Xjalam-uuch li Kristo naq kixk’ut rib’ chiruheb’ laj Nefita, xb’aan laj Andrew Bosley

12–18 octubre

3 Nefi 20–26

“Laa’ex ralal xk’ajol li sumwank”

Chakanab’ naq li Musiq’ej tatxb’eresi sa’ xtzolb’al 3 Nefi 20–26. A’an tatxtenq’a chixk’eeb’al reetaleb’ li na’leb’ li naru tixtoch’eb’ xch’ool li tzolb’ileb’ aab’aan.

Xtz’iib’ankil li nakak’oxla

Xkanab’ankileb’ chi wotzok

Chirix rilb’al ru sa’ komonil li raatin li Kolonel sa’ 3 Nefi 23:1, taaruuq taapatz’ reheb’ li komon k’a’ru xe’xsik’ naq xe’rileb’ ru li loq’laj hu chiru li xamaan a’in. K’a’ru xe’xtaw?

Xkʼutbʼal li tzolʼlebʼ

3 Nefi 20:25–41; 21:9–11, 22–29

Sa’ roso’jikeb’ li kutan, li Dios tixk’anjela jun xnimal ru ut sachb’a-ch’oolejil k’anjel.

• Li Kolonel ki’aatinak chirix “jun xnimal ru ut sachb’a-ch’oolejil k’anjel” (3 Nefi 21:9) li k’anjelanb’ilaq xb’aan lix Yuwa’ sa’ roso’jikeb’ li kutan. Maare eb’ li komon sa’ li tzoleb’aal te’ruuq chixwotzb’al li xe’xtzol chirix li k’anjel a’an naq xe’xtzoleb’ li ch’ol a’in sa’ rochocheb’. Eb’ li patz’om jo’eb’ a’in naru te’k’anjelaq re xtikib’ankil li aatinak: K’a’ru kixye li Qaawa’ naq taak’ulmanq sa’ junaq kutan chalel? (chi’ilmanq 3 Nefi 20:30–32, 39–41; 21:22–29). K’a’ut naq kixye naq “xnimal ru” ut “sachb’a-ch’oolejil” li k’a’aq re ru a’in? K’a’ruheb’ li eetalil naqil naq yoo chi uxmank li k’anjel a’in? Chan ru tootz’aqonq sa’ li k’anjel a’in?

• Re xtenq’ankileb’ li tzolb’ileb’ aab’aan chixkeeb’al reetal chan ru naq li Profeet aj Jose Smith kitenq’an chixtz’aqob’resinkil ru li xnimal ru ut sachb’a-ch’oolejil k’anjel re li Qaawa’, taaruuq taak’utb’esi jun xjalam-uuch li profeet ut taakanab’eb’ li komon chirilb’al ru 3 Nefi 21:9–11 re xtawb’aleb’ aatin ut ch’ol aatin li neke’xk’eheb’ chixk’oxlankil lix yu’am ut lix k’anjel laj Jose Smith. Qayehaq, chan ru naq li Qaawa’ “kixk’e xwankil a’an re tixk’e chi k’ute’k [li evangelio] chiruheb’ laj Gentil”? (raqal 11). K’a’ut naq aajel ru xnawb’al naq lix k’anjel laj Jose Smith kiyehe’ resil chi rub’elaj xb’aan li Kolonel? (chi’ilmanq ajwi’ 2 Nefi 3).

• Taaruuq ajwi’ taatenq’aheb’ li tzolb’ileb’ aab’aan chirilb’aleb’ rib’ sa’ li xnimal ru k’anjel yeeb’il resil chi rub’elaj sa’eb’ li ch’ol a’in wi teeril ru 3 Nefi 20:25–27 sa’ komonil. Wi na’ajman, taaruuq taaye reheb’ naq rik’in li ok sa’ sumwank rik’in li Qaawa’, yooko ajwi’ chi ok choq’ riyajil laj Abraham. Jo’eb’ li ralal xk’ajol laj Abraham, chan ru naru taqosob’tesi “chixjunileb’ li junkab’al re li ruchich’och’ ”? (raqal 25). Eb’ li komon sa’ li tzoleb’aal te’ruuq chixk’oxlankil li patz’om a’in naq neke’ril ru li raatin li Awa’b’ej Russell M. Nelson sa’ “Xkomon chik li k’anjeleb’aal” ut neke’xwotz xna’leb’eb’.

3 Nefi 23; 26:1–12

Li Kolonel naraj naq taqatzoleb’ li loq’laj hu.

• Chan ru naq li raatin li Kolonel reheb’ laj Nefita naxk’ut k’a’ru nareek’a a’an chirixeb’ li loq’laj hu? Re xtenq’ankileb’ li komon chixsumenkil a’in, taaruuq taapatz’ re xyijach li tzoleb’aal naq te’ril ru 3 Nefi 23 ut li jun yijach chik naq te’ril ru 3 Nefi 26:1–12; chirix a’an, te’ruuq chixwotzb’al chirib’ileb’ rib’ li xe’xtaw. Taaruuq ajwi’ te’xwotz xna’leb’eb’ chirix chan ru naru naqak’ut chiru li Qaawa’ naq eb’ li loq’laj hu ninqeb’ xwankil choq’ qe? Qayehaq, k’a’ru xjalanil xtz’ilb’aleb’ rix li loq’laj hu rik’in yal rilb’aleb’ ru? (chi’ilmanq 3 Nefi 23:1).

