Ni Mormon nga agsursurat kadagiti balitok a pinanid

Ni Moroni a Mangyab-ababa kadagiti Pinanid, ni Tom Lovell

Oktubre 28–Nobiembre 1

Mormon 1–6

“Kayatko a Magutugotkayo Amin … nga Agbabawi”

Bayat ti panangbasam iti Mormon 1–6, sarakem dagiti kinapudno a makatulong kadagiti miembro ti klasem nga agtalinaed a napudno iti panawen ti kinadangkes, kas iti inaramid ni Mormon.

Isuratmo Dagiti Impresionmo

icon iti panagbibinninglay

Yawis ti Panagbibinninglay

No dadduma agkedked dagiti miembro a mangibinglay kadagiti nalawag a pannakaammo ken pannakaawatda [insights] gapu ta awananda iti oras a mangurnos kadagiti kapanunotanda. Tapno matulongan ida iti daytoy, mangted kadakuada iti sumagmamano a minuto a mangisurat kadagiti nalawag a pannakaammo ken pannakaawat a nagun-odda manipud iti panagadalda iti Mormon 1–6 iti pagtaengan; kalpasanna idawat kadakuada a mangibinglay.

icon iti panangisuro

Isuro ti Doktrina

Mormon 1–6

Makapagbiagtayo a sililinteg iti baet ti kinadangkes iti aglawlawtayo.

• Maawatan ti adu kadagiti miembro ti klasem ti padas ni Mormon iti panangikarigatan nga agbiag a sililinteg iti maysa a nadangkes a lubong. Nalabit a mabalinda nga ibinglay no ania ti nasursuroda manipud iti pagwadan ni Mormon. Tapno matulongan a maparegget daytoy a panaglilinnawag, mabalinmo nga awisen dagiti miembro ti klase a mangsapul kadagiti bersikulo a mangilasin kadagiti kababalin ni Mormon ket ilista dagita a kababalin iti pisarra (kitaen, kas pagarigan, iti Mormon 1:2–3, 15–16; 2:1, 23–24; 3:1–3, 12, 17–22). Kasano a nakatulong dagitoy a kababalin nga agtalinaed a naespirituan a napigsa ni Mormon? Kasano a makatulongda kadatayo nga agbalin nga ad-adda pay a kas ken ni Mormon?

  Dagiti Nephite ken Lamanite nga agririnnanget

  Gubat, ni Jorge Cocco

• Masansan a direkta nga agsurat ni Mormon kadagiti tao iti panawentayo. Ania dagiti masursurotayo manipud kadagiti balikasna kadatayo iti Mormon 3:17–22 ken 5:10–24? Mangted iti tunggal miembro ti klase iti papel nga addaan nakasurat a ragup ti balikas [phrase] a “Balakad ni Mormon Kadatayo” iti ngatona, ket allukoyen ida a mangsapul kadagiti mensahe kadagitoy a bersikulo nga adda pakainaiganna iti panawentayo. Kasano a mayaplikartayo ti balakad ni Mormon a mangtulong kadatayo nga agtalinaed a naespirituan iti lubong iti agdama?

• No mangisursuroka kadagiti agtutubo, mabalinmo nga usaren ti pagwadan ni Mormon a mangtulong kadakuada a makaawat a makapagbalinda a nalinteg a dadaulo no ubbingda pay. No mangisursuroka kadagiti nataengan, mabalinmo nga usaren ti pagwadanna a mangguyugoy iti panaglilinnawag maipapan kadagiti gundaway a mangtulong kadagiti agtutubo nga agbalin a nasayaat a dadaulo. Tapno mangirugi iti panaglilinnawag, mabalinmo nga awisen ti sumagmamano a miembro ti klase a mangrebyu iti Mormon 1 ken dagiti dadduma pay a mangrebyu iti Mormon 2, a mangisurat kadagiti gundaway a naited ken ni Mormon a mangidaulo kabayatan ti kinaagtutubona. Ania dagiti kababalin nga adda kenkuana a namagbalin kenkuana a maysa a naindaklan a dadaulo? Mabalin a maibinglay dagiti miembro ti klase dagiti pagarigan a nakitadan iti nabileg nga impluensia dagiti nalinteg nga ubbing ken agtutubo. Mabalinda pay nga ilawlawag dagiti gundaway nga adda kadakuada—wenno dagiti agtutubo nga am-ammoda—tapno agbalin a dadaulo nga addaan kadagiti kababalin kas iti adda ken ni Mormon.

