Kraes i kamkamaot long Ol Man blong Nifae

Pikja blong Kraes we i kamkamaot long Ol Man blong Nifae, i kam long Andrew Bosley

12–18 Oktoba

3 Nifae 20–26

“Yufala I Ol Pikinini blong Kavenan”

Letem Spirit i lidim stadi blong yu long 3 Nifae 20–26. Bae Hem i helpem yufala blong faenem olgeta prinsipol we bae oli gat mining long ol pipol we yu stap tij.

Raetemdaon Ol Filing mo Tingting blong Yu

serem pikja bokis

Invaetem Ol Man blong Serem Wanem Oli Gat

Afta we yufala i ridim ol toktok blong Sevya we oli stap long 3 Nifae 23:1, yu save askem ol memba blong klas se, wanem nao oli bin lukaotem taem oli bin stap ridim ol skripja long wik ia. ?Wanem nao oli bin faenem?

tijing pikja bokis

Stap Tijim Doktrin

3 Nifae 20:25–41; 21:9–11, 22–29

Long ol las dei, God bae i wokem wan wok we i bigwan mo i gudfala.

• Sevya i tokbaot wan “wan bigfala mo gudfala wok” (3 Nifae 21:9) we Papa blong Hem bae i mekem long ol las dei. Maet ol memba blong klas oli save serem wanem nao oli bin lanem abaot wok ia taem oli stap stadi long ol japta ia long hom. Ol kwestin olsem oli save givim insperesen blong statem wan toktok insaed long klas: ?Wanem nao Sevya i bin talem se bae i hapen long wan fiuja taem? (luk speseli long 3 Nifae 20:30–32, 39–41; 21:22–29). ?From wanem nao bae Hem i singaotem olgeta samting ia, se oli “bigwan” mo “gudfala”? ?Wanem pruf nao yumi luk, we i soem se wok ia i stap tekem ples? ?Olsem wanem yumi tekpat long wok ia?

• Blong helpem ol memba blong klas blong luk olsem wanem Profet Josef Smit i bin help blong mekem bigfala mo gudfala wok ia blong Lod i kamtru, yu save soem wan pikja blong Profet mo invaetem klas blong ridim 3 Nifae 21:9–11, mo lukaotem ol toktok mo ol sentens we i stap mekem olgeta oli tingbaot laef mo seves blong Josef Smit. Eksampol: ?Olsem wanem nao Lod i bin “i givim long hem paoa ia blong bae hem i tekem ol toktok ia i go aot long Ol Jentael?” (ves 11). ?From wanem nao i impoten blong save se seves blong Josef Smit, Sevya i bin talemaot fastaem finis? (luk tu long 2 Nifae 3).

• Yu save helpem ol memba blong klas blong oli luk olgetawan insaed long bigfala wok ia we oli tokbaot finis insaed long ol japta ia, taem we, tugeta, yufala i ridim 3 Nifae 20:25–27. Sapos i nid, yu save poenemaot se taem yumi mekem ol kavenan wetem Lod, yumi kam sid, o laen blong Ebraham. ?Olsem wanem nao yumi, olsem laen blong Ebraham, yumi stap blesem “evri famli blong wol”? (Vesves 25). Ol memba blong klas oli save tingting hevi long kwestin ia taem oli stap ridim toktok blong Presiden Russel M. Nelson insaed long “Sam Moa Risos,” mo serem ol tingting blong olgeta.

3 Nifae 23; 26:1–12

Sevya i wantem yumi blong stadi gud long ol skripja.

• ?Wanem nao ol samting we Sevya i bin mekem wetem Ol Man blong Nifae oli talemaot wei we Hem i stap filim abaot ol skripja? Blong helpem ol memba blong klas blong faenemaot hemia, yu save askem haf blong klas blong ridim 3 Nifae 23, mo nara haf blong klas blong ridim 3 Nifae 26:1–12; afta, oli save serem wanem we oli faenem wetem wanwan long olgeta. Oli save serem tu ol aedia we oli gat abaot wei blong soem long Lod se ol skripja oli impoten long yumi. Eksampol: ?Wanem i defren bitwin fasin blong stadi gud long ol skripja mo fasin blong ridim nomo ol skripja? (luk long 3 Nifae 23:1).

3 Nifae 24:1–6

Lod i olsem wan faea we i stap kakae klinim man.

• Sapos yu yusum ol pikja o vidio, bae i helpem toktok blong yufala insaed long klas abaot 3 Nifae 24:1–6. Eksampol: Yu save soem wan silva koen, o sam sop taem ol memba blong klas oli stap ridim ol ves blong faenemaot olsem wanem ol samting ia oli go wetem Sevya mo misin blong Hem. Yu save serem tu wetem klas, fasin blong wokem silva, mo sop blong man we i wasem klos, we i stap long “Sam Moa Risos.” O yu save soem vidio blong “The Refiner’s Fire” (ChurchofJesusChrist.org). ?Olsem wanem nao Lod hem i “faea blong man blong wokem aean i smut, mo i olsem sop blong man we i wasem klos”? (ves 2). ?Wanem nao ol eksampol ia oli stap tijim yumi long saed blong fasin we Sevya i stap mekem yumi kam klin gud?

3 Nifae 24:7–18

God i gat sore long olgeta we oli stap gobak long Hem.

• Maet bae yu save poenemaot se ol tijing abaot taeting long 3 Nifae 24:8–12 oli ansa blong kwestin we i stap long ves 7: “?Long wanem wei nao bae mifala i kambak long Lod?” ?Wanem nao hem i rilesensip bitwin fasin blong gobak long Lod mo fasin blong pem taeting? Ol memba blong klas oli save serem ol eksperiens blong olgeta long wei we oli bin kasem ol blesing we oli listim insaed long ol ves 10–12 taem oli bin stap pem taeting blong olgeta. ?Olsem wanem nao, ol trutok ia, oli helpem wan we i stap traehad blong pem taeting?

