“Okitobwa 26–Nobembwa 1. Moomon 1–6: ‘I Tangiria bwa N na Kona ni Kairoroia ni Kabane … n Rairinanoia,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Okitobwa 26–Nobembwa 1. Moomon 1–6,” Nakomai, Iriirai—Ibukin te Reirei n Tabati: 2020
Moomon ngke e Kauarerekei kanoan Taiani Bwatua, iroun Tom Lovell
Okitobwa 26–Nobembwa 1
Moomon 1–6
“I Tangiria bwa N na Kona ni Kairoroia ni Kabane … n Rairinanoia”
N am tai ni wareka Moomon 1–6, kakaai taian koaua ake a na buokiia kaain am kiraati n teimatoa n onimaki inanon taai ni buakaka, n aron are e karaoia Moomon.
Korei Am Namakin
Kaungaa te Tibwatibwa
N tabetai kaain te aro a baenikai n tibwaua aia noonori ibukina bwa e tuai n reke aia tai ni iangoia raoi n aia iango. Buokaia n aron aio, anganiia tabeua te miniti bwa a na korei aia nonoori are e reke irouia inanon kamatebwaian Moomon 1–6 ni mweengaia, ngkanne tuangiia bwa a na tibwatibwa.
Reirei te Reirei
Ti konaa ni maiuakina te raoiroi n aki tabe ma te buakaka ae e katobibiira.
-
A mwaiti mai buakoia kaain am kiraati ae a konaa ni mataata n te bwai are e rinanona Moomon ni kabanea korakorana ni maiuakina te raoiroi inanon te aonaaba ae buakaka. Tao a kona n tibwauaia bwa tera ae a reiakinna man ana katooto Moomon. Ni buoka aron tararuaan te marooro aio, ko konaa ni kaoiia kaain te kiraati bwa a na kakaei kiibu ake a kaota anuan Moomon ao karinanii tain anua akanne iaon te burakibooti (taraa, ibukin te katooto Moomon 1:2–3, 15–16; 2:1, 23–24; 3:1–3, 12, 17–22). A kangaa anua aikai n tia ni buoka Moomon n teimatoa ni korakora n te maiu n tamnei? A na kangaa ni buokiira ni katotoonga riki Moomon?
TamneiNibwaite ao Reimwanaite a buaka i marenaiaBuaka, by Jorge Cocco
-
E aki toki Moomon ni koroboki ni kaeineti nakoia aomata i nanon ara bong. Tera ae ti konaa n reiakinna man ana taeka nakoira inanon Moomon 3:17–22 ao 5:10–24? Anganiia kaain te kiraati moti ni bebwa ma te kiibu n taeka “are e Reireiniira iai Moomon” ni koreaki mai ieta, ao kaungaia bwa a na kakaei rongorongo inanon kiibu aikai aika a kaeineti ibukin ara bong. Ti na kangaa ni kabongana ana reirei Moomon ni buokiira bwa ti na matoatoa ni maiun tamneira n te aonaaba aio?
-
Ngkana ko reireiniia te roronrikirake, ko konaa ni kabongana ana katooto Moomon ni buokiia bwa a na mataata bwa a konaa n riki bwa taan kairiri aika a raoiroi ngkai a kairake. Ngkana ko reireiniia ikawai, ko konaa ni kabongana ana katooto ni karioa te marooro ibukin te tai ni buokiia te roro ae rikirake bwa a na riki bwa taan kairiiri aika tamaroa. Ni moanan te marooro, ko konaa n tuangiia tabeman kaain te kiraati n rinanoa Moomon 1 ao ake tabeman n rinanoa Moomon 2, n nora te anga are e anganaki te tai Moomon bwa e na kairiiri inanon ana tai ni kairake. Baikara anuana ae ngaia ae e karikia bwa te tia kairiiri ae korakora? Kaain te kiraati a konaa ni tibwauai katooto n aron are a tia n nora korakoran aia waaki ataei ao kairake ake a raoiroi maiuia. A konaa naba ni maroroakina te tai ae e reke irouia ngke ngaiia—ke aomata aika kairake ake a kinaiia—ngke a riki bwa taan kairiiri ma anua ake titebo ma anuan Moomon.
Te rairanano e kainnanoa te nano ae uruaki ao te tamnei ae raraoma.
