Ni Ether a sumsumrek iti maysa a rukib

Ni Ether nga Aglemlemmeng iti Abut ti maysa a Rukib, ni Gary Ernest Smith

Nobiembre 23–29

Ether 12–15

“Mapasamak Amin a Banag Babaen ti Pammati”

Ti panggep daytoy a balabala ket saan a mangidikta no ania ti nasken a mapasamakto iti klase. Daytoy ti mangsuplemento iti—saan a mangsukat iti—bukod a paltiing. Bay-an a tarabayennaka ti Espiritu iti bukod a panagadalmo ken panagsaganam, ket kalpasanna kitaem no dagiti aktibidad iti daytoy a balabala ket makatulong kadagiti miembro ti klase a mangtakuat ken mangibinglay kadagiti napapateg a pagbatayan iti Ether 12–15.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Tapno matulongan dagiti miembro ti klase a mangibinglay no ania ti nasursuroda manipud iti bukod wenno sangapamiliaan a panagadalda, mabalinmo nga isurat iti pisarra dagiti ragup ti balikas kas iti “Nasursurok a …” “Adda pammaneknekko maipapan iti …” ken “Napadasak ti …” Awisem dagiti miembro ti klase a mangibinglay iti maysa a banag manipud iti Ether 12–15 a mabalin a mangkumpleto iti maysa kadagiti palawag iti pisarra.

icon iti panangisuro

Isuro ti Doktrina

Ether 12:2–22

Maawattayonto ti saksi ti kinapudno no usarentayo ti pammati ken ni Jesucristo.

• Tapno matulongan dagiti miembro ti klase a mangutob no ania ti kayat a sawen ti aramaten ti pammati ken ni Jesucristo, mabalinmo a saludsoden kadakuada no ania dagiti imahe wenno balikas a mapanunotda no mangngegda ti balikas nga aramaten. (Mabalinmo a kitaen ti balikas iti maysa a diksionario.) Ania ti epekto nga ited ti panagwatwat iti bagi kadagiti bagitayo? Kasano a maaramattayo daytoy a pagbatayan iti pammati? Iti ania a wagwagas a mabalintayo nga “aramaten ti pammati” ken ni Cristo? Mabalin nga agsukisok dagiti miembro ti klase iti Ether 12:2–22 ket paglilinnawagan no kasano nga inaramat dagiti tao a nadakamat kadagitoy a bersikulo ti pammati. Kasano a masurottayo dagiti pagwadanda? Segun kadagitoy a bersikulo, ania dagiti bunga ti panangaramat iti pammati ken ni Jesucristo?

• Dagiti pagarigan ti pammati iti Ether 12:7–22 ket mangted iti nasayaat a rebyu dagiti makaparegta nga estoria nga aggigiddan a naadalyo iti Libro ni Mormon. Nalabit a mabalin nga ibinglay dagiti miembro ti klase dagiti dadduma pay a pagarigan ti pammati ken no ania ti masursuroda manipud kadagitoy (masarakan dagiti dadduma pay iti Hebreo 11). Mabalinda pay nga ibinglay dagiti napudno a pagarigan manipud iti pakasaritaan ti pamilia iti bukodda a biag. Kasano a mangpapigsa dagitoy a pagarigan iti pammati ken ni Jesucristo ken iti Nailangitan nga Ama?

• Napno tiEther 12 iti nalawag a pannakaammo ken pannakaawat [insights] ken kinapudno maipapan iti pammati. Mabalin a sapulen dagiti miembro ti klase dagiti bersikulo iti daytoy a kapitulo a mangisuro maipapan iti pammati. Kalpasanna mabalinda nga isurat iti pisarra no ania ti matakuatanda.

Ether 12:1–9, 28, 32

Pammati ti mangiturong iti “namnama para iti nasaysayaat a lubong.”

