Kararag ni Cristo, ni Derek Hegsted

Oktubre 19–25

3 Nephi 27–4 Nephi

“Awanen ti Naragragsak a Tao”

Ti bukod a panagadal iti 3 Nephi 27–4 Nephi ket kapintasan a wagas a panangisagana a mangisuro. Dagiti doktrina ken kapanunotan iti daytoy a balabala ket mabalin a makatulong kenka a mangsungbat kadagiti naespirituan a parikna nga awatem bayat ti panagadalmo.

Isuratmo Dagiti Impresionmo

Yawis ti Panagbibinninglay

Maysa a wagas tapno maallukoy dagiti miembro ti klase a mangibinglay kadagiti nalawag a pannakaammo ken pannakaawat [insights] manipud iti bukodda a panagadal isu ti panangawis kadakuada a mangsapul iti maysa a himno a mainaig iti kinapudno a nasursuroda iti 3 Nephi 27–4 Nephi. Kalpasanna mabalinda nga ibinglay dagiti himno a nasarakanda ken no kasano a mainiag dagitoy a himno kadagiti kinapudno iti nasantuan a kasuratan.

Isuro ti Doktrina

3 Nephi 27:1–22

Naawagan ti Simbaan ni Jesucristo iti naganna ken nabangon iti ebangheliona.

• Ti panangilawlawag iti nagan ti Simbaan ket mabalin a mangpauneg iti panagdayaw dagiti miembro ti klasem iti kinamiembroda iti Ti Simbaan ni Jesucristo dagiti Santo iti Ud-udina nga Aldaw. Ibilang ti panangawis kadagiti miembro ti klase a mangilista iti nagnagan dagiti nadumaduma nga organisasion ken mangiladawan no ania ti ibaga dagiti nagan maipapan kadagita nga organisasion. Kalpasanna mabalin a basaen dagiti miembro ti klase ti 3 Nephi 27:1–12, a mangsapsapul iti no ania ti insuro ti Mangisalakan maipapan iti nagan ti Simbaan. Mabalinda pay nga ibinglay no ania ti kayat a sawen kadakuada ti agbalin a miembro ti Simbaan ni Cristo. Ania ti kayat a sawen ti awaten ti naganna iti bagbagitayo?

• Daytoy ti sabali pay a wagas a mangilawlawag iti kinapateg ti nagan ti Simbaan ti Mangisalakan. Kalpasan ti panaglilinnawag maipapan kadagiti kinapudno a masarakan iti 3 Nephi 27:1–22, mabalinmo nga isurat ti naan-anay a nagan ti Simbaan iti pisarra. Kalpasanna mabalin a pilien dagiti miembro ti klase dagiti balikas iti nagan ken isingasing no kasano a tulongannatayo ti tunggal balikas a mangammo no asinotayo wenno no ania ti patientayo. Makatulong ti palawag ni Presidente M. Russell Ballard iti “Dagiti Nainayon a Resources.” Apay a napateg nga usaren ti nagan ti Simbaan no ibinglaytayo dagiti pammatitayo iti dadduma?

• Kalpasan ti panangilawlawag a ti Simbaan ket nasken a “mabangon iti ebanghelio[na]” (3 Nephi 27:10), inladawan ti Mangisalakan no ania ti ebangheliona. Nalabit a mabalinmo ng awisen dagiti miembro ti klase a mangibinglay no kasano a mailawlawagda iti maysa a gayyem no ania ti ebanghelio. Kalpasanna mabalinmo nga awisen ida a mangsukisok iti 3 Nephi 27:13–22, a mangsapsapul no kasano nga inlawlawag ti Mangisalakan ti kaipapanan ti ebangheliona. Kasano a magupgoptayo ti kinuna ti Mangisalakan? Kabayatan ti panagadaltayo iti panangilawlawag ti Mangisalakan iti kaipapanan ti ebanghelio, ania dagiti nalawag a pannakaammo ken pannakaawat [insights] a magun-odtayo maipapan no kasano nga agtungpaltayo iti ebanghelio iti inaldaw a biagtayo?

3 Nephi 29–30

Ti Libro ni Mormon ti maysa a pagilasinan a maipatpatungpalen ti aramid ti Dios iti ud-udina nga aldaw.