-
N reiakina aron te kaokoro imarenan te nanokawaki ae e kairi nakon te rairannano ao te nanokawaki ae e aki, iangoia ni warekea Moomon 2:10-15 ni kabane ao maroroakinii titiraki n aron aikai: Tera ana mwakuri te “nanokawaki” n te rairanano? Tera te kaokoro imarenan te “nanokawaki … nakon te rairanano” ao te “nanokawaki ibukin te kabuakakaaki”? Baikara anua ao aroaro aika konaa ni buokiira ni karekea te “nano ae uruaki ao te tamnei ae raraoma”?
Ti konaa n tangiriia tabeman, e ngae ngke ti aki boraoi ma aia rinerine.
-
N aron Moomon, a mwaiti man am kiraati aika a irekereke ni kaan ma aomata ake aki boraoi aia koaua ma ngaiia. Ko na kangaa ni kabongana te bwai are e rinanona Moomon n reiakiniia kaain te kiraati tangiraia tabeman n aki tabe ma kaokoroia? Iangoia ni wareka Moomon 3:12 ni kabane ni maroroakin taai ngke Moomon e kaota te tangira nakoia nake a totokoa ana rongorongo ao n oin nanoia a kakaitara te Atua (taraa, n aron aei, Moomon 1:16–17; 2:12). Tera te bwai ae a tia n rinanona kaain te kiraati ae a konaa ni tibwauaia are e reke n oin maiuia n tangiriia nake aki boraoi ma aia koaua ke bwai ake a karinei? Ana taeka Beretitenti Dallin H. Oaks n “Bwaai n Ibuobuoki Riki Tabeua” a anga reirei riki tabeua.
E tei Iesu Kristo n taakini baina ni butimwaira.
-
Ibukiia te koraki ake a akea aia kaantaninga bwa a bon konaa ni kabwaraaki aia bure, ana kabwarabwara Moomon iaon te Tia Kamaiu n tei “ma baina ae e taakinna ni butimwaiko” e konaa n anganiko te raunnano. Iangoia ni wareka Moomon 6:17 ni kabane ao kaota tamnein Iesu Kristo ma baina ae e aroria (n aron te Te Boki n Tamnein te Euangkerio, nambwa 66). Tera ae e reireia te kibu aio ibukin ana tatauraoi te Tia Kamaiu ni buokiira? Ko konaa naba ni iangoa aneneakin te anene n taromauri ni kabane are e reiakina naba te rongorongo ae aekakin anne, n aron “Mai nakon Iesu” (Anene n Taromauri, nambwa 117). Ko na bae naba n tibwaua te bwai are e rinanona Beretitenti Russell M. Nelson inanon “Bwaai n Ibuobuoki Riki Tabeua” ao tuangiia kaain te kiraati ni marooro bwa ti na kangaa ni buokiia tabeman n ataia bwa te rairannano e bon konaa ni karaoaki.
Kaungaa te Kamatebwai n te Mweenga
Tao ko kona n tuangiia kaain te kiraati bwa a na iangoia bwa tera ae a na koreia inanon te reta nakon te aomata nakon taai aika imwaira. Inanon Moomon 7–9 ti wareka tera are a koreia Moomon ao Moronaai, inanon tienture n nako, nakoia aomata ni boong aikai.
Bwaai n Ibuobuoki Riki Tabeua
Tangiraia tabeman ake a kakoauaa ae kaokoro.
E kabwarabwara Beretitenti Dallin H. Oaks:
“Ti bane n riai n irii ni kabane reirein te euangkerio n tangiriia ake i irarikira ao n totokoa te kauntaeka. A riai taan iriira ana katooto Kristo n riki bwa taan karinerine. Ti riai n tangiriia aomata ni kabane, n riki bwa taan kakauongo aika tamaroa, ao ni kaota te tabeaianga ibukin aia onimaki. E ngae ngke ti aki boraraoi iai, ma ti riai ni kukurei iai. Otara ae ti tei iaona ao ara reitaki iaon atun taian reirei ake ti aki boraoi iai a na aki riai ni karika te itabarara. Ti riai ni wanawana ngkana ti kabwarabwara ao ni kaea are bon ara koaua ao n anai nanoia tabeman. Ni karaoan aei, ti tuatua bwa a na aki rootaki tabeman man ara koaua n ara aro ao inaomatan ara aro ni karaoa te mwakuri. Ti kaungaira ngaira aikai ni kabane ni karaoa nanon Ana Tua ae Kakawaki te Tia Kamaiu: ‘Ma ngaia aei, ba b’ai ni kabane aika kam tangiri ba a na karaoaki nako imi irouia aomata, ao kam na karaoi naba nako ia’ (Mataio 7:12).
