laj Nefi natijok sa’ jun najt xteramil kab’l

Xjalam-uuch laj Nefi sa’ jun najt xteramil kab’l xb’aan laj Jerry Thompson

24–30 agosto

Helaman 7–12

“Chijultiko’q eere li Qaawa’ ”

Laj Nefi kirelajiheb’ lix tenamit naq taajultiko’q reheb’ li Qaawa’. Naru ajwi’ taab’aanu a’an rik’ineb’ li nakatzol. Naq nakawil ru Helaman 7–12, tz’iib’a li na’leb’ nakak’ul chirix chan ru naru taatenq’aheb’ li tzolb’ileb’ aab’aan chixjultikankil li Qaawa’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li komon chixtz’iib’ankil chiru li pizarron junjunq na’leb’ re li evangelio xe’xtaw sa’ Helaman 7–12, rochb’een ajwi’ li rajlil li raqal xe’xtaweb’ wi’. Chirix a’an, texruuq chixsik’b’al ru jo’ tzoleb’aal b’ar wan reheb’ li na’leb’ a’in li tex’aatinaq wi’.

reetalil li k’utuk

Xkʼutbʼal li tzolʼlebʼ

Helaman 7–11

Eb’ li profeet neke’xk’utb’esi li rajom li Dios chiruheb’ li tenamit.

• Re xtenq’ankileb’ li komon sa’ laa tzoleb’aal chi tzolok sa’ Helaman 7–11 chirix lix k’anjeleb’ ut li teneb’anb’ileb’ wi’ li profeet, taaruuq teetikib’ rik’in rilb’al ru sa’ komonil li tz’iib’anb’il chi rub’el “Profeet” sa’ li K’utul Raqal reheb’ li Loq’laj Hu. Eb’ li komon sa’ li tzoleb’aal taaruuq te’xye k’a’ruheb’ lix k’anjeleb’ li profeet li yeeb’il resil ut te’xtz’iib’aheb’ chi tustu chiru li pizarron. Toja’ naq taaruuq taakanab’eb’ li komon chixnumsinkil sa’ junpaat jun reheb’ li ch’ol sa’ Helaman 7–11. Patz’ reheb’ naq te’xsik’ chan ru naq laj Nefi kixtz’aqob’resi ru li junjunq k’anjel tz’iib’anb’il chiru li pizarron. Chan ru naq eb’ li qayo’yookil profeet ut apostol neke’xtz’aqob’resiheb’ ru li k’anjel a’in? Chan ru naru taqaxaqab’eb’ xwankil sa’ li teneb’anb’ileb’ wi’?

• K’a’ut naq wan naq eb’ li profeet tento te’aatinaq rik’in kawilal, jo’ kixb’aanu laj Nefi? K’oxla xkanab’ankileb’ li komon sa’ li tzoleb’aal chirilb’al ru Helaman 7:11–29 re xtawb’aleb’ li tijom kixk’e laj Nefi ut k’a’ut naq teneb’anb’il chixk’eeb’aleb’ rik’in kawilal. K’a’ruheb’ li profeetil tijom li xoohe’xmusiq’a chixjalb’al qak’a’uxl ut chi chalk rik’in li Qaawa’? Sa’ “Xkomon chik li k’anjeleb’aal” taataw li jaljookil ru aatin kiroksi li Elder Neil L. Andersen re qatenq’ankil chixtawb’al ru naq xiwxiw xtz’eqtaanankileb’ lix tijom li profeet.

Helaman 9:1–20; 10:1, 11–15

Aajel ru naq li paab’aal ink’a’ ka’ajwi’ k’ojk’o sa’ xb’eeneb’ li eetalil ut li sachb’a-ch’oolej.

• Re aatinak chirixeb’ li raqal a’in, naru taak’uub’ li tzoleb’aal sa’ wiib’ ch’uut ut taakanab’ li junjunq chirilb’al ru Helaman 9:1–20 ut chixk’oxlankil naq wankeb’ sa’ xna’ajeb’ li oob’ winq malaj sa’ xna’ajeb’ li xb’eenileb’ aj raqol aatin. K’a’ raj ru ke’reek’a li kristiaan a’in? K’a’ut nekek’oxla naq jalan jalanq chan ru naq ke’xk’ul li sachb’a-ch’oolejil profeetil aatin? K’a’ru naru taqab’aanu re naq eb’ li sachb’a-ch’oolej te’xnimob’resi lix nawom qach’ool, a’ut ink’a’ te’ok choq’ li junaj chi k’ojleb’aal re li qapaab’aal? Chan ru naru taqanaw ma yaal malaj ink’a’ li raatin li profeet sa’ li qakutan?

Helaman 10:1–12

Li Qaawa’ naxk’e wankilal reheb’ li neke’xsik’ ru xb’aanunkil li rajom a’an ut ab’ink chiruheb’ lix taqlahom.

