“Nobembwa 2–8. Moomon 7–9: “I taetae Nakoimi n aron ae Aongkoa Iai Ngkami,” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Nobembwa 2–8. Moomon 7–9,” Nakomai, Iriirai—Ibukin te Reirei n Tabati: 2020
E Koroboki Nibwaai iaon Bwatua aika Koora iroun Dale Kilborn
Nobembwa 2–8
Moomon 7–9
“I taetae Nakoimi n aron ae Aongkoa Iai Ngkami”
Manga rinanoi namakin ake ko korei inanon am tai ni kamatebwaia Moomon 7–9 n te wiiki aei. Tera kiibu man koroboki aika tabu nimwakoro aikai ae ko namakini bwa a rangi ni bongana n rinanoakiia ma kaain am kiraati?
Korea Am Namakin
Kaungaa te Tibwatibwa
N anganakiia kaain te kiraati aia tai n tibwatibwa man aia kamatebwai ibon irouia ke n aia utu, ko kona ni kaungaia bwa a na taraa Moomon 7–9 ao tibwaua te taeka (ke te kibu) bwa a kakaitau iai ngkai Moomom ma Moronaai a rinei ni kairii inanon bwaatua aikai.
Reirei te Reirei
Moomon 7:8–10; 8:12–22; 9:31–37
Ana Boki Moomon bon te kabanea ni kakawaki.
-
Teuana te anga ni kabwarabwara te marooro ibukin kakawakin ana Boki Moomon bon marooroakinana bwa ti na kangaa ni bairea kakawakin te bwai. E kangaa ataakin kakawakin te bwai e bita te anga are ti kabongana iai? A kona kaain te kiraati ni kakaea Moomon 8:12–22 ao n tibwaua te bwai are e taekinna Moronaai ibukin kakawakin ana Boki Moomon (“te rekooti aei”). A kona naba n tibwauai bwaai ake a rinanona are a kaota nakoia kakawakin ana Boki Moomon. Ti na kangaa ni kaotia bwa e kakawaki ana Boki Moomon iroura?
Tamneikatooton ana Boki Moomon inanon taetae aika kakaokoroAna Boki Moomon e kamataatai reirei ake a taekinaki inanon te Baibara.
-
Ni buokiia kaain te kiraati n ataia bwa e kangaa ana Boki Moomon ao te Baibara ni boutoka ibon irouia, ko kona ni kaoiia bwa a na wareka Moomon 7:8–10 ao ni kakimomotoa ana kabwarabwara Moomon ibukin rekooti aika uoua n oin aia taeka (“te rekooti are e na roko nakoia Tientaire mairouia Iutaia” e kaeineti ma te Baibara). Iangoia ni korea tamnein uoua te mronron ni karimarenaa iaon te burakibooti ao korea aran teuana te Baibara ao are teuana ana Boki Moomon. A kona kaain te kiraati ni karinani bwaai aika ti te arona imarenan uoua koroboki aika tabu n te mwakro are n te marena ao bwaai aika kakaokoro n te mwakoro are teuana. (Te witeo “te Baibara ao ana Boki Moomon” iaon ChurchofJesusChrist.org e katauraoi atatai.) N te anga teuana, iangoia ni karinani koaua n te euangkerio iaon te burakibooti ao kaoiia kaain te kiraati bwa a na taraa te Kairi nakon Koroboki aika Tabu ni kakaei kiibu man ana Boki Moomon ao te Baibara are e buokiia ni kamataataia ni koaua aikai.
Ti kona ni kakaonimaki ngkana ti tiku n tii ngaira.
-
Tabeman aomata n am kiraati a bae n namakina te maroaa n aia konabwai ni maiuakina te euangkerio. Tera ae a reiakinna man ana katooto Moronaai are a kona ni buokaki ia? Iangoia kaoiia kaain te kiraati bwa a na wareka Moomon 8:1–11 ao iangoi titiraki ake a na titirakina iai Moronaai n reiakinna bwa e kangaa n teimatoa ni kakaonimaki n tabe ma aron ana kaangaanga. Tera are e kaungaia n aron ana katooto? Ngkai a tibwaua aia iango, kaungaia kaain te kiraati bwa a na tibwauai bwaai ake a tia n rinanona i bon irouia ngke ngaiia ke tabeman ake a kinaia a teimatoa ni kakaonimaki, e ngae ngke a namakina te maroaa. E kangaa ni buokiia te Uea?
E koreaki ana Boki Moomon ibukn ara bong.
-
Ngkai ko a roko n tokin te ririki ni kamatebwaian ana Boki Moomon, tao a kona kaain te kiraati n iangoia bwa bukin tera a namakinna bwa te boki aei e koreaki ibukin ara bong. Ko kona ni waakin te kabwarabwara man warekan ana taeka Beretitenti Ezra Taft Benson inanon “Bwaai n Ibuobuoki Riki Tabeua.” A kona kaain te kiraati ni kamwakura ana titiraki Beretitenti Benson nakon Moomon 8:26–41. Bukin tera ngkai e anaa nanon Moronaai te Uea bwa e na karin taeka aikai inanon te rekooti? A kangaa ni buokiira inanon ara bong?
-
N aron are e taekinaki inanon te kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao Utu, Moomon 9:1–30 iai inanona ana rongorongo Moronaai n te kaeka nakon karakon ara onimaki iroun Iesu Kristo inanon ara bong. Tao ko kona ni bwenaua te kiraati inanon teniua te kurubu ao kaoii kurubu nako bwa a na kakaea te reirei are e bongana nakoia ni kiibu akana imwina: 1–6 (mwin te aki kakoaua Kristo), 7–20 (kakawakin kakoauan te Atua ibukin taian kaotioti ao taian kakai), ao 21–30 (ana reirei Moronaai nakoira).
