li Jesus naxk’uteb’ chi ruq’ li Kab’laju chi Apostol

Rox Nefi: Li kab’laju a’in li keb’insik’ chaq ru, xb’aan laj Gary L. Kapp

21–27 septiembre

3 Nefi 12–16

“Laa’in li chaq’rab’, ut li saqen”

Li junjunq komon sa’ li tzoleb’aal naru tixtaw k’a’ruhaq nim xwankil choq’ re sa’eb’ li k’iila xninqal ru k’utum kixk’ut li Kolonel sa’ 3 Nefi 12–16. Kanab’eb’ li komon sa’ li tzoleb’aal chixwotzb’al li na’leb’ nawulak chiruheb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Re xk’eeb’al xhoonal chixjunileb’ re te’xwotz li xe’xtzol sa’ 3 Nefi 12–16, taaruuq taatz’iib’aheb’ li ajl 12 toj 16 chiru li pizarron. Chirix a’an, eb’ li komon te’ruuq chixsik’b’al jun raqal sa’eb’ li ch’ol a’in li xtoch’ xch’ooleb’ ut te’xtz’iib’a li rajlil li raqal a’an chirub’el li rajlil li ch’ol wan wi’ li raqal chiru li pizarron. Sik’eb’ ru junjunq raqal re rilb’al ru sa’ komonil, ut aatinanqex chirix k’a’ut naq ninqeb’ xwankil.

reetalil li k’utuk

Xkʼutbʼal li tzolʼlebʼ

3 Nefi 12–14

Eb’ lix k’utum li Kolonel neke’xk’ut chiqu chan ru toowanq jo’ tz’aqal tzolom.

• Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naxk’e junjunq li raqal sa’ 3 Nefi 12–14 li neke’tenq’an chixtz’aqob’resinkil ru li ch’ol aatin “Eb’ lix tz’aqal tzolom li Jesukristo …” Taaruuq taapatz’ reheb’ li komon ma wankeb’ junjunq li xe’xb’aanu li ch’ina k’anjel a’in ut ma te’wanq xch’ool chixwotzb’al li xe’xtzol. Malaj taaruuq taatz’iib’a li ch’ol aatin a’an chiru li pizarron, rochb’eeneb’ li raqal jo’eb’ a’in: 3 Nefi 12:3–16, 38–44; 13:1–8, 19–24; ut 14:21–27 (malaj jalaneb’ chik li raqal xataw naq xattzolok aajunes). Eb’ li komon sa’ li tzoleb’aal te’ruuq chixsik’b’al ru jun reheb’ li raqal re rilb’al ru, sa’ junesal malaj sa’ kok’ ch’uut, ut te’xye chan ru xtz’aqob’resinkil ru li ch’ol aatin tz’iib’anb’il chiru li pizarron jo’ chanru k’utb’il sa’ li raqal. Waklesi xch’ooleb’ li komon chixk’oxlankil ut maare chixtz’iib’ankil li te’xb’aanu re xtaaqenkil li Jesukristo chi tiikaq chi us xch’ooleb’ xb’aan li xe’xtzol sa’eb’ li raqal a’in.

• Re xtenq’ankileb’ li tzolb’ileb’ aab’aan chixtawb’al ru li raatin li Kolonel sa’ 3 Nefi 12:48, taaruuq taakanab’eb’ chixtzolb’al li raatin li Elder Jeffrey R. Holland “Tz’aqalaq eere eeru—junaq kutan” (Jolomil ch’utub’aj-ib’ re octubre 2017) rub’elaj li tzolok, ut chixwotzb’al li na’leb’ xe’xk’ul li naxtenq’aheb’ chixtawb’al ru li raqal a’in.

3 Nefi 12:21–30

Li naqak’oxla nak’amok sa’ li naqab’aanu.

• Jun aatinak chirix 3 Nefi 12:21–30 taaruuq tixtenq’aheb’ li komon sa’ li tzoleb’aal chixk’eeb’al reetal chan ru naq xb’eresinkil li qak’oxlahom naru tooxtenq’a chixb’eresinkil li qab’aanuhom. Re xtikib’ankil li aatinak, taaruuq taayiib’ jun kaaxukuut chiru li pizarron rik’ineb’ li jolomil aatin jo’ Eb’ li b’aanuhom naqaj xtz’eqtaanankil ut Eb’ li k’oxlahom malaj eek’ahom li neke’k’amok sa’eb’ li b’aanuhom a’an. Chirix a’an, taaruuq taakanab’eb’ li komon sa’ li tzoleb’aal chi sik’ok sa’ 3 Nefi 12:21–22 ut 27–30 re te’xtikib’ xnujob’resinkil li kaaxukuut. K’a’ chik li b’aanuhom ut k’oxlahom te’ruuq li komon chixtiqb’al rik’ineb’ li ak tz’iib’anb’ileb’ sa’ li kaaxukuut? Chan ru naq “maajun reheb’ li k’a’aq re ru a’in taqakanab’ chi ok” sa’ li qach’ool? (3 Nefi 12:29). Chan ru naru taqisiheb’ naq neke’ok? Chirix rilb’al ru li raatin li Awa’b’ej Ezra Taft Benson sa’ “Xkomon chik li k’anjeleb’aal,” taaruuq taayiib’ jun ak’ kaaxukuut rik’ineb’ li jolomil aatin Eb’ lix na’leb’ li Kristo naqaj xyu’aminkil ut Eb’ li k’oxlahom malaj eek’ahom li neke’k’amok sa’eb’ li na’leb’ a’an ut texnujob’resi jo’ tzoleb’aal.