• Li esil chirix laj Nefi naq ki’osob’tesiik xb’aan li Qaawa’ sa’ Helaman 10 naru tixmusiq’aheb’ li komon sa’ laa tzoleb’aal chixsik’b’al ru xb’aanunkil li rajom li Qaawa’ chi anchalaq wi’chik xch’ooleb’. Eb’ li komon sa’ li tzoleb’aal te’ruuq chirilb’aleb’ ru li raqal 1–12 re xtawb’al li kixb’aanu laj Nefi re xsahob’resinkil xch’ool li Dios chirix, ut chan ru naq li Qaawa’ kirosob’tesi. Chirix a’an, te’ruuq chixwotzb’al xkomoneb’ chik li esil chirixeb’ li kristiaan li ke’xsik’ ru ut ke’xb’aanu li rajom li Qaawa’ chi ink’a’ “xe’lub’ ” (Helaman 10:4) sa’eb’ li loq’laj hu malaj sa’ xyu’ameb’ a’an. Chan ru ke’osob’tesiik li kristiaan a’in xb’aan li Qaawa’ rik’in wankilal re xk’eeb’al “chi uq’e’k” (Helaman 10:9) li k’a’ru chanchaneb’ ninqi tzuul sa’ xyu’ameb’? K’e xhoonaleb’ li komon chixk’oxlankil chan ru naru te’chaab’ilo’q sa’ xsik’b’al ru xb’aanunkil li rajom li Qaawa’ ut sa’ ab’ink chiruheb’ lix taqlahom.

Helaman 12

Li Qaawa’ naraj naq taajultiko’q qe a’an.

• Naab’al reheb’ li komon sa’ laa tzoleb’aal ak okenaqeb’ sa’ sumwank naq junelik te’xjultika li Jesukristo. Maare te’ruuq chixwotzb’al chirib’ileb’ rib’ k’a’ru li naxtenq’aheb’ “junelik chixjultikankil a’an” (Moroni 4:3; Tzol’leb’ ut Sumwank 20:77), sa’ xkutankil li sahilal jo’ ajwi’ li ch’a’ajkilal. Chirix a’an, eb’ li komon sa’ li tzoleb’aal te’ruuq chi sik’ok sa’ Helaman 12 re xtawb’al k’a’ut naq chi kok’ aj xsa’ li Qaawa’ nasach sa’ xch’ooleb’ li tenamit. Chan ru naru toonumtaaq sa’ xb’eeneb’ li majelal ch’olob’anb’ileb’ sa’ li ch’ol a’in? Chan ru naq li ch’a’ajkilal xooxtenq’a re taajultiko’q qe li Dios? (chi’ilmanq Helaman 11:4–7).

• Re xk’utb’al naq xjultikankil k’a’ruhaq naraj ru li yalok q’e, taaruuq taak’e junjunq k’asal reheb’ li komon re xnumsinkil Helaman 12. Chirix a’an, taaruuq tatpatz’oq reheb’ chirix li ch’ol re rilb’al k’a’ru najultiko’ reheb’. Maare te’ruuq chixwotzb’al li neke’xb’aanu re xjultikankil li na’leb’ choq’ re jun examen. Chan ru naq a’in chanchan li yalok q’e na’ajman ru re “taajultiko’q qe li Qaawa’ ”? (Helaman 12:5). Chan ru naq jalan? Kanab’eb’ li komon sa’ li tzoleb’aal chixsik’b’al jun raqal malaj ch’ol aatin sa’ Helaman 12 li te’ruuq chixk’utb’esinkil sa’ rochocheb’ malaj chixkanab’ankil sa’ xk’a’uxleb’ re taajultiko’q reheb’ lix chaab’ilal ut lix wankil li Dios.

reetalil li tzolok

Xb’oqb’aleb’ chi tzolok sa’ kab’l

Re xwaklesinkil xch’ooleb’ li komon chirilb’al ru Helaman 13–16, taaruuq taaye reheb’ naq lix profeetil aatin laj Samuel aj Lamanita chirixeb’ li reetalil lix yo’lajik ut lix kamik li Jesukristo naru te’juntaq’eetaaq rik’in li k’a’ru taak’ulmanq sa’ li qakutan laa’o chirub’eetal li xkab’ xk’ulunik li Kolonel.

reetalil li kʼanjelebʼaal

Xkomon chik li kʼanjelebʼaal

Ab’i lix b’eresihomeb’ li profeet.

Li Elder Neil L. Andersen kixwotz a’in:

“Eb’ li neke’xsik’ ru k’anjelak chiru li Qaawa’ junelik te’xk’e xxik chirab’inkil li raatin li profeet. …

“… Inyehaq xyaalalil a’an rik’in jun li seraq’. Chiru k’iila chihab’ li qajunkab’al kiwan qochoch sa’ li estado Florida. Xb’aan naq naab’al li samahib’ aran Florida, na’awman aran jun paay chi pach’aya’, San Agustín xk’ab’a’, chixsutameb’ li kab’l. Wan jun ch’ina xul aran Florida, li grillo topo, li naxkamsi li pach’aya’ a’an.

