Jisas i kamkamaot long Ol Man blong Nifae

Blong Yufala I Mas Save, i kam long Gary L. Kapp

14–20 Disemba

Moronae 10

“Kam long Kraes, mo Kam Stret Evriwan Tru Hem”

Ol memba blong klas blong yu, maet oli bin gat ol eksperiens we i gat mining taem oli bin ridim Buk blong Momon long yia ia. Yusum ol eksperiens ia blong leftemap tingting blong evriwan long klas blong stadi ol skripja.

Raetemdaon Ol Filing mo Tingting blong Yu

serem pikja bokis

Invaetem Ol Man blong Serem Wanem Oli Gat

Yu save invaetem ol memba blong klas blong traem pikjarem se Moronae i stap visitim klas. ?Wanem nao bae oli talem long hem abaot wanem hem i bin raetem long Moronae 10? ?I gat eni ves we i gat bigfala mining long olgeta? Maet oli save serem ol eksperiens we oli bin gat wetem ol ves ia.

tijing pikja bokis

Stap Tijim Doktrin

Moronae 10:3–7

Mi save kam blong save trutok tru long paoa blong Tabu Spirit.

• Ol memba blong klas oli save gat sam niu tingting sapos oli stadi long Moronae 10:3–5. Blong helpem olgeta, yu save raetem ol impoten sentens aot long ol ves ia, i go long ol defren pis pepa, mo givim wan pepa long wanwan memba blong klas, o givim long wan grup blong ol memba blong klas. Invaetem olgeta blong tingting hevi, o blong toktok raon long wanem nao sentens blong olgeta i minim, mo tu, wanem nao oli save mekem blong yusum wanem toktok ia i talem long laef blong olgeta. Afta, oli save ridim Moronae 10:3–5 tugeta, mo stop taem oli kasem wan sentens we wan i bin stadi long hem, blong mekem se memba ia blong klas i save serem ol tingting blong hem.

• Blong leftemap tingting blong ol memba blong klas blong oli serem ol eksperiens we oli bin gat taem oli tekem aksen folem invitesen blong Moronae, yu save invaetem olgeta blong traem tingting se oli stap traem blong leftemap tingting blong wan fren, o wan memba blong famli blong oli kasem wan testemoni abaot Buk blong Momon. ?Olsem wanem nao oli save yusum Moronae 10:3–7? ?Wanem eksperiens nao oli save serem? ?Olsem wanem yumi save helpem ol narawan blong oli andastanem se i minim wanem blong save wan samting “tru long paoa blong Tabu Spirit”? (Moronae 10:5).

Moronae 10:8–25

“No tanem baksaed long ol presen blong God.”

• ?From wanem nao strong tok ia blong “no tanem baksaed long ol presen blong God” i impoten, speseli long ol las dei ia? (Moronae 10:8) Leftemap tingting blong ol memba blong klas blong oli askem kwestin ia taem oli stap ridim Moronae 10:8–18. Blong helpem bilif blong ol memba blong klas long ol presen we i kam long Spirit, yu save invaetem olgeta blong serem ol eksampol blong ol pipol we oli stap yusum wanwan presen ia we oli raetemdaon long Moronae 10:9–16. Ol eksampol ia oli save kam long ol skripja, long Jos histri, o long laef blong yumiwan. (Ol eksampol we oli stap long Buk blong Momon, yu save faenem long “Sam Moa Risos.”) Yu save toktok raon tu long wei we samfala presen we oli tokbaot long ol ves ia, oli bin kamkamaot klia long taem we Buk blong Momon i bin kamaot. ?From wanem i impoten blong wan we i stap wantem blong kasem wan testemoni abaot Buk blong Momon, blong hem i biliv long ol presen we oli kam long Spirit? ?Wanem nao sam samting we yumi stap mekem blong stap “tanem baksaed” long ol presen ia insaed long laef blong yumi? ?Olsem wanem ol presen ia oli stap helpem yumi blong “kam long Kraes mo kam stret evriwan tru Hem? (luk long Moronae 10:30–33).

• Wan nara wei blong lukluk long ol presen ia we oli kam long Spirit, we oli tokbaot long ol ves ia, hem i blong raetem ol kwestin long bod; ol kwestin olsem: ?Wanem nao oli ol presen we oli kam long Spirit? ?Oli givim ol presen long huia? ?From wanem oli givim ol presen ia? Mo ?Olsem wanem yumi kasem olgeta? Afta, invaetem ol memba blong klas blong stadi gud long Moronae 10:8–25 blong faenem ol ansa. (Ol toktok we oli kam long Presiden Brigham Yang mo Presiden Dallin H. Oaks insaed long “Sam Moa Risos” bae i save help.) Antap long ol presen we oli kam long Spirit we oli listim long ol ves 9–16, wanem nao ol nara “presen blong God” we yumi bin kasem, o yumi bin gat ol blesing wetem? (Moronae 10:8). Maet bae yu wantem serem wanem we Elda Bruce R. McConkie i bin tijim: “Ol presen we oli kam long Spirit, oli plante we namba i no save kaontem, mo oli plante we plante kaen. Olgeta we oli raetemdaon long toktok we i kam tru long revelesen, oli stap soem nomo bigbigfala tabu gladhat we God i gat i givim long yumi, olgeta ia we yumi lavem mo wok blong Hem” (A New Witness for the Articles of Faith [1985], 371).

Moronae 10:30–33

Mi save kam stret evriwan tru long gladhat blong Jisas Kraes.

