laj Samuel aj Lamanita nak’utuk sa’ xb’een li xaqxookil tz’ak

Laj Samuel aj Lamanita sa’ xb’een li xaqxookil tz’ak, xb’aan laj Arnold Friberg

31 agosto–6 septiembre

Helaman 13–16

“Sahil esilal re nimla sahil ch’oolejil”

B’ar wan reheb’ lix k’utum ut lix profeetil aatin laj Samuel aj Lamanita nakaweek’a naq q’axal chaab’ileb’ choq’ reheb’ li tzolb’ileb’ aab’aan? Naq nakatzol Helaman 13–16, k’oxla chan ru naru taatenq’aheb’ chixtawb’al xna’leb’eb’ sa’eb’ li ch’ol a’in.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li komon sa’ li tzoleb’aal chixwotzb’al rik’in anihaq chik li k’a’ru xe’xtzol, li k’a’ru xe’xtaw ru, malaj li k’a’ru xe’roksi sa’ xyu’ameb’ naq xe’ril ru li resil laj Samuel aj Lamanita sa’ Helaman 13–16 chiru li xamaan a’in. Kanab’ junjunq reheb’ chi wotzok rik’in chixjunil li tzoleb’aal.

reetalil li k’utuk

Xkʼutbʼal li tzolʼlebʼ

Helaman 13

Eb’ lix moos li Qaawa’ neke’aatinak ut neke’k’anjelak a’ yaal jo’ b’eresinb’ileb’ xb’aan li Dios.

• Li Qaawa’ kixpatz’ re laj Samuel aj Lamanita naq tixb’aanu li k’a’ru jwal ch’a’aj: xjultikankil aatin chiruheb’ li ak ke’risi chaq sa’ xtenamiteb’. Rik’in rilb’al ru Helaman 13:2–5 maare taajultiko’q reheb’ li komon sa’ li tzoleb’aal li k’a’ru ch’a’aj xpatz’ li Qaawa’ reheb’ naq te’xb’aanu. Kanab’eb’ chixwotzb’al li k’a’ru xe’xk’ul. Chan ru naq li Qaawa’ xtenq’aheb’? Qayehaq, maare eb’ li komon te’ruuq chixwotzb’al xnumsihomeb’ naq li Qaawa’ kixk’e jun na’leb’ sa’ xch’ooleb’ li xraj naq te’xye re anihaq chik (chi’ilmanq li raqal 4). K’a’ruheb’ li osob’tesink xe’xk’ul li komon sa’ li tzoleb’aal naq xe’xtaaqe lix b’eresihom li Qaawa’?

  Li Awa’b’ej Russell M. Nelson

  Li profeet nokoxjayali rik’in li Jesukristo.

• Us ta laj Samuel kixye lix tijom reheb’ laj Nefita xb’aan xkawilaleb’ li raam, wankeb’ li na’leb’ sa’ Helaman 13 choq’ qe chiqajunil. Re xtenq’ankileb’ li komon sa’ li tzoleb’aal chixtawb’al xna’leb’eb’ choq’ re xyu’ameb’ sa’ li raatin a’an, taaruuq taakanab’eb’ chi sik’ok sa’ Helaman 13 re xtawb’al jun esil li wan rilom rik’in li qakutan laa’o. (Wi neke’raj tenq’aak, taaruuq taatz’iib’aheb’ li raqal a’in chiru li pizarron: 8, 21–22, 26–29, 31, ut 38.) Chirix a’an, te’ruuq chixwotzb’al li xe’xtaw sa’ ka’kab’il, sa’ kok’ ch’uut, malaj rik’in chixjunil li tzoleb’aal. K’a’ruheb’ li esil chanchaneb’ a’in li k’eeb’ileb’ qe xb’aan li profeet sa’ li kutan a’in?

Helaman 14; 16:13–23

Eb’ li eetalil ut sachb’a-ch’oolej naru te’xkawob’resi lix paab’aaleb’ li ani ink’a’ neke’xkawob’resi li raameb’.

• Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al nokorelaji chixsik’b’aleb’ li eetalil k’eeb’ileb’ qe xb’aan li Qaawa’ re naq “tooruuq chi paab’ank re lix k’ab’a’ ” (Helaman 14:12). Maare eb’ li komon sa’ li tzoleb’aal te’ruuq chixwotzb’al li xe’xtaw naq xe’xk’oxla li na’leb’ a’in. Ye reheb’ naq wan naq eb’ li eetalil sa’ li qayu’am ink’a’ jwal ninqeb’ ut k’utk’uukeb’ jo’ li yeeb’ileb’ resil xb’aan laj Samuel. K’a’ruheb’ chik li rajb’aleb’ li eetalil li yeeb’ileb’ resil sa’ Helaman 14:28–30? Eb’ li komon sa’ li tzoleb’aal te’ruuq ajwi’ chixwotzb’al yalaq chik k’a’ru xb’aanuhom li Qaawa’ re xtenq’ankileb’ chixnimob’resinkil xpaab’aaleb’ chirix a’an.