• Nalabit a mabalinmo nga irugi ti panangilawlawag maipapan iti 3 Nephi 29–30 babaen ti panangisaritam maipapan kadagiti pagilasinan. Kas pagarigan, mabalin nga inaganan dagiti miembro ti klase dagiti pagilasinan a mangipakaammo kadatayo nga adda dumteng a bagyo wenno agbalbaliw dagiti tiempo ti panawen. Kalpasanna mabalinda a basaen ti 3 Nephi 29:1–3 tapno masursuro no ania ti pagilasinan ti idadateng ti Libro ni Mormon, nga inawagan ni Mormon iti “dagitoy a sao” (kitaen met iti 3 Nephi 21:1–7). Ania a mensahe ti inted ti Apo iti 3 Nephi 29:4–9 kadagiti “mangitarayan” wenno “mangtallikud” iti aramid ti Dios kadagiti maudi nga aldaw? Kasano a ti panangbasa iti Libro ni Mormon iti inaldaw ket mangpapigsa iti pammatitayo kadagita a banag nga “itarayan” wenno “tallikudan” dagiti dadduma pay a tao iti aldawtayo? Mabalin a kayatmo nga awisen dagiti miembro ti klase a mangbasa iti awis ti Apo iti 3 Nephi 30 ket ibinglay no kasano a nakatulong kadakuada ti Libro ni Mormon nga umawat iti daytoy nga awis.

4 Nephi

Ti pannakapasurot ken ni Jesucristo ken iti ebangheliona ket mangiturong iti panagkaykaysa ken kinaragsak.

• Ti pakaammuan iti 4 Nephi ket mangiladawan iti rag-o a mabalin a sumangbay iti biagtayo—kas indibidual, kas pamilia, ken kas ward wenno stake—bayat ti panagkagumaantayo nga agbalin nga ad-adda pay a napasurot ken ni Jesucristo. Ibilang ti panangidawat kadagiti miembro ti klase a mangsukisok iti 4 Nephi 1:1–18 ket isurat iti pisarra dagiti bendision a sumangbay kadagiti tao no napasurotda amin iti Apo. Kasano nga apektuan ti pannakapasurotda no kasano a tratuenda ti tunggal maysa? Nalabit a mabalin nga ibinglay dagiti miembro ti klase no kasano a nangisangbay ti ebanghelio dagiti isu met la a bendision kadagiti pamiliada wenno wardda. Tapno matulongan a maawatan dagiti miembro ti klase no kasano a makapagbiag ti tunggal maysa kadatayo nga ad-adda pay kas kadagiti tao iti 4 Nephi ken no kasano a mayallukoytayo ti dakdakkel a panagkaykaysa ken panagragsak kadagiti adda iti aglawlawtayo, mabalinyo a basaen ti palawag ni Elder D. Todd Christofferson iti “Dagiti Nainayon a Resources.” Mabalin nga amirisen dagiti miembro ti klase dagiti bukodda a panagkagumaan iti tallo a tay-ak nga inladawan ni Elder Christofferson.

• Pinaglasin dagiti tao ti Libro ni Mormon dagiti bagbagida kas Nephite ken Lamanite—ken adu a dadduma pay nga “-ite”—iti sinigsiglo, ngem kalpasan ti panagministro ti Mangisalakan kadakuada, naawan daytoy a pakabigbigan. Kalpasan ti panangbasa iti 4 Nephi 1:17 nga aggigiddan, malabit a mabalin nga ibinglay dagiti miembro ti klase dagiti kapanunotanda maipapan no ania a kita dagiti “-ite” wenno grupo nga adda iti gimongtayo iti agdama. Ania ti maaramidtayo a mangparmek kadagiti kasta a panagbibingay ken sipupudno nga agbalin a “sangsangkamaysa, dagiti annak ni Cristo”? (bersikulo 17).

• Ania ti masursuro dagiti miembro ti klase manipud iti pannakapaay ti gimong ti Zion a nailadawan iti 4 Nephi? Mabalinmo nga awisen ida a mangsukisok iti 4 Nephi 1:19–34, a mangsapsapul no ania ti nanggibus ti kinaragsak ken panagkaykaysa a napadasan dagiti tao iti dumani 200 a tawen kalpasan ti isasarungkar ti Mangisalakan. Ania dagiti kinapudno kadagitoy a bersikulo a makatulong kadatayo a mangilasin kadagiti ugali ken galad a kasapulan a balbaliwan iti biagtayo ken iti gimongtayo?

