eb’ lix b’oolam li palaw neke’xpik’a rib’ chiruheb’ li pek

17–23 agosto

Helaman 1–6

“Lix saqoonaq laj Tojol qix”

Ma nakanaweb’ ru chi yaal li komon sa’ laa tzoleb’aal? K’e aach’ool chixnawb’al ru jun komon sa’ laa tzoleb’aal b’ayaq chik rajlal xamaan. Naq nakab’aanu a’in, naru taak’uula chi chaab’il chik sa’ aach’ool li rajomeb’ ru a’an naq nakakawresi aawib’ re k’utuk.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

K’oxla xk’eeb’al xb’oqb’aleb’ li komon chi chalk chi kawresinb’ileb’ re xk’amb’al chaq junaq ch’ina k’anjeleb’aal re xk’utb’al jun na’leb’ xe’xtzol sa’eb’ li ch’ol a’in. Chan chik ru naru taqak’uteb’ li na’leb’ a’in chiruheb’ li qas qiitz’in?

reetalil li k’utuk

Xkʼutbʼal li tzolʼlebʼ

Helaman 1–6

Li q’etq’etil nokoxnajtob’resi rik’in li Musiq’ej ut lix metz’ew li Qaawa’.

• Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naxch’olob’ jun “sirso re q’etq’etil” li kixrahob’tesiheb’ laj Nefita. Maare jun komon sa’ li tzoleb’aal taaruuq tixyiib’ xjalam-uuch li sirso a’in chiru li pizarron. Chirix a’an, eb’ li komon te’ruuq chixsik’b’aleb’ li raqal sa’ Helaman 1–6 li neke’xk’oxla naq neke’xch’olob’ li junjunq xcha’alil li sirso ut te’xtz’iib’aheb’ li raqal chire li cha’al re li sirso neke’aatinak wi’. (Wi eb’ li komon neke’raj ru aatenq’, taaruuq taaye reheb’ naq te’sik’oq sa’ Helaman 3:24–36; 4:11–26.) Chan ru naq wan naq chanchano eb’ laj Nefita? K’a’ru naru taqab’aanu re naq ink’a’ tooq’etq’eto’q jo’ rajlal ke’xb’aanu? Taaruuq ajwi’ taawotz junjunq raqal sa’ “Capítulo 18: Cuidaos del orgullo” (Enseñanzas de los Presidentes de la Iglesia: Ezra Taft Benson [2014], 251–264).

  li sirso re q’etq’etil

  Li “sirso re q’etq’etil.”

• Taaruuq taakanab’eb’ li komon sa’ li tzoleb’aal chirilb’al ru Helaman 4:13 ut 24–26 ut taataw jun b’ich li nak’utuk chirix li kanab’ank-ib’ chiru li Dios, jo’ “Rajlal nawaj aawu” (Eb’ li B’ich, 53). K’a’ut naq li q’etq’etil nokoxnajtob’resi rik’in li Dios? Chan ru naru taqak’e reetal naq junelik naqaj ru li Dios? Eb’ li komon sa’ li tzoleb’aal te’ruuq chixwotzb’al chan ru xe’kawob’resiik xb’aan lix Musiq’ ut lix wankil li Qaawa’ rik’in naq xe’wan chi tuulan.

• Eb’ li komon re li Iglees li yeeb’ileb’ resil sa’ Helaman 3:33–34 ke’xrahob’tesiheb’ li rech aj komon sa’ li Iglees. Xb’aan lix q’etq’etileb’, ke’xrahob’tesiheb’ li neb’a’ ut ke’xb’aanu k’iila paay chik chi maak (chi’ilmanq Helaman 4:11–13). K’oxla rilb’al ru Helaman 3:33–34 ut 4:11–13 sa’ komonil ut xkanab’ankileb’ li komon sa’ li tzoleb’aal naq te’aatinaq chirix chan ru naru taqak’ut xchaab’ilal qach’ool ut oxloq’ chiruheb’ li qas qiitz’in, ut jo’kaneb’ ajwi’ li qakomon sa’ li Iglees li maare jalaneb’ qik’in. Taaruuq ajwi’ taaye reheb’ li komon naq te’xk’oxla anihaq neke’xnaw ru li maare rahob’tesinb’il xb’aan xb’aanuhom jalan, ut te’xk’oxla chan ru naru te’tenq’anq chixkawob’resinkil ut chixwaklesinkil xch’ool li kristiaan a’an.

Helaman 3:33–35

Li santob’resiik nachal rik’in xq’axtesinkil qach’ool chiru li Dios.

