Ti Kararag ni Cristo, ni Derek Hegsted

Oktubre 19–25

3 Nephi 27–4 Nephi

“Awanen ti Naragragsak a Tao”

Binilin ti Mangisalakan dagiti disipulona a mangisurat kadagiti banag a napadasanda (kitaen iti 3 Nephi 27:23–24). Bayat ti panagadalmo, isuratmo dagiti naespirituan a padas nga adda kenka.

Isuratmo dagiti Impresionmo

Saan laeng a napintas a pilosopia nga utoben dagiti pannursuro ni Jesucristo. Nalablabesda pay nga amang ngem dayta—kaipapananda ti mangbalbaliw iti biagtayo. Ti libro ti 4 Nephi ket mangted iti nakakakakigtot a pagarigan iti daytoy, a mangipakpakita no kasano a naan-anay a mangbalbaliw ti ebanghelio ti Mangisalakan iti maysa a tao. Kalpasan ti ababa a panagserbi ni Jesus, naggibus ti sinigsiglo a panagsusupanget dagiti Nephite ken Lamanite. Ti dua a pagilian a naam-ammo gapu iti sinnuppiat ken pasindayag ket “nagsangsangkamaysada, dagiti annak ni Cristo” (4 Nephi 1:17), ket nangrugi nga addaanda iti “agpapada iti amin a banag” (4 Nephi 1:3). Gapu iti “ayat ti Dios … a nagnaed iti puso dagiti umili,” ket “pudno awanen ti naragragsak a tao kadagiti amin a tao a pinarsua ti Dios” (4 Nephi 1:15–16). Daytoy no kasano a binalbaliwan dagiti pannursuro ti Mangisalakan dagiti Nephite ken Lamanite. Kasano a mabalbaliwandaka?

Dagiti Kapanunotan para iti Bukod a Panagadal iti Nasantuan a Kasuratan

3 Nephi 27:1–12

Ti Simbaan ni Jesucristo ket naawagan iti naganna.

Bayat ti panangrugi dagiti disipulo ti Mangisalakan a mangipasdek iti Simbaanna iti intero a daga, rimsua ti maysa a saludsod nga, iti dadduma, nalabit a kasla awan kaes-eskanna—ania ti nasken nga agbalin a nagan ti Simbaan? (kitaen iti 3 Nephi 27:1–3). Ania ti masursurom maipapan iti kapateg daytoy a nagan manipud iti sungbat ti Mangisalakan iti 3 Nephi 27:4–12? Idi 1838 impalgak ti Apo ti nagan ti Simbaanna iti agdama (kitaen iti DK 115:4). Utobem ti tunggal balikas iti dayta a nagan. Kasano a matulongantayo dagitoy a balikas a mangammo no asinotayo, no ania ti patientayo, ken no kasano nga agtignaytayo?

Kitaen met ti Russell M. Nelson, “The Correct Name of the Church,” Ensign wenno Liahona, Nob. 2018, 87–90; M. Russell Ballard, “The Importance of a Name,” Ensign wenno Liahona, Nob. 2011, 79–82.

3 Nephi 28:1–11

Bayat ti panangpatarnawko kadagiti tarigagayko, agbalinak a maysa a napudpudno a disipulo.

Ania koma ti isaom no saludsodennaka ti Mangisalakan, a kas iti panangsaludsodna kadagiti disipulona, “Ania ti tarigagayanyo kaniak?” (3 Nephi 28:1). Panunotem daytoy bayat ti panangbasam maipapan iti padas dagiti disipulo ti Mangisalakan iti 3 Nephi 28:1–11. Ania ti masursurom maipanggep kadagiti tarigagay ti puspuso dagiti disipulo manipud kadagiti sungbatda iti saludsodna? Insuro ni Presidente Dallin H. Oaks: “Tapno magun-odtayo ti agnanayon a panungpalantayo, agtarigagaytayo ket agtrabahotayonto para kadagiti kababalin a kasapulan tapno agbalin nga agnanayon a pinarsua. … Tarigagayantayonto ti agbalin a kas ken ni [Jesucristo]” (“Desire,” Ensign wenno Liahona, Mayo 2011, 44–45). Ania ti maaramidmo a mangaramid kadagiti tarigagay ti pusom a nalinlinteg? (Para iti ad-adu pay nga impormasion maipapan iti “panagbaliw a maaramid iti [bagi]” dagiti tallo a disipulo, kitaen iti 3 Nephi 28:37 ken “Nagbalbaliw a Parsua,” Pangiwanwan iti Nasantuan a Kasuratan, scriptures.ChurchofJesusChrist.org

4 Nephi 1:1–8

Ti pannakapasurot ken ni Jesucristo ken iti ebangheliona ket mangiturong iti panagkaykaysa ken kinaragsak.

Mapanunotmo kadi no ania ti kayarigan ti panagbiag kadagiti tawen kalpasan ti isasarungkar ti Mangisalakan? Kasano a napagtalinaed dagiti tao daytoy nadiosan a kappia iti napaut unay a panawen—iti dumani 200 a tawen? Bayat ti panangbasam iti 4 Nephi 1:1–18, ibilangmo ti panangmarka wenno panangisurat kadagiti pili nga inaramid dagiti tao tapno padasenda daytoy naparaburan a panagbiag.

