Iesu ngke e kaoti nakoia Nibwaite

Ootan Moana e Raneanea Iaoia, iroun Gary L. Kapp

Tebetembwa 28–Okitobwa 11

3 Nibwaai 17–19

“Nooria, E Bwanin Kimwareireiu”

Am katauraoi n anga reirei e riai ni waaki ma kamatebwai ae onoti ibukin koroboki aika tabu. Nakomai, Iriirai—Ibukiia Aomata n Tatabemaniia ao Utu e kona n raona riki am kamatebwai, ao te kabwarabwara aei e kona naba n anganiko taian iango ni buokiko ni katauraoi.

Korei Am Namakin

te aikaon ibukin te tibwatibwa

Kaungaa te Tibwatibwa

N 3 Nibwaai 17:1–3, te Tia Kamaiu e kaoiia aomata bwa a na okiri bataia ao “ni katauraoi raoi [aia] iango” imwaain okiia ni manga reireinaki. Ko na bae n titirakiniia am ataei a kangaa ni katauraoi ibukin te marooro n te bong aei ao aron are a iangoia.

te aikaon ibukin te anga reirei

Reirei te Reirei

3 Nibwaai 17; 18:24–25, 28–32

Te Tia Kamaiu bon ara banna ni katooto ae kororaoi n te mwakuri n ibuobuoki.

• Bane n iai ara tai n ibuobuoki nakoia tabeman, ao ti bane ni kona n nakoraoi iai. Teuana te kawai n reiakinaki man ana katooto te Tia Kamaiu n te ibuobuoki bon man warekan 3 Nibwaai 17 n te kiraati ao ni kaoiia kaain te kiraati n taetae ngkana iai te bwai ae a kunea are e reireiniia taekan te ibuobuoki. Tera ae ti reiakinna ni katein te Tia Kamaiu are e karikia bwa te banna ni katooto ae korakora n te ibuoubuoki? Tera koaua ae ti reiakin ibukin te ibuobuoki man ana katooto te Tia Kamaiu? Ko kona naba ni kakaei atatai inanon 3 Nibwaai 18:24–25 ao 28–32. A kona kaain te kiraati ni maroroakin bwaai aika a onoti ake a namakinna bwa a kaungaaki iai nanoia bwa a na iriira ana banna ni katooto te Tia Kamaiu n te ibuobuoki.

  E Kakabwaiaia natiia I-Nibwaite Iesu

  Nooria Ami Ataei aika a Uarereke, iroun Gary L. Kapp

3 Nibwaai 17:13–22; 18:15–25; 19:6–9, 15–36

E reireiniira te Tia Kamaiu arora n tataro.

• Ni buokiia kaain te kiraati n reiakinaki man katooto aika a mwaiti ibukin ao te reirei iaon te tataro inanon 3 Nibwaai 17–19, ko kona ni korea iaon te burakibooti Antai? Ni kangaa? N ningai? ao Bukin tera? ao kaoiia kaain te kiraati bwa a na kakaei kaekaan titiraki aikai ngkai a kairekerekea ma te tataro ni kiibu aika imwina: 3 Nibwaai 17:13–22; 18:15–25; and 19:6–9, 15–36. Tera atatai tabeua ae a karekea kaain te kiraati ngkai a wareki kiibu aikai? Ana taeka Unimwaane Richard G. Scott inanon “Bwaai n Ibuobuoki Riki Tabeua” ae e kona n reita te marooro aei. Ko kona naba ni kaoiia kaain te kiraati bwa a na tibwauai bwaai ake a karaoi bwa aia tataro ae onoti ao n utu are a karaoi e na rangi ni uaana riki (taraa 3 Nibwaai 18:18–21).

• Te kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao Utu e kaoti iango aika a na iangoaki raoi aron te tataro ngkana a warekaki kiibu aikai. Ko kona ni butiia kaain te kiraati bwa a na tibwauai atatai nako ake a karekei ibukin titiraki aikai. Ke ko kona ni kaoiia tabeman kaain te kiraati bwa a na roko n te kiraati ao n tauraoi ni marooroakina te bwai are a tia n reiakinna n aron te tataro man 3 Nibwaai 17–19. Tera ae a kaungaaki iai nanoia bwa a na karaoia bwa a na rangi ni uaana riki aia tataro?

