“Nobiembre 9–15. Ether 1–5: ‘Ray-abenyo Dayta Belo ti Kaawan ti Pammati,’” Umaykayo, Sumurot Kaniak—Para iti Sunday School: Libro ni Mormon 2020 (2020)
“Nobiembre 9–15. Ether 1–5,” Umaykayo, Sumurot Kaniak—Para iti Sunday School: 2020
Dagiti Jaredite a Pumampanaw iti Babel, ni Albin Veselka
Nobiembre 9–15
Ether 1–5
“Ray-abenyo Dayta Belo ti Kaawan ti Pammati”
Ania dagiti kinapudno a nasursurom kabayatan ti bukodmo a panagadal iti Ether 1–5 a mabalinmo nga ibinglay kadagiti sursuruam? Ania dagiti gundaway a maitedmo kadakuada a mangibinglay no ania ti nasursuroda?
Isuratmo Dagiti Impresionmo
Yawis ti Panagbibinninglay
Ibilang daytoy a managpartuat a wagas a pangawis iti panangbibinninglay: Mangipasa iti batbato iti 16 a miembro ti klase, ket mangawis iti sumagmamano kadakuada a mangibinglay iti kinapudno a malagipda manipud iti bukod wenno sangapamiliaan a panagadalda iti Ether 1–5. Ania ti aramidenda gapu iti no ania ti nasursuroda?
Isuro ti Doktrina
No agtultuloytayo nga umawag iti Apo, ipalgaknanto ti pagayatanna.
-
Inkarigatan ti tunggal maysa kadatayo a mangsapul iti maysa a sungbat iti maysa a problema wenno saludsod. Kasano a makatulong dagiti padas ti kabsat ni Jared kadagiti sursuruam nga agsursuro no kasano ti agpatulong iti Apo? Nalabit a makapagdrowingka iti maysa a tsart iti pisarra nga addaan kadagiti kolum a nasuratan iti Ti saludsod ti kabsat a lalaki ni Jared, Ti tignay ti kabsat ni Jared, ken Ti sungbat ti Apo. Kalpasanna mabalinmo a bingayen ti klase iti tallo a grupo ket idutokmo ti maysa a kolum iti tunggal grupo. Makapagtitinnulong ti tunggal grupo a mangbasa biit iti Ether 1:33–43 ken 2:16–3:6 ket isurat no ania ti masarakanda iti naidutok a kolumda. Kalpasanna mabalin a paglilinnawagan ti klase dagiti saludsod kas kadagitoy: Ania ti masursurotayo maipapan kadagiti nadumaduma a wagas a mabalin a pilien ti Apo a makatulong kadatayo? Ania ti masursurotayo maipapan iti akemtayo iti proseso ti panangawat iti paltiing? Nalabit a mabalin nga ibinglay dagiti miembro ti klase dagiti dadduma a pagarigan manipud kadagiti nasantuan a kasuratan a mangisuro kadagiti isu met laeng a pagbatayan. Ti palawag manipud ken ni Elder Richard G. Scott iti “Dagiti Nainayon a Resources” ket mangted kadagiti nayon a nalawag a pannakaammo ken pannakaawat [insights] maipapan no kasano a sungbatan ti Apo dagiti kararag.
-
Ti kararag ti kabsat ni Jared iti Ether 3:1–5 ket mabalin a mangparegta kadagiti miembro ti klase a mangamiris kadagiti bukod a kararagda. Nalabit a mabalin nga ipapan dagiti miembro ti klase a mangmangtedda iti balakad iti maysa a tao nga agsursuro pay laeng nga agkararag. Ania koma ti balakad a maitedda? Kalpasanna mabalinda a sukisoken ti Ether 3:1–5 ken gupgopen ti tunggal bersikulo iti maysa wenno dua a tip wenno pagbatayan maipapan iti no kasano ti agkararag a sisasamay. Ibilang ti panangted kadagiti miembro ti klase iti sumagmamano a minuto tapno panunoten maipapan kadagiti bukodda a kararag ken no kasano a masurotda ti pagwadan ti kabsat ni Jared a mangaramid a napatpateg dagiti kararagda.
