“Okitobwa 12–18. 3 Nibwaai 20–26: ‘Ataein te Berita ae Tabu Ngkami,’” Nakomai, Iriirai—Ibukin te Reirei n Tabati: Ana BokiMoomon 2020 (2020)
“Tianuare 13–19. 1Nibwaai 8–10,” Nakomai, Iriirai—Ibukin te Reirei n Tabati: 2020
Tamnein kristo ngke e kaoti nakoia Nibwaite iroun Andrew Bosley
Okitobwa 12–18
1Nibwaai 20–26
“Ataein te Berita ae Tabu Ngkami”
Kariaia te Tamnei bwa e na kaira am kamatebwai n 3 Nibwaai 20–26. E na buokiko n atai reirei ake a na bongana nakoia aomata ake ko reireiniia.
Korei Am Namakin
Kaungaa te Tibwatibwa
Imwiin te kaai ni wareka ana taeka te Tia Kamaiu n 3 Nibwaai 23:1, ko kona ni butiia kaain te kiraati bwaai ake a kunei ngkai a wareki koroboki aika tabu n te wiiki aei. Tera ae a kunea?
Reirei te Reirei
3 Nibwaai 20:25–41; 21:9–11, 22–29
Ni boong aika kaitira, te Atua e karaoa te mwakuri ae korakora ma ni kamiimi.
-
Te Tia Kamaiu e taekina “te mwakuri ae korakora ma ni kamiimi” (3 Nibwaaii 21:9) bwa Tamana e na karaoa te mwakuri n te kabanea ni bong. Tao a kona kaain te kiraati n tibwauai bwaai ake a reiakin aron te mwakuri ngkai a kamatebwai mwakoro aikai inanon mweengaia. Titiraki n aron aikai a kona ni kaungaa te marooro:Tera ae e taku te Tia Kamaiu bwa e na riki ni boong aika a na roko? (taraa riki 3 Nibwaai 20:30–32, 39–41; 21:22–29). Tera ae E na aranii iai bwaai aikai “korakora” ao “kamiimi”? Tera te kakoaua ae ti na nooria bwa e nang riki te mwakuri aei? Ti na kangaa ni kairekerekeira iai?
-
Ni buokiia kaain te kiraati n nooria bwa e kangaa te Burabeti ae Iotebwa Timiti ni buoka ni kakoroa bukin ana mwakuri te Uea ae korakora ma ni kamimi, ko kona ni kaota tamnein te Burabeti ao ni kaoiia kaain te kiraati bwa a na wareka 3 Nibwaai 21:9–11, ni kakaei taeka ao kibuntaeka ake a kauringiira ni maiun ao ana mwakuri Iotebwa Timiti. N aron te katooto, e kangaa te Uea “n anganna te mwaaka bwa e na karokoa [te euangkerio] nakoia Tientaire”? (te kibu 11). Bukoin tera e kakawaki ataakina bwa ana mwakuri Iotebwa Timiti e a kaman taekinaki iroun te Tia Kamaiu? (taraa naba 2 Nibwaai 3).
-
Ko kona naba ni buokiia kaain te kiraati n atatai bwa a kangaa n riki bwa mwakoron te mwakuri ae korakora are e a kaman taekinaki inanon mwakoro aikai man kaai ni wareka 3 Nibwaai 20:25–27. Ngkana e riai, ko kona ni kamataata bwa ngkana ti karaoi berita aika tabu ma te Uea, ti riki bwa kanoan Aberaam. Ti na kangaa ngaira aika kanoan Aberaam ni kakabwaiaia “ni kabane botanaomata ake iaon te aba”? (kibu 25). A kona kaain te kiraati n iangoa te titiraki aei ngkai a wareka ana taeka Beretitenti Russell M. Nelson inanon “Bwaai n Ibuobuoki Riki Tabeua” ao n tibwauai aia iango.
Te Tia Kamaiu e tangiriira bwa ti na ukori koroboki aika tabu.