Mormon 2:10–15

Agkasapulan ti panagbabawi iti nasneban a puso ken napnuan babawi nga espiritu.

• Tapno masursuro maipapan iti pagdumaan ti panangleddaang a mangiturong iti panagbabawi ken panagleddaang a saan a mangiturong iti panagbabawi, ibilang ti panangbasa iti Mormon 2:10–15 nga aggigiddan ket paglilinnawagan daditi saludsod kas kadagitoy: Ania ti akem ti “panagleddaang” iti panagbabawi? Ania ti pagdumaan ti “panagleddaang … iti panagbabawi” ken ti “panagleddaang ti nailunod”? Ania dagiti galad ken ugali a makatulong kadatayo a maaddaan iti “nasneban a puspuso ken napnuan babawi nga espiritu”?

Mormon 3:12

Mabalintayo nga ayaten dagiti dadduma, uray no saantayo nga umanamong kadagiti pilida.

• Kas ken ni Mormon, adu a miembro ti klasem ti makipulpulapol a nasinged kadagiti tao a saanda a kapada iti pammati. Kasano a mausarmo ti padas ni Mormon a mangisuro kadagiti miembro ti klase maipapan iti panagayat iti dadduma iti baet dagiti pagdudumaanda? Ibilang ti panangbasa iti Mormon 3:12 nga aggigigiddan ken panangilawlawag kadagiti panawen idi impakita ni Mormon ti ayatna kadagiti saan nga immawat iti mensahena ken siaayat a nagalsa a maibusor iti Dios (kitaen, kas pagarigan, iti Mormon 1:16–17; 2:12). Ania dagiti padas a maibinglay dagiti miembro ti klase manipud iti bukodda a biag maipapan iti panagayat kadagiti saan a kapada ti pammatida wenno ik-ikkan pateg? Ti palawag ni Presidente Dallin H. Oaks iti “Dagiti Nainayon a Resources” ket mangted iti nayon pay a balakad.

Mormon 6:17

Nakatakder ni Jesucristo nga addaan silulukat a takiag nga umawat kadatayo.

• Para kadagiti mabalin a naawananen iti namnama a mapakawanda kadagiti basolda, ti panangiladawan ni Mormon iti panagtakder ti Mangisalakan “nga addaan silulukat a takiag nga umawat kadakayo” ket mangted iti pammatalged. Ibilang ti panangbasa iti Mormon 6:17 nga aggigigddan ken panangipakita iti maysa a ladawan ni Jesucristo a nakaunnat dagiti takiagna (kas iti Libro ti Arte ti Ebanghelio, blng. 66). Ania ti isuro daytoy a bersikulo maipapan iti panaggagar ti Mangisalakan a mangisuro kadatayo? Mabalinmo met nga ibilang ti aggigiddan a panangkanta iti maysa a himno a mangisuro iti isu met laeng a mensahe, kas iti “Come unto Jesus” (Hymns, no. 117). Mabalinmo pay nga ibinglay ti padas ni Presidente Russell M. Nelson iti “Dagiti Nainayon a Resources” ken idawat kadagiti miembro ti klase a mangilawlawag no kasano a makatulongtayo iti dadduma a mangbigbig a posible ti panagbabawi.

icon iti panagsursuro

Yallukoy ti Panagsursuro iti Pagtaengan

Mabalinmo nga idawat kadagiti miembro ti klase a mangpanunot maipapan iti no ania ti isuratda kadagiti tao iti masakbayan. Iti Mormon 7–9 mabasatayo no ania ti insurat da Mormon ken Moroni, adu a siglon ti napalabas, kadagiti tao iti panawentayo.

resources icon

Dagiti Nainayon a Resources

Panagayat iti dadduma a sabali ti pammati.

Inlawlawag ni Presidente Dallin H. Oaks:

