Choq’ re li osob’tesink re li ach’ab’aak, xb’aan laj Scott M. Snow

3–9 agosto

Alma 43–52

“Xaqxo chi kaw sa’ xpaab’ankil li Kristo”

Rochb’een rilb’aleb’ li kok’ k’anjel tz’iib’anb’ileb’ arin, sik’ xk’ulb’al li musiq’anb’il na’leb’ aajunes naq nakatzol Alma 43–52 rik’in tijok ut nakatk’oxlak chirix chan ru taatenq’aheb’ li komon sa’ li tzoleb’aal chixtawb’aleb’ li tzol’leb’ li neke’k’utman.

Xtz’iib’ankil li nakak’oxla

Xkanab’ankileb’ chi wotzok

Re xkanab’ankileb’ li komon sa’ li tzoleb’aal chixwotzb’al li yookeb’ chixtzolb’al sa’ Alma 43–52, taaruuq taapatz’ reheb’ chan raj ru te’xsume junaq li naxye, “Ink’a’ nintaw ru chan ru naq eb’ li pleet li yeeb’ileb’ resil sa’ lix Hu laj Mormon wankeb’ rilom rik’in inyu’am laa’in.”

Xkʼutbʼal li tzolʼlebʼ

Alma 43–52

Eb’ li pleet sa’ lix Hu laj Mormon nokohe’xtzol chirix li qapleet rik’in li maa’usilal.

• Sa’ li tzolok xe’xb’aanu sa’ junesal ut sa’ junkab’al chiru li xamaan a’in, eb’ li komon maare ak xe’xtz’ileb’ rix malaj xe’xtz’iib’aheb’ lix k’oxlahom chirix chan ru naq eb’ laj Nefita ke’xkoleb’ rib’ chiruheb’ laj Lamanita ut chan ru naq eb’ laj Lamanita ke’xpleetiheb’ laj Nefita. Wi eb’ li komon ak xe’xb’aanu a’in sa’ rochocheb’, k’e xb’oqb’aleb’ chixwotzb’al li xe’xtaw. Malaj taaruuq taak’e xhoonaleb’ li komon chixtawb’aleb’ li na’leb’ a’in sa’ li tzoleb’aal rik’ineb’ li raqal reheb’ li loq’laj hu li neke’tawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Naq eb’ li komon sa’ li tzoleb’aal neke’xwotz li xe’xtaw, waklesi xch’ooleb’ chi aatinak chirix chan ru naru taqataaqe xb’aaunuhomeb’ laj Nefita sa’ xkolb’al qib’ chiru li maa’usilal, ut chan ru naru taqak’e reetal naq laj Satanas yoo chiqapleetinkil sa’ musiq’ej.

Alma 46:11–22

Wi kawaq qach’ool sa’ xkolb’al rix li qapaab’aal, naru taqawaklesi xch’ooleb’ li qas qiitz’in chi wank chi tiikeb’ chi paab’ank.

• Chan ru neke’ru li komon sa’ li tzoleb’aal chixtaaqenkil chi kawaqeb’ xch’ool xb’aanuhom laj Moroni sa’ xkolb’al rix lix paab’aaleb’ chirix lix evangelio li Jesukristo li k’ojob’anb’il wi’chik? Eb’ li komon te’ruuq chirilb’al ru Alma 46:11–22 ut chixtawb’al li kixb’aanu ut li kixk’ut laj Moroni li kimusiq’ank reheb’ lix tenamit chi wank chi tiikeb’ wi’chik xch’ool. Taaruuq taatz’iib’aheb’ li k’a’aq re ru a’in chiru li pizarron rub’el li jolomil aatin Xb’aanuhom laj Moroni. Chirix a’an, taaruuq taapatz’ reheb’ li komon naq te’k’oxlaq chirix li kixb’aanu laj Moroni ut te’xye li naru taqab’aanu anajwan re xkolb’al rix li paab’anb’il qab’aan. Taaruuq taatz’iib’a xna’leb’eb’ rub’el li jolomil aatin Xkolb’al rix li evangelio anajwan chi kawaq qach’ool. K’a’ruheb’ li yaal ut li na’leb’ li toje’ xe’k’ute’ chiqu xb’aan li qaprofeet li tento taqak’ut ut taqakol rix?

