Moronae I Stap Raet long Ol Buk we Oli Wokem long Gol, i kam long Dale Kilborn

2–8 Novemba

Momon 7–9

“Mi Toktok long Yufala Olsem se Yufala I Stap long Ples Ia”

Luklukbak long olgeta tingting mo filing we yu bin raetemdaon long taem blong stadi blong yuwan long Momon 7–9 long wik ia. ?Wijwan skripja long ol japta ia we yu yu filim se bae i gat moa mining long yu, we yu wantem blong luklukbak long olgeta wetem glad blong yu?

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Blong givim janis long ol memba blong klas blong oli serem wan samting we oli lanem long stadi blong olgetawan, o long famli skripja stadi, yu save leftemap tingting blong olgeta blong lukluk tru long Momon 7–9 mo serem wan sentens (o ves) we oli talem tangkyu se Momon o Moronae i bin jusum blong putum long ol buk ia.

Stap Tijim Doktrin

Momon 7:8–10; 8:12–22; 9:31–37

Buk blong Momon i impoten tumas.

• Wan wei blong statem wan storian insaed long klas abaot fasin blong ol rere blong kasem Buk blong Momon i blong tokbaot risal blong stap rere—o blong no stap rere—from ol nara samting. ?Olsem wanem we, taem yumi save valiu blong wan samting, hem i jenisim wei we yumi yusum samting ia? Ol memba blong klas oli save lukluk gud insaed long Momon 8:12–22 mo serem wanem we Moronae i talem abaot valiu blong Buk blong Momon (“histri ia”). Oli save serem tu sam eksperiens we i blong olgetawan, we i bin soem olgeta valiu blong Buk blong Momon. ?Olsem wanem nao yumi save soem se yumi tekem se Buk blong Momon i impoten tumas?

  

  Buk blong Momon i mekem i klia moa doktrin we oli stap tijim insaed long Baebol.

• Blong helpem ol memba blong klas blong oli luksave olsem wanem Buk blong Momon mo Baebol oli sapsapotem tufala, yu save invaetem olgeta blong ridim Momon 7:8–10 mo talemsot wetem toktok blong olgeta, wanem we Momon i tokbaot abaot tufala histri ia, (“histri we bae i kam long Ol Man Jiu i go long Ol Jentael,” i tokbaot Baebol). Tingting blong droem long bod, tufala sekol, we wan i ova long narawan, mo putum nem blong wan i Baebol mo narawan i, Buk blong Momon. Ol memba blong klas oli save listimdaon ol semmak samting bitwin tufala buk blong ol skripja ia, insaed long ples ia we laen blong tufala sekol i joen, mo raetem ol samting we oli defren, long ol nara pat blong sekol. (Vidio ia, “Bible and Book of Mormon” we i stap long ChurchofJesusChrist.org oli givim wan niu wei blong lukluk long samting.) Wan nara wei, i blong raetemdaon lis blong samfala trutok blong gospel antap long bod, mo invaetem ol memba blong klas blong lukluk insaed long Gaed long Ol Skripja blong faenem ol ves aot long Buk blong Momon mo Baebol we i stap helpem olgeta blong andastanem ol trutok.

Momon 8:1–11

Yumi save stap fetful iven taem yumi stap yumiwan.

• Sam pipol insaed long klas blong yu oli save filim se oli stap olgetawan taem oli stap traehad blong laef folem gospel. ?Wanem nao yumi save lanem aot long eksampol blong Moronae, we i save helpem olgeta tu? Tingting blong invaetem ol memba blong klas blong ridim Momon:1–11 mo tingting long sam kwestin we bae oli wantem blong askem Moronae blong oli lanem abaot wei we hem i gohed blong stap fetful, i nomata long ol had situesen blong hem. ?Wanem nao insaed long eksampol blong hem we i givim insperesen long olgeta? Taem oli stap serem ol tingting blong olgeta, leftemap tingting blong ol memba blong klas blong oli serem ol eksperiens blong olgetawan, abaot wan taem we, olgeta, o ol narawan we oli bin save olgeta, oli gohed blong stap fetful, iven taem oli filim se oli stap olgetawan. ?Olsem wanem nao Lod i bin helpem olgeta?

Momon 8:26–41; 9:1–30

Buk blong Momon, oli bin raetem blong yumi yusum long dei blong yumi.

• Taem yu stap kam kolosap long en blong stadi long yia ia, abaot Buk blong Momon, maet ol memba blong klas oli save tingtingbak long from wanem nao oli filim se buk ia, oli bin raetem blong taem blong yumi tedei. Yu save statem toktok insaed long klas taem yu ridim toktok blong Presiden Esra Taf Benson we i stap long “Sam Moa Risos.” Afta, ol memba blong klas oli save yusum ol kwestin blong Presiden Benson long wanem i stap long Momon 8:26–41. ?From wanem Lod i givim insperesen long Moronae blong putum ol toktok ia long histri blong hem? ?Olsem wanem nao ol toktok ia oli stap helpem yumi long taem blong yumi tedei?

• Olsem we oli tijim long aotlaen blong wik ia insaed long Kam Folem Mi—Blong Wanwan Man, Woman mo Famli, insaed long Momon 9:1–30, i gat mesej blong Moronae blong ansarem fasin blong no stap biliv long Jisas Kraes long taem blong yumi tedei. Maet yu save serem klas long tri grup mo invaetem wanwan grup blong faenem, insaed long ol ves ia, kaonsel ia we i stap givhan long olgeta: 1–6 (risal blong no stap biliv long Kraes), 7–20 (hamas i impoten blong stap biliv long wan God we i stap givim revelesen mo ol merikel), mo 21–30 (kaonsel blong Moronae i kam long yumi).

