Lix saqenkil li rilob’aal kilemtz’un chiruheb’, xb’aan laj Gary L. Kapp

28 septiembre–11 octubre

3 Nefi 17–19

“K’ehomaq reetal, nujenaq xsahil inch’ool”

Lix kawresinkil aawib’ chi k’utuk tento taatiklaaq rik’in xtzolb’aleb’ li loq’laj hu aajunes. Kim, Taaqehin—Choq’ reheb’ li komon ut li junkab’al naru taak’anjelaq aawe naq nakattzolok, ut li tusleb’ aatin a’in naru ajwi’ tixk’e aana’leb’ re aatenq’ankil chixkawresinkil aawib’.

Xtz’iib’ankil li nakak’oxla

Xkanab’ankileb’ chi wotzok

Sa’ 3 Nefi 17:1–3, li Kolonel kixb’oqeb’ li tenamit chi sutq’iik sa’ rochocheb’ ut “chixkawresinkil xk’a’uxleb’ ” rub’elaj naq te’sutq’iiq re te’tzole’q wi’chik. Taaruuq taapatz’ reheb’ li tzolb’ileb’ aab’aan chan ru xe’xkawresi rib’ choq’ re li aatinak anajwan ut k’a’ru li xe’xk’oxla.

Xkʼutbʼal li tzolʼlebʼ

3 Nefi 17; 18:24–25, 28–32

Li Kolonel a’an tz’aqal kixk’ut chiqu chan ru rilb’aleb’ li komon.

• Chiqajunilo nokoru chirilb’aleb’ li qakomon, ut chiqajunilo naru taqab’aanu chi chaab’il a’an. Re tzolok rik’in chan ru naq li Kolonel kirileb’ li komon, naru rilb’al ru 3 Nefi 17 jo’ tzoleb’aal ut naru taakanab’eb’ li komon chixyeeb’al resil naq neke’xtaw k’a’ruhaq li naxk’e xna’leb’eb’ chirix rilb’aleb’ li komon. K’a’ru naqatzol chirix li Kolonel li naxk’ut naq a’an kixk’ut chi chaab’il chan ru tento taa’uxq rilb’aleb’ li komon? K’a’ruheb’ li yaalil na’leb’ naqatzol chirix rilb’aleb’ li komon rik’in li kixb’aanu li Kolonel? Taaruuq taasik’ xkomon chik aana’leb’ sa’ 3 Nefi 18:24–25 ut 28–32. Chirix a’an, eb’ li komon sa’ li tzoleb’aal te’ruuq chi aatinak chirix li k’a’ru eek’asinb’ileb’ chixb’aanunkil re xtaaqenkil li Kolonel ut rilb’aleb’ li komon jo’ kixb’aanu a’an.

  

  K’ehomaq reetal lee kok’al, xb’aan laj Gary L. Kapp

3 Nefi 17:13–22; 18:15–25; 19:6–9, 15–36

Li Kolonel kixk’ut chiqu chan ru tijok.

• Re xtenq’ankileb’ li tzolb’ileb’ aab’aan chi tzolok rik’ineb’ li k’iila na’leb’ ut k’utum chirix li tijok sa’3 Nefi 17–19, taaruuq taatz’iib’a chiru li pizarron Ani? Chan ru? Jo’q’e? ut K’a’ut? ut taakanab’eb’ li komon chixsik’b’al xsumenkileb’ li patz’om a’in chirix li tijok sa’eb’ li raqal a’in: 3 Nefi 17:13–22; 18:15–25; ut 19:6–9, 15–36. K’a’ chik ru li na’leb’ neke’xk’uleb’ li komon naq neke’rileb’ ru li raqal a’in? Li raatin li Elder Richard G. Scott sa’ “Xkomon chik li k’anjeleb’aal” naru nekexxtenq’a sa’ li aatinak a’in. Taaruuq ajwi’ taakanab’eb’ li komon sa’ li tzoleb’aal chixwotzb’al li neke’xb’aanu re xchaab’ilob’resinkil li tijok neke’xb’aanu sa’ junesal ut jo’ junkab’al (chi’ilmanq 3 Nefi 18:18–21).

• Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naxk’e junjunq patz’om re xk’oxlankil chirix li tijok naq yooqat chirilb’aleb’ ru li raqal a’in. Taaruuq taakanab’eb’ li komon chixwotzb’al yalaq na’leb’ xe’xk’ul chirixeb’ li patz’om a’in. Malaj taaruuq taab’oq junjunqeb’ li komon sa’ li tzoleb’aal chi chalk chi kawresinb’ileb’ re aatinak chirix li xe’xtzol chirix li tiojk sa’ 3 Nefi 17–19. K’a’ru xe’musiq’aak chixb’aanunkil re xchaab’ilob’resinkil li tijok sa’ xyu’ameb’?