• Rik’in rilb’al ru chan ru ke’tz’aqob’resiik ru lix profeetil aatin laj Samuel naru te’nimob’resiiq xpaab’aaleb’ li tzolb’ileb’ aab’aan chirix li Jesukristo ut lix k’anjel. Maare eb’ li komon taaruuq te’roksi Helaman 14 re xyiib’ankil jun kaaxukuut tustuukeb’ wi’ lix profeetil aatin laj Samuel chirix lix yo’lajik ut lix kamik li Jesukristo sa’ jun pak’al, ut sa’ li jun pak’al chik eb’ li raqal reheb’ li loq’laj hu tz’iib’anb’ileb’ wi’ lix tz’aqlojikeb’ ru li junjunq chi profeetil aatin a’an. Naru roksinkil junjunq reheb’ li raqal li neke’tawman sa’ 3 Nefi 1:15–21 ut 3 Nefi 8:5–25. K’a’ut naq aajel ru naq taawanq qanawom chirixeb’ li profeetil aatin a’in ut lix tz’aqlojikeb’ ru?

• Eb’ li komon sa’ li tzoleb’aal maare xe’xk’e reetal—sa’ Helaman 16 ut sa’ xkomoneb’ chik li raqal reheb’ li loq’laj hu—naq li rilb’aleb’ eetalil ut sachb’a-ch’oolej moko junelik ta nokoxk’e chixpaab’ankil li Kristo. Kanab’eb’ chixwotzb’al junjunq seraq’ reheb’ li loq’laj hu chirixeb’ li ani ke’ilok reheb’ li eetalil a’b’an ink’a’ ke’ok chi paab’ank. Jo’ yeeb’il sa’ Helaman 16:13–23, k’a’ut naq naab’aleb’ sa’ xkutankil laj Samuel aj Lamanita ink’a’ ke’xpaab’eb’ li eetalil ut li profeetil aatin? Chan ru naq laj Satanas naxq’unb’esi xch’ooleb’ li kristiaan chi “wank chi chapcho chiru tz’aqal lix metz’eweb’ ut … lix na’leb’eb’ ” sa’ li kutan a’in? (Helaman 16:15). K’a’ru naqatzol sa’ li esil a’in li naru tooxtenq’a re naq ink’a’ taqab’aanu li ke’xb’aanu a’an?

Helaman 15:3

Li Qaawa’ naxq’useb’ li ani naxraheb’.

• Li raatin laj Samuel nujenaq rik’in kawil q’usum, a’b’an Helaman 15:3 naxk’e jun chaab’il na’leb’ chirix chan ru naq’usuk li Qaawa’. Re xtenq’ankileb’ li tzolb’ileb’ aab’aan chixtawb’al ru li na’leb’ a’in, naru teeril ru li raqal a’in sa’ komonil ut taakanab’eb’ chixwotzb’aleb’ li reetalil lix rahom ut li ruxtaan li Dios sa’eb’ lix profeetil aatin ut lix q’usum laj Samuel. Chan ru naq li q’usuk xb’aan li Qaawa’ naru taawanq choq’ reetalil lix rahom?

• Re xtenq’ankileb’ li komon sa’ li tzoleb’aal chixtawb’al ru chi us li aatin sa’ Helaman 15:3, taaruuq taawotz oxib’ li rajom li choxahil q’usuk li k’utb’ileb’ xb’aan li Elder D. Todd Christofferson (chi’ilmanq “Xkomon chik li k’anjeleb’aal”). K’uub’ li tzoleb’aal sa’ oxib’ ch’uut, ut patz’ re li junjunq naq te’aatinaq chirix jun reheb’ li oxib’ ajom a’in (eb’ li raqal reheb’ li loq’laj hu ut li video li wankeb’ sa’ “Xkomon chik li k’anjeleb’aal” naru te’tenq’anq). Chirix a’an, li junjunq ch’uut taaruuq te’xwotz rik’in chixjunileb’ yalaq na’leb’ xe’xk’ul naq yookeb’ chi aatinak li naxtenq’aheb’ chixtawb’al ru chi us k’a’ut naq li Qaawa’ naxq’useb’ li ani naxraheb’.

Helaman 16

Li profeet nokoxjayali rik’in li Qaawa’.

