Alma i baptaesem ol pipol long Ol Wota blong Momon

Minerva Teichert (1888–1976), Alma I Baptaesem Man insaed long Ol Wota blong Momon 1949–1951, oel peinting antap long mesonaet, 35⅞ x 48 inj. Brigham Yang Yunivesiti Miusiom blong Art, 1969

30 Novemba–6 Disemba

Moronae 1–6

“Blong Holemtaet Olgeta I Stap long Stret Rod”

Moronae i bin wantem se ol samting we hem i bin raet abaot, bae “oli gat gud yus” long olgeta we oli stap laef long ol las dei (Moronae 1:4). Taem yu stap rid long Moronae 1–6, wetem prea, tingting long ol samting we bae ol memba we yu stap tijim bae oli gat moa yus long ol.

Raetemdaon Ol Filing mo Tingting blong Yu

serem pikja bokis

Invaetem Ol Man blong Serem Wanem Oli Gat

Samtaem, ol memba blong klas bae oli faenem i moa isi blong serem ol niu tingting blong olgeta we oli bin kasem aot long stadi blong olgetawan, hemia taem we oli gat smol taem nomo blong tingbaot wanem oli bin ridim. Blong luklukbak long olgeta jalenj we Alma i bin fesem, luk long ol japta heding blong Moronae 1–6. (Hemia i save helpem tu ol memba blong klas we oli no bin rid long hom.) Afta, invaetem ol memba blong klas blong luklukgud insaed long ol japta ia blong kasem wan ves we i gat mining long olgeta, mo oli wantem blong serem wetem klas.

tijing pikja bokis

Stap Tijim Doktrin

Moronae 2–6

Oli mas mekem ol prishud odinens olsem we Lod i givim komanmen from.

• Sapos ol memba blong klas blong yu (o olgeta famli blong olgeta) oli stap kasem ol prishud odinens, maet bae i gud tumas blong luklukbak long wanem Moronae i stap tijim abaot ol odinens long Moronae 2–6. Ol memba blong klas oli save wok tutu blong rolplei ol situesen olsem olgeta ia: (1) Brata blong yu i rere blong oli odenem hem long prishud. ?Wanem kaonsel bae i yu givim wetem wanem we i stap long Moronae 3? (2) Wan fren blong wan nara fet i stap askem hemwan se from wanem i nid blong tekem mo kakae sakramen long evri wik. ?Bae yu talem wanem? (luk long Moronae 4–5). (3) Baptaes blong gel blong yu i stap kam kolosap, be hem i no save stret se hem i rere o nogat. ?Olsem wanem nao bae yu helpem hem? (luk long Moronae 6:1–3). Afta long ol rolplei, klas i save toktok raon long wanem we oli bin lanem aot long wanwan long olgeta. Oli save serem tu ol testemoni blong olgeta long saed blong wei we ol odinens ia oli bin tekem olgeta i go kolosap moa long Papa long Heven mo Jisas Kraes.

• Blong presentem wan toktok raon long topik blong fasin blong stap rere from baptaes, yu save askem wan memba blong klas blong i tokbaot ol wei we hem i bin mekem hemwan i rere from ol impoten komitmen long laef blong olgeta, olsem wan misin, wan mared, blong kam papa o mama, o blong gat wan niu wok. ?Olsem wanem nao fasin blong rere ia, yumi save komperem wetem wanem yumi nidim blong rere from blong kasem baptaes olsem we oli tokbaot long Moronae 6:1–3? (luk tu long Mosaea 18:8–10; D&K 20:37). ?From wanem ol fasin o kwaliti we oli tokbaot long ol ves ia, yumi nidim olgeta blong save kasem baptaes? ?Olsem wanem nao yumi save se yumi rere o no from odinens ia? Leftemap tingting blong ol memba blong klas blong tingting hevi sapos oli bin mekem gud blong stap laef folem olgeta standet ia stat long baptaes blong olgeta, mo wanem oli save mekem blong kam antap long hem. Yu save invaetem olgeta blong raetemdaon long pepa eni tingting o filing we oli kasem mo blong oli go luklukbak long wanem we oli bin raetem plante taem.

  yangfala gel i stap kasem wan blesing

  Ol odinens, oli mekem olgeta wetem paoa blong prishud.