• Helaman 3:33–35 taaruuq tixk’ojob’ xch’ooleb’ li wankeb’ sa’ laa tzoleb’aal li yookeb’ chixk’ulb’al “nimla rahob’tesiik” malaj “naab’al li ch’a’ajkilal” (raqal 34). Maare taaruuq taakanab’eb’ li komon chi sik’ok sa’eb’ li raqal a’in re xtawb’al li na’leb’ te’ruuq chixk’eeb’al re anihaq li yoo chi rahob’tesiik. Malaj eb’ li komon te’ruuq chixwotzb’al chan ru xe’xtaw “sahil ch’oolejil ut k’ojob’aak ch’oolej” sa’ xq’ehil li ch’a’ajkilal rik’in naq xe’xb’aanu li ch’olob’anb’il sa’ raqal 35.

• K’oxla xkanab’ankileb’ li komon sa’ li tzoleb’aal chixtzolb’al Helaman 3:33–35 jo’ ajwi’ li aatin ut li tenq’anel na’leb’ sa’ “Xkomon chik li k’anjeleb’aal.” K’a’ru neke’xk’ut li raqal ut aatin a’in chirix li santob’resiik? Chan ru naq li kuyuk sa’ ut li tijok neke’xk’ameb’ li osob’tesink yeeb’ileb’ resil sa’ Helaman 3:35? Chan ru naqaq’axtesi li qach’ool chiru li Dios? (chi’ilmanq Helaman 3:35). Chan ru naq a’in nokoxtenq’a chi wank chi santob’resinb’il? Taaruuq ajwi’ taakawresi ut taajek’i kok’ setb’il hu tz’iib’anb’il wi’ li aatin malaj li tenq’anel na’leb’ neke’tawman sa’ “Xkomon chik li k’anjeleb’aal” ut taakanab’eb’ li komon chixsik’b’al ru jun reheb’ re xtzolb’al. Toja naq’ te’ruuq chixwotzb’al chirib’ileb’ rib’ li xe’xtzol chirix li santob’resiik.

Helaman 5:12

Wi naqak’e li Jesukristo choq’ li qak’ojleb’aal, ink’a’ tooruuq chi t’ane’k.

• Laj Satanas naxtaqlaheb’ “lix kawil iq’ ” sa’ qayu’am chiqajunil. Naab’al reheb’ li komon sa’ laa tzoleb’aal ak xe’xk’ul a’in, ut toj te’wanq li kawil iq’ sa’eb’ li kutan chalel. K’a’ru naru taab’aanu re xtenq’ankileb’ li tzolb’ileb’ aab’aan chixkawresinkil rib’ choq’ reheb’ li kawil iq’ a’an rik’in xkab’lankil xyu’ameb’ sa’ xb’een li Jesukristo?

  Taaruuq taatikib’ li aatinak rik’in xk’utb’al xjalam-uucheb’ li santil ochoch malaj jalaneb’ chik li kab’l ut xjuntaq’eetankil li qayu’am rik’in jun kab’l. K’a’ru li tento tixsik’ ru xb’aanunkil jun aj kab’lanel? K’a’ru li tento taqasik’ ru xb’aanunkil laa’o sa’ xkab’lankil li qayu’am? Chirix a’an, texruuq chirilb’al ru Helaman 5:12 sa’ komonil ut chi aatinak chirix k’a’ru naraj naxye xkab’lankil li qayu’am sa’ xb’een li Jesukristo. Wi wan a’an choq’ qak’ojleb’aal, chan ru naq a’in naxjal li k’a’ru naqasik’ ru xb’aanunkil naq yooko chixkab’lankil li qayu’am?

  Eb’ li komon sa’ li tzoleb’aal te’ruuq chixwotzb’al chan ruhaq rik’in xk’eeb’al li Kolonel jo’ xk’ojleb’aaleb’ xe’tenq’aak chixk’ulb’aleb’ li kawil iq’ re li yu’am a’in. K’e xhoonaleb’ li komon re te’k’oxlaq chirix li yu’am yookeb’ chixkab’lankil ut chan ru te’ril naq k’ojob’anb’ileb’ chi kaw sa’ xb’een li Kristo. Li seraq’ chirix li Santil Ochoch re Lago Salado sa’ “Xkomon chik li k’anjeleb’aal” naru tatxtenq’a sa’ li aatinak.

Helaman 5:14–50

Nakawob’resiik li qapaab’aal xb’aan “xnimal li qilom li xqak’ul.”