-
Kalpasan ti panangibinglay iti naipalgak a padas ti kabsat ni Jared Ether 3, nangted ni Moroni iti balakad iti Ether 4 maipapan no kasano a maawattayo ti paltiing manipud iti Apo. Tapno matulongan dagiti miembro ti klase nga agsursuro manipud iti daytoy a balakad, mabalinmo nga ipakita ti maysa a ladawan ni Jesucristo ket awisem dagiti miembro ti klase a mangsukisok iti Ether 4:8–10 kadagiti banag a mabalin a manglapped kadatayo iti panangawat iti paltiing wenno kinapudno manipud iti Apo. Bayat ti panangibinglay dagiti miembro ti klase no ania ti masarakanda, mabalinmo nga in-inut a kaluban ti ladawan ni Cristo iti maysa a lupot wenno papel. Kasano a maliklikantayo dagitoy naespirituan a tubeng iti biagtayo? Sumaruno, mabalin a sukisoken dagiti miembro ti klase ti Ether 4:7, 11–15, a mangsapsapul iti no kasano a maikaritayo nga umawat iti kinapudno manipud iti Apo. Bayat ti panangibinglay dagiti miembro ti klase no ania ti nasarakanda, ikkatem ti lupot wenno ti papel. Ania ti kayat a sawen ti “panangaramat iti pammati … iti Apo, a kas iti inaramid ti kabsat ni Jared”? (Ether 4:7; kitaen met iti Ether 3:1–9). Ania ti kayat a sawen ti “ray-aben [ti] belo ti kaawan ti pammati” iti biagtayo? (Ether 4:15). Kasano a matulongantayo dagiti dadduma a mangaramid met iti kastoy? Mabalin met a sapulen dagiti miembro ti klase dagiti kinapudno maipapan iti bukod a paltiing iti mensahe ni Presidente Russell M. Nelson “Revelation for the Church, Revelation for Our Lives” (Ensign wenno Liahona, Mayo 2018, 93–96).
Babaen ti pannusana, awisennatayo ti Apo nga agbabawi ken umasideg Kenkuana.
-
Uray ti maysa a propeta a naindaklan a kas iti kabsat ni Jared ket umawat iti pannakadusa manipud iti Apo. Kinapudnona, paset ti namagbalin kenkuana a naindaklan ti wagas a panagrespondena iti pannusa. Tapno matulongan dagiti miembro ti klase nga agsursuro manipud iti pagwadan ti kabsat ni Jared, mabalinmo nga awisen ida nga aggigiddan a mangbasa iti Ether 2:14–15 iti kada paris. Kalpasanna idawat kadakuada nga aginkukuna a maysa kadakuada ti kabsat ni Jared ken ti sabali ti maysa a tao a kaaw-awatna ti pannakadusa manipud iti maysa a dadaulo ti Simbaan wenno naganak. Pailawlawag wenno payakem kadakuada no ania ti mabalin nga ibaga ti kabsat ni Jared maipapan iti bukodna a padas a makatulong iti daytoy a tao. Ania a balakad a maitedna? Ania dagiti adalen a masursurotayo a mangtulongto kadatayo nga umas-asideg iti Nailangitan nga Ama? Mabalinmo met nga ilawlawag no kasano a ti pannusa ti Apo ken ti panagresponde ti kabsat ni Jared ket mabalin a nakatulong a mangisagana kenkuana para iti padasna iti Ether 3:1–20. Adtoy ti sumagmamano a a dadduma pay a resources a makatulong: ti mensahe ni Elder D. Todd Christofferson “As Many as I Love, I Rebuke and Chasten” (Ensign wenno Liahona, Mayo 2011, 97–100) wenno ti benneg a napauluan iti “Discipline” iti mensahe ni Elder Lynn G. Robbins a “The Righteous Judge” (Ensign wenno Liahona, Nob. 2016, 96–97).
Paneknekan ti tallo a saksi maipanggep iti kinapudno ti Libro ni Mormon.
