li Jesus naxk’ut rib’ chiruheb’ laj Nefita

Laa’in lix saqen li ruchich’och’, xb’aan laj James Fullmer

14–20 septiembre

3 Nefi 8–11

“Waklinqex ut chalqex wik’in”

Wi taanumsi li na’leb’ ak aatz’iib’ahom naq xatzol 3 Nefi 8–11 naru tatmusiq’aaq rik’in na’leb’ naru taak’ut. Li k’a’ru tz’iib’anb’il arin naru tixk’e xkomon chik aana’leb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Wan naq te’wanq wi’chik xch’ool li kristiaan chi wotzok wi taaye k’a’ru tz’aqal taawaj naq te’xwotz. Qayehaq, taaruuq taakanab’eb’ li komon sa’ li tzoleb’aal chixwotzb’al jun na’leb’ sa’ 3 Nefi 8–11 li xk’ut chiruheb’ chan ru naq wan li Jesukristo. Taaruuq taak’e xb’oqb’aleb’ junjunq kutan rub’elaj li tzolok re naq te’ruuq chi chalk chi kawresinb’ileb’ re wotzok.

reetalil li k’utuk

Xkʼutbʼal li tzolʼlebʼ

3 Nefi 8–10

Wi naqajal qak’a’uxl, li Kolonel tooxch’utub’, tooxkol, ut tooxk’irtesi.

• Wan sa’eb’ li ch’ol a’in resil li sache’k ut li juk’e’k, a’b’an k’utb’ileb’ ajwi’ musiq’ejil tzol’leb’ li naru toohe’xtenq’a chi nach’ok rik’in li Jesukristo. Maare tatruuq chixk’uub’ankil li tzoleb’aal sa’ oxib’ ch’uut ut taak’e re li junjunq jun reheb’ li ch’ol sa’ 3 Nefi 8–10 re te’xsik’eb’ li aatin malaj ch’ol aatin li neke’xk’ut li k’a’ru ke’xtzol malaj ke’xk’ul li tenamit. Chirix a’an, jun kristiaan re li junjunq ch’uut taaruuq tixwotz rik’in chixjunil li tzoleb’aal li xe’xtaw sa’ xch’uuteb’. Waklesi xch’ooleb’ li komon sa’ li tzoleb’aal chi aatinak chirix chan ru naq eb’ li na’leb’ a’in te’ruuq chiqatenq’ankil chi nach’ok rik’in li Jesukristo.

• Jun xnimal ru na’leb’ sa’eb’ li ch’ol a’in, a’an naq li Kolonel naxye’ li ruq’ qe rik’in rahom ut uxtaan sa’ xq’ehil ajwi’ lix yalb’al qix q’axal ch’a’aj. Taaruuq taakanab’eb’ li komon chi k’oxlak chirix anihaq neke’xnaw ru li wan xch’a’ajkilal ut chixtz’ilb’al rix li raatin li Kolonel sa’ 3 Nefi 9:13–22 ut 10:1–10 re xtawb’aleb’ li ch’ol aatin li te’ruuq chixtenq’ankil li kristiaan a’an. Maare eb’ li komon sa’ li tzoleb’aal te’ruuq ajwi’ chixwotzb’al lix numsihomeb’ naq xe’reek’a naq li Kolonel yoo chixye’b’al li ruq’ reheb’.

3 Nefi 9:19–22

Li Qaawa’ naxpatz’ “jun yotʼbʼil chʼoolej ut jun tuulanil musiqʼej.”

• Rub’elaj xk’ulunik li Kolonel, eb’ li tiikeb’ xch’ool sa’ li yeechi’inb’il ch’och’ ke’xpaab’ lix chaq’rab’ laj Moises, sa’ li wan wi’ xmayejankileb’ li xul. Re xtenq’ankileb’ li komon sa’ li tzoleb’aal chixnimob’resinkil xnawomeb’ chirix li chaq’rab’ a’in, texruuq chixnumsinkil Moises 5:5–8 sa’ junpaat. K’a’ut naq taqlanb’ileb’ lix tenamit li Dios chixmayejankileb’ li xul sa’ najter q’e kutan? K’a’ru li ak’ taqlahom kixk’e li Kolonel sa’ 3 Nefi 9:20, ut chan ru nokoxjayali rik’in a’an ut lix mayej? Naru te’k’anjelaq li aatin chirix li chaq’rab’ re li mayejak sa’ “Xkomon chik li k’anjeleb’aal.”