• E reirei Iesu bukin tera ngkai ti riai n tataro n tainako (taraa 3 Nibwaai 18:15–18). Te reirei ae airi ma katootona e na kona ni buokiia kaain te kiraati n oota n te bwai are E reireia. N aron te katooto, ko na ni kanoaa te kaonteina n te ran bwa e tei ibukin ana kairoro Tatan. Nnea te kuunikai (are e tei ibukira) ni kamwaneaua raoi i kabin te mwangko (are e tei ibukin te tataro n tainako). Raira te mwangko ni kabobaraakia, ao kateboa rikaaki inanon te kaonteina n ran. E na riai ni mwauu te kunnikai i kabin te mwangko, e ngae ngke e katobibiaki n te ran. Tera ae e karaoia te bwai n reirei ae e airi ma ana katooto ao n 3 Nibwaai 18:15–18 ae e reireiniira taekan te tataro? (taraa naba RB 10:5). Tera ae nanonaki bwa ko na “tataro n tainako”? E kangaa te tataro ni buokiira n totokoa ana kairoro Tatan? Iangoia ni kariaia kaain te kiraati tabeua te tai ni korei bwaai ake iai namakinan te kukurei irouia ni karaoia ni kanakoraoa riki aia tataro.

3 Nibwaai 18:1–12

Ti kona ni kaonaki n te tamnei ngkai ti kana te toa.

• Ni waakina te marooro n taekan ana reirei te Tia Kamaiu iaon te toa inanon 3 Nibwaai 18, ko kona ni bwenaua am kiraati inanon taian kurubu ao n anganiia kaain te kurubu teuana mai buakon koroboki aika tabu bwa a na warekia ao ni marooroakinna: Mattaio 26:26–28; 3 Nibwaai 18:1–12; ao Reirei ao Berita aika Tabu 20:75–79; 27:1–4. Imwiin warekan aia kibu man koroboki aika tabu are a katabeaki iai, kurubu n tatabeua a na iangoa teuana ke uoua te titiraki taekan te toa are e na kaekaaki ni kiibu ake a wareki ao ni korei aia titiraki iaon te burakibooti. Ngkanne nikiraia kaain te kiraati a kona ni ukori koroboki aika tabu ibukin kaekaan taian titiraki. A kona kaain te kiraati ni marooroakinna bwa a na kangaa ni karekea aia taneiai aika uaana riki ibukin kanakin te toa.

• Tera nanon ni “kaonaki” ngkai ti kana te toa? (taraa 3 Nibwaai 18:4–5, 9; 20:9). Iangoia ni kaoiia kaain te kiraati bwa a na marooroakina te titiraki aei n ikatoatoa ngkai a wareka 3 Nibwaai 18:1–12 ni kabane. Ko kona naba n anganiia kaain te kiraati bwa a na iangoa te kabanea n tai are a na namakina ae a “kaonaki” n te tamnei ngke a kana te toa. Tao a kona ni marooroakin bwaai ake a na tukiia ke ni katabetabeia man te “kaonaki n te tamnei” man kanakin te toa ao tibwauai iango bwa a na kangaa n tokanikai iaon bwaai aika tutuuki akanne.

3 Nibwaai 19:9–15, 20–22

Ana reirei Iesu Kristo a ukoukora ana bwaintituaraoi te Tamnei ae Raoiroi.

