Lihae I Stap Haed Insaed long Wan Hol long Ston, i kam long Gary Ernest Smith

23–29 Novemba

Ita 12–15

“Tru long Fet, Evri Samting I Hapen”

Stamba tingting biaen long aotlaen ia, i no blong talem wanem bae i hapen long klas. Hem i kam sapotem—i no riplesem—revelesen we i blong yuwan. Letem Spirit i lidim stadi blong yuwan, mo afta, luk sapos ol aktiviti ia long aotlaen ia, oli save helpem ol memba blong klas blong faenemaot mo serem ol impoten prinsipol we oli stap long Ita 12–15.

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Blong helpem ol memba blong klas blong oli serem wanem oli lanem aot long skripja stadi blong olgetawan o wetem famli, yu save raetem ol sentens ia long bod, olsem: “Mi lanem se …” o, “Mi gat wan testemoni long saed blong …” o, “Mi kasem wan eksperiens …” Invaetem ol memba blong klas blong oli serem wan samting aot long Ita 12–15 we oli save yusum blong finisim wan long ol sentens ia antap long bod.

Stap Tijim Doktrin

Ita 12:2–22

Yumi save kasem wan witnes blong wan trutok taem yumi stap praktisim fet long Jisas Kraes.

• Blong helpem ol memba blong klas blong oli tingting hevi long mining blong praktisim fet long Jisas Kraes, yu save askem olgeta wanem pikja, o toktok i kam long maen blong olgeta taem oli harem toktok ia, praktisim. (Yu save lukluk toktok ia tu insaed long wan diksonari.) ?Wanem risal nao testemoni blong hem i mekem long olgeta we oli bin stap lisin? ?Olsem wanem nao yumi save mekem blong praktisim prinsipol blong fet ia? ?Long wanem wei yumi stap “praktisim fet” long Kraes? Ol memba blong klas oli save luklukgud insaed long Ita 12:2–22 mo toktok raon long hao nao ol pipol we oli tokbaot long ol ves ia oli stap praktisim fet. ?Olsem wanem nao yumi save folem eksampol blong hem? Folem ol ves ia, ?wanem nao ol risal blong stap praktisim fet long Jisas Kraes?

• Ol eksampol blong fet long Ita 12:7–22 oli givim wan gud taem blong luklukbak long ol gudfala stori blong insperesen we yufala i bin stadi tugeta long Buk blong Momon. Maet ol memba blong klas oli save serem ol nara eksampol blong fet, mo wanem oli bin lanem aot long olgeta (ol nara eksampol, yu save faenem long Hibrus 11). Oli save serem tu ol fetful eksampol aot long famli histri blong olgeta, o stret laef blong olgeta. ?Olsem wanem nao ol eksampol ia oli bin mekem fet blong yu long Jisas Kraes mo Papa long Heven i kam strong moa?

• Ita 12 i fulap long ol niu wei blong lukluk samting, mo i fulap long ol trutok abaot fet. Ol memba blong klas oli save toktok raon long hao japta ia i tijim olgeta abaot fet. Afta, oli save raetem wanem we oli faenem antap long bod.

Ita 12:1–9, 28, 32

Fet i lidim man i go long “hop blong kasem wan wol we i moa gud.”

• ?I save gat wan insaed long klas blong yu we i save tokbaot from wanem wan angka i impoten insaed long wan bot? Yu save soem wan pikja blong wan bot mo wan angka (o droem wan long bod) mo toktok raon long wanem bae i hapen long wan bot we i no gat angka. ?Wanem nao i hapen long yumi taem yumi no gat hop? Ol memba blong klas oli save ridim Ita 12:4 mo tokbaot olsem wanem hop i olsem “wan angka long sol blong [yumi].” Mo tu, oli save ridim Ita 12:1–9, 28, mo 32 mo serem sam niu samting we oli kasem abaot hop. ?Wanem nao yumi stap hop from (luk long Ita 12:4; Moronae 7:41; luk tu long Jon 16:33).

Ita 12:23–29

Tru long gladhat blong Jisas Kraes, ol wiknes blong yumi oli kam ol samting we yumi strong long ol.

• Blong helpem ol memba blong klas blong putum long olgetawan ol trutok we Moronae i bin lanem abaot ol wiknes mo ol samting we yumi strong long ol, we oli tokbaot long Ita 12, yu save invaetem ol memba blong klas blong tingting long wan we maet tingting blong hem i slak from ol wiknes blong hem. Afta, yu save invaetem ol memba blong klas blong luklukgud long Ita 12:23–29 blong faenem samfala ansa long kwestin ia. Sapos Moronae i stap long ples ia tedei, ?wanem nao bae hem i talem blong leftemap tingting blong hem? Ol memba blong klas oli save serem tu ol eksperiens blong laef blong olgeta, abaot wan taem we Sevya i bin help blong “ol samting ia we oli no strong long olgeta, bae … oli winim mo kam strong long olgeta.” (Ita 12:27). ?Olsem wanem jenis ia i defren long ol traehad blong kam antap moa we wan man o woman i save mekem nomo, we hem i no dipen long Sevya? Blong kasem moa long saed blong topik ia, luk long toktok we i kam long Presiden Henry B. Eyring we i stap long “Sam Moa Risos.”

