A Kitana Bwabera Iaretaite, iroun Albin Veselka

Nobembwa 9–15

Ita 1–5

“Raeuaka Rabunan te Ataibwai”

Tera te koaua ae ko reiakinna n am tai ni kamatebwaia Ita 1–5 ae ko konaa ni tibwauaia ma ake ko reireiniia? Baikara bwaai are ko na anganiia bwa e na reke aia tai n tibwaua are a reiakinna?

Korei Am Namakin

Kaungaa te Tibwatibwa

Iangoa te kawai ni kareke iango aei ni kaungaa te tibwatibwa: Tibwai atiibu nakoia 16 kaain te kiraati, ao kaoiia tabeman mai ibuakoia bwa a na tibwaua te koaua are a uringa man aia kamatebwai ibon irouia ke n aia utu iaon Ita 1–5. Tera ae a nang karaoia ibukin te bwai are a tia n reiakinna?

Reirei te Reirei

Ita 1–3; 4:8–19

Inanon ara tai n reitanako weteakin te Uea, E na bon kaota Nanona.

• Ngaira n tatabemaniira nako ti a tia ni korakai ni kakaea kaekaan te kaangaanga ke te titiraki. E na kangaa te bwai are e a tia n rinanona tarin Iareta ni buokiia te koraki ake ko reireiniia n ataa aron ukoran te ibuobuoki mai iroun te Uea? Tao ko na konaa ni korea tamnein te taibora iaon te burakibooti ae e tibwatibwaaki nanona ao a koreaki iai Ana titiraki tarin Iareta, Te bwai are e karaoia tarin Iareta, ao Ana kaeka te Uea. Ngkane ko konaa ni katannakoia kaain te kiraati inanon tenua te kurubu ao anganiia kaka teuana te rinan nakoia kurubu. A konaa ni bane ni mwakuri n aia kurubu n taratara Ita 1:33–43 ao 2:16–3 6 ao korei baike a kunei n aia rinan n te taibora. Imwiina a konaa kaain te kiraati ni maroroakin titiraki n aron aikai: Tera ae ti reiakinna iaon kawai aika a kakaokoro are e rineia te Uea ni buokiira iai? Tera ae ti reiakinna ibukin tibwangara inanon te kawai ni karekean te kaotioti? Tao a kona kaain te kiraati n tibwauai katooto tabeua man booki aika tabu ake a na reireia te reirei aei. Te marooro mai iroun Unimwaane Richard G. Scott n “Bwaai n Ibuobuoki Riki Tabeua” e katauraoi bwaai aika a na ataaki iaon ae e kangaa te Uea ni kaekai tataro.

• Ana tataro tarin Iareta n Ita 3:1–5 e na kaungaa nanoia kaain te kiraati n taraa aron aia tataro i i bon irouia. Tao a kona kaain te kiraati ni iangoia ae aongkoa anga taeka n reirei nakon temanna ae e a tibwa reireinna n tataro. Tera taeka n reirei ae a na anga? A konaa ngkanne ni kakaea n Ita 3:1–5 ao ni manga taekinii kiibu akanne ma teuana ke uoua anga ni ibuobuoki ke reirei bwa ko na kangaa n tataro ni koaua. Iangoia n anganiia kaain te kiraati tabeua te miniti ni iangoa aron aia tataro ao a na kangaa n ira ana katooto tarin Iareta ni karaoa aia tataro ma nanoia ni koaua.

• Imwiin tibwaan ana taneiai n reken ana kaotioti tarin Iareta n Ita 3, e anga te reirei Moronaai n Ita 4 bwa ti na kangaa ni karekea te kaotioti mai iroun te Uea. Ni buokiia kaain te kiraati n reiakina te reirei aio, ko konaa ni kaota tamnein Iesu Kristo ao kaoiia kaain te kirati ni kakaea n Ita 4:8–10 ni baike a konaa n tukiira man karekean te kaotioti ke te koaua mai iroun te Uea. Inanon aia tai kaain te kiraati ni tibwaua te bwai are a kunea, ko konaa ni karaurau n rabuna tamnein Iesu n te kunikai ke te bebwa. Ti na kangaa n tukii taian totoko ni maiun tamneira inanon maiura? Imwiina, a konaa kaain te kiraati n kakaea n Ita 4:7, 11–15, bwa ti na kangaa n tau ibukin karekean te koaua mai iroun te Uea. Ngkai a tibwaua te bwai ae a kunea kaain te kiraati, kanakoa te kunikai ke te bebwa. Tera ae e nanonaki n “kamwakura te onimaki iroun … te Uea, n ai aron are e karaoia tarin Iareta”? (Ita 4:7; taraa naba Ita 3:1–9). Tera ae e nanonaki n “raeuaka [te] rabuna n ataibwai” inanon maiura? (Ita 4:15). Ti na kangaa ni buokiia tabeman bwa a na karaoa ae ai aron anne? A konaa naba kaain te kiraati n nora te koaua iaon te kaotioti i bon iroum n ana marooro Beretitenti Russell M. Nelson “Te Kaotioti ibukin te Ekaretia, Te Kaotioti ibukin Maiura” (Ensign ke Riaona, Meei 2018, 93–96).

Ita 2:14–15

Man nanonakin Ana tai ni kaetiira, e kaoira te Uea bwa ti na rairii nanora ao n Nakoina.