• Li Jesus kixk’ut naq junelik tento tootijoq (chi’ilmanq 3 Nefi 18:15–18). Jun ch’ina k’anjeleb’aal maare tixtenq’aheb’ li wankeb’ sa’ laa tzoleb’aal chixtawb’al ru li k’a’ru kixk’ut a’an. Qayehaq, taaruuq taanujob’resi jun nimla sek’ rik’in ha’ re reetalinkil lix wankil laj Satanas. Ch’ik jun li hu malaj t’ikr (li nokoreetali laa’o) sa’ jun uk’leb’ sek’ (li nareetali naq junelik nokotijok). B’alqusi’ li uk’leb’ sek’, ut ch’ik chi xulxu sa’ li ha’ wan sa’ li nimla sek’. Ink’a’ nat’aqresiik li hu malaj t’ikr sa’ li uk’leb’ sek’, us ta sutinb’il xb’aan li ha’. K’a’ru naxk’ut li ch’ina k’anjel a’in ut 3 Nefi 18:15–18 chirix li tijok? (chi’ilmanq ajwi’ Tzol’leb’ ut Sumwank 10:5). K’a’ru naraj naxye “junelik tento textijoq”? Chan ru naq li tijok naru tooxtenq’a chixtz’eqtaanankil lix wankil laj Satanas? K’oxla xk’eeb’al hoonal reheb’ li komon re te’xtz’iib’a li eek’asinb’ileb’ chixb’aanunkil re xchaab’ilob’resinkil li tijok sa’ xyu’ameb’.

3 Nefi 18:1–12

Naru toonujaq sa’ musiq’ej naq naqak’ul li loq’laj wa’ak.

• Re xtikib’ankil li aatinak chirixeb’ lix k’utum li Kolonel chirix li loq’laj wa’ak sa’ 3 Nefi 18, taaruuq taak’uub’ laa tzoleb’aal sa’ kok’ ch’uut ut taak’e re li junjunq jun reheb’ li raqal a’in re rilb’al ru ut aatinak chirix: Mateo 26:26–28; 3 Nefi 18:1–12; ut Tzol’leb’ ut Sumwank 20:75–79; 27:1–4. Chirix rilb’al ru li raqal k’eeb’il reheb’, li junjunq ch’uut te’ruuq chixk’oxlankil jun malaj wiib’ li patz’om chirix li loq’laj wa’ak li sumenb’il sa’eb’ li raqal xe’ril ru, ut te’xtz’iib’aheb’ lix patz’om chiru li pizarron. Li jun siir chik sa’ li tzoleb’aal te’ruuq chi sik’ok sa’eb’ li loq’laj hu re xtawb’al xsumenkileb’ li patz’om. Eb’ li komon sa’ li tzoleb’aal te’ruuq ajwi’ chi aatinak chirix chan ru naq te’ruuq chireek’ankil li Musiq’ej sa’ xk’ulb’al sa’ li loq’laj wa’ak.

• K’a’ru naraj naxye naq “toonujaq” naq naqak’ul li loq’laj wa’ak? (chi’ilmanq 3 Nefi 18:4–5, 9; 20:9). K’oxla xkanab’ankileb’ li komon chi aatinak chirix li patz’om a’in chi ka’kab’il naq neke’ril ru 3 Nefi 18:1–12 sa’ komonil. Taaruuq ajwi’ taakanab’eb’ li komon chi k’oxlak chirix jo’q’e xe’reek’a naq “xe’nujak” sa’ musiq’ej naq xe’xk’ul li loq’laj wa’ak. Maare te’ruuq chi aatinak chirix li k’a’ru naramok qe chi “nujob’resiik” xb’aan li loq’laj wa’ak, ut chixwotzb’al xna’leb’eb’ chirix chan ru numtaak sa’ xb’een li ramleb’ a’an.

3 Nefi 19:9–15, 20–22

Eb’ lix tzolom li Jesukristo neke’xsik’ li maatan re li Santil Musiq’ej.

• Naru taapatz’ reheb’ li komon sa’ li tzoleb’aal naq te’xk’oxla k’a’ruhaq li neke’raj chi anchaleb’ xch’ool. K’a’ raj ru te’xb’aanu re xk’ulb’al? A’in taaruuq taak’amoq sa’ li aatinak chirix “li k’a’ru k’a’jo’ ajb’il xb’aaneb’ ” li kab’laju tzolom, jo’ ch’olob’anb’il sa’ 3 Nefi 19:9–15 ut 20–22. K’a’ut naq jwal aajel ru a’in choq’ reheb’? Kʼaʼut naq aajel ru choqʼ qe? Jo’ chanru li naxye sa’eb’ li raqal a’in, chan ru naru taqasik’ chi anchal qach’ool naq toorochb’eeni li Santil Musiq’ej?