-
E ngae ngke Moomon 9:1–6 e koreaki nakoia “naake a aki kakoaua Kristo,” e ibuobuoi nakoira ni kabane n iangoia ae ti a tei imatan te Atua ni motikaki taekara. Butiia kaain te kiraati bwa a na rinanoi kiibu aikai, ni kakaei taeka ke kibuntaeka are a kabwarabwara aron aia namakin naake a buakaka n te bong anne. Tera ae ti kona ni karaoia n totokoi namakin aikai? A kona kaain te kiraati ni kakaei atatai aika bongana n ana karaki Beretitenti Boyd K. Packer inanon “Bwaai n Ibuobuoki Riki Tabeua.”
-
Angiina aomata n te bong aei a kakoaua bwa a toki taian kakai. Ko na kangaa ni kabongana ana reirei Moronaai ni buokiia kaain te kiraati ni kakoaua “Atuan taian kakai”? Ko kona ni waaki ni butiia kaain te kiraati bwa a na rinanoa Moomon 9:7–26 ao n tarai taian kakai are e kaumakiira Moronaai bwa ti na kakoauai. Tera ae ti reiakinna man kiibu aikai ao Ana mwakuri inanon ara bong? Tera ae ti na karaoia n te aro are e aonga te Atua ni karaoi taian kakai? (taraa Moomon 9:20–21). Tera kakai ake ti a tia n noori?
Kaungaa te Kamatebwai n te Mweenga
A tia ni mimii kaain am kiraati bwa a na kangaa ni karikirakea aia onimaki iroun te Tama are i Karawa ao Iesu Kristo? Ngkana ngaia, kaoiia bwa a na kakaea Itta 1–5 ibukin aanga ake a na kakorakoraaki iai aia onimaki.
Bwaai n Ibuobuoki Riki Tabeua
E koreaki ana Boki Moomon ibukin ara bong.
E taku Beretitenti Ezra Taft Benson:
“A tuai karekea te boki Nibwaite; ke tao Reimwanaite naba n taai ake ngkoa. E bon nanonaki ibukira. …
“Taan korea ana Boki Moomon a kaotia bwa e koreia ibukiia rooro n taai aika a na roko [taraa 2 Nibwaai 25:21; Iakobwa 1:3; Moomon 7:1; 8:34–35]. …
“Ngkana a noora ara bong, ao n rinei bwaai aika moan baan te kakawaki nakoira, tiaki anne arona ae ti riai iai ni kamatebwaia ana Boki Moomon? Ti na teimatoa n titirakiina,‘Bukin tera e kaungaa nanon Moomon te Uea (ke Moronaai ke Aramwa) bwa a na karina anne inanon ana rekooti? Tera te reirei ae I kona n reiakinna are e na buokai ni maiu n te bong aei ao ngkana ko a kara?’” (“Ana Boki Moomon—Kiingin ara Ekaretia,” Ensign, Nobembwa. 1986, 6).
Ti kona n itiaki.
Beretitenti Boyd K. Packer e karakina mwanangana inanon onobong te bong ngke te ataeinimwaane ngaia ma tautia n te taanga ni buaka iaon te turein ae kabuebue, te turein ni kaako ae e bubu, ae bon akea te anga ae ko na kona n tebotebo ke n onea kunnikaim. N te tabo are e na toki iai te turein, tautia ake a taonaki n te baki a nako n te tabo n amwarake ae kabooaki.
“E bon onrake nanona, ao ti a bane n tataninga n te rain ae abwabwaki n tataninga tekatekara. Ngai te moan, ni mena ibukiia tabeman aine aika a rangi n tararaoi oneaia. N aki naba kan tatanrikaaki, te aine ae taraa n iai arona are e mena imoau e waekoa n ataia bwa ti mena ikekei.
“E rairaki ao e taraira. Ngkanne e rairaki ao n taraai mai atuu nakon waeu. I tei ma au kabooraoi ae maonotiti, ae bareka, ae rooro, ma ni mwanuunu. E taku ma te bwanaa n nanomwaraa, ‘Akea o, ai barekarekara mwaane aikai!’ A bane n taraira aomata.
“Akea ana nanououa bwa ai tera ngke ti aki mena ikekei; I tibwaa ana iango. I namakinna ae I barekareka, aki mweengaraoi, ao ni maama.”
Ngkanne Beretitenti Packer e taetae iaon Moomon 9:4 ao ni kabotaua te bwai are e a tia n rinanona ma te aki itiaki n te tamnei imatan te Atua. Ni kaotia bwa ana Mwakuri ni Kamaiu Iesu Kristo bon tii te kawai ae e kona n riki n itiaki n tamneina, ngkanne e taku:
“Ko kona n iangoia bwa e kangaa aron au namakin ngke te kabanea n tai I a kona n nooria bwa ngkana I iriiri bwaai nako ake e karaoi te Tia Kamaiu, N na bon aki kona n rinanon te nano rawawata n te aki itiaki n tamnei? Iangoa te namakin ae karaunano, ae ko inaomata iai, ae mimitong ae e kaoti nakoim ngkana ko noora koauan te Mwakuri ao maiuakinana ni katoa bong ma kakawakina nakoimi n tatabemani ngkami nako” (“Washed Clean,” Ensign, Meei 1997, 9–10).
Kanakoraoan Ara Anga reirei
Tataro ibukiia kaain am kiraati. Iai kaain am kiraati ae rootaki n te karawawataaki? N aron te Tia Kamaiu ngke e tataro ibukin Betero (taraa Ruka 22:31–32), ko kona n tataro ibukiia naake ko reireiniia bwa a na kakorakoraaki (taraa Reirei n Ana Kawai te Tia Kamaiu, 6).