Yallukoy ti Panagsursuro iti Pagtaengan

Iladawan tiMormon 1–6 dagiti napeggad a pasamak a nangiturong iti pannakadadael dagiti tao a Nephite. Tapno maallukoy dagiti miembro ti klase a mangbasa kadagitoy a kapitulo, awisen ida a mangsapul kadagiti banag a nadlawda maipapan kadagiti Nephite a makitatayo a mapaspasamak iti aldawtayo.

Dagiti Nainayon a Resources

Ti nagan ti Simbaan ni Cristo.

Kinuna ni Presidente M. Russell Ballard:

“Pinanunotko iti namin-adu maipapan no apay nga inted ti Mangisalakan ti siam a balikas a nagan iti naisubli a Simbaanna. Mabalin a kasla atiddog daytoy, ngem no panunotentayo kas pangiladawan a pakagupgopan ti kaipapanan ti Simbaan, kellaat nga agbalin daytoy nga nakaskasdaaw ti kinababa, nailanad iti direkta, ken nalawag ken nalaka a maawatan. Kasano a makapagbalin nga ad-adda a natarus ken nalawag ti ania man a panangiladawan ngem nayebkas iti kasta a sumagmamano a balikas?

“Tunggal balikas ket makailawlawag ken nakapatpateg. Ipakita ti balikas a Ti ti naidumduma a saad ti naisubli a Simbaan kadagiti relihion ti lubong.

“Ipakdaar dagiti balikas a Simbaan ni Jesucristo a daytoy ti Simbaanna [kitaen iti 3 Nephi 27:8]. …

“Ilawlawagti Ud-udina nga Aldaw a daytoy ti isu met la a Simbaan nga impasdek ni Jesucristo kabayatan ti mortal a panagministrona ngem naisubli kadagitoy ud-udina nga aldaw. Ammotayo nga adda pannakatnag, wenno ikakalilis iti kinapudno, a kasapulan iti Pannakaisubli ti pudno ken naan-anay a Simbaan iti panawentayo.

Ti“Dagiti Santo ket kayatna a sawen a sumurot dagiti miembrona Kenkuana ket agkagumaanda nga agaramid iti pagayatanna, agtungpal kadagiti bilinna, ken agsagana manen a makipagnaed Kenkuana ken iti Nailangitan nga Amatayo iti masakbayan. TiSanto ket maiturong laeng kadagiti agkalikagum a mangaramid a nasantuan ti biagda babaen ti pannakitulag a sumurot ken ni Cristo” (“The Importance of a Name,” Ensign wenno Liahona, Nob. 2011, 80).

Ania ti maaramidto a mangbangon iti Zion?

Insuro ni Elder D. Todd Christofferson: “Nabangon ti Zion gapu iti ugali, kababalin, ken kinapudno dagiti umilina [kitaen iti Moises 7:18]. … No ipasdektayo ti Zion iti pagtaengan, sanga, ken staketayo, nasken a mabangontayo iti daytoy a pagrukodan. Kasapulanto daytoy (1) tapno agbalin a nakaykaysa iti maysa a puso ken maysa a panunot; (2) tapno agbalin a nasantuan a tattao, tunggal maysa ken agkakadua; ken (3) tapno agaywan kadagiti napanglaw ken agkasapulan nga addaan iti kasta a kinasamay a maikkattayo ti kinakurapay kadatayo. Ditayo makapaguray agingga a dumteng ti Zion tapno mapasamak dagitoy a banag—umayto ti Zion laeng bayat ti pannakapasamakda” (“Come to Zion,” Ensign wenno Liahona, Nob. 2008, 38).

Panangpadur-as iti Panangisurotayo

Agusar iti nadumaduma a pamay-an. Mabalin a nalaka nga agbalin a komportable iti maysa a masinunuo nga estilo ti panangisuro, ngem dagiti nadumaduma a pamay-an iti panangisuro ti mangtulong iti nadumaduma a miembro ti klase. Mangpanunotka maipapan kadagiti pamay-an nga inusarmo itay nabiit—nagusarka kadi kadagiti estoria, banag nga adalen [object lesson], ladawan, ken dadduma pay? (kitaen iti Panangisuro iti Wagas ti Mangisalakan, 7).