Prea blong Kraes, i kam long Derek Hegsted

Oktoba 19–25

3 Nifae 27–4 Nifae

“I No Save Gat Wan Pipol we I Moa Hapi”

Blong yuwan yu stadi long 3 Nifae 27–4 Nifae, hem i bes wei blong rere blong tij. Ol doktrin mo ol aedia long aotlaen ia oli save helpem yu blong mekem folem ol kwaet toktok blong Spirit we yu stap kasem taem yu stap stadi.

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Wan wei blong leftemap tingting blong ol memba blong klas blong oli serem ol niu tingting aot long stadi blong olgetawan, hem i blong invaetem olgeta blong faenem wan hym we i go wetem trutok ia we oli bin lanem insaed long 3 Nifae 27kasem4 Nifae. Afta, oli save serem ol hym ia we oli bin faenem, mo serem olsem wanem ol hym ia oli go wetem ol trutok blong ol skripja.

Stap Tijim Doktrin

3 Nifae 27:1–22

Oli singaotem Jos Ia blong Jisas Kraes folem nem blong Hem, mo oli bildimap long gospel blong Hem.

• Taem bae yufala i toktok raon long nem blong Jos, maet bae i mekem ol memba blong klas oli glad moa long membasip blong olgeta insaed long Jos Ia blong Jisas Kraes blong Ol Lata-dei Sent. Tingting blong invaetem ol memba blong klas blong listim daon ol nem blong sam defren oganaesesen, mo tokbaot olsem wanem nao ol nem ia oli talem samting abaot ol oganaesesen ia. Afta, ol memba blong klas oli save ridim 3 Nifae 27:1–12, mo stap lukaotem wanem nao Sevya i bin tijim abaot nem blong Jos blong Hem. Oli save invaetem tu olgeta blong serem se, long olgeta, i minim wanem blong stap olsem ol memba blong Jos Ia blong Kraes. ?Hem i minim wanem blong tekem nem blong Hem long yumi?

• Hemia i wan nara wei blong toktok raon long hamas nao, nem blong Jos blong Sevya i impoten. Afta we yumi toktok raon long ol trutok we yumi faenem long 3 Nifae 27:1–22, yu save raetem ful nem blong Jos antap long bod. Afta, ol memba blong klas oli save jusum ol toktok long nem ia mo talem olsem wanem wanwan long ol toktok ia i helpem yumi blong save huia yumi, o wanem nao yumi stap biliv long hem. Toktok blong Presiden M. Russell Ballard we i stap long “Sam Moa Risos” i save help tu. ?From wanem hem i impoten blong yusum nem blong Jos taem yumi stap serem ol bilif blong yumi wetem ol narafala man?

• Afta we yu eksplenem se Jos blong Hem, oli mas bildim antap long gospel blong Hem, (3 Nifae 27:10), Sevya i stap tokbaot wanem nao hem i gospel. Maet yu save invaetem ol memba blong klas blong serem olsem wanem oli save eksplenem long wan fren, wanem nao hem i gospel. Afta, oli save invaetem olgeta blong stadi gud long 3 Nifae 27:13–22, mo lukaotem ol wei we Sevya i bin tokbaot gospel blong Hem. ?Olsem wanem yumi talem sot wanem we Sevya i bin talem? Taem yumi stap stadi long mining we Sevya i givim long gospel blong Hem, ?wanem niu tingting nao i kam long yumi long wei blong laef folem gospel long evri dei laef blong yumi?

3 Nifae 29–30

Buk blong Momon i wan saen we i talem we wok blong ol lata-dei i stat finis mo i stap hapen.

• Maet yu save stat blong toktok raon long 3 Nifae 29–30 taem yufala i toktok raon long ol saen. Eksampol: ol memba blong klas oli save givim nem blong ol saen we oli letem yumi save se i gat wan strong win i stap kam, o i talem se taem bae i jenis. Afta, oli save ridim 3 Nifae 29:1–3 blong lanem wanem nao hem i mining blong taem we Buk blong Momon i kamkamaot, we Momon i singaotem “ol toktok” (luk tu long 3 Nifae 21:1–7). ?Wanem mesej nao Lod i stap givim long 3 Nifae 29:4–9 long olgeta we bae oli “tok agensem” o “tanem baksaed” long wok blong God long ol las dei? ?Olsem wanem nao we, taem yumi stap ridim Buk blong Momon evri dei, i mekem fet blong yumi i kam strong moa long olgeta samting ia we ol nara pipol oli stap “tok agensem” o stap “tanem baksaed” blong olgeta long hem, long taem blong yumi tedei? Bae yu save invaetem ol memba blong klas blong ridim invitesen blong Lod long 3 Nifae 30 mo serem olsem wanem Buk blong Momon i bin helpem olgeta blong akseptem invitesen ia.

4 Nifae

Fasin blong jenisim laef i go long Jisas Kraes mo long gospel blong Hem, i lidim yumi long yuniti mo hapines.