• Sa’ Helaman 16, k’a’ru naqatzol rik’ineb’ li ke’xk’ulub’a lix k’utum laj Samuel? K’a’ru naqatzol rik’ineb’ li ke’xtz’eqtaana? Usaq raj rab’inkileb’ li komon sa’ li tzoleb’aal chixwotzb’al chan ru xe’xk’ul xnawom xch’ooleb’ chirix lix aajelil ru xtaaqenkileb’ li yo’yookil profeet. Te’ruuq ajwi’ chixwotzb’al chan raj ru te’roksi Helaman 16 malaj li raatin li Elder Andersen wan sa’ “Xkomon chik li k’anjeleb’aal” re xch’olob’ankil chiru anihaq k’a’ut naq neke’xsik’ ru xtaaqenkil li profeet.

reetalil li tzolok

Xb’oqb’aleb’ chi tzolok sa’ kab’l

Re xwaklesinkil xch’ooleb’ li komon chirilb’al ru 3 Nefi 1–7 chiru li xamaan chal re, taaruuq taaye reheb’ naq naab’al reheb’ li profeetil aatin li xe’ril ru chiru li xamaan a’in neke’tz’aqob’resiik ru sa’eb’ li ch’ol a’in.

reetalil li kʼanjelebʼaal

Xkomon chik li kʼanjelebʼaal

Eb’ li rajom li choxahil q’usuk.

Li Elder D. Todd Christofferson kixwotz oxib’ li rajom li choxahil q’usuk (chi’ilmanq “Yo reprendo y disciplino a todos los que amo,” Liahona, mayo 2011, 97–100):

1. “Re xq’unb’esinkil qach’ool chixjalb’al qak’a’uxl.” Chi’ilmanq Eter 2:14–15; Tzol’leb’ ut Sumwank 1:27; 93:41–50; 105:6.

2. “Re xsaqob’resinkil qu ut qasantob’resinkil.” Chi’ilmanq Mosiah 23:21–22; Tzol’leb’ ut Sumwank 101:1–5; 136:31.

3. “Re xjayalinkil chi ak’il li qab’e sa’ li qayu’am rik’in li b’e li naxnaw li Dios naq q’axal wi’chik chaab’il.” Chi’ilmanq li seraq’ chirix li Awa’b’ej Hugh B. Brown ut li arbusto de grosella sa’ li raatin li Elder Christofferson (eb’ li perel 98–99); “La voluntad de Dios” (video, ChurchofJesusChrist.org).

Nasaho’ qach’ool rik’in naq wan jun li profeet.

Li Elder Neil L. Andersen kixk’ut:

“Jun profeet ink’a’ naxram ru aab’e rik’in li Kolonel. Xaxqo b’an chak’atq ut naxk’ut li b’e li nakatxk’am rik’in li Kolonel. Lix teneb’ankil li profeet li q’axal nim, ut lix maatan q’axal nim choq’ qe, a’an lix nawom naq li Jesus a’an li Kristo. Jo’ laj Pedro re najter q’e kutan, li qaprofeet naxye, “A’in li Kristo, li Ralal li yo’yookil Dios” [Mateo 16:16; chi’ilmanq ajwi’ Jwan 6:69].

“Sa’ junaq kutan chalel, naq yooko chirilb’al li qayu’am sa’ ruchich’och’, taasaho’q qach’ool naq xoowan sa’ ruchich’och’ sa’ xq’ehil jun yo’yookil profeet. Sa’ li kutan a’an, chiqaye taxaq:

“Xoo’ab’ink re. Xoo’paab’ank re li raatin. Xqatzol li raatin rik’in kuyum ut paab’aal. Xootijok chirix. Xooxaqli chixk’atq. Tuulan qach’ool, jo’kan naq xooru chixtaaqenkil. Xqara a’an” (“Lix profeet li Dios,” Jolomil ch’utub’aj-ib’ re abril 2018).

Xchaab’ilob’resinkil li qak’utum

Naweb’ ru li tzolb’ileb’ aab’aan. Maajun juntaq’eet rik’in xkomon. Eb’ li tzolb’ileb’ aab’aan jalan jalanq li chalenaqeb’ wi’ chaq, li k’a’ru neke’xk’oxla, ut lix seeb’aleb’. Tijon re xnawb’al chan ru naru taawoksi a’in re xtenq’ankileb’ chi tzolok. Naq q’axal wi’chik nakanaweb’ ru li tzolb’ileb’ aab’aan, q’axal wi’chik naq tatruuq chixk’uub’ankil aatzolom re tixtoch’eb’ xch’ool ut taajultiko’q reheb’. (Chi’ilmanq Li k’utuk jo’ li Kolonel, 7.)