3 Nefi 13:1–8, 16–18

Tento naq li k’anjelak chiruheb’ li qas qiitz’in ut li loq’onink taab’aanumanq chi tiik li qajom.

• Rik’in tzolok sa’ 3 Nefi 13 eb’ li komon te’ruuq chixtz’ilb’al rix k’a’ut naq neke’xb’aanu li us. Re xtikib’ankil li aatinak, taaruuq teeril ru sa’ komonil eb’ li raqal 1–2 ut 16 ut taawotz li na’leb’ a’in chirix li aatin aj ka’pak’al-u: “Junaq li napak’ok; li aatin sa’ Griego [li oksinb’il sa’ li Ak’ Chaq’rab’] naraj naxye “jun actor,” malaj “junaq li … naxpak’ lix nimal ru k’a’ruhaq” ” (Mateo 6:2). Maare jun malaj wiib’ reheb’ li komon sa’ li tzoleb’aal taawulaq raj chiruheb’ xb’aanunkil jun li k’utb’esink, sa’ li neke’xpak’ wi’ naq yookeb’ chi k’ehok tumin reheb’ li neb’a’ malaj chi kuyuk sa’. K’a’ut naq li pak’ok malaj li k’anjel re k’utb’esink nak’anjelak jo’ jalajookil ru aatin choq’ re li ka’pak’alil? K’a’ru naru taqab’aanu re naq li k’anjelak chiru qas qiitz’in, li tijok, ut li kuyuk sa’ taab’aanumanq chi anchal qach’ool ut chi maak’a’ li ka’pak’alil?

• Chirix xtawb’aleb’ li chaab’il k’anjel yeeb’ileb’ resil sa’ 3 Nefi 13:1–8 ut 16–18, eb’ li komon sa’ li tzoleb’aal te’ruuq chi aatinak chirix k’a’ru naru nak’amok re jun kristiaan chixb’aanunkileb’ li k’a’aq re ru a’in malaj xkomon chik k’a’ru naxpatz’ qe li Dios naq taqab’aanu. K’a’ raj ru taqaye re anihaq li xpatz’ qe k’a’ut naq naqab’aanu li k’a’ru chaab’il? Waklesi xch’ooleb’ li komon chi k’oxlak chirix li rajomeb’ xch’ool sa’ xb’aanunkil xkomoneb’ li chaab’il k’anjel a’in. Chan ru naru taqasaqob’resi ru li rajom qach’ool?

3 Nefi 14:7–11

Wi naqasik’ li “k’a’aq re ru chaab’il” rik’in li qaChoxahil Yuwa’, taqak’ul.

• Re xtawb’al ru lix b’oqom li Qaawa’ re tz’aamank, sik’ok, ut toch’ok, maare usaq raj xtz’ilb’al rix li k’a’ru naraj naxye li junjunq aatin a’in. K’a’ru naxk’ut li junjunq aatin chirix li nokoxb’oq li Qaawa’ chixb’aanunkil? Chan ru nokotz’aaman, nokotijok, ut nokotoch’ok? Chan ru naq ak xtz’aqob’resiik ru sa’ li qayu’am li yeechi’inb’il sa’ 3 Nefi 14:7–8? Eb’ li komon sa’ li tzoleb’aal te’ruuq ajwi’ chirilb’al ru li raatin li Awa’b’ej Russell M. Nelson sa’ “Xkomon chik li k’anjeleb’aal” re xsik’b’aleb’ li patz’om naroksi ut li b’oqom naxk’e. K’e xhoonaleb’ li komon re te’k’oxlaq chirix ut te’xtz’iib’a chan ru te’xsumeheb’ lix patz’om ut chan ru te’xk’anjelaheb’ lix b’oqom.