• Mailadawan kadi ti maysa a tao iti klasem no apay a napateg ti angkora iti maysa a bilog? Mabalinmo nga ipakita ti ladawan ti maysa a bilog ken maysa nga angkora (wenno mangidrowing iti maysa iti pisarra) ket ilawlawag no ania ti mapasamak iti bilog nga awanan iti angkora. Ania ti mapasamak kadatayo no awanantayo iti namnama? Kalpasanna mabalin a basaen dagiti miembro ti klase ti Ether 12:4 ket pagsasaritaan no kasano a maipada ti namnama iti “angkora iti kararua[tayo].” Mabalinda pay a basaen ti Ether 12:1–9, 28, ken 32 ket ibinglay dagiti nalawag a pannakaammo ken pannakaawat [insights] a magun-odda maipapan iti namnama. Ania ti nasken a namnamaentayo? (kitaen iti Ether 12:4; Moroni 7:41; kitaen met iti Juan 16:33).

Ether 12:23–29

Babaen ti parabur ni Jesucristo, agbalin a napigsa dagiti nakapsut a banag.

• Tapno matulongam dagiti miembro ti klase a mapagbalin a bukodda dagiti kinapudno a nasursuro ni Moroni maipapan iti pagkapsutan ken pagpigsaan iti Ether 12, mabalinmo nga awisen dagiti miembro ti klase a mangpanunot iti maysa a tao a mabalin a makarikna a naawanan iti namnama gapu kadagiti pagkapsutanda. Kalpasanna allukoyem dagiti miembro ti klase a mangsukisok iti Ether 12:23–29 a mangsarak kadagiti mensahe a makatulong iti dayta a tao. No adda ditoy ni Moroni ita, ania koma ti maibagana a mangallukoy kenkuana? Mabalin pay nga ibinglay dagiti miembro ti klase dagiti padas manipud iti bukodda a biag idi tinulongan ida ti Mangisalakan nga “aramiden a napigsa kadakuada dagiti nakapsut a banag” (Ether 12:27). Kasano a maigiddiat daytoy a panagbalbaliw manipud kadagiti panagkagumaan a panangpasayaat iti bagi a mabalin nga aramiden ti maysa a tao a saan nga agpannuray iti Mangisalakan? Para iti ad-adu pay maipapan itoy a topiko, kitaen iti palawag ni Presidente Henry B. Eyring iti “Dagiti Nainayon a Resources.”

• Ti padas ni Moroni ti maysa kadagiti adu iti nasantuan a kasuratan a mangipakita no kasano a mamagbalin ti parabur ti Mangisalakan a pagpigsaantayo dagiti pagkapsutantayo. Mabalin a makatulong a bingayen ti klase iti kada grupo, dutokan ti tunggal grupo a mangpili iti maysa a tao iti nasantuan a kasuratan nga addaan iti pagkapsutan, ket mangilawlawag no kasano nga inaramid ti Apo a napigsa dayta a tao. Naisingasing ti sumagmamano a pagarigan iti “Dagiti Nainayon a Resources.” Mabalinmo pay nga isingasing nga irebyu dagiti miembro ti klase ti kaipapanan ti parabur iti Pangiwanwan iti Nasantuan a Kasuratan wenno Napudno iti Pammati (dagiti panid 77–78). Kasano a mangiladawan iti bileg ti parabur ti Mangisalakan dagiti pagarigan iti nasantuan a kasuratan nga inadalda? Kasano nga awisentayo ti bileg ti priesthood iti biagtayo?

• Gagangay ti mangidasig kadagiti pagkapsutantayo kadagiti pagpigsaan ti sabali a tao; nupay narikna ni Moroni a sisusupiat a nangidasig iti kabsat ni Jared (kitaen iti Ether 12:24). Apay a napeggad a mangidasig iti bagbagitayo kadagiti dadduma? Segun iti Ether 12:26–27, kasano a tarigagayan ti Apo a makitatayo ti pagkapsutantayo? (kitaen met iti palawag ni Presidente Henry B. Eyring iti “Dagiti Nainayon a Resources”). Kasano a tarigagayanna a makitatayo ti pagkapsutan dagiti dadduma? (kitaen iti Ether 12:26).

Ether 13–15

Ti saan a panangawat kadagiti propeta ti mangisangbay iti naespirituan a peggad.

