“7–13 Disemba. Moronae 7–9 ‘Bae Kraes I Leftemap Yu” Kam Folem Mi—Blong Sandei Skul: Buk blong Momon 2020 (2020)
“7–13 Disemba. Moronae 7–9,” Kam Folem Mi—Blong Sandei Skul: 2020
Minerva Teichert (1888–1976), Moronae: Las Man blong Nifae, 1949–1951, oel peinting antap long mesonaet, 34¾ x 47 inj. Brigham Yang Yunivesiti Miusiom blong Art, 1969
7–13 Disemba
Moronae 7–9
“Bae Kraes I Leftemap Yu”
Stamba tingting blong yu, i blong helpem ol pipol blong oli kam kolosap moa long God, i no jes blong stap nomo long taem blong lesen. Rere from Sandei Skul; ridim Moronae 7-9 wetem ol memba blong klas oli stap long maen blong yu, mo faenem ol prinsipol we bae i helpem olgeta.
Raetemdaon Ol Filing mo Tingting blong Yu
Invaetem Ol Man blong Serem Wanem Oli Gat
Invaetem ol memba blong klas blong luklukbak long Moronae japta 7, 8, o 9 mo faenem wan trutok we i gat mining long hem. Afta, ol memba blong klas oli save serem trutok we oli faenem mo olsem wanem i bin blesem olgeta.
Stap Tijim Doktrin
“Be luk, samting we i blong God, i stap invaetem mo i switim man blong mekem samting we i gud oltaem.”
-
Blong save stap ol disaepol blong Jisas Kraes, yumi mas save jajem wanem we hem i gud mo wanem we hem i nogud. Maet sapos yufala i toktok raon long ol trutok insaed long Moronae 7:3–19 i save helpem ol memba blong klas blong stap longwe long fasin blong stap jajem ol samting i “rong” (Moronae 7:18). Blong rere from toktok ia insaed long klas, haf long klas i save lukaotem ol ves ia blong kaonsel we Momon i givim abaot wei blong luksave wanem we i kam long God, mo nara haf i save lukaotem wei blong faenemaot wanem i kam long devel. Afta, oli save toktok raon long wanem oli bin faenem mo serem ol eksampol blong ol samting we i stap invaetem olgeta blong “mekem gud mo blong lavem God, mo wok blong hem” (Moronae 7:13). ?Olsem wanem yumi save praktisim kaonsel blong Momon long evri dei desisen blong yumi? ?Olsem wanem nao yumi mekem ol stret mo gud joes, mo stil soem lav long olgeta raon long yumi we oli no laef folem gospel?
-
Plante pipol oli askem olgetawan: “?Olsem wanem bae mi save se wan kwaet toktok ia i kam long God, o, oli ol tingting blong mi nomo?” Yu save raetem kwestin ia antap long bod mo invaetem ol memba blong klas blong luklukgud insaed long Moronae 7:13–16 blong faenem ol prinsipol we oli save help blong ansarem ol kwestin ia. ?Olsem wanem ol ves ia i stap helpem yumi blong luksave insperesen we i kam long heven? Bae i help blong eksplenem se “Spirit blong Kraes,” we oli save tu olsem laet blong Kraes, samtaem, bae oli tokbaot tu se hem i gud tingting. Toktok ia we i kam long Presiden Gordon B. Hinckley insaed long “Sam Moa Risos” mo i stap long vidio ia “Patterns of Light” (ChurchofJesusChrist.org) bae i save help.
Olgeta we oli stap folem Jisas Kraes, oli lukaot blong gat fet, hop mo jareti.
