“Nobembwa 16–22. Ita 6–11: ‘Bwa e Aonga n Toki te Buakaka,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Nobembwa 16–22. Ita 6–11,” Nakomai, Iriirai—Ibukin te Reirei n Tabati: 2020
N na Uotikorake man te Tabo ae Nano, iroun Jonathan Arthur Clarke
Nobembwa 16–22
Ita 6–11
“Bwa e Aonga n Toki te Buakaka”
Uringnga bwa rekooti ake inanon ana Boki Moomon a koreaki ibukin ara bong. Ngkai ko katauraoi n anga reirei, tarai reirei rinanon rongorongo ni koroboki aika tabu aikai ake a kona ni kakorakoraia kaain te kiraati ni kaitarai kakaewenako inanon maiuia.
Korei Am Namakin
Kaungaa te Tibwatibwa
Ni buokoiia kaain te kiraati n tibwauai bwaai aika a uaana ake a kunei n Ita 6–11, ko kona ni kaoiia n iangoia bwa mwakoro aikai a karaoaki nakon te tamnei; tera te kibuntaeka man Ita 6–11 ae a iangoia bwa atuun te marooro? Anganiia aia tai n iango aei, ao ni kaoiia bwa a na tibwauai atuun aia marooro ao ni kabwarabwara bukin tera ngkai a rineia.
Reirei te Reirei
Te Uea e na kairiiri rinanon mwanangara n rabwatara ae mamate.
-
Te kabwarabwara n te wiiki aei inanon Nakomai, Iriirai—Ibukiia Aomata ao Utu te kaoti iaon kabotauan mwanangaia Iaretaite rinanon marawa nakon mwanangara rinanon te rabwata ae mamate. Butiia kaain te kiraati ake a kataa te waaki ni kakukurei aei inanon mweengaia bwa a na tibwauai atatai ake a karekei man te kabotau aei. Ni buokiia kaain te kiraati n rimoa ni karaoi bwaai ni kabotau inanon te kiraati, kaoiia bwa a na taraa Ita 6:1–12 ibukin rongorongo te mwananga are e kona iai nanon te kanikina (n aron atiibu aika a raneanea, taian bwaati, ao te ang) ao karinani iaon te burakibooti. Ngkanne a kona kaain te kiraati ni kabanea tabeua te miniti ni mwakuri n ikatoatoa ke inanon kurubu aika a uarereke ni kamatebwai kiibu ao ni marooroakinna tera ae a tei ibukin kanikina aikai inanon maiura. N aron te katooto, tera ara “aba ni berita”? (kibu 8). E kangaa ni kairiira te Atua inanon mwanangara?
-
Ko kona ni kabongana Ita 6:1–12 ni kaungaa te marooro aron te rairaki nakon te Atua e buokiira n rikirake n aron mwiin kataakira. N aron te katooto, te taeka inanon “Bwaai n Ibuobuoki Riki Tabeua” e kona ni buokiia kaain te kiraati ni kabotaua te “ang ae baibati” are e taekinaki inanon kiibu 5–8 ma kakatai n te maiu. Tera ae a karaoia Iaretaite ngke a “otabwaniniaki n te ran ae bati”? (kibu 7). A kona kaain te kiraati n tibwauai bwaai ake a rinanona are inanon aia kaangaanga ni buokiia n rikirake. E kangaa aia aanga ni kaeka nakon aia kaangaanga ni buokiia n rikirake nakon aia “aba ni berita”? E kangaa te Uea ni buokiia n tokanikai man korakaia? Kaungaia bwa a na tarai taeka ao kibuntaeka man Ita 6 ngkai a tibwauai bwaai ake a rinanona ao aia iango.
TamneiIaretaite a mwananga ma maanMwanangaia Iaretaite n rinanon Atia, iroun Minerva Teichert
Ita 6:7–18, 30; 9:28–35; 10:1–2
Te Uea e kakabwaiaira ngkana ti nanorinano.
-
E ngae ngke mwaitin rongorongon Iaretaite e kaota mwin buakakan te kainikatonga ao te buakaka, iai naba inanona taai n nanorinano ao ni kakabwaia are ti kona n reiakinaki mai iai. Ni buokiia kaain te kiraati n reiakinaki man katooto aika raraoi aikai, ko kona ni bwenaua te kiraati inanon uoua te kurubu ao ni katabea teuana te kurubu bwa a na wareka Ita 6:7–18 and 30 inanon are te kurubu are teuana a wareka Ita 9:28–35 ao 10:1–2. Butiia bwa a na tarai kiibu aikai ibukin kakoaua bwa Iaretaite a tia ni kananorinanoia—a nanorinano man aia kaangaanga—ao ngkai te Uea e kakabwaiaia imwin anne. Ngkana e tau aia tai kaain te kiraati, kaoiia tabeman man taian kurubu bwa a tibwauai bwaai ake a reiakin. E kangaa te riki n nanorinano ni buokiira ni kaanira ma te Atua? Te anene ke n ongora n te anene n taromauri n taekan te nanorinano, n aron “I Kainnanoiko Ngai” (Anene n Taromauri, nambwa. 98), could add to this activity.
Taan kairiiri aika raoiroi a kairiia aomata nakon te Atua.