“Sa’ jun ewu, naq wankin chirix kab’l wochb’een jun wech kab’al, a’an kixk’e reetal jun ch’ina xul yoo chixq’axb’al ru li tz’akil b’e wan chire li wochoch. “Usaq raj naq taak’e li veneno sa’ li pach’aya’ chixsutam laa wochoch,” chan we. “Aran wan jun ch’ina grillo topo.” Ak kink’e li pesticida junjunq xamaan chaq, ut kiweek’a naq maak’a’ inhoonal chi moko intumin re xb’aanunkil wi’chik.

“Wulajaq chik sa’ lix saqen li eq’la, kink’e reetal li pach’aya’ chi us. Jwal cham, rax ru, ut ch’ina us. Kin’ilok sa’ li pach’aya’ re rilb’al ma naru tinwil junaq ch’ina xul. Maajun kiwil. Jultik we naq kink’oxla, “Maare li ch’ina grillo topo yal yoo chi nume’k chire wochoch toj sa’ li pach’aya’ re li wech kab’al.” …

“A’b’an, moko sa ta lix raqik li seraq’ a’in. Kin’el sa’ wochoch jun eq’la, maare lajeeb’ kutan chirix naq xin’aatinak rik’in li wech kab’al. Jo’ chanchan naq chiru yal jun q’ojyin xk’ulman, wankatqeb’ li kok’ na’ajej kamenaq wi’ li pach’aya’. Xkohin sa’ aanil sa’ k’ayib’aal re xloq’b’al li veneno, ut kink’e chiru li pach’aya’ sa’ junpaat, a’b’an ak xikenaq li hoonal. Po’jenaq chik li pach’aya’, ut re xtuqub’ankil wi’chik taa’ajmanq raj ru li ak’ ch’och’ ut iyaj, k’iila hoonal, ut naab’al li tumin.

“Lix tijom li wech kab’al tz’aqal aajel ru choq’ re xchaab’ilal li pach’aya’. A’an kiru chirilb’al ru li ink’a’ kiwil laa’in. A’an kixnaw li ink’a’ kinnaw laa’in. A’an kixnaw naq eb’ li grillo topo wankeb’ chirub’el li ch’och’ ut ka’a’jwi’ neke’el chiru q’ojyin, jo’kan naq maak’a’ aj-e li tz’ilok-ix kinb’aanu chi kutan. A’an kixnaw naq eb’ li grillo topo ink’a’ neke’xk’uxeb’ lix xaq li pach’aya’, neke’xtzeka b’an lix xe’. A’an kixnaw naq eb’ li xul a’in q’axal kok’eb’ te’ruuq chixtzeqankil k’iila xe’ rub’elaj naq tink’e raj reetal a’an chixb’een li ch’och’. K’a’jo’ xnimal li tz’aq kintoj xb’aan lin q’etq’etil na’leb’. …

“… Wankeb’ li musiq’ejil grillo topo li neke’xmuq rib’ chirub’el li qaxaqxookil tz’ak re kolb’a-ib’ ut neke’xsach li qaq’unil xe’. Naab’al reheb’ li kok’ xul a’in re maa’usilal chanchan naq q’axal kok’eb’, wan naq chanchan naq ink’a’ naru rilb’aleb’ xb’aan xka’ch’inaleb’. …

“Miqataaqe li kinb’aanu laa’in naq kink’uleb’ li grillo topo aran Florida. Miqatz’eqtaanaheb’ li tijom. Miqaq’etq’eti rib’ rik’in xk’oxlankil naq ak naqanaw chixjunil qajunes. Choowanq junelik chi ab’ink ut chi tzolok chi tuulan qach’ool ut rik’in paab’aal, ut kawalaqo chixjalb’al qak’a’uxl wi na’ajman ru” (“Los profetas y los grillos cebolleros espirituales,” Liahona, enero 2000, 18–20).

Xchaab’ilob’resinkil li qak’utum

K’ut li rahok. “A’ yaal jo’ li wankat wi’, naru nakak’ut li rahok choq’ reheb’ li ani tzolb’ileb’ aab’aan rik’in xwaklesinkileb’ xch’ool rik’in jun chaab’il aatin, xpatz’b’al reheb’ k’a’ru yoo chi k’ulmank sa’ xyu’ameb’, rab’inkil chi us li neke’xye, xk’eeb’aleb’ xhoonal chi aatinak sa’ li tzolok, k’anjelak chiruheb’, malaj yal xk’eeb’al xsahileb’ xch’ool naq nakawileb’ ” (Li k’utuk jo’ li Kolonel, 6).