Momon I Stap Raetemsot Histri long Ol Buk, i kam long Tom Lovell

26 Oktoba –1 Novemba

Momon 1–6

“Mo Mi Wantem se Mi Save Winim Tingting blong Yufala Evriwan … blong Yufala I Sakem Sin”

Taem yu stap ridim Momon 1–6, lukaotem ol trutok we bae i helpem ol memba blong klas blong yu blong gohed blong stap fetful long taem we fasin nogud i stap, olsem we Momon i bin mekem.

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Samtaem, ol memba oli semsem blong serem ol niu tingting blong olgeta from se oli no gat taem blong oganaesem ol tingting blong olgeta. Blong helpem olgeta wetem hemia, givim olgeta sam minit blong oli raetemdaon ol niu tingting blong olgeta we oli bin kasem taem oli bin stadi long Momon 1–6 long hom; afta, askem olgeta blong serem ol samting we oli raetem.

Stap Tijim Doktrin

Momon 1–6

Yumi save laef long wan stret mo gud fasin, nomata long evri fasin nogud we oli stap raon long yumi.

• Plante long ol memba blong klas blong yu oli save andastanem eksperiens blong Momon blong stap traehad blong laef long wan stret mo gud fasin insaed long wan wol we i gat fasin nogud. Mebi oli save serem wanem oli lanem aot long eksampol blong Momon. Blong help blong lidim toktok ia insaed long klas, yu save invaetem ol memba blong klas blong oli faenem ol ves we oli soemaot ol kwaliti blong Momon, mo mekem wan lis blong ol kwaliti ia antap long bod (eksampol, luk long Momon 1:2–3, 15–16; 2:1, 23–24; 3:1–3, 12, 17–22). ?Olsem wanem ol kwaliti ia oli bin helpem Momon blong stap strong long saed blong spirit? ?Olsem wanem nao oli save helpem yumi blong yumi stap moa olsem Momon?

  

  Faet, i kam long Jorge Cocco

• Plante taem, Momon i stap raet i kam stret long ol pipol blong taem blong yumi tedei. ?Wanem nao yumi save lanem aot long ol toktok blong hem we hem i sendem i kam long yumi, we i stap long Momon 3:17–22 mo 5:10–24? Givim wan pis pepa i go long wanwan memba blong klas, wetem sentens ia i stap antap evriwan long pepa, “Kaonsel blong Momon long Yumi,” mo leftemap tingting blong olgeta blong faenem ol mesej insaed long ol ves ia, we oli stret blong taem blong yumi tedei. ?Olsem wanem yumi save yusum kaonsel blong Momon blong helpem yumi blong stap strong long saed blong spirit long wol blong tedei?

• Sapos yu stap tijim ol yut, yu save yusum eksampol blong Momon blong helpem olgeta blong andastanem se oli save stap olsem ol stret mo gud lida taem oli yangfala nomo i stap. Sapos yu stap tijim ol adalt, yu save yusum eksampol blong Momon blong stat blong toktok raon long ol janis we oli stap blong helpem ol yut blong stap olsem ol gudfala lida. Blong stat blong toktok raon, yu save askem samfala memba blong klas blong luklukbak long Momon 1 mo sam narawan blong luklukbak long Momon 2, mo tek not long ol janis we Momon i bin kasem blong lidim man long taem we hem i yangfala yet. ?Wanem kwaliti nao hem i bin gat we i bin mekem hem i wan bigfala lida? Ol memba blong klas oli save serem ol eksampol we oli bin luk, abaot strong paoa blong ol stret mo gud pikinini mo yut blong lidim tingting blong man. Oli save toktok raon tu long ol janis we, olgeta—o ol yang pipol we oli save olgeta—oli gat blong stap olsem ol lida wetem ol kwaliti we Momon i bin gat.

Momon 2:10–15

Fasin blong sakem sin, i askem wan hat we i fulap wetem sore mo wan spirit we i wantem blong sakem sin.