-
Blong helpem klas blong yu blong i andastanem gud moa wanem i joenem fet, hop mo jareti tugeta, yu save soem wan stul we i gat tri leg (o wan pikja blong wan stul ia) mo askem ol memba blong klas blong tekem se fet, hop mo jareti oli olsem ol trifala leg ia (luk long toktok blong Presiden Dieter F. Uchtdorf insaed long “Sam Moa Risos”). Afta, yu save invaetem olgeta blong jusum wan long ol fasin ia mo lukluk long wanem Momon i stap tij abaot hemia long Moronae 7:21–48. Toktok raon long ol kwestin olsem: ?From wanem yumi nidim fet mo hop blong save kasem presen ia we i bigfala lav o jareti? ?Olsem wanem nao wanwan long ol fasin ia i joenem yumi long Jisas Kraes? ?From wanem ol fasin ia oli wan nid blong wan disaepol blong Jisas Kraes? ?Wanem nao i hapen long yumi taem yumi lusum fet, hop mo jareti? Invaetem ol memba blong klas blong oli tekem sam taem blong raetem ol tingting mo ol filing we oli gat.
Taem yumi andastanem ol doktrin we oli stret, i save helpem yumi blong mekem ol joes we oli stret.
-
Maet i no nid blong klas blong yu i toktok raon long from wanem nao i rong blong baptaesem ol smol bebi, mo ol toktok blong Momon, long saed blong topik ia, i save helpem olgeta blong luk ol denja blong giaman doktrin long evri samting. Blong soemaot olsem wanem Buk blong Momon i “blokem ol giaman doktrin” (2 Nifae 3:12), yu save invaetem ol memba blong klas blong ridim Moronae 8:4–21 long ol grup, o wanwan. Haf long olgeta oli save lukaotem doktrin ia we Momon i bin filim se ol pipol oli no bin andastanem, wetem doktrin ia blong Atonmen blong Jisas Kraes (luk long ves 20) mo fasin blong stap akaontebol (ansa from ol aksen blong yumi) (luk long ves 10). Nara haf i save lukaotem ol risal we oli kamaot from ol mistek o rong blong ol pipol. Wanwan grup i save serem wetem klas wanem we oli bin faenem. ?Wanem nao ol ves ia oli stap tijim yumi abaot hamas i impoten blong lanem samting mo stap laef folem wan doktrin we i stret? ?Wea nao yumi save faenem stret eksplenesen blong doktrin blong Kraes? ?Olsem wanem nao yumi save meksua se wanem yumi andastanem abaot wan doktrin, i stret?
-
Mebi klas blong yu i save lanem samting aot long eksampol blong Momon taem hem i bin helpem wan blong mekem ol joes we i gud moa taem hem i bin tijim olgeta doktrin ia we i stret. Yu save mekem hemia taem yu invaetem ol memba blong klas blong oli tingting long wan, aot long ol skripja, we i bin mekem wan rong joes. ?Wanem doktrin trutok nao bae i helpem man o woman ia blong nomo mekem nogud joes ia bakegen? Givim sam minit long ol memba blong klas blong faenem ol skripja o ol toktok we oli kamaot long las jeneral konfrens we bae i helpem man o woman ia blong andastanem doktrin trutok. Afta, yu save askem ol memba blong klas blong oli serem wanem we oli bin faenem.
Yumi save gat hop long Kraes, i nomata long situesen blong yumi.
-
Las mesej we Momon i raetemdaon i go long boe blong hem, we i stap long Moronae 9:25–26 i save helpem ol memba blong klas blong oli faenem hop long Kraes, iven long ol situesen we i nomo gat hop i stap. Blong stat, yu save askem ol memba blong klas blong oli serem ol risen from wanem Moronae i filim blong slakem tingting blong hem. Afta, yu save ridim ol ves ia, mo raetemdaon long bod ol trutok we Momon i leftemap tingting blong Moronae blong lukluk nomo long olgeta. ?Olsem wanem nao ol semfala trutok ia oli save “leftemap yumi” long taem blong yumi tedei? Ol memba blong klas oli save serem ol eksampol blong sore mo longfala tingting blong God, we oli bin witnesem. O, oli save serem sam aedia blong helpem wanwan blong kipim Sevya mo gospel blong Hem “i stap long maen” blong yumi oltaem, iven taem yumi fesem taem we tingting blong yumi i slak evriwan (ves 25).
