“Oktubre 12–18. 3 Nephi 20–26: ‘Annaknakayo iti Katulagan,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Oktubre 12–18. 3 Nephi 20–26,” Umaykayo, Sumurot Kaniak—Para kadagiti Indibidual ken Pamilia: 2020
Ladawan ni Cristo iti panagparangna kadagiti Nephite ni Andrew Bosley
Oktubre 12–18
3 Nephi 20–26
Annaknakayo iti Katulagan”
Idi agsarsarita maipapan kadagiti nasantuan a kasuratan, masansan nga usaren ni Jesus ti balikas nga amirisen [sukisoken] (kitaen iti 3 Nephi 20:11; 23:1, 5). No basaem ti 3 Nephi 20–26, anianto ti sukisokem?
Isuratmo dagiti Impresionmo
No mangngegmo dagiti tao nga agusar kadagiti termino a kas iti balay ti Israel, mariknam kadi a sarsaritaenda ti maipapan kenka? Dagiti Nephite ken Lamanite ti talaga nga an-annabo ti Israel—nangrugi ti estoriada idiay Jerusalem—ngem iti sumagmamano kadakuada, ti Jerusalem ket kasla “ili nga adayo, ti ili a saanmi nga ammo” (Helaman 16:20). Wen, isuda “a sanga ti kayo ti Israel,” ngem isuda met ti “napukaw iti bagina” (Alma 26:36; kitaen met iti 1 Nephi 15:12). Ngem idi nagparang ti Mangisalakan kadakuada, tinarigagayanna a maammuanda a saanda a napukaw Kenkuana. “Ket addakayo iti balay ti Israel,” kinunana, “ket addakayo iti katulagan” (3 Nephi 20:25). Mabalin nga isaona kenka ti maysa a banag ita nga aldaw, para iti siasino man a nabuniagan ken nagaramid kadagiti katulagan Kenkuana ket adda met iti balay ti Israel, “iti katulagan,” sadino man ti nagtaudam wenno pagnaedam. Iti sabali a balikas, no agsao ni Jesus maipapan iti balay ti Israel, agsasao iti maipapan kenka. Ti pangiturong a mangbendision “ti amin nga agkakabagyan iti daga” ket para kenka (3 Nephi 20:27). Ti awis nga “agriingka manen, ket urnongem ti pigsam” ket para kenka (3 Nephi 20:36). Ket ti nakapatpateg a karina, “Ti kinamanagayatko saanto a mapukaw kenka, ket di met maikkat ti katulagak iti kinatalna,” ket para kenka (3 Nephi 22:10).
Dagiti Kapanunotan para iti Bukod a Panagadal iti Nasantuan a Kasuratan
Kadagiti ud-udina nga aldaw, agaramidto ti Dios iti naindaklan ken nakaskasdaaw nga aramid.
Nangted ti Mangisalakan iti ummong kadagiti sumagmamano a kari ket nagipadto maipapan iti masakbayan dagiti natulagan a taona—ket nairamanka. Kas kinuna ni Presidente Russell M. Nelson: “Datayo dagiti naitulag a tattao ti Apo. Karbengantayo ti makiraman a personal iti pannakaipatungpal dagitoy a kari. Anian a kinaregta a panawen nga agbiag! ” (“The Gathering of Scattered Israel,” Ensign wenno Liahona, Nob. 2006, 79).
Sapulem dagiti padto maipapan kadagiti maudi nga aldaw kadagiti sao ti Apo iti 3 Nephi 20–22. Ania kadagitoy dua a padto ti naipangpangruna a makaparagsak kenka? Ania ti maaramidmo a makatulong a maipatungpal dagitoy a padto kadagitoy a kapitulo?
Madlawmo a ti 3 Nephi 21:1–7 ket mangipakita a ti yaay ti Libro ni Mormon (“dagitoy a banag” kadagiti bersikulo 2 ken 3) ket maysa a tanda a dagiti kari ti Dios ket nangrugin a maipatungpal. Ania dagita a kari, ken kasano a makatulong ti Libro ni Mormon a maipatungpal dagitoy?
Kitaen met iti Russell M. Nelson, “Hope of Israel” (worldwide devotional for youth, Hunio 3, 2018), broadcasts.ChurchofJesusChrist.org.
Kayat ti Mangisalakan a sukisokek dagiti balikas dagiti propeta.
Ipalgak dagiti balikas ken tignay ti Mangisalakan iti intero kadagitoy a kapitulo no kasano ti mariknana maipapan kadagiti nasantuan a kasuratan. Ania ti masursurom maipapan kadagiti nasantuan a kasuratan iti 3 Nephi 20:10–12; 23; ken 26:1–12? Ania ti masarakam kadagitoy a bersikulo a mangparegta kenka nga “amirisen [sukisoken] dagitoy a banag a sireregta”? (3 (Nephi 23:1).