-
Ti panagsursuro iti ad-adu pay maipapan iti padto ni Moroni maipanggep iti Tallo a Saksi ket makatulong a mangpapigsa kadagiti pammaneknek dagiti miembro ti klase iti Libro ni Mormon. Nalabit a mabalin a basaen ti kagudua ti klase ti Ether 5 ken ti sabali pay a kagudua a mangbasa iti “Ti Pammaneknek ti Tallo a Saksi” (iti rugi ti Libro ni Mormon) ket agbibinninglayda no ania ti mariknada iti panggep ti Apo iti panangpalugodna iti Tallo a Saksi a mangkita iti maysa nga anghel ken dagiti pinanid. Mabalinda met nga ilawlawag dagiti dadduma pay a pagarigan a nangipasdekan dagiti adu a saksi iti kinapudno (kitaen, kas pagarigan, iti Mateo 3:13–17; 18:15–16; Juan 5:31–47; DK 128:3). Ania dagiti saksi iti biagtayo a nangparegta kadatayo a mamati? Kasano a “naipakita” kadatayo “ti bileg ti Dios ken kasta met ti balikasna” iti Libro ni Mormon? (Ether 5:4).
Yallukoy ti Panagsursuro iti Pagtaengan
Awisem dagiti miembro ti klase a mangipapan a dagiti dadauloda iti politika ket agtultuloy iti panagtiliw ken panagpatay iti tunggal maysa. Iti Ether 6–11, mabasadanto maipapan no kasano a napasamak daytoy kadagiti an-annabo ni Jared ken ti kabsatna. Masarakandanto pay ti sumagmamano a ballaag a mangtulongto kadakuada a mangliklik kadagiti parikut a nakaipasanguan dagiti Jaredite.
Dagiti Nainayon a Resources
Panangbigbig kadagiti sungbat iti kararag.
Insuro ni Elder Richard G. Scott:
“No ilawlawagtayo ti maysa a parikut ken ti naisingasing a pangrisut, no dadduma sungbatanna iti wen, no dadduma saan. Masansan nga agkedked a mangted iti sungbat, saan a gapu iti kaawan iti pakaseknan, ngem gapu ta ay-ayatennatayo—a naan-anay. Tarigagayanna nga aramatentayo dagiti kinapudno nga intedna kadatayo. Tapno dumur-astayo, nasken nga agtalektayo iti kabaelantayo nga agaramid kadagiti umno a pangngeddeng. Nasken nga aramidentayo no ania ti mariknatayo a rumbeng. Iti naituding a panawen, sumungbatto Isuna. Saannatayonto a paayen. …
“… Tarigagayanna nga agtignaytayo a manggun-od ti kasapulan a padas:
“No sumungbat Isuna iti wen, mangted daytoy kadatayo iti panagtalek.
“No sumungbat Isuna iti saan, manglapped daytoy iti biddut.
“No agkedked a mangted Isuna iti sungbat, daytoy ket mangpadur-as kadatayo babaen iti pammatitayo Kenkuana, panagtungpal kadagiti bilinna, ken kinatallugod nga agtignay babaen iti kinapudno. Manamnama kadatayo nga agsungbat iti pagrebbengan babaen ti panagtignay iti pangngeddeng a maitunos kadagiti pannursurona nga awan ti umuna a pammatalged. Nasken a ditayo agtugaw a di agtignay nga agur-uray wenno agdayengdeng gapu ta saan a nagsao ti Apo. Nasken nga agtignaytayo” (“Learning to Recognize Answers to Prayer,” Ensign, Nob. 1989, 31–32).
Panangpadur-as iti Panangisurotayo
Agibasar nga umuna kadagiti nasantuan a kasuratan. Dagiti nasantuan a kasuratan koma ti kangrunaan a pagadawan para iti panagadalmo ken panagsaganam. Saanmo a liplipatan a dagiti balikas dagiti agdama a propeta ket mangnayon kadagiti pagrukodan nga aramid [standard works] ken dagitoy pay ti nasantuan a kasuratan (kitaen iti Panangisuro iti Wagas ti Mangisalakan, 17–18).