• ?Wanem fasin nao, we oli tokbaot long 3 Nifae 24:13–15, we yumi faenem plante long wol blong tedei? Leftemap tingting blong ol memba blong klas blong oli serem wanem bae oli talem long wan we i filim se laef i isi moa, o i gud moa taem oli no stap obei long ol komanmen. Folem 3 Nifae 24, ?olsem wanem nao Lod i stap blesem olgeta we oli wok blong Hem? Yu save leftemap tingting blong olgeta tu blong faenem ol eksampol insaed long 3 Nifae 22. (Luk tu long Mosaea 2:41; Alma 41:10.)

3 Nifae 25:5–6

Hat blong yumi i mas tanem i go long ol bubu blong yumi.

• Blong soem tingting ia, blong stap tanem hat blong yumi i go long ol bubu blong yumi, yu save invaetem wan memba blong klas blong tanem baksaed blong hem long klas, mo hem i tokbaot long ol memba blong klas, aot long memori blong hem (olsem ples we oli sidaon long hem, wanem oli stap werem, mo sam narawan moa). Afta, hem i save tanem hem i fesem klas bakegen, mo i traem bakegen. ?Wanem nao eksampol ia i tijim long yumi abaot fasin blong tanem hat blong yumi i go long ol bubu blong yumi tru long wok blong tempol mo famli histri wok? Afta we yufala i ridim 3 Nifae 25:5–6, maet ol memba blong klas oli save serem olsem wanem hat blong olgeta i tanem i go long ol bubu blong olgeta. Yu save invaetem tu speselis blong wod long saed blong tempol mo famli histri wok, blong hem i presentem sam famli histri tul i go long klas. ?Olsem wanem nao wok ia i go wetem hemia blong mekem Isrel i kam tugeta we Presiden Russel M. Nelson i stap tokbaot, we yu save faenem long “Sam Moa Risos.”

lanem samting pikja bokis

Stap Leftemap Tingting blong Lanem Samting long Hom

Long 3 Nifae 27kasem4 Nifae yumi stap rid abaot “wan pipol we i moa hapi long medel blong evri pipol we han blong God i mekem olgeta.” (4 Nifae 1:16). Givim tingting long klas se taem yumi ridim olgeta japta ia, i save helpem yumi blong lanem olsem wanem blong faenem hapines blong yumiwan mo blong famli blong yumi.

risos pikja bokis

Sam Moa Risos

!Yu save tekpat long wan samting we i bigwan!

Presiden Russell M. Nelson

“I tru, hemia oli ol las dei, mo Lod i stap muvum wok blong Hem i go hariap blong pulum Isrel i kam tugeta. Kam tugeta ia, i samting we i moa impoten we i stap tekem ples long wol tedei. I no gat samting we yu save komperem, we i bigwan tumas olsem, we i impoten tumas olsem, mo i hae mo i tabu tumas olsem. Mo sapos yu jusum, sapos yu wantem, yu save tekpat bigwan long hem. !Yu save tekpat long wan samting we i bigwan, i gud tumas, wan samting we i naes!

“Taem yumi stap tokbaot, kam tugeta, yumi stap talem stamba trutok ia nomo: evriwan long ol pikinini blong Papa blong yumi long Heven, long tugeta saed blong vel, i nidim blong harem mesej blong gospel we i kambak blong Jisas Kraes. …

“ …!Tingbaot hemia! Aot long evri pipol we i bin laef long wol ia, yumi, yumi olgeta ia we i gat janis blong tekpat long las bigfala taem blong kam tugeta ia. !Hemia i gud tumas! …

“Kam tugeta ia, i mas minim evri samting long yu. Hemia i misin ia nao we oli sendem yu from long wol ia” (“Hope of Israel” [wol divosen blong ol yut, 3 Jun 2018], broadcasts.ChurchofJesusChrist.org).

Blong stap mekem i smut moa, mo i klin gud moa.

Silva, taem oli faenem, hem i miks wetem ol nara ston we oli singaotem ore. Long taem bifo, wan man we i stap wokem silva, bae i karemaot silva ia taem hem i putum ston blong ore ia i go insaed long wan oven blong faea, we i hot we i hot tumas. Hemia i mekem se ol doti oli kamaot mo oli flot long ore ia we i kam olsem wota. Man we i wokem silva, bae i karemaot ol doti ia, i lego klin silva i stap, mo oli save luksave silva ia from hem i saen gud.

Man blong was, i wan we i wasem klos mo i mekem klos i waet. Klos ia, bae oli draonem long wota we oli miksim wetem wan “sop” we oli mekem speseli blong karemaot oel mo doti. Taem klos i draon long wota, bae man blong was i kilkilim o i ramem blong karemaot ol doti long klos. (Luk long “Refiner’s Fire and Fuller’s Soap,” New Era, June 2016, 6–7.)

Stap Kam Antap long Fasin blong Yumi blong Stap Tij

Tijim ol pipol, i no ol lesen. “Wei we yu tritim ol pipol, i impoten i semmak nomo long wanem yu stap tijim olgeta. Samtaem, yumi tingting tumas blong presentem wan lesen we i save stopem yumi blong talemaot lav blong yumi long olgeta we yumi stap tijim olgeta. Sapos hem i hapen long yu, tingting long wei we bae yu lukluk nomo long wanem we i impoten moa” (Teaching in the Savior’s Way, 6).