• Jun reheb’ li osob’tesink naqak’ul rik’in ch’utlaak sa’ li Dominkil Tzoleb’aal, a’an li hoonal re xkawob’resinkil qapaab’aal sa’ komonil—jo’ ke’xb’aanu laj Lamanita sa’ Helaman 5:50. Maare texruuq chirilb’al ru Helaman 5:50 sa’ komonil ut taapatz’ reheb’ li komon naq te’xtaw “li k’a’aq re ru ke’rab’i ut ke’ril chaq” eb’ laj Lamanita sa’eb’ li raqal 20–49. Chirix a’an, eb’ li komon te’ruuq chixwotzb’al chirib’ileb’ rib’ junjunq reheb’ li musiq’ejil numsihom li xk’e chixnaweb’ naq tz’aqal yaal li evangelio—us ta maajun sut xe’rileb’ ru li anjel malaj xaqal re xam. K’a’ru rilomeb’ a’an li naxk’ut xyaalal lix evangelio li Jesukristo li k’ojob’anb’il wi’chik?

reetalil li tzolok

Xb’oqb’aleb’ chi tzolok sa’ kab’l

Sa’ Helaman 7–12 nayeeman chan ru naq laj Nefi kixsahob’resi xch’ool li Qaawa’, ut kik’eeman nimla wankilal re. Taaruuq taaye re reheb’ li tzolb’ileb’ aab’aan naq rik’in rilb’aleb’ ru li ch’ol a’in, te’ruuq chi tzolok chirix chan ru xsahob’resinkil xch’ool li Dios sa’ xyu’ameb’ a’an.

reetalil li kʼanjelebʼaal

Xkomon chik li kʼanjelebʼaal

Li santob’resiik rik’in li Jesukristo.

• Li santob’resiik a’an “naq nakanab’aak junaq chi kolb’il chiru li maak, saq ru, ch’ajb’il, ut sant sa’ xk’ab’a’ lix tojb’al rix li maak xb’aan li Jesukristo” (K’utul Raqal reheb’ li Loq’laj Hu, “Santob’resink”).

• “Naq jalb’il chi yaal qak’a’uxl, li Kristo taarisi chiqix li riiq li xutaan xb’aan li qamaak. Naru taqanaw qajunes qib’ naq kuyb’il qamaak ut santob’resinb’ilo. Li Santil Musiq’ej tixch’olob’ xyaalal a’an chiqu; A’an aj Santob’resinel. Maajun chik reetalil li kuyuk maak nim wi’chik chiru a’in” (Dieter F. Uchtdorf, “El punto de retorno seguro,” Liahona, mayo 2007, 101).

• “Li santob’resiik rik’in lix kik’el li Kristo a’an li kanaak chi ch’ajb’il, saq ru, ut sant. Wi li tiikob’resiik narisi li tojb’a-maak xb’aan li maak xqab’aanu, li santob’resiik narisi lix tz’ajnil ut li reeqaj maak” (D. Todd Christofferson, “Justification and Sanctification,” Ensign, junio 2001, 22).

• “Naq li rajom xch’ool, li ratawom, ut li reek’ahom junaq wan chi q’axtesinb’il chiru li Dios ut chiru li ajb’il xb’aan, santob’resinb’il li kristiaan a’an” (Brigham Young, “Discourse,” Deseret News, 7 septiembre, 1854, 1).

• Santob’resinb’ilo rik’in lix wankil li Santil Musiq’ej xb’aan lix tojb’al rix li maak kixb’aanu li Jesukristo (chi’ilmanq Hebreos 13:12; Alma 13:10–12; 3 Nefi 27:19–20; Moroni 10:32–33; Tzol’leb’ ut Sumwank 76:40–42).

• Us ta ak santob’resinb’ilo, toj naru toot’ane’q chaq sa’ li choxahil usilal (chi’ilmanq Tzol’leb’ ut Sumwank 20:30–34).

Jun k’ojleb’aal ch’olch’o ru.

Naq yoo chi kab’lamank li Santil Ochoch re Lago Salado, ke’tawman li ninqi itz’il chiruheb’ li k’ojleb’aal pek. Us ta b’eleb’ chihab’ kiraj li kab’lak toj sa’ li hoonal a’an, li Awa’b’ej Brigham Young kixtaqla naq tento te’isiiq li k’ojleb’aal pek wankeb’ wi’ itz’il ut sa’ xna’ajeb’ te’k’ehe’q pek li chaab’ileb’ chik. Oob’ chihab’ ki’ajman re risinkileb’ li k’ojleb’aal pek ut xk’eeb’aleb’ li ak’ pek toj reetal naq xe’wulak sa’ xteram li ch’och’ wi’chik. “Nawaj rilb’al naq taakab’lamanq li santil ochoch a’an,” chan li Awa’b’ej Young, “re naq taaruuq taakanaaq chiru li jun mil chihab’ ” (“Remarks,” Deseret News, 14 octubre, 1863, 97).

Xchaab’ilob’resinkil li qak’utum

Xch’olob’ankil lix nawom qach’ool chirix li Jesukristo. Maare laj Aminadab ink’a’ kireek’a naq jwal seeb’ a’an re xk’utb’al chiruheb’ laj Lamanita naq tento te’xjal xk’a’uxl ut te’xpaab’ li Kristo (chi’ilmanq Helaman 5:35–41). A’b’an a’an kixwotz li kixnaw, ut k’a’jo’ naq kik’anjelak lix ch’olob’ahom rik’ineb’. K’a’ru nakatzol rik’in li kixb’aanu a’an?