“Ngkana e aki tokanikai are koaua are ti tei iaona, ti riai ni butimwaai reeke aika aki kakukure ma te nanoraoi ao ni kaota te karinerine ma ake a kaitaraira” (“Loving Others and Living with Differences,” Ensign ke Riaona, Nobembwa 2014, 27).
E konaa ni karaoaki te rairannano.
Beretitenti Russell M. Nelson e tibwaa te bwai ae e rinanona aio:
“N te ririki ae nako ngke Unimwaane David S. Baxter ao Ngai ti buti nakon te maungatabu n te titeiki, ti tei n te tabo n amwarake. Imwiina ngke ti a okira ara kaa, e kawariira temanna te aine ao e weweteira. … E titiraki ngkana ngaira unimwaane man te Ekaretia. Ti kaeka eng. Ao n taraan ae akea tautauana, e a taekina rongorongon maiuna ae kananokawaki, e a onrake n te bure. Ngkai, ai 28 ana ririki, ao e a rang rawawata. E namakina ae akea bonganana, n akea bonganan maiuna. N ana tai n taetae, e a moana ni kaoti tamaroan tamneina. Ma ranin matana aika waanako e a bubuti, e titiraki ngkana iai te kaantaninga ibukina, te kawai ae e waerake ao ni kaotinakoa man akean ana kaantaninga.
“Eng,’ ti kaeka, ‘iai te kaantaninga. Te kaantaninga e itoman ma te rairannano. Ko kona ni bitaki. Ko kona n “nako mai nakon Kristo, ma ni kakororaoaki irouna”’ [Moronnai 10:32]. Ti kaumakia bwa e na aki kawaeremwea bongin ana rairannano [taraa Aramwa 13:27; 34:33]. E maikeike n tang ma te nanorinano ao e karabwaira ma nanona n tangira.
“Ngke Unimwaane Baxter ao Ngai tia reitanako mwanangara, ti iangoa te bwai are e riki arei. Ti uringa te taeka n reirei are e anganako Aaron nakon te tamnei ae akea ana kaantaninga, ngke e taku ‘Ngkana ko rairananom man am bure ni kabane, ma ni bobaraaki i matan te Atua, ma ni wetea arana n te onimaki, ni kakoaua bwa ko na karekea, ao ngkanne ko na karekea te kaantaninga are ko tangiria’ [Aramwa 22:16]. …
“… Nakon te aine are 28‑ana‑ririki are e bae inanon te bure, ao n nakoira n tatabemaniira, I taekina bwa te kakabwaia ae moan te kakukurei man te rairannano e bon konaa ni riki. E roko rinanon te rairaki ae bwanin nakon te Uea ao Ana mwakuri ae tabu”
Irarikina, Beretitenti Nelson e kunea ‘Ti uringa naba te botanaomata ae bure ae a mena iaan ana tararua aia tia kairiiri, Moomon, are e koreia,‘Bon akea au kaantaninga, bwa I bon ataa ana motikitaeka te Uea are e na roko i aoia, bwa a bon aki rairinanoia man aia bure, ma a bon kekeiaki ibukin maiuia ma n aki wewetea Teuare e karikiia’ (Moomon 5:2)” (“Te Rairannano ao te RairakI,” Ensign ke Riaona, Meei 2007, 102, 104).
Kanakoraoan Ara Anga reirei
Te rikirake n te maiu n tamnei e riki n te mweenga. Kaain am kiraati a kabanea 165 te aoa ni katoa wiiki itinanikun te taromauri. Inanon te tai anne, bon iai oin aia tataneiai ni maiun tamneia ae e reireiniia taekan te euangkerio. Anga titiraki aika a na kaungaia taan reiakinaki bwa a na tibwauai bwaai ake a reiakin inanon te wiiki ma aia utu (taraa Reirei n ana Kawai te Tia Kamaiu, 18).