• Chan ru naru taatenq’aheb’ li komon sa’ li tzoleb’aal chixyu’aminkil li kixb’aanu laj Moroni rik’in li eetalil re ach’ab’aak? Kanab’eb’ chirilb’al ru Alma 46:11–22 ut chixtawb’aleb’ li yaalil na’leb’ kixk’ut laj Moroni ut kixpatz’ re lix tenamit naq te’xxaqab’. K’a’ruheb’ li yaal ut li na’leb’ li ka’jultikanb’ileb’ xb’aaneb’ laj jolominel qe sa’ li Iglees sa’ li qakutan? (Taaruuq taanumsi junjunq reheb’ sa’ Choq’ re Xkawilaleb’ li Saaj, “Li Junkab’al: Jun Jek’inb’il Aatin choq’ re li Ruchich’och’,” malaj sa’ li aatin k’eeb’il sa’eb’ li jolomil ch’utub’aj-ib’ toje’ xe’nume’.) K’a’ruheb’ li ch’a’ajkilal naqak’ul sa’ xkolb’al rix li qapaab’aal sa’ li ruchich’och’ anajwan? K’a’ru naru taqatzol rik’in li kib’aanu laj Moroni? K’e xhoonaleb’ li komon sa’ li tzoleb’aal chixyiib’ankil jun eetalil re ach’ab’aak li naru tixjultika reheb’ naq te’xyu’ami ut te’xk’ol rix li k’a’ru neke’xpaab’ chi kawaqeb’ xch’ool.

  

  Li xMinerva K. Teichert (1888–1976), Jun pleet re xkolb’al rix jun tenamit aj Nefita, 1935, óleo en masonite, 36 x 48 pulgadas. Museo de Arte, Universidad de Brigham Young

Alma 47

Laj Satanas nokoraale ut nokoxb’alaq’i chi b’ab’ayatqil.

• Maare usaq choq’ re laa tzoleb’aal xtzolb’al Alma 47, li naxk’ut chan ru naq lix b’alaq’il na’leb’ laj Amalikiah chanchan li naxb’aanu laj Satanas re qab’alaq’inkil. Taaruuq taatikib’ rik’in xpatz’b’al re anihaq naq tixk’os ru li esil natawman sa’ Alma 47. Re xtenq’ankileb’ chi tzolok, taaruuq taakanab’eb’ wiib’ li komon sa’ li tzoleb’aal chixk’oxlankil naq a’aneb’ laj Amalikiah ut laj Lehonti ut naq te’xseraq’i li kik’ulman rik’ineb’. K’a’ru kixb’aanu laj Amalikiah li nokoxk’e chi k’oxlak chirix li naxb’aanu laj Satanas re qaalenkil ut qab’alaq’inkil? Waklesi xch’ooleb’ li komon chiroksinkileb’ li raqal sa’eb’ li loq’laj hu naq neke’aatinak chirix li patz’om a’in. Sa’ li aatin sa’ “Xkomon chik li k’anjeleb’aal” wan jun chik eetalil chirix chan ru naq laj Satanas nokoxb’alaq’i. K’a’ru li na’leb’ naru taqak’e chiqib’il qib’ re qatenq’ankil chixk’eeb’al reetal chan ru naq laj Satanas nokoraale sa’ li kutan a’in? K’a’ru naru taqab’aanu re xkolb’al qix?

Alma 48:7–17

Naq naqayal qaq’e chi wank chi tiik chi paab’ank jo’ laj Moroni, toowanq b’ayaq chik jo’ li Kolonel.

• Li aatinak chirixeb’ lix chaab’ilal laj Moroni naru tixmusiq’aheb’ li komon sa’ li tzoleb’aal chixyalb’aleb’ xq’e chixtaaqenkil a’an. Taaruuq taatikib’ a’an rik’in xk’utb’al jun xjalam-uuch laj Moroni, jo’ li natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Chirix a’an, kanab’eb’ li komon chixtzolb’al Alma 44:3–4 ut 48:7–13 ut chixtz’iib’ankil chiru li pizarron eb’ li aatin ut ch’ol aatin li neke’xch’olob’ chan ru laj Moroni. Chirix a’an, texruuq chirilb’al ru Alma 48:17 sa’ komonil ut chi aatinak chirix chan ru naq eb’ lix chaab’ilal laj Moroni, jo’eb’ li tz’iib’anb’ileb’ chiru li pizarron, ke’xtenq’a chi numtaak sa’ xb’een lix wankil laj Satanas ut chi ok jo’ chanchan li Jesukristo. Chan ru naru nokowan jo’ laj Moroni?

Alma 48:7–9; 49:1–9; 50:1–6

Naru taqakawob’resi qib’ ut taqakawob’resi li qajunkab’al chiru laj tza.

• Maare usaq choq’ reheb’ li komon sa’ laa tzoleb’aal rab’inkil rib’eb’ chi aatinak chirix chan ru naru te’xkol rib’ ut te’xkoleb’ xjunkab’aleb’ chiru lix b’alaq’il na’leb’ ut li raalehom laj Satanas. Re xtikib’ankil li aatinak jo’ a’an, texruuq chirilb’al ru Alma 48:7–9; 49:1–9; ut 50:1–6 sa’ komonil. Naq nokok’oxlak chirix lix aajelil ru li musiq’ejil kolb’a-ib’ na’ajej chiru li maak, k’a’ru naru taqatzol rik’in chan ru naq eb’ laj Nefita ke’xyal xq’e chixkolb’aleb’ rib’? Chan ru naru taqakab’laheb’ li musiq’ejil kolb’a-ib’ na’ajej re xkolb’al qib’ ut li qajunkab’al chiru li maak ut li maa’usilal? Waklesi xch’ooleb’ li komon re te’xwotz li k’a’ru xtenq’ank reheb’ sa’ xb’aanunkil a’in. K’a’ut naq aajel ru naq “ink’a’ taqakanab’ kawresink”? (Alma 50:1).