Xb’oqb’aleb’ chi tzolok sa’ kab’l

Li Qaawa’ kixye, “nim ru li raatin laj Isaias” (3 Nefi 23:1). Re xwaklesinkil xch’ooleb’ li komon sa’ li tzoleb’aal chirilb’al ru 3 Nefi 20–26, taaruuq taaye reheb’ naq sa’eb’ li ch’ol a’in, li Jesus kixch’olob’ xyaalal junjunq li “xninqal ru raatin” laj Isaias. K’e xb’oqb’aleb’ li komon sa’ li tzoleb’aal chi k’oxlak chirix k’a’ut naq nim ru li raatin laj Isaias. Waklesi xch’ooleb’ chi chalk chi xkawresinb’ilaqeb’ re te’xwotz li xe’xtzol sa’ li domingo chal re.

Xkomon chik li kʼanjelebʼaal

Lix loq’al li tijok.

Li Elder Richard G. Scott kixch’olob’ xyaalal lix loq’al li tijok:

“Nokotijok chiru li qaChoxahil Yuwa’ sa’ lix santil k’ab’a’ li Jesukristo, lix Raarookil Alal. Li tijok q’axal wi’chik nak’anjelak naq yooko chixyalb’al qaq’e chi wank chi santob’resinb’il ut chi tiik chi paab’ank, chi maak’a’ li qab’alaq’, ut naq wan qach’ool chixb’aanunkil li naxpatz’ a’an. Li tijok rik’in tuulanil ut rik’in xkanab’ankil qib’ chiru naxk’am chaq li b’eresihom ut li tuqtuukilal.

“Matk’oxlak chirix chan ru nakaye li reek’ahom aach’ool. Aatinan b’i’ rik’in laa Yuwa’ aj uxtaan li naxtaw ru chixjunil. Laa’at lix raarookil alal malaj rab’in, ut a’an naraj aatenq’ankil. Naq nakattijok, k’e reetal naq nach’ wan laa Yuwa’ sa’ Choxa, ut yoo chawab’inkil.

“Jun aajel ruhil na’leb’ re xchaab’ilob’resinkil li tijok, a’an xpatz’b’al li chaab’il patz’om. K’oxla xkanab’ankil xtz’aamankil li k’a’ru nakawaj laa’at, ut ruuchil a’an, xsik’b’al chi anchal aach’ool li naraj a’an choq’ aawe. Ut naq nakatzol li rajom xch’ool a’an, tijon re taak’ame’q aab’e chixtawb’al aametz’ew re xb’aanunkil.

“Wi wan hoonal nakaweek’a naq najt wankat rik’in li qaYuwa’, k’iila paay k’a’ut naq naru nak’ulman a’an. Maak’a’ naxye k’a’ aj-e a’in, wi ink’a’ nakakanab’ xtz’aamankil lix tenq’, a’an tixk’am aab’e chixb’aanunkil li k’a’ru na’ajman re naq taaweek’a wi’chik naq nach’ wan a’an. Tijon us ta ink’a’ nakawaj tijok. Wan naq, jo’ jun ch’ina al, maare xab’aanu li ink’a’ us ut nakaweek’a naq ink’a’ naru tat-aatinaq rik’in laa Yuwa’ chirix jun li ch’a’ajkilal. Jwal aajel ru naq tattijoq sa’ li hoonal a’an. Maak’oxla naq maak’a’ aak’ulub’ejil re tijok.

“Ink’a’ ninnaw ma naru taqataw ru lix nimal xwankil li tijok toj reetal naq naqataw jun ch’a’ajkilal q’axal nim ut naqak’e reetal naq maak’a’ li qawankil re xtuqub’ankil ru. Sa’ li hoonal a’an too’ok chiru li qaYuwa’ rik’in xtuulanil qach’ool chixnawb’al naq ka’ajwi’ a’an naru chi tenq’ank qe. Usaq raj xtawb’al jun ch’anch’ookil na’ajej b’ar wi’ naru taqayaab’asi li reek’ahom qach’ool jo’ najtil ut jo’ kawil na’ajman ru” (“Utilizar el don supremo de la oración,” Liahona, mayo 2007, 8).

Xchaab’ilob’resinkil li qak’utum

Yal aaq’e chi rahok jo’ kirahok li Kristo. Wi wan junaq komon sa’ laa tzoleb’aal li naraj ru k’ulub’aak xb’aaneb’ li komon, k’oxla chan ru naru taatenq’a chireek’ankil naq ajb’il ru sa’ li tzoleb’aal. Qayehaq, taaruuq taab’oq junaq chik sa’ li tzoleb’aal chi chunlaak chixk’atq li kristiaan a’an re te’ok jo’ ramiiweb’ rib’.