Moronae 4–5

Blong tekem mo kakae long sakramen i helpem yumi blong kam kolosap moa long Jisas Kraes.

• Aotlaen blong wik ia, insaed long Kam Folem Mi—Blong Wanwan Man, Woman mo Famli i tokbaot ol aktiviti we i go wetem sakramen. Maet yu save invaetem sam memba blong klas blong oli mekem ol aktiviti ia long hom, mo oli kam long klas we oli rere blong serem wanem oli bin lanem. Maet yu save invaetem tu ol memba blong klas blong oli serem wetem wanwan long olgeta wanem we oli mekem blong mekem olgetawan, mo famli blong olgeta, oli rere blong gat ol tabu eksperiens wetem sakramen.

• Plante long yumi oli bin harem ol prea blong sakramen plante taem, be yumi, ?yumi tingting o no long mining blong ol toktok ia? Blong helpem ol memba blong klas blong tingting hevi long ol prea ia, yu save givim olgeta sam minit blong oli raetemdaon tufala prea blong sakramen folem wanem oli lanem baehat. Afta, invaetem olgeta blong komperem wanem we oli raetem wetem Moronae 4:3 mo 5:2. ?Wanem nao oli tingbaot i isi nomo? ?Wanem nao oli bin mestem? ?Oli tek notis long eni samting abaot ol prea ia, we bifo, oli no bin tek notis long hem? Invaetem ol memba blong klas blong serem ol toktok mo ol sentens we oli kam long sakramen prea we i tajem olgeta, o i helpem olgeta blong filim se odinens ia, i wan tabuwan. Blong mekem se ol memba blong klas oli glad moa long hat blong olgeta from sakramen, tingting blong invaetem wan memba blong klas blong singsing o blong plei wan hym blong sakramen. Yu save soem tu vidio ia, “Always Remember Him” (ChurchofJesusChrist.org).

Moronae 6:4–9

Ol disaepol blong Jisas Kraes oli gohed blong stap givgivhan long wanwan long olgeta.

• Tingting blong yusum wan analoji blong helpem ol memba blong klas blong oli andastanem hamas i impoten blong “fidim olgeta wetem gudfala toktok blong God” (Moronae 6:4). Eksampol: ?Wanem kaen kaekae yu nidim blong fidim wan sid o wan bebi? ?Wanem i hapen sapos yu no wantem save long wan samting we i nidim blong oli givim kaekae long hem? ?Olsem wanem nao ol memba we oli niu mo ol memba we oli stap kambak long Jos, oli semmak long wan plant o wan smol pikinini we i nidim kaekae? Ol memba blong klas oli save stadi gud long Moronae:4-9 mo faenem ol aedia long wei we oli save “fidim” wanwan long olgeta long saed blong spirit. Mo tu, oli save faenem ol aedia insaed long “Sam Moa Risos.” Maet yu save serem wan eksperiens we, insaed long hem, wan disaepol i givhan long yu. Maet samfala memba blong klas bae oli glad blong serem ol semmak eksperiens blong olgeta.

• Moronae 6:4–9 , i save helpem ol memba blong klas blong oli andastanem olsem wanem yumi kasem blesing taem “oli kaontem olgeta wetem ol pipol blong jos blong Kraes” mo go long ol miting blong Jos. ?Olsem wanem yu save eksplenem ol blesing ia long wan we i stap kwestinim nid blong gat wan jos we i oganaes? Maet ol memba blong klas oli save luklukgud long ol ves ia blong faenem wan samting we oli save serem. O, oli save mekem wan lis blong ol blesing we oli bin kasem olsem ol memba blong Jos ia (luk long D. Todd Christofferson, “Why the Church,” Ensign o Liahona, Nov. 2015, 108–11). ?Wanem nao yumi save mekem blong meksua se ol fren disaepol blong yumi, oli “tingbaot olgeta mo oli fidim olgeta wetem gudfala toktok blong God” taem yumi stap “mit tugeta plante taem”? (Moronae 6:4–5).