• Chan ru naru taatenq’aheb’ li komon sa’ li tzoleb’aal chixtawb’al ru k’a’ru naraj naxye naq yot’b’il qach’ool ut tuulan qamusiq’? Maare tatruuq chixtz’iib’ankil chiru li pizarron eb’ li aatin yot’b’il, tuulan, ut mayej. Chirix a’an, taaruuq taakanab’eb’ li komon chixyiib’ankileb’ jalam-uuch li neke’reetali li k’a’ru naraj naxye li junjunq aatin jo’ neke’xk’oxla, malaj te’xtz’iib’aheb’ li aatin malaj ch’ol aatin li wankeb’ rilom rik’ineb’ li aatin a’an. Naq eb’ li komon neke’xwotz xjalam-uucheb’, raatineb’, malaj li ch’ol aatin, te’ruuq chi aatinak chirix chan ru neke’xk’am rib’ rik’in li naxpatz’ li Kolonel naq taqab’aanu sa’ 3 Nefi 9:19–22. Naru ajwi’ taak’anjelaq li raatin li Elder D. Todd Christofferson sa’ “Xkomon chik li k’anjeleb’aal.”

3 Nefi 11:1–17

li Jesukristo a’an lix saqen li ruchich’och’

• Eb’ li hoonal yeeb’il resil sa’ 3 Nefi 11:1–17, a’an junjunq reheb’ li hoonal q’axal loq’eb’ sa’ lix Hu laj Mormon. K’oxla xk’eeb’al junjunq k’asal reheb’ li komon re te’rileb’ ru li raqal a’in sa’ xk’a’uxleb’. Maare taaruuq taatz’iib’a junjunq li patz’om chiru li pizarron re te’xk’oxlaheb’ naq yookeb’ chi ilok ru hu, jo’eb’ a’in: K’a’ raj ru kaweek’a wi ta katwan sa’ xyanqeb’ li tenamit a’an? K’a’ru naxtoch’ aach’ool chirix li Kolonel sa’eb’ li raqal a’in? K’a’ru nakatzol rik’in li kixb’aanu li Jesukristo? malaj K’a’ru aak’ulum laa’at li xch’olob’ xyaalalil chawu naq li Jesukristo a’an aj Kolol aawe? Taaruuq taakanab’eb’ li komon chixwotzb’al junjunq reheb’ lix k’oxlahom malaj li reek’ahom.

  li Jesus naxk’ut li k’ob’olal sa’ ruq’ chiruheb’ laj Nefita

  Chi junjunqil, xb’aan laj Walter Rane

3 Nefi 11:10–41

Li Jesukristo kixxaqab’ lix tzol’leb’ ut lix Iglees.

• Maare us raj xk’eeb’al reetal k’a’ru li kixsik’ ru li Kolonel xyeeb’al ut xb’aanunkil xb’een wa naq kixk’ut rib’ sa’ li ch’och’ Naab’alil. Maare eb’ li komon sa’ li tzoleb’aal te’ruuq chixjuch’b’aleb’ malaj chixtz’iib’ankileb’ li yaalil na’leb’ neke’xtaw sa’ li raatin ut lix b’aanuhom li Kolonel sa’ 3 Nefi 11:10–41. Kanab’eb’ chixwotzb’al li k’a’ru xe’xtaw. K’a’ru naqatzol chirix li Kolonel sa’eb’ li raqal a’an? K’a’ru naqatzol chirix lix Iglees?

• Re xk’eeb’al xraqik li wech’ok-ib’ sa’ xyanqeb’ li tenamit chirix li kub’iha’, li Kolonel kixk’utb’esi aajel ruhil na’leb’ chirix li k’ojob’anb’il k’anjel a’in sa’ 3 Nefi 11. Re xtenq’ankileb’ li komon sa’ li tzoleb’aal chixtawb’aleb’ li na’leb’ a’in, taaruuq taatz’iib’a li rajlileb’ li raqal a’in chiru li pizarron: 21–25, 26–27, 33–34. K’e xb’oqb’aleb’ li junjunq komon sa’ li tzoleb’aal chixsik’b’al ru jun malaj wiib’ raqal ut chixwotzb’al jun yaalil na’leb’ naxk’ut chirix li kub’iha’.

reetalil li tzolok

Xb’oqb’aleb’ chi tzolok sa’ kab’l

Maare us raj choq’ re laa tzoleb’aal xnawb’al naq li rula’anihom li Kolonel sa’ xyanqeb’ laj Nefita ut laj Lamanita q’axal kixtoch’eb’ xch’ool, jo’kan naq eb’ li tenamit a’in, li junxil q’axal aj wech’oneleb’, ke’wan sa’ tuqtuukilal chiru xnumik 200 chihab’ chirix a’in (chi’ilmanq 4 Nefi 1). A’in taaruuq chixmusiq’ankileb’ li komon sa’ li tzoleb’aal chixtz’ilb’al rix 3 Nefi 12–16 re xtzolb’al k’a’ru kixk’ut li Kolonel chiruheb’ li tenamit li kixk’e chi uxmank li nimla jalaak a’in sa’ xyanqeb’.

reetalil li kʼanjelebʼaal

Xkomon chik li kʼanjelebʼaal

Li chaq’rab’ re li mayejak.