-
Tera aron ana reitaki te Tia Kamaiu ma Nibwaite ni kaotan Ana namakin ibukin koroboki aika tabu? Ni buokiia kaain te kiraati ni ukoria, tuangiia iteran te kiraati bwa a na wareka 3 Nibwaai 23 ao are te iterana bwa a na wareka 3 Nibwaai 26:1–12; ngkanne a kona ni tibwatibwa imarenaia ni bwaai ake a kunei. A kona naba ni tibwauai iango ake a karekei bwa a na kangaa ni kaotia nakon te Uea bwa koroboki aika tabu a kakawaki nakoira. N aron te katooto, tera te kaokoro imarenan ukoukoran koroboki aika tabu ao n tii warekii? (taraa 3 Nibwaai 23:1).
Te Uea kangaa ai aron te tia kabooua te ai.
-
Bwaai n ibuobuoki aika nooraki e na kanakoraoa am marooro ibukin 3 Nibwaai 24:1–6. N aron te katooto, ko kona ni kaota te mwane ae tirewa ke tabeua te toobu inanon aia tai ni wareware kaain te kiraati ni ukoria bwa a kangaa bwaai aikai n irekereke ma te Tia Kamaiu ao Ana mwakuri. Ko kona naba n tibwauaia ma kaain te kiraati nanon kaitiakan te tirewa ao ana toobu te tia kaitiaki kunnikai inanon “Bwaai n Ibuobuoki Riki Tabeua.” Ke ko kona ni kaota te witeo “Ana Ai te Tia Kaitiaki” (ChurchofJesusChrist.org). E kangaa te Uea “n riki kangaa ana ai te tia kaitiaki, ao kanga ana toobu te tia kaitiaki kunnikai”? (kibu 2). Tera ae ti reireiniira n anga reirei aikai bwa e kangaa te Tia Kamaiu ni kaitiakiira?
Te Atua e nanoanga nakoia ake a oki Nakoina.
-
Ko kona bae n tangiria ni kan kamataata bwa te reirei iaon te kabwianibwai n 3 Nibwaai 24:8–12 bon kaekaan te titiraki n te kibu 7: “Nningai ae ti na oki [nakon te Uea]?” Tera te reitaki imarenan te “[oki] nakon [te Uea]” ao ni kabwaka te kabwianibwai? A kona kaain te kiraati n tibwauaia bwa a kanga aroia ni karekei kakabwaia ake a koreaki inanon kiibu 10–12 ngkai a tia ni kabwaka aia kabwianibwai. A kangaa koaua aikai n ibuobuoki nakon temanna are e rootaki ni kabwakaan te kabwianibwai?
-
Tera anua ake a kabwarabwaraaki n 3 Nibwaai 24:13–15 n angin te tai e kuneaki ni boong aikai n te aonaaba? Kaungaia kaain te kiraati bwa a na tibwauai bwaai ake a na taekin nakon temanna are e namakinna bwa e bebete te maiu ke e nakoraoi ibukiia naake a aki kawakin tuua. Ni kaineti ma Nibwaai 24, e kangaa te Uea ni kakabwaiaia naake a beku Ibukina? Ko kona naba ni kaungaia bwa a na kakaei katooto n 3 Nibwaai 22. (Taraa naba Motiaea 2:41; Aramwa 41:10.)
Nanora a rairaki nakoia ara bakatibu.
-
Ni kamataata te iango ni rairi nanora nakoia ara bakatibu, ko kona ni kaoa kaain te kiraati n tinanikua te kiraati ao ni kabwarabwaraia kaain te kiraati n ana iango (te tabo are a tekateka iai, tera kunnikaia, ao a mwaiti riki). Ngkanne teuanne ke neienne e kona n tanrikaaki nakoia kaain te kiraati ao ni manga kataia riki. Tera ae ae kona n reireiniira te katooto aei n aron rairakin nanora nakoia ara bakatibu rinanon te mwakuri n te tembora ao te kateiriki? Imwiin warekan 3 Nibwaai 25:5–6, tao a kona kaain te kiraati n tibwaua aron rairakin nanoia nakoia aia bakatibu. Ko kona naba ni kaoa te tia rabakau ibukin te uoote ibukin te tembora ao te tia rabakau ni kabwarabwara nakoia bwaai ni mwakuri ibukin te kateiriki. E kangaa te mwakuri n irekereke ma ikotakiia Iteraera are e kabwarabwaraaki iroun Beretitenti Russell M. Nelson inanon “Bwaai n Ibuobuoki Riki Tabeua”?