-
E ngae ngke naake a tuai nakoa ni kairiiri ae kinaaki a kona n reiakinaki man aia katooto aika raoiroi ao aika buakaka uean Iaretaite; rongorongo aikai a kona ni buokiira n riki bwa taan kairiiri aika tamaroa riki inanon mweengara, inanon ara komiuniti, ao n te taromauri. Ko kona ni waakina te marooro iaon atuun te reirei aei n titirakiniia kaain te kiraati bwa a na iangoa temanna are a taku bwa te tia kairiiri ae raoiroi. Kaoiia bwa a na kakimototoa n tibwaua anuan te aomata anne, ao ni karinani iaon te burakibooti. Ngkanne ko kona ni katabea kaka temanna kaain te kiraati n reiakina taekan temanna uean Iaretaire n Ita 7–11. (Rinania uea, ma taekan taian kibu are a kabwarabwara aia tai n tautaeka, e kuneaki inanon te kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao Utu.) A kona kaain te kiraati n tibwauai bwaai ake a reiakin mairouia uea aikai n aron te kairiiri, ni karin anua riki tabeua ake a kunei ni karinani iaon te burakibooti. Tabeua anua ni kairiiri aika raraoi a karinanaki inanon “Bwaai n Ibuobuoki Riki Tabeua.” Ti na kangaa ni karikirakei anua aikai ao n riki bwa taan kairiiri, e ngae ngke akea mwiokora ae onoti ni kairiiri?
Kaungaa te Kamatebwai n te Mweenga
NI kaungai nanoia kaain te kiraati ni warekan Ita 12–15, ko kona n taekinna bwa ni mwakoro aikai e kabwarabwaraa Moronaai nakon te Uea tabeua aki mweengaraoina ibukin rekooti ake e kawakin. Ana kaeka te Uea e kona ni buokiira ngkana ti te arona ara namakin n arora n aki tau.
Bwaai n Ibuobuoki Riki Tabeua
Ara kaangaanga a katauraoira ni karekea te maiu are akea tokina.
N taetae n te maungatabu ni kabuta inanon ririki aika a kaangaanga n tain ana Kauoua ni Buaka te Aonaaba, e taku Unimwaane Charles A. Callis man te Kooram n Abotoro n te Tengaun ma Uoman: “Ti tuangaki bwa a mwananga iaon aia bwaati Iaretaite ni kaea te aba ni berita aei, a kaitaraaki ma te buaka ae kakamaaku man korakora. E kare te ang ao a mena inanon te kaangaanga ae korakora ni mwanangaia ae e na karika te kabuanibwai. E boutokaiia te Uea. Ao ti warekia bwa e ngae ngke e reitinako te ang ae korakora ma te angibuaka, ae karika te urubwai, bwa e reitinako ni kare te ang nakon te aba ni berita. Ao kaangaanga aikai ake ti taneiai n rinanona, buaka aika korakora aikai ao bwaai aika a buakaka ake a riki, a mena ni mwaakan te Atua. E kona ni katoki ngkana E rineia, ngkana e koro bukin Ana kaantaninga. Ma ti na aki mwaninga bwa rinanon te kaangaanga i marawa, ara kaangaanga, bwaai ake ti rinanona ao ake e na karaoi te Atua a bane ni mwakuri ibukin tamaroara, ngkana ti ongotaeka Irouna—a uotiira bwaai aikai nakonkamanoara man te angibuaka, nakon mimitongin te tai ae e na roko, nakon te maiu are akea tokina” (inanon Ribooti ni Maungatabu, Eberi. 1943, 62).
Anuaia taan kairiiri aika a raoiroi.
“N abanuean te Atua, te kakannato ao te aro ni kairiiri nanona noorakia aomata n aron ae boni ngaiia—n aron ae e nooria te Atua—ao ngkanne ni karoko irouia ao ni buokiia. Nanona te kimwareirei ma naake a kukurei, n tang ma naake a nanokawaki, ni kabebeteia ake a rawawata, ao n tangiriia kaain rarikira n arona ngkai e tangiriira Kristo. …
“… Te aro ni kairiiri n te Ekaretia tiaki aron mwaitin kairaia temwangina ma bon tauraoin nanora ni kan kairaki iroun te Atua” (Dieter F. Uchtdorf, “The Greatest among You,” Ensign ke Riaona, Meei 2017, 79–80).
“Tii naake a marurung iai aia konabwai n tabekarake ao ni kaunga temanna nakon te mwakuri n ibuobuoki ae korakora, nakon te korakora are iaona riki” (Teachings of Presidents of the Church: Ezra Taft Benson [2014], 244).
“E reirei te aonaaba bwa taan kairiiri a na riai ni korakora, E reirei te Uea bwa a na riai n nimamannei. Taan kairiiri n te aonaaba a karekea te mwaaka, ao ni kairiiri rinanon aia tarena, rabwakauia, ao kaubwaia. Taan kairiiri n aron Kristo a karekea te mwaaka ao te kairoro ‘tii man te anai nano, man te taotaonaki n nano, man te atataiaomata ao te nimamannei, ao man te tangira ae aki kewe’ [RB 121:41]” (Stephen W. Owen, “The Greatest Leaders Are the Greatest Followers,” Ensign ke Riaona, Meei 2016, 75).
Kanakoraoan Ara Anga reirei
Kaungaa te tabo ni karinea. Ko namakinna bwa a mweengaraoi kaain te kiraati ni kabane ni kaota aia iango ao aia namakin? “Buokiia kaain te kiraati n oota bwa ngaiia n tatabemaniia nako a roota tamneia kaain te kiraati. Kaungaiia bwa a na buokiko ni katea te tabo, ae ukinako, ae tangiraki, ao ni karineaki bwa a aonga aomata nako n namakina te mano n tibwauai bwaai ake a rinanona, aia titiraki, ao aia kakoaua” (Reirei n ana Kawai te Tia Kamaiu, 15).