• I nomata we oli bin raetem Momon 9:1–6 “blong olgeta we oli no stap biliv long Kraes,” hem i helpem yumi evriwan blong traem pikjarem se yumi stap stanap long fored blong God wan dei, blong Hem i jajem yumi. Askem ol memba blong klas blong oli luklukbak long ol ves ia, mo oli lukaotem ol toktok o ol sentens we i tokbaot olsem wanem ol man nogud bae oli filim long dei ia. ?Wanem nao yumi save mekem blong stap longwe long ol filing ia? Ol memba blong klas oli save faenem ol niu tingting insaed long stori we Presiden Boyd K. Packer i talem, we i stap long “Sam Moa Risos.”

• Plante pipol tedei, oli biliv se ol merikel oli nomo hapen. ?Olsem wanem nao yu save yusum ol tijing blong Moronae blong helpem ol memba blong klas blong biliv long wan “God blong ol merikel”? Blong stat, yu save askem ol memba blong klas blong luklukbak long Momon 9:7–26 mo faenem ol merikel we Moronae i stap askem strong long yumi blong biliv long olgeta. ?Wanem nao yumi lanem aot long ol ves ia abaot God mo wok blong Hem long taem blong yumi tedei? ?Wanem nao yumi mas mekem blong God i save wokem ol merikel? (luk long Momon 9:20–21). ?Wanem merikel nao yumi bin luk?

Stap Leftemap Tingting blong Lanem Samting long Hom

?Weswe? ?Ol memba blong klas blong yu oli stap askem olgetawan o no, long wanem wei nao oli save kam antap long fet blong olgeta long Papa long Heven mo long Jisas Kraes? Sapos i olsem, nao invaetem olgeta blong stadi gud long Ita 1–5 blong oli faenem ol wei blong helpem fet blong olgeta i gro.

Sam Moa Risos

Buk blong Momon, oli bin raetem blong yumi yusum long dei blong yumi.

Presiden Esra Taf Benson i talem:

“Ol Man blong Nifae oli neva gat buk ia; mo tu, Ol Man blong Leman blong bifo, oli neva gat buk ia. Buk ia, hem i blong yumi. …

“Wanwan long olgeta we oli raet plante long Buk blong Momon oli bin testifae se hem i raet blong ol fiuja jeneresen we oli stap kam yet [luk long 2 Nifae 25:21; Jekob 1:3; Momon 7:1; 8:34–35]. …

“Sapos olgeta oli bin luk taem blong yumi tedei, mo oli jusum olgeta samting ia we bae i impoten bigwan long yumi, ?bae hemia i no wei ia nao we yumi sapos blong stadi long Buk blong Momon? Yumi mas askem yumiwan oltaem: ‘?From wanem Lod i bin givim insperesen long Momon (o Moronae, o Alma) blong putum stori ia long rekod blong hem? ?Wanem lesen nao mi save lanem aot long hemia, we bae i helpem mi long tedei mo long taem ia?’” (“The Book of Mormon—Keystone of Our Religion,” Ensign, Nov. 1986, 6).

Yumi save kam we yumi no gat wan mak long yumi.

Presiden Boyd K. Packer i tokbaot se hem i bin travel blong sikis dei taem hem i wan yang man insaed long ami, long wan taem we i bin hot tumas, insaed long wan tren we i gat fulap smok, mo i no gat wei blong swim o blong jenisim klos. Long wan ples we tren i stop long hem, ol ami soldia oli bin go long wan restrong.

“Ples i fasfas, mo mifala i joenem wan longfala laen blong wet blong mifala i save sidaon blong kakae. Mi mi faswan, jes biaen long sam woman we oli bin dresap gud. Iven we hem i no tanem hem raon, wan woman long fored blong mi i kam blong save kwik se mifala i bin stap ia.

Hem i tanem hem mo i lukluk long mifala. Nao hem i tanem hem mo i lukluk mi bakegen, hed i go kasem fingga blong leg. Mi stanap ia, insaed long yunifom blong mi we i smel swet, i blak, i benben olbaot. Wetem wan voes we hem i no glad nating, hem i talem: ‘Tru ia, !yufala i no klin nating!’ Evri ae i lukluk mifala.

“Mifala i luk gud nomo se woman ia i stap tingting se, sapos hem i no stap ia nomo; mi tu, mi tingting olsem. Mi filim se mi doti we doti, mi no fil gud mo mi sem.”

Afta, Presiden Packer i talem toktok ia long Momon 9:4 mo i komperem eksperiens blong hem long fasin blong no stap klin long saed blong spirit, long fored blong God. Taem hem i stap testifae se Atonmen blong Jisas Kraes i wan wei ia nomo we hem i save kam klin long saed blong spirit, nao hem i talem:

“?Yu save pikjarem filing blong mi, taem we, mi save luk se, sapos mi stap folem eni kaen kondisen we Ridima i putum i stap, bae mi neva nid blong gotru long harem nogud blong no stap klin long saed blong spirit? Traem tingting long filing ia se, i givim pis long maen, i mekem yu fri, mo yumi filim se yu stap olsem wan god; ol samting ia bae oli kam long yu taem yu luk se Atonmen i ril mo yu praktisim samting ia evri dei, from we yu luk se hem i impoten tumas” (“Washed Clean,” Ensign, May 1997, 9–10).

Stap Kam Antap long Fasin blong Yumi blong Stap Tij

Prea from ol memba blong klas blong yu. ?I gat wan insaed long klas blong yu we i gat hadtaem long ol traehad blong hem? Olsem we Sevya i bin prea from Pita (luk long Luk 22:31–32), yu save prea from olgeta we yu stap tijim blong oli kam strong moa (luk long Teaching in the Savior’s Way, 6).