“Okitobwa 19–25. 3 Nibwaai 27–4 Nibwaai: ‘Bon Akea Riki te Botanaomata n ai Aroia ae a Kukurei,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Okitobwa 19–25. 3 Nibwaai 27–4 Nibwaai,” Nakomai, Iriirai—Ibukin te Reirei n Tabati: 2020
E tataro Kristo, iroun Derek Hegsted
Okitobwa 19–25
3 Nibwaai 27–4 Nibwaai
“Bon Akea Riki te Botanaomata n ai Aroia ae a Kukurei”
Am kamatebwai i bon iroum n 3 Nibwaaii 27–4 Nibwaaii bon te kawai ae tamaroa n am katauraoi n anga reirei. Taian reirei ao iango aika inanon te kabwarabwara aei a konaa ni buokiko n kaeka nakon ana namakin te tamnei are ko karekei n am tai ni kamatebwai.
Korea Am Namakin
Kaungaa te Tibwatibwa
Teuana te kawai ni kaungaia kaain te kiraati n tibwai aia nonoori man aia kamatebwai ibon irouia bon kaoakiia ni kakaea te anene n taromauri ae kaineti ma te koaua are a reiakina inanon 3 Nibwaai 27–4 Nibwaai. A konaa ngkanne n tibwaua te anene n taromauri are a kunea ao e kangaa te anene anne n irekereke ma taekan te koaua ni koroboki aika tabu.
Reirei te Reirei
Ana Ekaretia Iesu Kristo e aranaki n Arana ao e kateaki iaon Ana euangkerio.
-
Maroroakinan aran te Ekaretia e na konaa ni kamatoa aia kakaitau kaain te kiraati ni kaainakin Ana Ekaretia Iesu Kristo ibukiia Aika Itiaki ni Boong aika Kaitira. Iangoia ni kaoiia kaain te kiraati ni karinani araia bootaki aika kakaokoro ao kabwarabwaraa bwa tera te ara anne ae e tuangiira ibukin te bootaki anne. Ngkanne a konaa kaain te kiraati ni wareka 3 Nibwaai 27:1–12, n nooria bwa tera ae reiakina te Tia Kamaiu ibukin aran Ana Ekaretia. A konaa naba n tibwauaia bwa tera nanona irouia ngkai a kaaina ana Ekaretia Kristo. Tera ae e nanonaki n ae ti na katoka Arana iaora?
-
Aio te kawai teuana ni maroroakina kakawakin aran ana Ekaretia te Tia Kamaiu. Imwiin te marooro iaon te koaua are e kuneaki inanon 3 Nibwaai 27:1–22, ko konaa ni koreia ni kabwanina aran te Ekaretia iaon te burakibooti. Ngkanne kaain te kiraati a na rinei tabeua taeka man te ara ao n anga aia iango bwa a kangaa taeka akane ni buokiira n ataia bwa antai ngaira ke tera ae ti kakoaua iai. Ana taeka Beretitenti M. Russell Ballard inanon “Bwaai n Ibuobuoki Riki Tabeua” e na ibuobuoki. Bukin tera e kakawaki bwa ko na kabongana aran te Ekaretia ngkana ti tibwaua ara koaua ma tabeman?
-
Imwiin are e kabwarabwaraa bwa Ana Ekaretia e riai ni “kateaki iaon [Ana] euangkerio” (3 Nibwaai 27:10), te Tia Kamaiu e kabwarabwara bwa tera Ana euangkerio. Tao ko na konaa ni kaoiia kaain te kiraati n tibwauaia bwa a na kangaa ni kabwarabwara nakon raraoia bwa tera te euangkerio. Ngkanne kaoiia bwa a na ukoukora 3 Nibwaai 27:13–22, ni kakaea bwa e kangaa te Tia Kamaiu ni kabwaranakoa Ana euangkerio. Ti na kangaa n taekina ni kauarerekea te bwai are e taekina te Tia Kamaiu? N ara tai ni kamatebwaia ana kabwarabwara te Tia Kamaiu iaon ana euangkerio, tera mataatara ae e reke bwa ti na kangaa ni maiuakina te euangkerio inanon maiura?
