“Nobembwa 16–22. Ita 6–11: ‘Bwa e Aonga n Toki te Buakaka,’” Nakomai, Iriirai—Ibukiia Aomata n Tatabemaniia ao Utu 2020 (2020)
“Nobembwa 16–22. Ita 6–11,” Nakomai, Iriirai—Ibukiia Aomata n Tatabemaniia ao Utu: 2020
N na Bon Uoti Ngkami Rake Mai i Kabin Taari, iroun Jonathan Arthur Clarke
Nobembwa 16–22
Ita 6–11
“Bwa e Aonga n Toki te Buakaka”
N taetae iaon aia rekooti Iaretaite, Moomon e taekinna bwa “a riai aomata ni kabane n atai taekan bwaai ake a koreaki i nanon te rongorongo aio” (Motiaea 28:19). Kawakina te bwai aei n am iango ngkana ko wareka Ita 6–11. Bukin tera a riai bwaai aikai—ke a ibuobuoki—nakoim ao nakoia am utu aika ko tangiriia?
Korei Am Namakin
Tebubua te ririki imwiin are a kamaunaaki Iaretaite, tenaan Nibwaiite a kunei mwiin aia maeka aia aomata n taai akekei aika a urubekeaki. Ibuakon urubekebeke aikai bon te rekooti ae aki ataaki—bwaatua aika “koora” ake a “a on n te koroboki” (Motiaea 8:9). Uean Nibwaite, Rimwaai, e kona n namakinna bwa te rekooti aei e kakawaki: “I ataia ni koaua bwa e a korakora te bwai ae raba i nanon bwaatua aikai,” e taku (Motiaea 8:19). N te bong aei e a tia n reke kauarerekean te rongorongo aei, ae rairaki nakon am taetae, ao e aranaki bwa ana boki Ita. E roko man te rongorongo ae ti tebo ma te rongorongo are “a kabanei iai nanoia” Nibwaite ni warekia, ao ngke a karaoia, “a onrake n te nanokawaki; e ngae n anne, e anganiia te atatai ae korakora, are a kimwareirei iai” (Motiaea 28:12, 18). Ngkana ko wareka taekan teirakeia ao bwakaia ae korakora Iaretaite, ko na kunei taai aika a rangi ni kananokawaki. Mai tai mwaninga kakukurein kamatebwaiakan reirei man te rongorongo aei. Imwiina, n aron ae koroia Moronaai, “bon ibukin te wanawana iroun te Atua ao a kaotaki bwaai aikai nakoimi” (Ita 8:23), bukina bwa ngkana ti kona n reirei man kabwakaia ao nakoraoia Iaretaite, “bwa e aonga n toki te buakaka, ao … e na roko te tai are a na akea mwaakan Tatan inanoia natiia aomata” (Ita 8:26).
Iango ibukin Am Kamatebwai I Bon Iroum ni Koroboki Aika Tabu
E na kairai te Uea nakon abau ni berita.
Ko na kona ni kunei iango n tamnei ngkana ko kabotaua’ mwanangaia Iaretaite n rinanon te marawa nakon mwanangam rinanon te maiu aei. Te katooto, tera ae e a tia ni katauraoia te Uea ae e na kaotaa kawaim n aron karaki n aia kaibuke Iaretaite’? Tera ae e na tei ibukin te kaibuke, ke te ang are “e kare nakon te aba ni berita”? (Ita 6:8). Tera ae ko reiakinna man aia mwakuri Iaretaite imwaina, n tain, ao imwiin te mwananga? E kanga te Uea ni kairiko nakon am aba ni berita?
Mwanangaia Iaretaite rinanon Asia, iroun Minerva Teichert
Ita 6:5–18, 30; 9:28–35; 10:1–2
E kakabwaiaai te Uea ngkana I nanorinano.
E ngae ngke te kamoamoa ao te buakaka a taraa n taona nako rongorongoia Iaretaite, iai naba katooto n te nanorinano inanon mwakoro aikai—riki inanon Ita 6:5–18, 30; 9:28–35; ao 10:1–2. Iangoakin titiraki aikai a kona ni buokiko n reirei man katooto aikai: Bukin tera a kananorinanoia Iaretaite n taian kaangaanga aikai? Tera ae a karaoia ni kaota aia nanorinano? A kanga ni kakabwaiaki imwina? Taraia bwa n taian kaangaanga tabeua, aomata a kabaeaki bwa a na nanorinano man aia kaangaanga. Iangoia bwa tera ae ko kona ni karaoia ma nanom ni koaua “nakonako ma te nanorinano imatan te Uea” (Ita 6:17) nakon are ko na imanonoaki bwa ko na nanorinano (taraa Motiaea 4:11–12; Aramwa 32:14–18).
Taraa naba “Nanorinano,” Gospel Topics, topics.ChurchofJesusChrist.org.
Taan kairiiri aika a kokoaua a kakabwaiaia aomata aika a kairiia.