Li Awa’b’ej M. Russell Ballard kixch’olob’ chan ru naqayu’ami li chaq’rab’ re li mayejak sa’ li kutan a’in:

“Chirix li xnimal ru mayej kixb’aanu li Kolonel, ke’uxman wiib’ li jalok chirix chan ru xpaab’ankil li chaq’rab’ re li mayejak. Xb’een, li k’ojob’anb’il k’anjel re li loq’laj wa’ak kixk’ul xna’aj li k’ojob’anb’il k’anjel re li mayejak; ut xkab’, rik’in li jalok a’in, li mayej moko jayalinb’il ta chik rik’in li xul, rik’in b’an li kristiaan. Chanchan naq li mayej ink’a’ chik jayalinb’il rik’in li k’a’ru q’axtesinb’il, kijale’ b’an re naq jayalinb’ilaq chik rik’in li naq’axtesink re li mayej. …

“… Li Qaawa’ ink’a’ chik naxpatz’ li qaxul ut li qa’iyaj, anajwan chik naraj naq taqakanab’ chixjunil li moko us ta. …

“… Naq nokonumta sa’ xb’een li qaq’etq’etil ajom ut naqak’e li Dios xb’een wa sa’ li qayu’am ut noko’ok sa’ sumwank naq took’anjelaq chiru, maak’a’ naxye jo’nimal xtz’aq, chi jo’kan yooqo chixyu’aminkil li chaq’rab’ re li mayejak” (“La ley de sacrificio,” Liahona, marzo 2002, 17).

Li Elder Neal A. Maxwell re lix Molameb’ li Kab’laju chi Apostol kixye: “Li tz’aqal mayejak maawa’ xk’eeb’al jun xul sa’ xb’een li artal. A’an b’an naq wan qach’ool chixk’eeb’al li qaxulil laa’o sa’ xb’een li artal ut chixkanab’ankil naq taak’atmanq!” (“Absteneos De Toda Impiedad,” Liahona, julio 1995, 78).

Jun yotʼbʼil chʼoolej ut jun tuulanil musiqʼej.

Li Elder D. Todd Christofferson kixch’olob’ k’a’ru naraj naxye naq yot’b’il qach’ool ut tuulan qamusiq’:

“Naru taaq’axtesi re li Qaawa’ li maatan re jun ch’oolej li yot’b’il, malaj jalb’il, ut jun musiq’ej tuulan, malaj li na’ab’in chiru. Relik chi yaal, laa’at li maatan—chan ru wankat ut li k’a’ru tatwulaq wi’.

“Ma wan k’a’ruhaq sa’ aawaam malaj sa’ aayu’am li wan xtz’ajnil malaj li moko k’ulub’ej ta? Naq nakawisi a’an, a’an jun maatan choq’ re li Kolonel. Ma wan junaq chaab’ilal malaj usil na’leb’ li toj maji’ wan sa’ aayu’am? Naq nakasik’ xk’ulb’al ut roksinkil a’an sa’ laa yu’am, yookat chixk’eeb’al jun maatan re li Qaawa’ ” (“Cuando te hayas convertido,” Liahona, mayo 2004, 12).

Xchaab’ilob’resinkil li qak’utum

K’anjelan sa’ komonil rik’ineb’ li komon sa’ li junkab’al. “Eb’ li ani q’axal wankeb’ xwankil sa’ xyu’am junaq—choq’ re li us malaj li ink’a’ us—chi kok’ aj xsa’ a’aneb’ li ani wankeb’ sa’ rochoch. Rik’in naq li ochoch a’an li na’ajej q’axal nim xwankil re xyu’aminkil ut xtzolb’al li evangelio, k’a’jo’ wi’chik naq tatruuq chixk’eeb’al xkawilal jun komon sa’ li tzoleb’aal naq nakatk’anjelak sa’ komonil rik’in … li wankeb’ sa’ li junkab’al” (Li k’utuk jo’ li Kolonel, 8–9).