3 Nefi 24:1–6

Li Qaawa’ a’an chanchan lix xam laj k’uub’anel ch’iich’.

• Eb’ li kok’ k’anjeleb’aal maare texxtenq’a chi aatinak chirix 3 Nefi 24:1–6. Qayehaq, taaruuq taak’ut jun ch’ina tumin re plaat malaj li xab’on naq eb’ li komon sa’ li tzoleb’aal neke’rileb’ ru li raqal re xtawb’al chan ru naq eb’ li k’a’aq re ru a’in wankeb’ rilom rik’in li Kolonel ut lix k’anjel. Taaruuq ajwi’ taawotz rik’in li tzoleb’aal li aatin chirix xsaqob’resinkil ru li plaat ut lix xab’on laj puch’unel sa’ “Xkomon chik li k’anjeleb’aal.” Malaj taaruuq taak’ut li video “El fuego purificador” (ChurchofJesusChrist.org). Chan ru naq li Qaawa’ a’an “chanchan lix xam laj k’uub’anel ch’iich’, ut chanchan xxab’on laj puch’unel”? (raqal 2). K’a’ru neke’xk’ut chiqu li eetalil a’in chirix chan ru naq li Kolonel naxsaqob’resi qu?

3 Nefi 24:7–18

Li Dios naruxtaanaheb’ ru li neke’sutq’i rik’in.

• Taaruuq taaye naq li k’utb’il chirix li lajetqil sa’ 3 Nefi 24:8–12 naxsume li patz’om sa’ li raqal 7: “K’a’ put ru toosutq’iiq wi’ ” rik’in li Qaawa’? Chan ru neke’xk’am rib’ li “sutq’iik rik’in li Qaawa’ ” ut xtojb’al li lajetqil? Eb’ li komon te’ruuq chixwotzb’al chan ru xe’xk’uleb’ li osob’tesink tusub’anb’ileb’ sa’eb’ li raqal 10–12 naq xe’xtoj xlajetqil. Chan ru naq eb’ li yaalil na’leb’ a’in te’ruuq chixtenq’ankil anihaq li nach’a’ajko’ xtojb’al li lajetqil chiru?

• K’a’ruheb’ li na’leb’ yeeb’ileb’ resil sa’ 3 Nefi 24:13–15 li neke’tawman chi kok’ aj xsa’ sa’ li ruchich’och’ anajwan? Waklesi xch’ooleb’ li tzolb’ileb’ aab’aan chixwotzb’al li te’xye raj re anihaq li nareek’a naq ink’a’ mas ch’a’aj ut naq chaab’il chik li yu’amej choq’ reheb’ li ink’a’ neke’ab’in chiruheb’ li taqlahom. Jo’ chanru li naxye sa’ 3 Nefi 24, chan ru naq li Qaawa’ narosob’tesiheb’ li neke’k’anjelak chiru? Taaruuq ajwi’ taawaklesi xch’ooleb’ chixtawb’al xsumenkil a’an sa’ 3 Nefi 22. (Chi’ilmanq ajwi’ Mosiah 2:41; Alma 41:10.)

3 Nefi 25:5–6

Tento naq te’sutq’isiiq qach’ool rik’ineb’ li qaxe’ qatoon.

• Re xk’utb’esinkil xyaalalil li na’leb’ chirix lix sutq’ijikeb’ li qach’ool rik’ineb’ li qaxe’ qatoon, taaruuq taapatz’ re jun komon sa’ li tzoleb’aal naq tixsutq’isi rib’ chiruheb’ li rech aj komon re naq ink’a’ naru taarileb’ ut naq yal rik’in li najultiko’ re, tixye chan ru neke’k’utun (qayehaq, b’ar chunchuukeb’, li t’ikr tiqtookeb’ wi’, ut xkomon chik). Chirix a’an, taaruuq chirilb’aleb’ li komon ut tixyal wi’chik. K’a’ru naru tixk’ut a’in chirix xsutq’isinkil qach’ool rik’ineb’ li qaxe’ qatoon rik’in li k’anjel re li santil ochoch ut li resilal li junkab’al? Chirix rilb’al ru 3 Nefi 25:5–6, maare eb’ li komon te’ruuq chixwotzb’al chan ru naq xe’sutq’isiik xch’ooleb’ rik’ineb’ lix xe’toonil. Taaruuq ajwi’ taapatz’ re li ani b’oqb’il sa’ li teep chi tenq’ank rik’in li k’anjel re li santil ochoch ut li resilal li junkab’al naq tixk’ut chiruheb’ li komon junjunqeb’ li k’anjeleb’aal re xsik’b’al resilal li junkab’alej. Chan ru naq li k’anjel a’in naxk’am rib’ rik’in lix ch’utub’ankil Israel li ch’olob’anb’il xb’aan li Awa’b’ej Russell M. Nelson sa’ “Xkomon chik li k’anjeleb’aal”?