• Stori we i stap long 4 Nifae i soemaot glad we i kam long laef blong yumi—olsem wanwan man, woman, olsem ol famli, mo olsem wan wod o stek—taem yumi stap traem blong jenisim laef blong yumi moa fulwan i go long Jisas Kraes. Tingting blong invaetem ol memba blong klas blong stadi gud long 4 Nifae 1:1–18 mo raetem long bod olgeta blesing we i kam long ol pipol taem we, evriwan, i bin jenisim olgeta i go long Lod. ?Olsem wanem fasin blong jenisim laef i tajem wei we oli stap tritim wanwan long olgeta? Maet ol memba blong klas oli save serem olsem wanem nao gospel i bin tekem ol semmak blesing long ol famli, o long wod blong olgeta. Blong helpem ol memba blong klas blong oli andastanem olsem wanem wanwan long yumi i save laef moa olsem ol pipol insaed long 4 Nifae, mo olsem wanem nao yumi save leftemap fasin blong gat moa yuniti mo hapines long medel blong olgeta we oli raonem yumi, yu save ridim toktok we i kam long Elda D. Todd Christofferson, we i stap long “Sam Moa Risos.” Ol memba blong klas oli save skelem hamas oli kam antap long ol trifala eria ia we Elda Christofferson i tokbaot:

• Ol pipol blong Buk blong Momon, man i save talem huia olgeta olsem Ol Man blong Nifae mo Ol Man blong Leman, o ol narawan bakegen, blong plante handred yia; be afta we Sevya i bin kam mo wok long medel blong olgeta, evri pipol ia oli kam semmak nomo mo oli nomo talem se oli Ol Man wea. Afta we yufala i ridim 4 Nifae 1:17 tugeta, maet ol memba blong klas oli save serem ol tingting abaot wanem kaen “Man” o grup i stap naoia long sosaeti blong yumi tedei. ?Wanem nao yumi save mekem blong i nomo gat ol defren kaen grup ia, mo yumi rili kam “wan, … ol pikinini blong Kraes”? (ves 17).

• ?Wanem nao ol memba blong klas oli save lanem aot long foldaon blong sosaeti blong Saeon we oli tokbaot insaed long 4 Nifae? Yu save invaetem olgeta blong stadi gud long 4 Nifae 1:19–34, mo lukaotem se wanem nao i putum en long hapines mo yuniti blong ol pipol ia, kolosap 200 yia afta we Sevya i bin visitim olgeta. ?Wanem trutok nao long ol ves ia i save helpem yumi blong faenemaot ol fasin mo ol wei blong ol man we i nid blong jenis long laef blong yumi, mo tu long sosaeti blong yumi tedei?

Stap Leftemap Tingting blong Lanem Samting long Hom

Momon 1–6 i tokbaot ol prapa nogud taem we i lid i go blong Ol Man blong Nifae oli ded evriwan. Blong leftemap tingting blong ol memba blong klas oli ridim olgeta japta ia, invaetem olgeta blong lukaotem ol samting we oli luk abaot Ol Man blong Nifae we oli luk se i stap hapen tu long taem blong yumi tedei.

Sam Moa Risos

Nem blong Jos Ia blong Kraes.

Presiden M. Russell Ballard i talem:

“Mi tingting plante abaot from wanem nao Sevya i givim wan nem we i gat ten toktok insaed long hem, blong Jos blong Hem we i kambak. Yumi luk se nem ia i longwan, be sapos yumi tingting long nem ia, se hem i talem wan samting abaot wanem i Jos ia, nao bae yumi luk se nem ia i sot, i tru, mo i tok stret. ?Hao nao bae fasin blong tokbaot wan samting bae i tok stret moa, i klia moa, be yet, oli talem long wan sot toktok olsem?

“Evri toktok insaed, i klia, mo i nid blong stap long nem ia. Toktok ia, Jos Ia i talemaot stret ples we Jos i stap long hem long medel blong ol relijin long wol, mo ples ia i blong Jos ia nomo, i no wan narawan.

“Ol toktok blong Jisas Kraes oli talemaot se hemia i Jos blong Hem [luk long 3 Nifae 27:8]. …

blong Ol Lata-dei i eksplenem se hem i sem Jos olsem Jos we Jisas Kraes i bin stanemap taem Hem i bin stap long wol, be long ol las dei ia, jos ia i bin kambak bakegen. Yumi save se i bin gat wan taem we ol pipol oli bin foldaon, o i bin gat wan apostasi, we i bin nidim wan Restoresen, o i bin nid blong putumbak tru mo ful Jos long taem blong yumi tedei.

Sent i minim se ol memba oli stap folem Hem mo oli traem blong mekem tingting blong Hem, oli traem blong obei long ol komanmen blong Hem, mo oli rere wan moa taem blong laef wetem hem mo Papa blong yumi long Heven long wan fiuja taem. Sent i tokbaot nomo olgeta we oli wantem blong mekem laef blong olgeta i tabu taem oli mekem kavenan blong folem Kraes” (“The Importance of a Name,” Ensign o Liahona, Nov. 2011, 80).

?Bae i nidim wanem blong bildimap Saeon?

Elda D. Todd Christofferson i tijim: “Saeon hem i Saeon from ol fasin, ol kwaliti mo fetful fasin blong ol sitisen blong hem [luk long Moses 7:18]. … Sapos bae yumi stanemap Saeon insaed long ol hom blong yumi, insaed long ol branj, ol wod, mo ol stek blong yumi, nao yumi mas kam antap kasem standet ia. Bae i wan mas blong, (1) kam wan long hat mo maen; (2) olsem wanwan man, woman mo olsem wan grup, blong yumi kam wan tabu pipol; mo (3) blong yumi kea long olgeta we oli pua mo olgeta we oli stap long nid; mo bae yumi kam gud tumas long wok ia mekem se bae i nomo gat pua man long medel blong yumi. Yumi no save wet kasem taem we bae Saeon i kam blong olgeta samting ia oli hapen—Saeon bae i kam nomo long semtaem we olgeta samting ia oli stap hapen” (“Come to Zion,” Ensign o Liahona, Nov. 2008, 38).

Stap Kam Antap long Fasin blong Yumi blong Stap Tij

Yusum defren teknik blong tij. Bae i isi blong yu stap folem nomo wan stael blong tij, be i gat ol defren fasin blong tij we i save tajem ol defren memba blong klas. Tingting long ol teknik we yu bin stap yusum—?Yu bin yusum ol stori, ol samting insaed long lesen, ol pikja, mo ol narawan moa? (luk long Teaching in the Savior’s Way, 7).