• Iangoia ni butiia kaain te kiraati bwa a na iangoa te bwai are a rangi n tangiria. Tera ae a tauraoi ni karaoia bwa a na karekea? Aei e kona ni kaira marooroakinaia reirei ake tengaun ma uoman “te bwai ae a rangi n tangiria are e kabwarabwaraaki n 3 Nibwaai 19:9–15 ao 20–22. Bukin tera e rangi ni kakawaki aei nakoia? Bukin tera ngkai e kakaawaki nakoira? NI kaineti ma kiibu aikai, ti kangaa ni kakorakoraira n ukora ana iraorao te Tamnei ae Raoiroi?

te aikaon ibukin te kamatebwai

Kaungaa te Kamatebwai n te Mweenga

E taku te Uea, “A korakora bonganan ana taeka Itaia” (3 Nibwaai 23:1). Ni kaungaia kaain te kiraati bwa a na wareka 3 Nibwaai 20–26, ko kona n tuangiia bwa inanon koroboki aika tabu aikai, Iesu e kabwarabwarai tabeua “korakoran bonganan” ana taeka Itaia. Kaoiia kaain te kiraati bwa a na iangoia bukin tera e korakora bonganan ana taeka aikai Itaia. Kaungaia bwa a na roko ao a na tauraoi n te Tabati are imwina n tibwauai bwaai ake a reiakin.

te aikaon ibukin bwaai ni ibuobuoki

Bwaai n Ibuobuoki Riki Tabeua

Kakawakin te tataro.

Unimwaane RichardG. Scott e kakoaua aron kakawakin te tataro:

“Ti tataro nakon Tamara are i Karawa n aran Natina ae tabu, Iesu Kristo. E rangi ni koraora te tataro ngkan ti kataia n itiaki ao n ongotaeka, ma mwakuri aika kororaoi, ao n tauraoi ni karaoa are E tuangiira. Te nanorinano, n onimaki bwa te tataro e na uota te kairi ao te rau.

“Tai raraoma ni waeremwen kaotan am namakin. Tii taetae ma Tamam ae nanoanga, ao n oota. Ngkoe natina ae onoti are E tangiriko ma kororaoin ana tangira ao n tangiria ni buokiko. Ngkai ko tataro, ataia bwa Tamara are i Karawa e kaan ao E kakauongo.

“Te kiing ni kanakoraoan te tataro bon reiakinan atongan te titiraki ae eti. Iangoia ni biti baike ko bubuti ibukina ake ko tangiri nakon te kokoaua n ukoukora are E tangiria ibukim. Ngkanne ngkai ko reiakina Ana kaantaninga, tataro bwa ko na kairaki bwa ko na karekea te korakora ni kakoroa nanona.

“Ko riai n namakina raroanakom mairoun Tamara, tao iai bukina ae mwaiti. Baikara nako bukina, ngkai ko reitinako ni bubuti ibukin ana ibuobuoki, E na kairiko ni manga kaoka am onimaki bwa E bon mena ikai. Tataro e ngae ngke akea nanom ni kan tataro. N tabetai, n aron te ataei, ko na bae n aki rau ao namakinna bwa ko aki kona ni karokoa am kaangaanga iroun Tamam. Anne ngke ko rangi ni kainnanoia bwa ko riai n tataro. Tai namakinna ae ko aki tau n tataro.

“I mimi ngkana ti kona n oota ni korakoran mwaakan te tataro ni karokoa are ti aitara ma te kaangaanga ae aki kona n taobaraaki, ao ni baiti ao n ataia bwa akea korakorara ni katokia. Ngkanne ti a tanrikaaki nakon Tamara ni kinaakin te nanorinano n ara onimaki ae bwanin Irouna. E ibuobuoki ni karekea te tabo ae onoti ngkana a kona ara namakin ni kaotaki ni bwanaara n ae abwabwaki ao e na rangi ni korakora ngkana e riai” (“Using the Supernal Gift of Prayer,” Ensign ke Riaona, Meei 2007, 8).

Kanakoraoan Ara Anga reirei

Keiakina ana tangira Kristo. Ngkana iai kaain am kiraati ae kainnanoa te kawaraki ni kamarurungaki, iangoia ko na kangaa ni buoka teuanne ke neienne n namakinna ae ngaia bon kaain te kiraati. N aron te katooto, ko na bae ni kaoa temanna kaain te kiraati bwa e na tekateka irarikin te aomata aei ao n raona teuanne ke neienne.