• Blong lanem wanem i defren bitwin bigfala harem nogud we i lidim man i go long fasin blong sakem sin, mo bigfala harem nogud we i no lidim man long fasin blong sakem sin, plis tingting blong ridim Momon 2:10–15 tugeta, mo toktok raon long ol kwestin olsem: ?Wanem nao hem i rol blong stap filim “bigfala harem nogud” long fasin blong sakem sin? ?Wanem i defren bitwin “bigfala harem nogud … we i mekem man i sakem sin” mo “bigfala harem nogud blong olgeta we devel i stap kontrolem olgeta”? ?Wanem kaen fasin mo samting nao we yumi stap mekem we i save helpem yumi blong gat wan “hat we i fulap wetem sore mo spirit we i wantem blong sakem sin”?

Momon 3:12

Yumi save lanem ol narafalawan, iven sapos yumi no agri wetem joes blong olgeta.

• Olsem Momon, plante memba blong klas oli joen gud wetem ol pipol we oli gat ol semmak bilif. ?Olsem wanem nao yu save yusum eksperiens blong Momon blong tijim ol memba blong klas abaot fasin blong lavem ol narafala pipol, i nomata ol samting we oli defren bitwin yumi? Tingting blong ridim Momon 3:12 tugeta mo toktok raon long ol taem we Momon i bin soem bigfala lav long olgeta we oli bin sakemaot mesej blong hem mo oli bin minim blong go agensem God (eksampol, luk long Momon 1:16–17; 2:12). ?Wanem eksperiens nao ol memba blong klas oli save serem aot long laef blong olgeta abaot fasin blong lavem olgeta we oli no bin serem ol bilif mo valiu blong olgeta? Toktok we i kam long Presiden Dallin H. Oaks we i stap long “Sam Moa Risos” oli givim sam moa kaonsel.

Momon 6:17

Jisas Kraes i stanap wetem han blong Hem we i open blong i tekem mi.

• Long olgeta we, maet oli no gat hop se oli save kasem fogivnes from ol sin blong olgeta, Momon i tokbaot Sevya we i stanap “wetem han we i open blong tekem yu;” mo hemia i save mekem hat blong yumi i stap kwaet. Tingting blong ridim Momon 6:17 tugeta mo soem wan pikja blong Jisas Kraes wetem han blong Hem we i open bigwan (olsem hemia we i stap long Gospel Art Buk, no. 66). ?Ves ia i tijim wanem abaot hat blong Sevya we i wantem tumas blong helpem yumi? Mo tu, yu save tingting blong singsing wan hym tugeta we i tijim wan semmak mesej, olsem “Come unto Jesus” (Hymns, no. 117). Yu save serem tu, eksperiens blong Presiden Russel M. Nelson we i stap insaed long “Sam Moa Risos,” mo askem ol memba blong klas olsem wanem yumi save helpem ol narawan blong luksave se i posibol blong sakem sin.

Stap Leftemap Tingting blong Lanem Samting long Hom

Yu save askem ol memba blong klas blong tingbaot wanem bae oli raetem long wan leta i go long ol pipol long fiuja taem. Insaed long Momon 7–9 yumi stap rid abaot wanem Momon mo Moronae i bin raetem, plante handred yia i pas, i go long ol pipol long taem blong yumi.

Sam Moa Risos

Stap lavem ol narafala pipol we oli no gat biliv long ol semmak samting.

Presiden Dallin H. Oaks i eksplenem:

“Yumi evriwan i sapos blong folem ol tijing blong gospel blong lavem ol neiba blong yumi, mo blong yumi stap longwe long fasin blong raorao. Olgeta we oli stap folem Kraes oli mas stap olsem ol eksampol blong wan pipol we oli gat stret mo gud laef. Yumi mas lavem evri pipol, save stap ol man we i save lisingud, mo save soem intres long ol bilif blong ol narawan. I nomata se bae yumi no save agri, yumi no mas mekem hemia long wan rabis fasin. Ol toktok blong yumi blong talemaot weaples yumi stanap long hem, mo ol toktok blong yumi long saed blong ol topik we i gat plante tingting, oli no mas ol toktok blong raorao. Yumi mas waes blong save eksplenem mo save stanap weaples yumi stap stanap long hem, mo long fasin blong yumi blong lidim tingting blong ol narafala man. Taem yumi mekem olsem, yumi stap askem ol narawan blong oli no harem nogud from ol bilif blong relijin blong yumi we yumi bilif long hem long tru fasin, mo stap praktisim wetem fridom. Mifala i stap leftemap tingting blong yumi evriwan blong praktisim Gol Rul blong Sevya: ‘Yufala i mas mekem i gud long ol narafala man, olsem we yufala i wantem blong olgeta oli mekem long yufala.’ (Matiu 7:12).