Kaungaa te Kamatebwai n te Mweenga
N 3 Nibwaai 27–4 Nibwaai ti wareka aron te “[kukurei] i buakoia aomata nako ake a karikaki ni bain te Atua.” (4 Nibwaai 1:16). Kaota am iango nakoia kaain te kiraati bwa warekan mwakoro aikai a kona ni buokiira n aron kunean te kukurei i bon ibukira ao ara utu.
Bwaai n Ibuobuoki Riki Tabeua
Ko kona n riki bwa mwakoron te bwai ae rangi ni kakannato.
E kabwarabwara Beretitenti Russell M. Nelson:
“Ni koauana aikai bon boong aika kaitira, ao te Uea e kawaekoa Ana mwakuri ni bootiia Iteraera. Te ikotaki aei bon te bwai ae moan te kakawaki ae e a karaoaki ngkai iaon te aba. Akea riki kabotauana n abwabwakina, akea riki kabotauana ni kakawakina, akea riki kabotauana ni mimitongina. Ao ngkana ko kan rineia, ngkana ko tangiria, ko kona ngkoe n riki bwa mwakorona. Ko kona n riki bwa buburan mwakoron te bwai ae bubura, te bwai ae tamaroa, te bwai ae mimitong!
“Ngkana ti taekina ikotakiia, ti na taekina buburan te koaua aei: ni kabaneia natin Tamara are i Karawa, n iteran te roki ake uoua, n tauraoi n ongoraea rongorongon ana euangkerio Iesu Kristo.ae kaokaki. …
“… Iangoa aron anne! Mai buakoia ni kabane aomata ake a maeka iaon te buraneti ae aon te aba, ngaira are ti bon riai n ira waakin te kabanea, n ikotaki ae kakannato aei. Ai kakukureira anne! …
“Te ikotaki aei nanona bwa e riai n ae bwaai ni kabane nakoim. Aei bon te mwakuri ae ko kanakomaiaki nako aon te aba ibukina” (“Hope of Israel” [aia bootaki n taromauri kairake n te aonaaba ni kabuta, Tuun 3, 2018], broadcasts.ChurchofJesusChrist.org).
E kaboouaki ao ni kaitiakaki.
E kuneaki te tirewa ae renganaki ma tabeua taian miinero ni karinaki n te biti. N taai ake ngkoa, te tia kaitiaka te tirewa e na bae ni buuta te tirewa ni kaaki te biti inanon te taukaro n ai ae koro kabuebuena. Aei e na karika te bwai ae akea bonganana (miinero aika a bareka ao n aki tangiraki) n otirake iaon te biti are e kabueaki. Te tia kaitiaki e na karaua ni kakaaria te bwai are akea bongana, ni katuka ae bon te tirewa raoi, are e kona ni kinaaki man raneaneana ae moan te okoro.
Te tia kaitiaki bon temanna are e kaitiaki ao ni kamainainai kunnikai. E na kateboaki te kunnikai inanon te ran ae renganaki ma “ana toobu te tia kaitiaki kunnika,” are e bairekai ibukin kaitiakan te oera ao te bareka. Inanon kamaraakin te kunnikai, e na bae te tia kaitiaki kunnikai n ororea ke n toutouaki ni kanakoaki barekana. (Taraa “Ana Ai te Tia Kaitiaki ao te Tia Kaitiaki Kunnikai,” New Era, Tuunu 2016, 6–7.)
Kanakoraoan Ara Anga reirei
Reireiniia aomata, tiaki taian reirei. “Are ko karaoia nakoia aomata e kakawaki riki nakon te bwai are ko reireiniia. N tabetai tabetabera n te anga reirei e kona n totokoira man kaotakin ara tangira ibukiia koraki ake ti reireiniia. Ngkana e riki aei, iangoia bwa ko na kangaa ni katurua am iango iaon bwaai ake a rangi ni kakawaki riki” (Reirei n Ana Kawai te Tia Kamaiu, 6).