• Long filing blong yu, ?wanem nao bae i helpem ol memba blong klas blong yu blong akseptem invitesen blong Moronae blong “kam long Kraes mo kam stret evriwan tru hem”? (Moronae 10:32). Stat wetem wan hym abaot topik ia, olsem “Kam Folem Mi” (Liahona, Epril 2010); Hemia i save invaetem Spirit i kam long toktok insaed long klas. Mo ol memba blong klas oli save serem wanem samting we i joen bitwin hym ia mo ol trutok we oli stap long Moronae 10:30–33. ?Wanem nao yumi lanem aot long ol ves ia mo hym ia abaot mining blong kam long Kraes? ?I minim wanem blong “kam stret evriwan tru long Kraes”? (luk long D&K 76:50–53, 69). Serem ol filing blong yu abaot mining blong “kam stret gud evriwan tru long Jisas” (D&K 76:69), mo leftemap tingting blong ol memba blong klas blong serem filing blong olgeta.

• From se hemia i las toktok insaed long klas abaot Buk blong Momon, long yia ia, maet bae yu wantem askem ol memba blong klas blong oli serem sam samting abaot wanem oli bin filim mo lanem taem oli bin stadi long buk ia. Blong helpem ol memba blong klas blong oli mekem hemia, yu save ridim Moronae 10:32–33 tugeta, mo askem ol memba blong klas blong spendem sam minit blong tingting hevi long wei we Buk blong Momon i bin helpem olgeta blong kam long Kraes. Yu save askem: ?Olsem wanem nao Buk blong Momon i bin helpem yumi blong gat moa bigfala lav long God? ?Olsem wanem i bin helpem yumi blong dipen moa fulwan long gladhat blong Kraes? ?Olsem wanem nao i bin helpem yumi blong “no tanem baksaed” long paoa blong Sevya’? Invaetem ol memba blong klas blong serem testemoni blong olgeta abaot Buk blong Momon mo witnes blong buk ia abaot Jisas Kraes.

lanem samting pikja bokis

Stap Leftemap Tingting blong Lanem Samting long Hom

Blong helpem ol memba blong klas blong luk fored blong stadi long Doktrin mo Ol Kavenan long nekis yia, yu save luklukbak long Moronae 10:9–16 mo eksplenem se ol presen ia, evriwan oli kamkamaot klia long Jos tedei. Taem yumi stap ridim Doktrin mo Ol Kavenan, bae yumi luk olsem wanem oli bin yusum ol presen ia mo paoa blong God blong mekem wok blong Hem long ol las dei ia.

risos pikja bokis

Sam Moa Risos

Ol Taem we ol presen we oli kam long Spirit oli kamaot insaed long Buk blong Momon

• Tij wetem Spirit: Nifae mo Lihae (Hileman 5:17–19)

• Bigfala fet olgeta: Alma, Amulek, Amon, mo ol narawan (Ita 12:13–22)

• Hiling: Alma (Alma 15:5–11)

• Ol bigfala merikel: Ol Trifala Disaepol (3 Nifae 28:19–22)

• Profesi: Lihae (2 Nifae 1:6–7)

• Luk ol enjel: Amulek (Alma 10:7–10)

• Talem mining blong ol lanwis: Mosaea (Mosaea 28:11–16)

Testemoni blong Presiden Brigham Yang long saed blong ol presen we oli kam long Spirit.

“Fet. Taem yu biliv long olgeta prinsipol blong Gospel mo go kasem fet, we i wan presen we i kam long God, Hem i ademap moa fet, i ademap fet long fet. …

“Presen blong Hiling. Mi mi stap ia blong testifae long ol handred blong ol defren man, woman mo pikinini we paoa blong God i hilim olgeta, tru long fasin blong putum han antap long hed blong man, mo mi bin luk plante we oli girap oli aot long ol get blong ded, mo oli karembak olgeta we oli stap stanap finis long laen ia blong taem we i no save finis; mo sam, we spirit blong olgeta i bin aot finis long bodi blong olgeta, we oli kambak bakegen. Mi testifae se mi bin luk ol sikman oli kam oraet bakegen tru long fasin blong putum han antap long hed blong man, folem promes blong Sevya. …

“Profesi, Revelesen, mo Save. Evri man mo woman, i save kam reveleta, mo i gat wan testemoni abaot Jisas, we i spirit blong profesi, mo i save luk finis maen mo tingting blong God long saed blong olgeta bakegen, i sakemaot ivel, mo i jusum wanem we i gud” (Teachings of Presidents of the Church: Brigham Young [1997], 252–53).

“Holemtaet evri gudfala presen.”

Presiden Dallin H. Oaks i tokbaot olsem wanem we taem mama blong hem i lukaotem ol presen long saed blong spirit, i bin blesem hem: “From se hem i lusum hasban blong hem, wido mama blong mi i no filim se hem i fulwan i stap. !Hem i prea strong blong wanem hem i nidim blong mekem responsabiliti blong hem blong lukaotem trifala smol pikinini blong hem! !Hem i stap lukaotem wei, hem i klin inaf, mo hem i kasem blesing! Prea blong hem i gat ansa, long plante wei, wetem hemia blong kasem ol presen long saed blong spirit. Hem i gat plante, be olgeta we oli kamkamaot klia long memori blong mi, oli ol presen blong gat fet, blong gat testemoni, mo waes” (“Spiritual Gifts,” Ensign, Sept. 1986, 72).

Stap Kam Antap long Fasin blong Yumi blong Stap Tij

Putum wan taem i stap blong olgeta we oli lanem samting, oli serem wanem oli lanem. “Taem olgeta we oli lanem samting oli serem wanem we oli stap lanem, oli no filim Spirit nomo mo mekem testemoni blong olgeta i kam strong moa, be tu, oli stap leftemap tingting blong ol nara memba blong klas blong faenemaot ol trutok olgetawan” (Teaching in the Savior’s Way, 30).