• Naikkan kadagiti napapateg a kinapudno a naisuro iti Ether 12, mabalin a saanmo a pilien ti mangbubos iti adu nga oras iti klase kadagiti kapitulo 13–15. Nupay kasta, mabalin a napateg a pagupgop biit iti maysa a miembro ti klase no ania ti mapasamak kadagitoy a kapitulo. Tapno matulongan dagiti miembro ti klase a mangsarak kadagiti napapateg a mensahe iti daytoy a pakaammuan, mabalinmo nga idawat kadakuada a mangkompleto iti ragup ti balikas, a “kasta a makitatayo …” iti adalen a sursuruenda manipud iti pannakatnag dagiti Jaredite. Kasano a maipada ti pannakatnagda iti pannakatnag dagiti Nephite? (kitaen, kas pagarigan, iti Ether 15:19 ken Moroni 8:28). Ania ti tarigagayan ti Apo a sursuruentayo manipud kadagitoy a pakaammuan, ken ania ti maaramidtayo tapno maliklikan ti pinagpasaran dagiti Jaredite? Mabalin met nga irebyu dagiti miembro ti klase no kasano a mainaig ti libro ni Ether iti Omni 1:19–22; Mosiah 8:8; ken Mosiah 28:11–18.

icon iti panagsursuro

Yallukoy ti Panagsursuro iti Pagtaengan

Iti sumaruno a lawas rugianto dagiti miembro ti klase ti panangadal iti libro ni Moroni. Mabalin a matakuatanda a makaay-ayo a mangammo a saan a sigud a plinano ni Moroni nga isurat ti ania man a banag nga ad-adu pay kalpasan ti libro ni Ether, ngem nagtalinaed isuna a sibibiag iti napapaut pay ngem iti ninamnamana. Iti daytoy a lawas rugiandanto ti panangbasa kadagiti maudi a mensahe a nakaparegtaan nga insurat ni Moroni sakbay a natay isuna.

resources icon

Dagiti Nainayon a Resources

Agkasapulan ti naespirituan a panagdur-as iti panangkita kadagiti pagkapsutantayo.

Ni Presidente Henry B. Eyring, iti panagkomentona iti Ether 12:27, insurona: “Kinuna ni Moroni idi ‘nangngegna dagitoy a balikas,’ isu ket ‘naliwliwa’ (Ether 12:29). Makapagbalinda a liwliwa iti amin kadatayo. Saan a dumur-as dagiti saan a mangkita kadagiti pagkapsutanda. Ti kinamannakaammom iti pagkapsutam ket maysa a bendision no tulongannaka daytoy nga agtalinaed a napakumbaba ken agsubli iti Mangisalakan. Saannaka laeng a liwliwaen ti Espiritu, ngem Isu pay ti mangibagi a pangitrabahuan ti Pannubbot iti maysa a panagbalbaliw iti mismo a kinataom. Kalpasanna agbalin a napigsa dagiti nakapsut a banag” (“My Peace I Leave with You,” Ensign wenno Liahona, Mayo 2017, 16).

Dagiti pagarigan: Maaramid a napigsa dagiti nakapsut.

• Enoc (Moises 6:31–34; 7:13)

• Moises (Exodo 4:10–12; 14:31)

• Gideon (Uk-ukom 6:12–16; 8:22–23)

• Pedro(Lucas 5:8–10; 22:55–62; Dagiti Aramid 4:13–21)

• Moroni (Ether 12:23–29)

• Joseph Smith (Joseph Smith—Pakasaritaan 1:28; DK 35:17; 135:3)

Panangpadur-as iti Panangisurotayo

Isuro ti “apay.” No dadduma masdaaw dagiti agad-adal—nangruna dagiti agtutubo—no kasano nga adda pakainaigan kadakuada dagiti pagbatayan ti ebanghelio wenno no apay a nasken nga agtungpalda kadagiti masinunuo a bilin. Nupay kasta, no maawatanda ti agnanayon a plano ti Nailangitan nga Ama para iti pagragsakan dagiti annakna, dagiti gapu para kadagiti pagbatayan ti ebanghelio ken bilin ket agbalin a nalawlawag ken ad-adda a maguyugoyda nga agtulnog” (Panangisuro iti Wagas ti Mangisalakan, 20).