Stap Leftemap Tingting blong Lanem Samting long Hom
Blong leftemap tingting blong ol memba blong klas blong oli ridim Moronae 10, yu save givim tingting se maet i wan gud taem blong tingtingbak long wanem wei nao oli bin gat eksperiens ia blong wan witnes we i kam niu bakegen abaot Buk blong Momon, taem oli bin stap stadi long hem long yia ia.
Sam Moa Risos
?I kam long Spirit o no?
Blong ansarem kwestin ia, “Olsem wanem nao yumi luksave ol kwaet toktok blong Spirit? Presiden Gordon B. Hinckley i bin kwotem Moronae 7:13 mo talem: “Mi no ting se hem i had tumas. … ?Hem i stap winim tingting blong yu blong mekem gud, blong stanap stret, blong mekem raet samting, blong stap kaen, blong yu gat gudfala hat? Sapos yes, nao Hem i Spirit blong God” (Teachings of Gordon B. Hinckley [1997], 260–61).
Fet, hop mo jareti.
Presiden Dieter F. Uchtdorf i bin komperem fet, hop, mo jareti long wan stul we i gat trifala leg, mo eksplenem se olgeta trifala klin fasin ia, “i mekem laef blong yumi i balens gud, i nomata i sidaon long wan graon we i raf o i smut. …
“Fet, hop mo jareti, oli kam joenem mo mekem narawan i komplit; taem wan i kam antap, ol narawan tu oli gro wetem. Hop i kamaot long fet, from se sapos i no gat fet, nao i no gat hop. Long semmak fasin, fet i kamaot long hop, from se fet i ‘ol samting we yumi stap hop long olgeta.’
“Hop, hem i wan mas blong stap wetem fet mo jareti. Taem fasin blong no stap obei, fasin blong harem nogud, mo fasin blong pusumbak taem i stap kakae fet, nao hop i stap blong leftemap fet blong yumi. Taem we yumi no glad, o no save wet longtaem, hemia i givim jalenj long jareti; nao hop i holemtaet yumi mo i pusum tingting blong yumi blong kea long ol nara man, we yumi no wet se bae oli talem tangkyu from. Moa hop blong yumi i saen moa, moa fet blong yumi bae i kam bigwan. Moa hop blong yumi i strong, nao jareti blong yumi i moa klin (“The Power of Hope,” Ensign o Liahona, Nov. 2008, 21, 23–24).
“Klin lav blong Kraes.”
Elda Jeffrey R. Holland i givim tu posibol mining blong toktok ia, “klin lav blong Kraes”:
“Wan, … i kaen lav ia we i gat sore long hem, we i save fogivim man, we ol disaepol blong Kraes oli mas gat long wanwan long olgeta. …
“[Wan nara mining] i we, lav blong Kraes i no save fogetem man, i bigwan evriwan, mo i pem praes from yumi. … Hem i kaen jareti ia nao—klin lav blong Kraes from yumi—we sapos yumi no gat, bae yumi nating nomo (Christ and the New Covenant: The Messianic Message of the Book of Mormon [1997], 336).
Stap Kam Antap long Fasin blong Yumi blong Stap Tij
Helpem olgeta we oli stap lan blong oli developem fasin blong stap dipen long olgetawan long saed blong spirit. ‘Taem yu stap tij, yu no givim infomesen nomo, be yu helpem ol memba blong klas blong oli faenemaot ol trutok blong gospel olgetawan. … Taem oli gat kwestin, samting i moa gud blong tijim olgeta olsem wanem blong faenem ol ansa olgetawan” (Teaching in the Savior’s Way,28). Eksampol, yu save poenem ol memba i go long Ol Gospel Topik long topics.churchofjesuschrist.org, we i tekem plante infomesen we i stap help, long saed blong plante defren topik.