• Eksperiens blong Moronae i wan long ol plante skripja we i soem olsem wanem gladhat blong Sevya i save tanem ol wiknes blong yumi oli kam ol paoa blong yumi. Maet bae i help blong serem klas long ol grup, blong givim wok long wanwan grup blong pikimap wan long ol skripja we i bin gat wan wiknes, mo toktok raon long wei we Lod i bin mekem man o woman ia i kam strong. I gat sam eksampol we oli stap long “Sam Moa Risos.” Yu save givim tingting tu se ol memba blong klas oli luklukbak long mining blong gladhat long Bible Dictionary o long Stap Tru long Fet (ol pej 69–71). ?Olsem wanem nao ol eksampol long ol skripja, we oli bin stadi long ol, i soemaot paoa blong gladhat blong Sevya? ?Olsem wanem yumi invaetem paoa ia insaed long laef blong yumi?

• Hem i nomol blong stap komperem ol wiknes blong yumi long paoa we yumi luk long wan nara man o woman; iven Moronae i filim se hem i komperem hem long wan fasin we i no stret, long brata blong Jared (luk long Ita 12:24). ?From wanem hem i wan denja blong komperem yumi long ol narawan? Folem Ita 12:26–27, ?olsem wanem nao Lod i wantem yumi blong luk wiknes blong yumi? (Luk tu long toktok blong Presiden Henri B. Eyring we i stap long “Sam Moa Risos”). ?Olsem wanem nao Hem i wantem yumi blong luk ol wiknes blong ol narafala man? (luk long Ita 12:26).

Ita 13–15

Blong sakemaot ol profet, i tekem denja long saed blong spirit i kam.

• Wetem ol impoten trutok we oli tijim insaed long Ita 12, bae yu no jusum blong spenem plante taem long klas long ol japta 13–15. Be, bae i save help blong askem long wan memba blong klas blong talem sot wanem i hapen long ol japta ia. Blong helpem ol memba blong klas blong faenem ol mesej we oli gat mining insaed long stori ia, yu save askem olgeta blong komplitim sentens ia: “Olsem ia nao yumi luk se …” wetem wan lesen we oli lanem aot long foldaon blong Ol Man blong Jared. ?Olsem wanem nao rod we i lidim Ol Man blong Nifae blong oli go ded evriwan, i Foldaon rod we Ol Man blong Jared oli bin folem (komperem Ita 15:19 wetem Moronae 8:28). ?Wanem nao Lod i wantem yumi blong lanem aot long ol stori ia, mo wanem nao yumi save mekem blong stap longwe long wanem i bin hapen long Ol Man blong Jared? Ol memba long klas oli save luklukbak long wei we buk blong Ita i joen wetem Omnae 1:19–22; Mosaea 8:8; mo Mosaea 28:11–18.

Stap Leftemap Tingting blong Lanem Samting long Hom

Long nekis wik, ol memba blong klas bae oli stat blong stadi long buk blong Moronae. Bae oli faenem i intresting blong save se Moronae i no bin plan, long stat, blong raetem eni samting moa afta long buk blong Ita, be hem i bin laef i longwan moa bitim we hem i ting long hem. Long wik ia, bae oli stat blong ridim ol las mesej we Moronae i bin gat insperesen blong raetem bifo hem i ded.

Sam Moa Risos

Blong save progres long saed blong spirit, i nidim blong yumi save luksave ol wiknes blong yumi.

Presiden Henry B. Eyring, taem hem i givim tingting abaot Ita 12:27, i bin tijim se: “Moronae i bin talem se taem hem i harem ol toktok ia, hem i harem gud long hem (Ita 12:29). Ol toktok ia oli save mekem evriwan long yumi i harem gud. Olgeta we oli no save luksave ol wiknes blong yumi, oli no save progres. Taem yu luksave wiknes blong yu, hem i wan blesing from se hem i helpem yu blong gat tingting i stap daon, mo i gohed blong stap tanem yu i go long Sevya. Spirit i no stap mekem yumi harem gud nomo, be tu, hem i hem nao, we tru long hem, Atonmen i wok blong jenisim ol fasin blong yu. Nao yumi kam strong long ol samting we yumi no strong long olgeta” (“My Peace I Leave with You,” Ensign o Liahona, May 2017, 16).

Ol eksampol: Olgeta we oli no strong, oli kam strong.

• Inok (Moses 6:31–34; 7:13)

• Moses (Eksodas 4:10–12; 14:31)

• Gidion (Ol Prija 6:12–16; 8:22–23)

• Pita (Luk 5:8–10; 22:55–62; Ol Wok 4:13–21)

• Moronae (Ita 12:23–29)

• Josef Smit (Josef Smit—Histri 1:28; D&K 35:17; 135:3)

Stap Kam Antap long Fasin blong Yumi blong Stap Tij

Tijim poen ia: “from wanem.” “Samtaem, olgeta we oli stap lan—speseli ol yut—oli stap askem olgetawan olsem wanem nao ol prinsipol blong gospel oli abaot olgeta, o from wanem oli mas obei long samfala impoten komanmen. Be, sapos oli andastanem plan we i no save finis, blong Papa long Heven, we Hem i gat blong ol pikinini blong Hem oli stap hapi, bae ol prinsipol blong gospel mo ol komanmen bae oli kam klia, mo bae i pusum olgeta moa blong stap obei” (Teaching in the Savior’s Way, 20).