lanem samting pikja bokis

Stap Leftemap Tingting blong Lanem Samting long Hom

Maet bae ol memba blong klas oli moa strong tingting blong ridim Moronae 7–9 long nekis wik sapos yu eksplenem se, insaed long riding ia, i gat tufala leta we Momon i bin raetem blong helpem boe blong hem blong stap fetful long taem blong ol hadtaem.

risos pikja bokis

Sam Moa Risos

Tok blong God i fidim hem.

Elda Jeffrey R. Holland i tijim: “Plante long ol pipol oli no kam long Jos blong stap lukaotem nomo sam niu samting long saed blong gospel, o blong luk ol olfala fren, we i nomata se evri samting ia oli impoten. Be oli kam blong lukaotem blong gat wan eksperiens long saed blong spirit. Oli wantem pis. Oli wantem se fet blong olgeta i kam strong, mo hop blong olgeta i kam niu bakegen. Long sot toktok, oli wantem blong gudfala toktok blong God i fidim olgeta, blong ol paoa blong heven i mekem olgeta oli kam strong moa” (“A Teacher Come from God,” Ensign, May 1998, 26).

Presiden Gordon B. Hinckley i eksplenem se blong fidim ol niufala konvet, o ol niufala memba blong jos wetem toktok blong God, “i wok blong evriwan. Hem i wan wok blong ol hom tija, mo ol visiting tija [we naoia, oli ol givhan brata mo sista]. Hem i wok blong bisoprik, blong ol kworom blong prishud, blong Rilif Sosaeti, blong ol yang man mo ol yang woman, iven, i wok blong Praemeri.

“Mi bin stap long wan fast mo testemoni miting long las Sandei. Wan boe, we i gat samples 15 o 16 yia, i stanap long fored blong kongregesen, mo i talem se hem i disaed blong kasem baptaes.

“Afta, wan afta wan, ol boe blong kworom blong ol tija, oli stanap, oli kam long maek blong talemaot se oli lavem hem, oli talem long hem se hem i stap mekem raet samting, mo oli talem hem se bae oli stanap wetem hem mo bae oli helpem hem. Hem i bin wan gudfala eksperiens blong harem ol yang man ia oli toktok, oli talem ol gudfala toktok blong tangkyu mo blong leftemap tingting blong fren blong olgeta. Mi mi glad se evriwan long ol boe ia, wetem hemia we i bin baptaes long las wik, se evriwan bae oli go long wan misin.

“Long wan intaviu wetem media i no longtaem i pas, oli askem mi: ‘?Wanem nao i mekem yu glad we yu glad taem yu stap luk wok blong Jos tedei?’

“Ansa blong mi i: ‘Eksperiens we i mekem mi mi glad tumas, i blong luk wanem we gospel ia i stap mekem long ol pipol. I givim olgeta wan niu lukluk i go long laef. I givim olgeta wan niu wei blong lukluk samting we oli neva bin filim bifo. I mekem ae blong olgeta i lukluk i go antap, i lukluk long ol samting we oli gud tumas mo oli tabu. Wan samting i hapen long olgeta we i wan merikel blong luk. Oli luk long Kraes mo oli kam laef.’

“… Mi askem wanwan long yufala, blong plis, yufala i help long fasin ia” (“Converts and Young Men,” Ensign, May 1997, 48).

Stap Kam Antap long Fasin blong Yumi blong Stap Tij

Lukaotem insperesen blong yuwan. Yu no lukluk long ol aotlaen ia olsem ol instraksen we yu mas folem, be yu yusum olgeta blong kasem sam aedia, o blong givim laet blong yu kasem insperesen blong yuwan nomo taem yu stap tingting hevi long ol nid blong olgeta ia we yu stap tijim olgeta.