• Naru naq junjunq reheb’ li komon sa’ li tzoleb’aal ink’a’ neke’xnaw chi tz’aqal li kiraj xyeeb’al li Kolonel naq kixye, “Yalaq ani natz’aaman, nak’uluk” (3 Nefi 14:8). K’a’ut naq junjunqeb’ li qatij chanchan naq ink’a’ neke’sumeek, ut k’a’ut naq wan naq naqak’ul junaq sumehom ink’a’ naqaj? Naru teetz’il rix junjunq reheb’ li raqal a’in sa’ li tzoleb’aal re xsumenkileb’ li patz’om a’in: Isaias 55:8–9; Helaman 10:4–5; 3 Nefi 18:20; ut Tzol’leb’ ut Sumwank 9:7–9; 88:64. Waklesi xch’ooleb’ li komon sa’ li tzoleb’aal chixwotzb’al li k’a’ru neke’xtaw. Chan raj ru naq eb’ li na’leb’ a’in te’xjal chan ru nokotijok?

reetalil li tzolok

Xb’oqb’aleb’ chi tzolok sa’ kab’l

Re xwaklesinkil xch’ooleb’ li komon chirilb’al ru 3 Nefi 17–19 sa’ rochocheb’, taaruuq taak’e xb’oqb’aleb’ chixk’oxlankil k’a’ raj ru te’reek’a wi ta te’rab’i li Kolonel chi tijok chirixeb’ a’an ut chirix lix junkab’aleb’. Sa’eb’ li ch’ol a’in te’ril ru resileb’ li tenamit li ke’xk’ul li santil osob’tesink a’an.

reetalil li kʼanjelebʼaal

Xkomon chik li kʼanjelebʼaal

Naru taqab’eresi li naqak’oxla.

Li Awa’b’ej Ezra Taft Benson kixk’ut:

“Li k’a’uxleb’aal chanchan jun li escenario, b’ar wi’ ka’ajwi’ chi junjunqil naru neke’k’utb’esiman li escena. Sa’ jun pak’al wan li Qaawa’, li nakatxra, li yoo chixyalb’al xk’eeb’al li k’a’ru taa’osob’tesinq aawe sa’ li escenario re laa k’a’uxleb’aal. Sa’ li jun pak’al chik wan laj tza, li xik’ nakatril, li yoo chixyalb’al xk’eeb’al li k’a’ru taamajewanq aawe sa’ li escenario re laa k’a’uxleb’aal.

“Laa’at aj jolominel re li escenario—laa’at nakasik’eb’ ru li k’oxlahom li te’wanq sa’ li escenario. … Li nakak’oxla, a’an ajwi’ li nakat-ok wi’—li k’a’ru rajlal kanab’anb’il aab’aan chi wank sa’ li escenario re laa k’a’uxleb’aal. …

“Wi noko’ok chi wank jo’ li naqak’oxla, ut tento toowanq jo’ li Kristo, aajel ru naq took’oxlaq jo’ taak’oxlaq raj li Kristo” (“Pensad en Cristo,” Liahona, junio 1989, 3).

Li Dios naraj aatinak aawik’in.

Li Awa’b’ej Russell M. Nelson kixye:

“K’a’ru taateemanq chawu xb’aan li sik’ok nakab’aanu? B’ar wan li na’leb’ li toj maak’a’ aawe? K’a’ru li taawaj chi anchal aach’ool xtawb’al ru? B’aanu li kixb’aanu li Profeet aj Jose. Taw jun li na’ajej b’ar wi’ naru tatxik chi kok’ aj xsa’. Tuulanob’resi aawib’ chiru li Dios. Hoy chixjunil laa week’ahom chiru li Dios. Sik’ ru a’an re aasumenkil ut re xk’ojob’ankil aach’ool.

“Tijon sa’ xk’ab’a’ li Jesukristo chirix laa k’a’uxl, laa xiw, laa majelal—yaal, tz’aqaleb’ li ratawom laa ch’ool. Chirix a’an, tat-ab’inq! Tz’iib’a li na’leb’ li na’ok sa’ laa k’a’uxl. Tz’iib’a li nakaweek’a ut b’aanu li k’a’ru eetalinb’il naq tento taab’aanu. …

“Ma yaal naq li Dios naraj aawaatinankil? Yaal! … Nin’elajink chawu naq taayal aaq’e chixk’ulb’al xkomon chik li k’utb’esinb’il na’leb’. …

“Ay, toj wan chik naab’al li naraj laa Choxahil Yuwa’ naq taanaw” (“Li k’utb’esinb’il na’leb’ choq’ re li Iglees ut choq’ re qayu’am,” Jolomil ch’utub’aj-ib’ re abril 2018).

Xchaab’ilob’resinkil li qak’utum

Xtenq’ankileb’ li komon sa’ li tzoleb’aal chixwaklesinkil rib’ chirib’ileb’ rib’. “Rik’in li junjunq li wan sa’ laa tzoleb’aal naru natawman li xnawom ch’oolej, li chaab’il na’leb’, ut li k’a’ru nak’ulman rik’in xyu’aminkil li evangelio. B’oqeb’ chi wotzok ut chixwaklesinkil rib’ chirib’ileb’ rib’ ” (Li k’utuk jo’ li Kolonel, 5).