“Septiembre 28–Oktubre 11. 3 Nephi 17–19: ‘Adtoy, Naan-anay ti Ragsakko,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Septiembre 28–October 11. 3 Nephi 17–19,” Umaykayo, Sumurot Kaniak—Para kadagiti Indibidual ken Pamilia: 2020
Linawagan Ida ti Silnag ti Rupana, ni Gary L. Kapp
Septiembre 28–Oktubre 11
3 Nephi 17–19
“Adtoy, Naan-anay ti Ragsakko”
Idinto a kangrunaan a nakapamaysa dagiti immun-una a kapitulo iti 3 Nephi kadagiti balikas ti Mangisalakan, iladawan dagiti kapitulo 17–19 ti panagserbi ken panangisurona kadagiti tao. Bayat ti panangbasam kadagitoy a kapitulo, ania ti isuro ti espiritu kenka maipapan iti Mangisalakan?
Isuratmo dagiti Impresionmo
Kalkalpas ni Jesucristo a nangbubos iti aldaw a panagserbina iti daga ti Bountiful, panangisuro iti ebangheliona, pannangted kadagiti tao ti gundaway a mangkita ken mangrikna kadagiti marka iti nagungar a bagina, ken panangipaneknek nga Isu ti naikari a Mangisalakan. Ket orasen para Kenkuana tapno pumanaw. Kasapulanna ti agsubli iti Amana, ket ammona a kasapulan dagiti tao ti oras a mangutob iti no ania ti insurona. Kamayatanna nga agsubli iti sumaruno nga aldaw, pinagawidna ti ummong kadagiti pagtaenganda. Ngem awan ti pimmanaw. Saanda nga imbaga no ania ti marikriknada, ngem narikna ni Jesus daytoy: namnamaenda ti “panagbayagna pay bassit kadakuada” (3 Nephi 17:5). Adda dagiti dadduma pay a napateg a banag nga aramidenna, ngem ti gundaway a mangipakita iti pannakipagrikna ket saan a kanayon a sumangbay iti maysa a nawaya a kanito, isu a nagtalinaed pay bassit ni Jesus kadagiti tao. Ti simmaruno ti nalabit a kangrunaan a pagwadan ti panagserbi a naisurat iti nasantuan a kasuratan. Ti la makuna dagidi nakaimatang idi ket maysa dayta a saan a mailadawan (kitaen iti 3 Nephi 17:16–17). Ginupgop ni Jesus Mismo ti naplano a pannakaibukbok ti espiritu kadagitoy simple a balikas: “Ket ita adtoy, naan-anay ti ragsakko” (3 Nephi 17:20).
Dagiti Kapanunotan para iti Bukod a Panagadal iti Nasantuan a Kasuratan
Ti Mangisalakan ti naan-anay a pagwadak iti panagserbi.
Ammotayo nga adda agarup 2,500 a tattao (kitaen iti 3 Nephi 17:25) a nakapadas iti immuna nga isasarungkar ni Cristo, kas naisurat iti 3 Nephi 11–18. Ngem nakasapul ti Mangisalakan iti wagas a pakapagserbianna iti tunggal maysa kadakuada. Ania ti masursurom maipapan iti panagserbi manipud iti pagwadan ti Mangisalakan iti daytoy a kapitulo? Ania dagiti kasapulan a nakapagserbianna? Utobem no kasano a makatulong kenka ti pagwadanna tapno makapagserbi kadagiti dadduma.
Kitaenyo dagiti Ubbingyo, ni Gary L. Kapp
3 Nephi 17:13–22; 18:15–25; 19:6–9, 15–36
Sinuruannatayo ti Mangisalakan no kasano ti agkararag.
Panunotem ti no ania koma ti kayarigan ti pannakangngeg iti Mangisalakan a mangikarkararag kenka? Ania koma ti mabalin nga isaona a para kenka? Mabalin a mangyeg kenka iti kapanunotan dagiti pannursuro ken kararagna kadagitoy a kapitulo. Bayat ti panagadalmo, ania ti masursurom manipud iti pagwadan ni Cristo a mangaramid a napatpateg dagiti bukodmo a kararag? Ania dagiti bendision manipud iti panagkararag ti nakitamon iti biagmo?
Makapagbussogak a naespirituan bayat ti pannakiranudko iti sakramento.
Bayat ti panangbasam iti 3 Nephi 18:1–12, utobem no kasano a matulongannaka ti pannakiranudmo iti sakramento a naespirituan a “mabsog”(3 Nephi 18:3–5, 9; kitaen met iti 3 Nephi 20:1–9). Kas pagarigan, mabalinmo nga ilista dagiti saludsod a mangyallukoy iti bukod a panagpanunot no makiranudka iti sakramento, kas iti “Kasano ti mariknak maipapan iti Mangisalakan ken ti Sakripisiona para kaniak?” “Kasano a mangimpluensia ti sakripisionaiti inaldaw a panagbiagko?” wenno “Ania ti nasayaat nga ar-aramidek kas maysa a disipulo, ken ania ti mapasayaatko?”