• N aron naba te burabeti ae korakora are tarin Iareta e kaetaki naba arona iroun te Uea. Ni bon koauana, te bwai are e riki iai n rangi ni korakora bon arona ni kaekaa kaetakina. Ni buokiia kaain te kiraati n reiakina te katooto mai iroun tarin Iareta, ko konaa ni kaoiia bwa a na uaia ni wareka Ita 2:14–15 ni ikatoatoa. Ngkanne tuangiia bwa temanna aongkoa e na riki bwa tarin Iareta ao are temanna bwa te aomata are e a tibwa tuangaki kaetakin arona mai iroun te tia kairiiri n te Ekaretia ke irouia ana karo. Kariaia bwa a na maroroakinna ke ni karaoa te kaotioti iaona bwa e na kangaa ana taeka tarin Iareta ibukin ana taneiai ni buoka te aomata anne. Tera taeka n reirei ae e na anga? Baikara reirei ake ti reiakin ake ana buokiira ni kaniira ma Tamara are i Karawa? Ko konaa naba ni marorakinna bwa e kangaa te Uea ni kaeta aron temanna ao ana kaeka tarin Iareta are e na tia ni buokia iai n aron te bwai are e a tia n rinanona n Ita 3:1–20. Aikai tabeua bwai ni ibuobuoki ake a na konaa ni buokiko: Ana rongorongo Unimwaane D. Todd Christofferson “As Many as I Love, I Rebuke and Chasten” (Ensign ke Riaona, Meei 2011, 97–100) ke te mwakoro ae atunaki “Discipline” n ana marooro Unimwaane Lynn G. Robbins “The Righteous Judge” (Ensign ke Riaona, Nobembwa. 2016, 96–97).

Ita 5

Teniman taan kakoaua a taekina koauan Ana Boki Moomon.

• Reiakinan ana taetae ni burabeti Moronaai ibukiia Teniman Taan Kakoaua e na buoka ni kakorakora aia koaua kaain te kiraati n Ana Boki Moomon. Tao iteraia kaain te kiraati a na kona ni wareka Ita 5 ao are iterana a na wareka “Aia Koaua Taan Kakoaua aika Teniman” (ni moan Ana Boki Moomon) ao n tibwauaia imarenaia bwa tera aia namakin bwa nanon te Uea ngkai e kariaia Teniman taan Kakoaua bwa a na noora te anera ao taian bwaatua. A konaa naba ni maroroakin tabeua riki bwaai aika a riki n aron rawataia taan kakoaua ni karababanakoa te koaua (taraa, n aron te katootoo, Mataio 3:13–17; 18:15–16; Ioane 5:31–47; RB 128:3). Tera te kakoaua inanon maiura ae e a tia n anganiira namakinana bwa ti na kakoauaa? E kangaa n tia “mwakan te Atua ao ana taeka naba” ni “kaotaki” nakoira inanon Ana Boki Moomon? (Ita 5:4).

Kaungaa te Kamatebwai n te Mweenga

Kaoiia kaain te kiraati bwa na iangoia ae aongkoa aia taan kairiiri n te tautaeka a reitinako ni karekeia taenikai ao n tiringiia imarenaia. Inanon Ita 6–11, a na warekia bwa e kangaa n riki aei nakoia ana aomata Iareta ao tarina. Ana kunei naba tabeua kauring are e na buokiia ni kararoai kaangaanga ake a kaaitarai Iaretaite.

Bwaai n Ibuobuoki Riki Tabeua

Kinakin kaekaan te tataro.

E reirei Uniwmaane Richard G. Scott:

“Ngkana ti kabwarabwaraa te kaangaanga ao n anga aron katokana, n tabetai E kaeka bwa eng, n tabetai tiaki. E aki toki n taua moa te kaeka, tiaki n ae e aki tabe iai, ma ibukina bwa E tangiriira—ni koaua. E tangiriira bwa ti na kabonganai koaua ake E a tia n anganira. Bwa ibukin rikirakera, ti riai n onimakina oin ara konabwai ni karaoi rinerine aika eti. Ti riai ni karaoi baike ti namakinna bwa a eti. N te taina, E na kaeka. E na bon aki katikuira. …

“… E tangiriira bwa ti na karaoa te mwakuri ni karekea te taneiai ae ti kainnanoia:

“Ngkana E kaeka bwa eng, anne bon anganakira kamatoaan nanora.

“Ngkana E kaeka bwa tiaki, anne bon totokoan te kairua.

“Ngkana E taua te kaeka, anne bon karikara bwa ti na rikirake inanon te onimaki Irouna, ongeaba nakon Ana tua, ao n anga nanora ni mwakuri iaon te koaua. Ti bon kantaningaaki ni butimwaai bukinakira man karaoan mwakuri iaon te rinerine ake a boraoi ma Ana reirei n aki taninga kamatoakina. Ti na aki tiku n akea te bae ti karaoia n tataninga ke ni ngurengure ibukin ae e tuai taetae te Uea. Ti na karaoa te mwakuri” (“Learning to Recognize Answers to Prayer,” Ensign, Nobembwa. 1989, 31–32).

Kanakoraoan Ara Anga reirei

Nako moa nakon Booki aika Tabu. A na riki koroboki aika tabu bwa ngaia oin bwai ni ibuobuoki n am kamatebwai ao ni katauraoi. Tai mwaninga are aia taeka burabeti aika ngkai a buoka ni kabwaninii taian boki aika tabu ao bon koroboki aika tabu naba (taraa Reirei n Ana Kawai te Tia Kamaiu, 17–18).