Xb’oqb’aleb’ chi tzolok sa’ kab’l

Re xwaklesinkil xch’ooleb’ li komon sa’ li tzoleb’aal re te’ril ru Alma 53–63, taaruuq taaye reheb’ naq li esil sa’eb’ li ch’ol a’in taaruuq tixmusiq’aheb’ ut lix junkab’aleb’ chi ab’ink chiru li Dios ut chixkawob’resinkil lix paab’aaleb’.

Xkomon chik li kʼanjelebʼaal

Li nak’ulman naq naqakanab’ qib’ chi aaleek xb’aaneb’ li kok’ aaleek.

Re xk’utb’al naq “li ninqi maak neke’ok sa’ qayu’am naq xb’een wa naqakanab’ qib’ chi aaleek xb’aaneb’ li kok’ aaleek,” li Awa’b’ej Spencer W. Kimball kixwotz li seraq’ a’in:

“Jun li kameey ut laj eechal re … yookeb’ chi b’eek chiru li samahib’ sa’ li chaqi ch’och’ naq kichal jun kaq-sut-iq’. Laj b’ehenel sa’ junpaat kixyiib’ lix muheb’aal t’ikr ut ki’ok chi sa’, ut kixtz’ap li rokeb’aal re xkolb’al rib’ chiru li samahib’ yoo chi kutb’eek xb’aaneb’ li kawil iq’. Kikana li kameey chirix, ut naq yoo chi sak’e’k xb’aan li samahib’ kutb’enb’il xb’aaneb’ li xuwajel iq’ chiru lix junxaqalil, sa’eb’ li ru, ut sa’ ru’uj, ink’a’ kixkuy ut kixtz’aama ok chi sa’ li muheb’aal t’ikr.

“ “Maak’a’ chik li na’ajej, tz’aqal ka’ajwi’ choq’ we laa’in,” chan laj b’ehenel.

“ “A’b’an ma naru tink’e li wu’uj chi sa’ re naq taaruuq tinmusiq’a li iq’ moko nujenaq ta rik’in samahib’?” chan li kameey.

“ “Us, maare naru taab’aanu a’an,” chan laj b’ehenel, ut kixte b’ayaq li okeb’aal ut ki’ok li ru’uj li kameey chi sa’. Sa chik wan li kameey anajwan. A’b’an sa’ junpaat li kameey kititz’ rik’in li samahib’ yoo chixsak’b’al li ru ut lix xik … :

“Li samahib’ kutb’enb’il xb’aan li iq’ chanchan jun ji’leb’ chiru injolom. Ma naru tinwoksi lin jolom?”

“Jun sut chik, laj b’ehenel kixye naq maak’a’ tixk’ul wi tixkanab’ chixb’aanunkil a’an, xb’aan naq lix jolom li kameey taaruuq taawanq sa’ li yamyookil na’ajej ink’a’ yoo chiroksinkil a’an. Jo’kan naq li kameey kiroksi lix jolom chi sa’ li ut kisaho’ xch’ool wi’chik—a’b’an sa’ junpaat kititz’ wi’chik.

“ “K’a’ajwi’ b’ayaq chik,” kixtz’aama li kameey re, ut jun sut chik laj b’ehenel kiq’unb’esiik xch’ool xb’aan ut anajwan chik xyijach li kameey wan chi sa’ li muheb’aal t’ikr. Sa’ xraqik, rik’in xnaab’alil li tz’aamank ut li q’unb’esink ch’oolej , chixjunil lix junqaxalil li kameey kikana sa’ li muheb’aal t’ikr. A’b’anan, anajwan chik jwal laatz’ choq’ reheb’ li wiib’, ut li kameey kirisi chaq laj b’ehenel chirix kab’l sa’ li kawil iq’ ” (Enseñanzas de los Presidentes de la Iglesia: Spencer W. Kimball [2006], 119–120).

Xchaab’ilob’resinkil li qak’utum

Musiq’anb’il laa b’oqb’al. “Laa b’oqb’al chi k’utuk nachal chaq rik’in li Qaawa’. … Xatk’ojob’aak rub’el xwankil li ani neke’wan lix laawil li tijonelil rik’in; jo’kan ut, nakatru chixk’ulb’al li na’leb’ chi k’utb’esinb’il re naq chaab’il tat-elq. Eb’ li osob’tesink a’in taaruuq taak’ul wi nakasik’eb’, nakatkana chi tiik chi paab’ank, ut nakayal aaq’e chi wank aak’ulub’il” (Li k’utuk jo’ li Kolonel, 5).