Ol Man blong Jared Oli Aot long Babel, i kam long Albin Veselka

9–15 Novemba

Ita 1–5

“Teremaot Vel Ia blong No Gat Bilif”

?Wanem trutok nao yu bin lanem long taem blong stadi blong yuwan long Ita 1–5 we yu save serem wetem olgeta we yu stap tij? Sapos i gat, invaetem olgeta blong serem wanem oli lanem?

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Tingting long gudfala wei ia blong invaetem man blong serem samting: Pasem sam ston i go long 16 memba blong klas, mo invaetem sam moa blong serem wan trutok we oli tingbaot aot long stadi blong olgetawan, o aot long famli stadi blong olgeta Ita 1–5. ?Wanem nao yumi filim insperesen blong go mekem from olgeta samting ia we yu stap lanem?

Stap Tijim Doktrin

Ita 1–3; 4:8–19

Taem bae yumi stap prea long Lod oltaem, bae Hem i talemaot tingting blong Hem.

• Evriwan long yumi i bin faenem i had blong faenem wan ansa long wan problem o wan kwestin. ?Olsem wanem nao, ol eksperiens blong brata blong Jared oli save helpem olgeta we yu stap tijim olgeta blong oli lanem wei blong askem help i kam long Lod? Maet yu save droem wan tebol antap long bod, wetem ol kolom i stap, oli singaotem Kwestin blong brata blong Jared, Aksen brata blong Jared, mo Ansa blong Lod. Afta, yu save serem klas i go long tri grup mo givim wok long wanwan grup blong lukluk long wan kolom. Wanwan grup i save wok tugeta blong oli luk tru long Ita 1:33–43 mo 2:16–3:6 mo oli raetem wanem we oli faenem insaed long kolom blong olgeta. Afta long hemia, klas i save toktok raon long ol kwestin olsem: ?Wanem nao yumi lanem aot long ol defren wei we Lod i save jusum blong helpem yumi? ?Wanem nao yumi lanem abaot rol blong yumi long fasin ia blong stap kasem revelesen? Maet ol memba blong klas oli save serem ol nara eksampol aot long ol skripja we oli stap tijim ol semmak prinsipol. Toktok blong Elda Richard G. Scott insaed long “Sam Moa Risos,” i givim sam moa niu tingting abaot wei we Lod i stap ansarem ol prea blong yumi.

• Prea blong brata blong Jared we i stap long Ita 3:1–5 i save givim insperesen long ol memba blong klas blong oli skelem ol prea blong olgetawan. Maet ol memba blong klas oli save traem tingting long maen blong olgeta se oli stap givim kaonsel long wan we i jes lan olsem wanem blong prea. ?Bae oli givim wanem advaes? Oli save luklukgud insaed long Ita 3:1–5 mo talemsot wanem i stap long wanwan ves, mo tu, talem wan o tu wei o prinsipol abaot fasin blong talem wan prea we bae i wokaot. Tingting blong givim sam minit long ol memba blong klas blong oli tingting long prea blong olgetawan bakegen, mo olsem wanem oli save folem eksampol blong Jared blong mekem prea blong olgeta i gat moa mining.

• Afta we yu serem revelesen eksperiens blong brata blong Jared long Ita 3, Moronae i bin givim kaonsel long Ita 4 abaot wei we yumi save kasem revelesen we i kam long Lod. Blong helpem ol memba blong klas blong oli lan aot long kaonsel ia, yu save soem wan pikja blong Jisas Kraes, mo invaetem ol memba blong klas blong luklukgud insaed long Ita 4:8–10 blong faenem ol samting we oli save stopem yumi blong kasem revelesen o trutok we i kam long Lod. Taem we ol memba blong klas oli stap serem wanem oli faenem, sloslo, yu save kavremap pikja blong Kraes wetem wan pis kaliko, o wan pis pepa. ?Olsem wanem nao yumi save stap longwe long ol fanis ia long saed blong spirit long laef blong yumi? Nekiswan, ol memba blong klas oli save luklukgud insaed long Ita 4:7, 11–15mo lukaotem wei we yumi kwalifae blong kasem trutok we i kam long Lod. Taem ol memba blong klas oli stap serem wanem we oli faenem, nao karemaot kaliko o pepa ia. ?Hem i minim wanem blong “yusum fet long Lod, olsem we brata blong Jared i bin mekem”? (Ita 4:7; luk tu long Ita 3:1–9). ?Hem i minim wanem blong “teremaot vel ia blong no gat bilif” insaed long laef blong yumi? (Ita 4:15). ?Olsem wanem nao yumi save helpem ol nara man blong oli mekem sem samting? Ol memba blong klas oli save lukaotem ol trutok abaot revelesen blong olgetawan insaed long mesej ia blong Presiden Russel M. Nelson “Revelesen blong Jos, Revelesen blong Laef blong Yumi” (Ensign o Liahona, Mei 2018, 93–96).

Ita 2:14–15

Tru long fasin blong Hem blong stap stretem yumi, Lod i stap invaetem yumi blong sakem sin mo blong kam long Hem.