Ana Boki Moomon bon te kanikinaa ae ana mwakuri te Atua n bong aikai a kakoroaki nanoia.
-
Tao ko na moana te marooro iaon 3 Nibwaai 20–30 n taetae iaon kanikinaa. Te katooto, kaain te kiraati a konaa n atongii kanikina are e na tuangiira iai bwa e a roko te angibuaka ke e a bitaki kanoan te bong. A konaa ngkanne ni wareka 3 Nibwaai 29:1–3 n reiakina bwa tera ae e tei ni kaota rokon Ana Boki Moomon, are e atonga Moomon bwa “taeka aikai” (taraa naba 3 Nibwaai 21:1–7). Tera te rongorongo are e anga te Uea inanon 3 Nibwaai 29:4–9 nakoia naake a na “ribai” ke “kakewei” ana mwakuri te Uea n te kabanea ni bong? E kangaara warekan Ana Boki Moomon ni katoa bong ni kakorakora ara onimaki ni baike a “ribai” ke “kakewei” aomata tabeman n ara bong aikai? Tao ko na tangiria ni kaoiia kaain te kiraati ni wareka ana kakao te Uea inanon 3 Nibwaai 30 ao n tibwauaia bwa e kangaa Ana Boki Moomon n tia ni buokiia ni butimwaea te kakao aei.
Rairakira nakon Iesu Kristo ao Ana euangkerio e kairiira nakon te katiteuanaaki ao te kukurei.
-
Te rongorongo inanon 4 Nibwaai e kaota te kimwareirei ae e konaa n roko nakon maiura—i bon iroura, n ara utu, ao n ara uoote ke titeiki—ngkai ti kekeiaki n rairaki ni koaua nakon Iesu Kristo. Iangoia n tuangiia kaain te kiraati ni kakaea n 4 Nibwaai 1:1–18 ao korei iaon te burakibooti kakabwaia ake a roko nakoia aomata ngkana a bane n rairaki nakon te Uea. E kangaa rairakiia n roota aron tararuakin temanna? Tao a na konaa kaain te kiraati n tibwauaia bwa e kangaa te euangkerio n tia n uota te aeka ni kakabwaia ae aiaron anne nakon aia utu ke aia uoote. Ni buokiia kaain te kiraati n ataia bwa ti na kangaa ngaira n tatabemaniira ni maeka n ai aroia aomata ake n 4 Nibwaai ao ti na kangaa ni kaungaa te reitaki ae korakora ao te kukurei imarenara ma ake irarikira, ko konaa ni wareka te rongorongo mai iroun Unimwaane D. Todd Christofferson n “Bwaai n Ibuobuoki Riki Tabeua.” A konaa kaain te kiraati n tirobaea aron oin aia kekeiaki man kawai aika teniua are e kabwarabwara Unimwaane Christofferson.
-
Aomata inanon Ana Boki Moomon a tia ni kakaokoroiia imarenaia bwa Nibwaite ao Reimwanaite—ao a mwaiti riki “-aekan reti n aomata”—inanon ririki aika bati, ma imwiin ana mwakuri te Tia Kamaiu ibuakoia, te aeka ni kakaokoroaki aio e maunanako. Imwiin warekan 4 Nibwaai 1:17 ni bootaki, tao a na konaa kaain te kiraati n tibwaua aia iango bwa aekakira aron te “-aekan reti n aomata” ke te kurubu ae iai ngkai n ara bootaki aika onoti. Tera ae ti kona ni karaoia ni katokii aekaki ni kakaokoroaki ae ai aron aikai ao n riki ni koaua bwa “temanna, natin Kristo”? (kibu 17).
-
Tera ae a kona n reiakinna kaain te kiraati man kekerikakin te botanaomata ae Tion are e kabwarabwaraki n 4 Nibwaai? Ko konaa ni kaoiia bwa a na kakaea n 4 Nibwaai 1:19–34, n nooria bwa tera ae e katoka te kukurei ao te bonnano are a tia n rinanona aomata n ae e kaniia 200 te ririki imwiin kawarakiia iroun te Tia Kamaiu. Baikara koaua inanon taian kibu aikai ake a konaa ni buokiira n atai anua ao aroaro ake a na riai ni bitaki inanon maiura ao ara bootaki?