“Nasken a surotentayo amin dagiti pannursuro ti ebanghelio nga ayatentayo ti padatayo a tao ket liklikantayo ti panagsusupanget. Nasken a pagwadan ti panagdayaw dagiti pasurot ni Cristo. Nasken nga ayatentayo ti amin a tao, agbalin a nasayaat a dumdumngeg, ken mangipakita iti pannakaseknan para kadagiti napudno a kannawidanda. Nupay mabalin a saantayo nga umanamong, nasken a saantayo a sumuppiat. Dagiti pagarup ken panagsasaritatayo maipapan kadagiti kontrobersial a topiko ket saan koma a mapannuppiat. Nasken a masiribtayo iti panangilawlawag ken panangipatungpal kadagiti posisiontayo ken iti panangaramat iti impluensiatayo. Iti panangaramid iti dayta, idawatmi a saan koma a mapasakitan dagiti dadduma kadagiti napudno a kannawidantayo iti relihion ken ti nawaya a panangaramat iti pammatitayo. Allukoyenmi ti amin kadatayo a mangsanay iti Nabalitokan nga Annuroten ti Mangisalakan: ‘Amin dagiti bambanag a kayatyonto a dagiti tattao aramidenda koma kadakayo, kasta met ti aramidenyo kadakuada’ (Mateo 7:12).

“No ditayo mapagtalinaed dagiti posisiontayo, nasken nga awatentayo a sidadayaw dagiti saan a makaay-ayo a bungana ket sanayen a dayawentayo dagiti kabusortayo” (“Loving Others and Living with Differences,” Ensign wenno Liahona, Nob. 2014, 27).

Posible ti panagbabawi.

Imbinglay ni Presidente Russell M. Nelson ti sumaganad a padas:

“Itay napalabas a tawen bayat ti panangmanehomi ken Elder David S. Baxter nga agturong iti komperensia iti stake, dimmagaskami iti maysa a restaurant. Idi agangay idi agsublikami iti luganmi, inasitgannakami ti maysa a babai a nangawag kadakami. … Dinamagna no dakami ti elder iti Simbaan. Kinunami ti wen. Dumani di mapengdan, insaritana ti estoria ti naliday a biagna, a nairarem iti basol. Ita, agtawen laeng iti 28, nakaay-ay-ay ti biagna. Nariknana nga awan pategna, nga awanan iti pagbiaganna. Bayat ti panagsaona, nangrugi a timpuar ti kinasam-it ti kararuana. Makalkalua nga impakpakaasina, no adda pay la namnama para kenkuana, tapno sumayaat iti baet dagiti pannakaupayna.

“‘Wen,’ insungbatmi, ‘adda namnama. Kasilpo ti namnama ti panagbabawi. Makapagbalbaliwka. Mabalinmo ti “umasideg ken ni Cristo, ket agbalin a naan-anay kenkuana”’ [Moroni 10:32]. Ginutugotmi isuna a saan a mangitantan [kitaen iti Alma 13:27; 34:33]. Sipapakumbaba a nagsaibbek ket sipupudno a nagyaman kadakami.

“Bayat ti panangituloymi iti biahemi ken Elder Baxter, inutobmi dayta a padas. Nalagipmi ti balakad nga inted ni Aaron iti maysa a maup-upay a kararua, a kinunana, ‘No ibabawim amin a basbasolmo, ket agtamedka iti Dios, ket awagam ti naganna iti pammati, … maawatmo ngarud ti namnama a tartarigagayam’ [Alma 22:16]. …

“… Iti babai nga agtawen iti 28 a nailumlom iti basol, ken iti tunggal maysa kadatayo, ibagak a posible ti nasam-it a parabur ti panagbabawi. Sumangbay daytoy babaen ti naan-anay a pannakapasurot wenno kumbersion iti Apo ken iti nasantuan nga aramidna.”

Mainayon pay, napaliiw ni Presidente Nelson: “Malagiptayo pay dagiti managbasol a tao nga ay-aywanan ti maseknan a liderda, ni Mormon, a nangisurat iti, “Awan namnamak, ta ammok ti panangukom ti Apo a maitedto kadakuada; ta saanda a nagbabawi kadagiti nagbasolanda, ngem insayangkatda ti bagbagida a di immawag iti Parsua a nangaramid kadakuada’ (Mormon 5:2)” (“Repentance and Conversion,” Ensign wenno Liahona, Mayo 2007, 102, 104).

Panangpadur-as iti Panangisurotayo

Mapasamak iti pagtaengan ti naespirituan a panagdur-as. Bubosen dagiti miembro ti klase ti 165 nga oras iti tunggal lawas iti ruar ti simbaan. Kabayatan dayta a panawen, addaanda iti bukodda a naespirituan a padas a mangisuro kadakuada maipapan iti ebanghelio. Agdamag kadagiti saludsod a mangallukoy kadagiti agad-adal a mangibinglay kadagiti banag a nasursuroda kabayatan ti lawas ken dagiti pamiliada (kitaen iti Panangisuro iti Wagas ti Mangisalakan, 18).