Naasi ti Dios kadagiti agsubli Kenkuana.
Iti 3 Nephi 22 ken 24, inadaw ti Mangisalakan dagiti balikas manipud kada Isaias ken Malakias a napnuan kadagiti nalawag a ladawan ken panagidasig—dagiti namaris a pamuon a batbato, dagiti uring iti apuy, napatarnaw a pirak, dagiti tawa ti langit. Mabalin a makaay-ayo nga ilista dagitoy. Ania ti isuro ti tunggal maysa kenka maipapan iti relasion ti Dios kadagiti taona? Kas pagarigan, idasig ti 3 Nephi 4–8 ti Dios iti maysa nga asawa a lalaki ken dagiti taona iti maysa nga asawa a babai. Ti panangbasam maipapan kadagitoy a ladawan ket mabalin a mangguyugoy kenka maipapan iti bukodmo a ralasion iti Apo. Kasano a naipatungpal iti biagmo dagiti kari kadagitoy a kapitulo? (kitaen iti 3 Nephi 22:7–8, 10–17; 24:10–12, 17–18).
Naken a maiturong ti pusok kadagiti kapuonak.
Ti naikari a panagsubli ni propeta Elias ket sigagagar a pinasungadan dagiti Hudio iti intero a lubong iti adu a siglo. Ammo dagiti Santo iti Ud-udina nga Aldaw a nagsubli ni propeta Elias, a nagparang ken ni Joseph Smith iti Templo ti Kirtland idi 1836 (kitaen iti DK 110:13–16). Ti aramid a mangiturong ti puspuso kadagiti amma—aramid iti templo ken pakasaritaan ti pamilia—ket narugianen ken maar-aramiden. Ania dagiti addan a padasmo a nakatulong iti panangiturong ti pusom kadagiti kapuonam?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
3 Nephi 22:2
Kalpasan ti panangbasam iti daytoy a bersikulo, mabalinmo ti agaramid iti maysa a tolda ket pagsasaritaan ti maipapan iti no kasano a mayarig ti Simbaan iti maysa a tolda iti kabakiran. Ania ti mabalin a kayat a sawen ti “paatiddogem dagiti lubid[na]” ket “patibkerem dagiti istaka[na]”? Kasano nga awisentayo dagiti dadduma nga agsapul iti “salinong” iti Simbaan? ( kitaen iti video a “Welcome” iti ComeUntoChrist.org).
3 Nephi 23:6–13
No nasken nga amirisen ti Mangisalakan dagiti pakasaritaan nga indulin ti kaamaantayo, ania dagiti saludsod a mabalinna a damagen kadatayo? Adda kadi dagiti napateg a pasamak wenno naespirituan a padas a nasken nga isurattayo? Itan ti mabalin a nasayaat a panawen a mangaramid wenno mangnayon iti kasuratan ti kaamaan ket aggiinnuman a sangkamaysa maipapan iti no ania ti iraman. Mabalin a magustuan dagiti in-inaudi a miembro ti pamilia a mangarkos iti kasuratanyo kadagiti ladawan wenno drowing. Apay a napateg nga isurat dagiti nespirituan a padas ti pamiliatayo?
3 Nephi 24:7–18
Kasano a napadasantayo dagiti bendision ti panagbayad iti apagkapullo a naikari kadagitoy a bersikulo ? Ti mensahe ni Elder David A. Bednar a “The Windows of Heaven” (Ensign wenno Liahona, Nob. 2013, 17–20) ket makatulong kadagiti miembro ti pamiliam a mangilasin kadagitoy a bendision.
3 Nephi 25:5–6
Kasano a matulongam dagiti miembro ti pamiliam nga iturong ti puspusoda iti ammada? Mabalinmo a dutokan dagiti miembro ti pamilia a mangsursuro maipapan iti maysa kadagiti kapupuonmo ken mangibinglay iti dadduma pay iti pamilia no ania ti masursuroda (kitaen iti FamilySearch.org). Wenno mabalinyo ti agtitinnulong nga agsapul iti maysa a kapupuon nga agkasapulan kadagiti ordinansa ti templo ket mangplano iti panagbiahe a mapan iti templo tapno mangannong kadagita nga ordinansa.
Para kadagiti nayon a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Agbiagka iti pammaneknekmo. “Isurom no aniaka,” kinuna ni Elder Neal A. Maxwell. “Dagiti kababalinmo ti ad-adda a malaglagipto … ngem iti naipangpangruna a kinapudno iti naipangpangruna a leksion” (“But a Few Days” [address to Church Educational System religious educators, Sept. 10, 1982], 2). No kayatmo ti mangisuro iti maysa a pagbatayan ti ebanghelio, aramidem amin a kabaelam nga agbiag iti dayta nga ebanghelio.
Yegmo ti Kasuratan, ni Gary L. Kapp