Kaungaa te Kamatebwai n te Mweenga
Moomon 1–6 e kabwarabwara te waaki ae e kananokawaki are e a karika kamaunanakoaia taian Nibwaite. Ni kaungaia kaain te kiraati bwa a na warekii mwakoro aikai, kaoiia bwa a na kakaei bwaai ake a noori ibukiia Nibwaite ake ti noori bwa a riki naba ni bong aikai.
Bwaai n Ibuobuoki Riki Tabeua
Aran ana Ekaretia Kristo.
E taku Beretitenti M. Russell Ballard:
“I a tia ni karaua ni iangoia bwa e aera te Tia Kamaiu e anga tebwi ma teuana‑taeka n aran Ana Ekaretia ae kaokaki. E taraa n rangi n abwabwaki, ma ngkana ti iangoia bwa te kabwarabwara n aron taraakina bwa tera te Ekaretia, e waekoa n riki bwa te kabwarabwara ae kimototo, n akea kairuana ao eti ruru. E na kangaa aekan te kabwarabwara ae e na rangi n turuturu ao ni mataata ao riki ni kabwaranakoa n ti inanon tabeua taeka?
“Ni kabane taekana a bon karika te kamataata ao a riai. Te taeka Ana e katerea kaokoron nnen te Ekaretia ae kaokaki ibuakon aro nako n te aonaaba.
“Te taeka Ekaretia Iesu Kristo e kaotia bwa bon Ana Ekaretia [taraa 3 Nibwaaii 27:8]. …
Ni Boong aika Kaitira e kabwarabwara bwa aio bon te Ekaretia n aron te Ekaretia are e kateia Iesu Kristo ngke E maeka i aon te aba ma e a manga kaokia ni boong aika kaitira. Ti ataia bwa iai te kekerikaki, ke te birinako man te koaua, ae karika riain manga Kaokan Ana Ekaretia ae koaua ao ni bwanin n ara bong.
“Ibukiia Aika Itiaki e nanonaki bwa kaain te aro a ririmwina ao ni kekeiaki ni karaoa Ana kantaninga, kawakin Ana tua, ao ni manga katauraoiia ni maeka ma Ngaia ao Tamara are i Karawa n te tai ae e na roko. Ibukiia Aika Itiaki e bon ti kaineti nakoia te koraki ake a ukoukora karaoan maiuia bwa e na tabu ni berita bwa a na iriira Kristo” (“Kakawakin te Ara,” Ensign ke Riaona, Nobembwa 2011, 80).
Tera ae na riai ni karaoaki bwa e na tei Tion?
E reirei Unimwaane D. Todd Christofferson: “Tion bon Tion ibukin te anua, te aroaro, ao te kakaonimaki irouia kaaina [taraa Mote 7:18]. … Ngkana ti kan katea Tion ni mweengara, n ara mwaanga, n ara uoote, ao n ara titeiki, ti na riai n roko n te aeka ni katei n aroaro aikai. Tao e na konaa (1) n riki ni katiteuanaaki n teuana nanora ao ara iango; (2) n riki, ni bon ngkoe ao ni ikotaki; bwa aomata aika tabu; ao (3) n tararuaia nake a aki kaubwai ao ni kainnano n te aro ae e rangi n namakinaki waakina bwa ti na kamauna te kaainano imarenara. Ti aki konaa n taningaa Tion bwa e na roko bwa aonga n riki bwaai aikai—E na roko Tion ngkana a karaoaki” (“Come to Zion,” Ensign ke Riaona, Nobembwa 2008, 38).
Kanakoraoan Ara Anga reirei
Kabonganai anga n anga reirei aika kakaokoro. E na kabebetea mwengaraoim n aron am anga reirei ae ti teuana, ma aekakin nako anga reirei aika kakaokoro e rotiia kaain te kiraati n ae kaokoro. Iangoi aanga n anga reirei ake ko a tia ni kabonganai–ko a tia ni kabongana te karaki, te bwai ni kakairi n te reirei, tamnei, ao a bati riki? (taara Reirei n Ana Kawai te Tia Kamaiu, 7).