“Taem posisen blong yumi oli no wanem we plante oli akseptem, yumi mas akseptem ol nogud risal ia wetem wan gudfala fasin, mo praktisim gud mo waes fasin wetem ol enemi blong yumi. (“Loving Others and Living with Differences,” Ensign o Liahona, Nov. 2014, 27).

Fasin blong sakem sin, i posibol.

Presiden Russel M. Nelson i bin serem eksperiens ia:

“Las yia, taem Elda David S. Baxter mo mi i bin stap draev i go long wan stek konfrens, mitufala i stop long wan restrong. Afta long hemia, taem mitufala i gobak long trak blong mitufala, wan woman i kam, i singaotem mitufala. … Hem i askem sapos mitufala i ol elda insaed long Jos. Mi talem yes. Hem i no holemtaet hem. Hem i talemaot stori blong laef blong hem, we i no stret tumas, we hem i draon long sin i stap. Hem i gat 28 yia, mo hem i no gat wan gud laef nating. Hem i filim se hem i nating nomo, mo i no gat wan stamba tingting we bae hem i laef from. Taem hem i stap toktok, swit sol blong hem i stat blong kamkamaot. Hem i krae, i plis long mitufala, i askem sapos i gat eni hop i stap blong hem, sapos i gat eni wei blong hem i go antap, mo i aot long fasin ia we hem i lusum hop.

“ ‘Yes,’ mitufala i ansa, ‘i gat hop i stap. Hop i joen wetem fasin blong sakem sin. Yu save jenis. Yu save “kam long Kraes, mo stap stret gud long hem” [Moronae 10:32]. Mitufala i talem strong long hem se hem i no pusumbak taem blong sakem sin [luk long Alma 13:27; 34:33]. Hem i putum tingting blong hem i stap daon, mo i talem tangkyu wetem tru hat blong hem.

“Taem Elda Baxter mo mi i gohed long wokbaot blong mitufala, mitufala i tingting hevi long eksperiens ia. Mitufala i tingbaot kaonsel we Eron i givim long wan sol we i nomo gat hop: ‘Sapos yu wantem samting ia, sapos yu bodaon long fored blong God, yes, sapos yu sakem evri sin blong yu, mo yu bodaon long fored blong God, mo singaotem nem blong hem wetem fet, we yu bilivim strong se bae yu kasem, ale bae yu kasem hop we yu wantem.’ [Alma 22:16]. …

“ … long woman ia we i gat 28 yia, we i swim long doti wota blong sin, mo long wanwan long yumi, mi talemaot se swit blesing ia blong sakem sin, hem i posibol. Hemia i kam tru long wan ful jenis i go long Lod mo tabu wok blong Hem.”

Antap long hemia, Presiden Nelson i talem tingting blong hem: “Mitufala i tingbaot tu ol pipol we oli mekem sin, we lida blong olgeta, Momon, i wari tumas long olgeta, nao i raetem: ‘Mi no bin gat hop, from mi save ol jajmen blong Lod we bae i kam long olgeta; from oli no sakem ol rabis fasin blong olgeta, be oli traehad from ol laef blong olgeta, oli no prea long God we i bin mekem olgeta’ (Momon 5:2)” (“Repentance and Conversion,” Ensign o Liahona, May 2007, 102, 104).

Stap Kam Antap long Fasin blong Yumi blong Stap Tij

Fasin blong gro long saed blong spirit, i stap hapen insaed long hom. Ol memba blong klas blong yu oli stap spendem 165 aoa evri wik, aotsaed long jos. Long tetaem ia, oli gat ol eksperiens blong olgeta long saed blong spirit we i stap tijim olgeta abaot gospel. Askem ol kwestin we i leftemap tingting blong olgeta we oli stap lan blong oli serem wanem we oli bin lanem truaot long wik, mo wanem we oli bin lanem wetem famli blong olgeta (luk long Teaching in the Savior’s Way, 18).