Dagitoy a balikas manipud ken ni Pesidente Henry B. Eyring ti mabalin a mangtulong kenka a mangutob iti maysa a wagas a pakatulongan ti sakramento kenka a naespirituan a nabsog: “Bayat ti panangamirismo iti biagmo kabayatan ti ordinansa ti sakramento, sapay koma ta maipamaysa ti pampanunotyo saan laeng kadagiti banag a nakaaramidanyo iti biddut ngem kasta met kadagiti banag a nakaaramidanyo iti umno—dagiti kanito a nakariknaanyo a naragsakan kadakayo ti Nailangitan nga Ama ken ti Mangisalakan. Maaddaankayo pay iti kanito kabayatan ti sakramento a mangidawat iti Dios a tulongannakayo a mangkita kadagitoy a bambanag. … No naaramidkon daytoy, impanamnama kaniak ti Espiritu nga idinto ta adayoak pay iti panagbalin a perpekto, nasaysayaatak ita ngem idi kalman. Ken daytoy ti nangted kaniak iti panagtalek a, gapu iti Mangisalakan, mabalinko ti agbalin a nasaysayaat inton bigat” (“Always Remember Him,” Ensign, Peb. 2018, 5).
Kalikaguman a gun-oden dagiti disipulo ni Jesucristo ti sagut ti Espiritu Santo.
Panunotem maipapan iti naisaom iti kararagmo itay nabiit. Ania ti isuro kenka dagiti kararagmo maipapan kadagiti kaunggan a tarigagaymo? Kalpasan ti panangbubosda iti maysa nga aldaw iti sidong ti Mangisalakan, ti ummong “inkararaganda ti kaskenan kadakuada”— ti sagut ti Espiritu Santo (3 Nephi 19:9). Bayat ti panagbasam kadagitoy a binatog, utobem ti bukodmo a tarigagay para iti panangkadkadua ti Espiritu Santo. Ania ti nasursurom maipapan iti panagkalikagummo a manggun-od iti panangkadkadua ti Espiritu Santo?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
3 Nephi 17
Bayat ti panagbasayo iti daytoy a kapitulo a sangapamiliaan, ibilang ti panagsardengyo sagpaminsan tapno mangawis iti pamiliayo a mangipapan iti panangpadasda kadagitoy a pasamak. Kas pagarigan, mabalinmo a damagen dagiti saludsod kas iti “Ania dagiti sagabaen a yasidegmo iti Mangisalakan tapno mapaimbag?” “Ania ti kayatmo nga ikararaganna para kenka?” wenno “Asino kadagiti ipatpategmo ti kayatmo a bendisionanna?” Ti panangbasa itoy a kapitulo ket mabalin a mangparegta pay kenka nga agkararag para kadagiti miembro ti pamiliam, saggaysa, a kas iti inaramid ni Jesus.
3 Nephi 18:1–12
Ania ti kayat a sawen ti “mataraonan” babaen ti pannakiranud iti sakramento, ken kasano ti panangpadastayo iti daytoy? Ania ti masursurotayo manipud kadagiti bersikulo 5–7 maipapan no apay nga inted ni Jesus kadatayo ti ordinansa ti sakramento?
3 Nephi 18:17–21
Ania ti masursurotayo manipud kadagitoy a bersikulo maipapan kadagiti panggep ti kararag? Kasano a mapadur-astayo ti nespirituan a bileg dagiti kararagtayo, agpada kas indibidual ken kas pamilia?
3 Nephi 18:25; 19:1–3
Ania ti napadasanen ti pamiliatayo babaen ti ebanghelio a kayattayo met a mapadasan ti tunggal tao iti aglawlawtayo? Kasano a masurottayo ti pagwadan dagiti tao kadagitoy a bersikulo ken “[n]agikamakam iti trabaho[na]” (3 Nephi 19:3) a mangyeg kadagiti dadduma ken ni Cristo, tapno met “ marikna ken makitada” (3 Nephi 18:25) no ania ti nasarakantayo iti ebanghelio?
Para kadagiti nayon a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Bay-an a tarabayennaka ti Espiritu iti panagadalmo. Maiturongnaka ti Espiritu Santo kadagiti banag a kasapulam a masursuro iti inaldaw. Agbalinka a managrikna kadagiti pariknana, uray no kasla isingasingda nga agbasaka iti sabali pay a topiko wenno agadalka iti sabali a wagas ngem iti gagangay ar-aramidem. Kas pagarigan, bayat ti panagbasam maipapan iti sakramento iti 3 Nephi 18, mabalin nga iparikna kenka ti Espiritu a bubosem ti ad-adu pay nga oras iti dayta a topiko ngem iti naplanom.
Nakitada a Nakalukat dagiti Langit, ni Walter Rane