Utobem no ania ti maaramidmo a makatulong iti pamiliam, ward, wenno purokmo nga agbiag iti dakdakkel a panagkaykaysa ken ragsak, a kas inaramid dagiti tao iti 4 Nephi. Ania dagiti pannursuro ni Jesucristo ti ad-adda a maibiagmo a naan-anay tapno maipatungpalmo daytoy a panggep a tun-oyen? Ania ti maaramidmo a mangtulong kadagiti dadduma a makaawat ken agbiag kadagitoy a pannursuro?

4 Nephi 1:19–49

Ti kinadangkes ti mangiturong iti pannakasayyasayya ken panagladingit.

Nakalidliday, a ti kagimongan a Zion a nailadawan iti 4 Nephi (kitaen met iti Moises 7:18) ket in-inut a naungaw. Bayat ti panangbasam iti 4 Nephi 1:19–49, sapulem dagiti galad ken kababalin a nakaigapu ti pannakadadael daytoy a kagimongan. Adda kadi dagiti makitam a tanda dagitoy a galad wenno kababalin iti bagim?

Kitaen met iti “Chapter 18: Beware of Pride,” Teachings of Presidents of the Church: Ezra Taft Benson (2014], 229–40).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

3 Nephi 27:13–21

Dagitoy a bersikulo ti makatulong kadagiti miembro ti pamilia nga ad-adda a maawatanda no ania ti kayat a sawen ti Mangisalakan idi dinakamatna ti “ebangheliok.” Kalpasan ti panangbasa ken panangilawlawag kadagitoy a bersikulo, mabalinmo a dawaten iti tunggal miembro ti pamilia a manggupgop iti maysa a binatog no ania ti ebanghelio.

3 Nephi 27:23–26

Kamustan ti ar-aramidentayo a panangisurat kadagiti banag a “nakita ken nangngegtayo”—kas indibidual wenno kas pamilia? Apay a napateg ti mangisurat kadagiti naespirituan a banag?

3 Nephi 27:30–31

Tapno makatulong kadagiti miembro ti pamilia a maawatanda ti ragsak nga inladawan ti Mangisalakan kadagitoy a bersikulo, mabalinyo ti agay-ayam iti maysa a game a makapaglemmeng dagiti miembro ti pamilia ket mangpadas a mangsapul ti sabali pay a miembro ti pamilia kadakuada. Daytoy ti mabalin a mangiturong iti maysa a panagsasarita maipapan iti no apay a nasken a sapulen ti tunggal miembro ti pamilia tapno “awan kadakuada ti mapukaw.” Kasano a matulongam dagiti miembro ti pamiliam nga agtalinaed a natibker iti ebanghelio wenno agsubli no immadayoda?

3 Nephi 28:17–18, 36–40

Ania ti masursurotayo manipud iti pagwadan ni Mormon idi saanna a naawatan amin ti maipapan iti panagbalbaliw a napasamak kadagiti tallo a Nephite? Ania ti mabalintayo nga aramiden no ditayo maawatan amin a banag maipapan iti maysa a pagbatayan ti ebanghelio? Insuro ni Presidente Dieter F. Uchtdorf: “Ipatpategnaka ti Dios. Denggennanto, ken sungbatannanto dagiti bukodyo a saludsod. Umayto ti sungbat dagiti kararagyo iti bukodna a wagas ken iti bukodna a panawen, ket ngarud, nasken a sursuruem ti dumngeg iti timekna” (“Receiving a Testimony of Light and Truth,” Ensign wenno Liahona, Nob. 2014, 21).

4 Nephi 1:15

Tapno maikkat ti panagsusupanget iti pagtaenganyo, mabalin a mangitudingdagiti miembro ti pamilia iti panggep a tun-oyen nga agbalin nga ad-adda a managayat iti tunggal maysa itoy a lawas. Kalpasan nga aggibus ti lawas, aggigiddan nga irebyuyo ti panagdur-asyo ket paglilinnawagan no kasano a ti panangipakita iti dakdakkel nga ayat ket nangapekto iti pamiliayo.

Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—para iti Primary.

Panangpadur-as iti Bukod a Panagadal

Agkalikagum a maaddaan iti paltiing iti inaldaw. Masansan nga umay ti paltiing iti “tunggal binatog” (2 Nephi 28:30). Bayat ti panangutobmo kadagiti bersikulo nga ad-adalem, mabalin nga umay kenka dagiti kapanunotan ken impresion iti unos ti aldaw. Saanmo a panunoten a ti panagadal iti ebanghelio a kas maysa a banag a “mailatangan iti oras” ngem kas maysa a banag a kanayonmo nga ar-aramiden (kitaen iti Panangisuro iti Wagas ti Mangisalakan, 12).

Ni Cristo ken dagiti Tallo a Disipulo a Nephite, ni Gary L. Kapp