Xb’oqb’aleb’ chi tzolok sa’ kab’l

Sa’ 3 Nefi 27–4 Nefi naqil ru resil jun tenamit li “sa wi’chik xch’ool sa’ xyanq chixjunileb’ li tenamit li yo’ob’tesinb’ileb’ xb’aan ruq’ li Dios” (4 Nefi 1:16). Ye reheb’ li komon naq rilb’aleb’ ru li ch’ol a’in naru tooxtenq’a chi tzolok chirix chan ru xtawb’al li sahil ch’oolejil choq’ qe ut choq’ re li qajunkab’al.

Xkomon chik li kʼanjelebʼaal

Naru tat-okenq sa’ jun xnimal ru k’anjel.

Li Awa’b’ej Russell M. Nelson kixye:

“Relik chi yaal naq a’aneb’ a’in li roso’jikeb’ li kutan, ut li Qaawa’ yoo chixseeb’ob’resinkil lix k’anjel re xch’utub’ankil Israel. Li ch’utub’ank a’an li k’anjel q’axal aajel ru li yoo chi k’ulmank sa’ li ruchich’och’ anajwan. Maak’a’ chik naru xjuntaq’eetankil rik’in lix nimal ru, rik’in lix aajelil ru, rik’in lix loq’alil. Ut wi nakasik’ ru, wi nakawaj, naru naq nimaq laa tz’aqonik sa’ li k’anjel a’an. Naru naq nimaq aatz’aqonik rik’in li k’a’ru nim, li k’a’ru chaq’al ru, li k’a’ru loq’!

“Naq noko’aatinak chirix li ch’utub’ank, ka’ajwi’ yooko chixyeeb’al li yaalil na’leb’ a’in: chixjunileb’ li ralal xk’ajol li qaChoxahil Yuwa’, sa’ xka’pak’alil li tz’apleb’ t’ikr, xk’ulub’eb’ re rab’inkil li esil chirix lix evangelio li Jesukristo k’ojob’anb’il wi’chik. …

“… K’oxlahomaq a’an! Sa’ xyanqeb’ chixjunileb’ li wanjenaqeb’ sa’ xb’een li ruchich’och’ a’in chalen chaq xtiklajik, osob’tesinb’ilo laa’o chi tz’aqonk sa’ li roso’jikil ut xnimal ru ch’utub’ank a’in. K’a’jo’ xchaab’ilal a’an! …

“Tento naq tz’aqal ajeelaq ru li k’anjel a’in choq’ aawe. A’an a’in li k’anjel kattaqlaak wi’ chixb’aanunkil arin sa’ ruchich’och’ ” (“Juventud de Israel” [ch’utam choq’ reheb’ li saaj sa’ chixjunil li ruchich’och’, 3 junio, 2018], broadcasts.ChurchofJesusChrist.org).

Li saqob’resink-u ut li santob’resink.

Li plaat natawman chi junajinb’il rik’in xkomoneb’ chik li ch’iich’ sa’eb’ li pek li neke’tawman sa’ li ch’och’. Sa’ najter q’e kutan, jun aj k’uub’anel plaat, re risinkil chaq li plaat, naxk’e li pek wan wi’ li ch’iich’ sa’ jun k’atleb’aal q’axal tiq. Naq ha’resinb’il li pek, lix tz’ajnil (a’an li pek ut ch’iich’ li ink’a’ na’ajman) nakana sa’ xb’een li ha’resinb’il ch’iich’. Laj k’uub’anel plaat narisi li tz’aj, ut junes li plaat nakana, li nawb’il ru xb’aan lix lemtz’unkil.

Jun aj puch’unel, a’an li ani naxpuch’ ut naxsaqob’resi ru li t’ikr. A’an naxsub’ li t’ikr sa’ ha’ junajinb’il rik’in “xxab’on laj puch’unel,” li narisi li aseeyt ut li tz’ajnil. Naq sub’b’il li t’ikr, laj puch’unel naxsak’ li t’ikr chi ruq’ malaj chi roq re risinkil li tz’ajnil. (Chi’ilmanq “Refiner’s Fire and Fuller’s Soap,” New Era, junio 2016, 6–7.)

Xchaab’ilob’resinkil li qak’utum

K’ut chiruheb’ li kristiaan. “Juntaq’eet x’aajelil ru li nakab’aanu reheb’ rik’in li na’leb’ nakak’ut chiruheb’. Wan naq li qak’a’uxl chirix chan ru xk’utb’al jun na’leb’ nokoxram chixk’utb’al li qarahom choq’ reheb’ li ani tzolb’ileb’ qab’aan. Wi na’uxman a’in aawik’in, k’oxla chan ru tatruuq chixb’aanunkil li k’a’ru q’axal aajel ru” (Li k’utuk jo’ li Kolonel, 6).