruam dagiti tao, saan a dagiti adalen. “Ti wagas a pannakilangenmo kadagiti tao ket kapada ti pateg dagiti isursurom kadakuada. No dadduma ti pannakakumikomtayo iti panangidatag iti maysa nga adalen ket mabalin a makalapped kadatayo iti panangipeksa iti ayattayo kadagiti sursuruantayo. No mapasamak kenka daytoy, ibilangmo no kasano a makapagpokuska iti no ania dagiti banag a kaskenan” (Panangisuro iti Wagas ti Mangisalakan, 6).