Mwakoro 7–11 n Ita iai inanona ae kaniia 28 te roro. E ngae ngke e aki tau te kamataata n te marena ae uarereke, e waekoa n roko te baeten: te kairiiri ae raoiroi e kairiiri nakon kakabwaia ao te maiu raoi, ngkai kairiiri aika a buakaka a kairi nakon te kabureaki ao te kamaunaaki.
Aika oti inano bon araia tabeman ueea aika a taekinaki inanon mwakoro aikai. Wareki kiibu aika a irekereke, ao taraia bwa tera ae ko kona n reiakinna man aia katooto—aika a raraoi ao aika a buakaka—iaon taekan te kairiiri. Ngkana ko karaoia, iangoi taai aika ko na kairiiri ke ni kairoroia taberman ni mweengam, am komiuniti, nakoam n te Ekaretia, ao a mwaiti riki.
-
Oria—Ita 6:30–7:1
-
Tiure—Ita 7:23–27
-
Iareta—Ita 8:1–7, 11–15
-
Emera ao Koriantam—Ita 9:21–23
-
Eta—Ita 9:26–30
-
Teeti—Ita 10:1–2
-
Ribwakite—Ita 10:5–8
-
Morianton—Ita 10:10–11
-
Riibu—Ita 10:19–28
-
Eetem—Ita 11:11–13
Tera bootaki ni karaba aika buakaka?
Ngkana uoman ke teniman aomata aika a karaoi aia babaire aika a raba ni kateimatoai ni karabai aia mwakuri aika a buakaka, a irekereke ma bootaki ni karaba aika a buakaka. A aki toki ni mwakuri korakora ibukin tangiran te mwaaka ke kaubwai. Irarikin te bootaki ni karaba ae kabwarabwaraaki inanon Ita 8:7–18, katooto tabeua a kona ni kuneaki n Ereman 1:9–12; 2:2–11; 6:16–30, ao Mote 5:29–33. Inanon Ita 8:18–26, Moronaai e kabwarabwaraa te kaangaanga ae e na reke man te bootaki ni karaba (Taraa naba Ita 9:4–12) ao e kauringiira bwa ti na aki boutokaia.
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
Ita 6:2–12
A na kona am utu ni kukurei ni karaoia n te kaotioti mwanangaia Iaretaite nakon te aba ni berita? Tao ko kona ni kabongana te ruu ae rotongitong bwa te kaibuke ao te taura ae kiakia bwa e na tei ibukin atiibu aika kiakia. Ko kona n taekinna bwa a kanga Iaretaite ni kaota aia onimaki iroun te Uea man rinnakoia n te kaibuke, n aki tabe ngkai a ataia bwa a na “taunaki i kabin marawa” (Ita 6:6). Imwiin warekan kiibu 9, a kona kaain te utu n tibwaua aia anene ni kamoamoa ae a tatangiria ao ni bootaki n aneneia. A kanga mweengara ni kabotauaki nakon aia kaibuke Iaretaite? Tera te aba ni berita ae a kairiiia iai ara utu te Uea nako iai?
Ita 6:22–23
Ni kabuta te wiiki aei, a kona am utu ni iangoia bwa a kanga aia kauring ni burabeti tarin Iareta ibukin te tautoronaki ni kakoroaki bukina. Tera kauring aika a tia ara mataniwi n te Ekaretia n anganiira? Kawai raa ae a na kona ni kairiia nakon te tautoronaki ngkana a kakeai kaetieti?
Ita 8:23–26
Ni kaineti ma kiibu aikai, bukin tera Moronaai e tuangaki bwa e na koroi “bwaai aikai” ibukin te bootaki ni karaba? (Ita 8:23). Tera ae ti a tia n reiakinna man ana boki Ita ae kona ni buokiira ni karekei kakabwaia aika e kabwarabwarai n te kibu 26?
Ita 9:11
A kanga nanora n rooti ara rinerine? Tera ae ti kona ni karaoia n ara utu ni kakoaua bwa ti tangirii ana bwai te Atua?
Ita 11:8
N reiakina riki ana nanoanga te Uea nakoia naake a rairinanoia, ko kona ni wareka Motiaea 26:29–30; 29:18–20; Aramwa 34:14–16; or Moronaai 6:8. Tao a kona kaain te utu n tibwauai katooto n ana mwakuri n akoi te Atua man koroboki aika tabu ke man oin maiuia.
Ibukin riki iango ibukin reireinaia ataei, taraa te kamataata n te wiiki aei innanon Nakomai, Iriirai—Ibukin te Moanrinan.
Kanakoraoan Am Kamatebwai
Mwakuriia te bwai ae ko reiakinna. Reiakinan te euangkerio e raka riki nakon ae ti te wareware ao te iango. Ti reiakinna n tainako ae bati riki man mwakurian koaua inanon koroboki aika tabu (taraa Ioane 7:17). Tera ae ko na karaoia ni kabongana te bwai ae ko warekia n Ita 6–11?
Aia Kaibuke Iaretaite, iroun Gary Ernest Smith