• Iven wan profet we i bigfala, olsem brata blong Jared, Lod i bin tok long Hem blong stretem Hem. Wanem i tru, i we, wanem i mekem hem i wan bigfala profet, hem i wei we hem i tekem ol strong tok ia we i kam long Lod. Blong helpem ol memba blong klas blong oli lan aot long eksampol blong brata blong Jared, yu save invaetem olgeta blong oli joen tutu, mo oli ridim Ita 2:14–15 tugeta. Afta, askem olgeta blong priten se wan long olgeta i brata blong Jared, mo narawan, i wan we i jes kasem wan strong tok blong stretem hem, we i kam long wan lida blong Jos, o i kam long wan papa o mama. mekem olgeta oli toktok raon, o oli rolplei long wanem maet brata blong Jared i talem abaot eksperiens blong hem blong helpem narawan. ?Wanem kaonsel nao hem i save givim? ?Wanem lesen nao yumi lavem we bae i helpem yumi blong kam kolosap moa long Papa long Heven? Yu save toktok raon tu long wei we Lod i stap stretem man mo wei we brata blong Jared i akseptem, we maet i helpem hem from eksperiens we hem i bin gat, we i stap long Ita 3:1–20. Hemia sam nara risos we i save help: Mesej blong Elda D. Todd Christofferson, “As Many as I Love, I Rebuke and Chasten” (Ensign o Liahona, May 2011, 97–100) o seksen we oli singaotem “Discipline” insaed long mesej blong Elda Lynn G. Robbins “The Righteous Judge” (Ensign o Liahona, Nov. 2016, 96–97).

Ita 5

Ol trifala witnes oli testifae se Buk blong Momon i tru.

• Blong lanem abaot profesi blong Moronae abaot Olgeta Tri Witnes i save mekem testemoni blong ol memba blong klas abaot Buk blong Momon, i kam strong moa. Maet haf blong klas i save ridim Ita 5 mo nara haf i save ridim “Testemoni blong Olgeta Tri Witnes” (we i stap long stat blong Buk blong Momon) mo oli save serem wanem oli filim abaot stamba tingting blong Lod blong letem Olgeta Tri Witnes blong luk wan enjel mo ol buk blong histri ia. Oli save toktok raon tu long ol nara taem we plante witnes oli bin stanemap trutok (eksampol, luk long Matiu 3:13–17; 18:15–16; Jon 5:31–47; D&K 128:3). ?Wanem samting nao we yumi witnesem long laef blong yumi we i bin givim insperesen long yumi blong biliv? ?Olsem wanem nao oli bin “soem paoa blong God mo toktok blong hem” long yumi insaed long Buk blong Momon (Ita 5:4).

Stap Leftemap Tingting blong Lanem Samting long Hom

Invaetem ol memba blong klas blong oli traem tingting se ol politik lida blong olgeta oli stap gohed blong tekem prisena mo kilimded ol man. Long Ita 6–11, bambae oli rid abaot wei we hemia i bin hapen long ol laen blong Jared mo brata blong hem. Bae oli faenem sam woning tu we bae i helpem olgeta blong stap longwe long ol problem we Ol Man blong Jared oli bin fesem.

Sam Moa Risos

Stap luksave ol ansa blong ol prea.

Elda Richard G. Scott i bin tijim:

“Taem yumi stap eksplenem wan problem, mo givim wan ansa blong hem, samtaem Hem i ansa se, yes, mo samtaem hem i, no. Plante taem bae Hem i holemtaet ansa blong Hem, i no from se Hem i no gat wari long yumi, be, from se Hem i lavem yumi—i stret evriwan. Hem i wantem yumi blong praktisim ol trutok we Hem i bin givim long yumi. Blong yumi save gro, yumi nid blong trastem paoa blong yumi blong mekem ol stret desisen. Yumi nidim blong mekem wanem we yumi filim se i stret. Wetem taem, bambae Hem i ansa. Bambae Hem i no save lego yumi stap nating. …

“… Hem i wantem yumi blong tekem aksen blong yumi kasem eksperiens ia we yumi nidim:

“Taem Hem i ansa se, yes, hem i blong givim yumi paoa blong trastem yumiwan bakegen.

“Taem Hem i ansa se, no, hem i blong blokem yumi blong mekem mistek.

“Taem Hem i holemtaet wan ansa, hem i blong mekem yumi gro tru long fet we yumi gat long Hem, tru long fasin blong stap obei long ol komanmen blong Hem, mo tru long fasin blong wantem mekem wanem we i tru. Oli wantem luk yumi blong ansa from desisen blong yumi taem yumi tekem aksen i folem desisen ia we i go wetem ol tijing blong Hem, mo bae Hem i no konfemem bifo yu mekem. Yumi no mas sidaon nating, o stap toktok smosmol from se Lod i no toktok yet. Yumi mas tekem aksen” (“Learning to Recognize Answers to Prayer,” Ensign, Nov. 1989, 31–32).

Stap Kam Antap long Fasin blong Yumi blong Stap Tij

Go long ol skripja faswan. Ol skripja oli fas samting blong yu stadi mo rere from. Yu no fogetem se ol toktok blong ol profet blong tedei, oli kam komplitim ol tabu standet wok, mo tu, oli ol skripja (luk long Teaching in the Savior’s Way, 17–18).