Jun kutan, jun q’ojyin, ut jun kutan, xb’aan laj Jorge Cocco

7–13 septiembre

3 Nefi 1–7

“Taqsi aajolom ut chiwanq xsahil aach’ool”

Li Santil Musiq’ej naru tatxmusiq’a chixjayalinkil aawib’ rik’in junjunq li na’leb’ sa’ 3 Nefi 1–7 sa’ li tzoleb’aal. Naru naq a’aneb’ tz’aqal li na’leb’ li te’osob’tesinq re junaq li naraj tenq’aak.

Xtz’iib’ankil li nakak’oxla

Xkanab’ankileb’ chi wotzok

Re xtenq’ankileb’ li komon sa’ li tzoleb’aal chixwotzb’al li yookeb’ chixtzolb’al sa’ kab’l, kanab’eb’ chixtz’iib’ankil chiru kok’ setb’il hu junjunq li yaalil na’leb’ li xe’xtaw sa’ 3 Nefi 1–7 rochb’een rajlil li raqal xe’xtaweb’ wi’ li na’leb’. K’eheb’ li kok’ setb’il hu sa’ jun sek’, ut xok junjunq reheb’ re tex’aatinaq chirix jo’ tzoleb’aal. Naq eb’ li komon yookeb’ chi wotzok, k’oxla ma wankeb’ chik li na’leb’ sa’ li tusleb’ aatin a’in li naru te’xchaab’ilob’resi li aatinak re te’tz’aqonq xkomoneb’ chik sa’ li tzoleb’aal.

Xkʼutbʼal li tzolʼlebʼ

3 Nefi 1–7

Li jalok ch’oolej naraj ru lix yalb’al qaqe’ chi k’eek’o qach’ool.

• Sa’ 3 Nefi 1–7 wan resil li ani ke’jale’ xch’ool chirix li Jesukristo ut lix evangelio ut jalaneb’ chik li ink’a’. Re xtenq’ankileb’ li tzolb’ileb’ aab’aan chixk’eeb’al reetal xjalanileb’ li wiib’ ch’uut a’in, taaruuq taayiib’ jun kaaxukuut chiru li pizarron rik’ineb’ li jolomil aatin a’in: Eb’ li paab’ahom ut b’aanuhom li neke’xq’unob’resi li jalok ch’oolej ut Eb’ li paab’ahom ut b’aanuhom li neke’xkawob’resi li jalok ch’oolej. Jek’iheb’ li raqal a’in wankeb’ sa’eb’ li loq’laj hu reheb’ li komon sa’ li tzoleb’aal, ut kanab’eb’ chixtz’iib’ankil sa’ li kaaxukuut li neke’xtaw (ak wan jun na’leb’ choq’ re li xb’een raqal).

  • 3 Nefi 1:4–23, 29–30: Naxq’unob’resi li jalok ch’oolej: ink’a’ xpaab’ankil li raatineb’ li profeet ut xse’enkileb’ li tiikeb’ xch’ool (eb’ li raqal 5–6). Naxkawob’resi li jalok ch’oolej: xpaab’ankil li raatineb’ li profeet ut tijok re xk’ulb’al tenq’ (eb’ li raqal 8, 11).

  • 3 Nefi 2:1–3

  • 3 Nefi 3:12–16

  • 3 Nefi 4:8–10, 30–33

  • 3 Nefi 6:13–18

  • 3 Nefi 7:15–22

  Chan ru naru taqak’uula chi jalb’il qach’ool, us ta wan li taach’a’ajkilo’q qe?

• Maare taawulaq chiruheb’ li komon sa’ laa tzoleb’aal xtzolb’al chan ru xkawob’resinkileb’ li “tasal tenamit li yookeb’ chi nimank” jo’ yeeb’il reheb’ sa’ 3 Nefi 1:27–30 . Taaruuq taakanab’eb’ li komon chixtawb’al sa’eb’ li raqal a’in k’a’ut naq eb’ li saaj aj Nefita ut Lamanita ink’a’ ke’xkuy xtz’eqtaanankil li maa’usilal wan chixsutameb’. A’in taaruuq tixtikib’ li aatinak chirix junjunq lix ch’a’ajkilaleb’ li tasal tenamit yookeb’ chi nimank sa’ li kutan a’in ut chan ru xtenq’ankileb’ re xnimob’resinkil xpaab’aaleb’ chirix li Kristo. Wankeb’ junjunq li tenq’anel na’leb’ sa’ “Xkomon chik li k’anjeleb’aal.”

3 Nefi 1:4–21; 5:1–3

Li Qaawa’ tixtz’aqob’resi ru chixjunil li raatin.

• Rik’in rilb’aleb’ ru li esil sa’ 3 Nefi 1:4–21 ut 5:1–3, taaruuq taakawob’resiiq lix paab’aaleb’ li tzolb’ileb’ aab’aan chirixeb’ lix yeechi’ihom li Qaawa’. Maare eb’ li komon sa’ li tzoleb’aal te’ruuq chirilb’al ru 3 Nefi 1:4–7 sa’ komonil ut chixtz’iib’ankil chi tustu chiru li pizarron chan raj ru ke’reek’a wi ta ke’wan sa’ xyanqeb’ laj paab’anel yeeb’ileb’ resil sa’eb’ li raqal a’in. Taaruuq ajwi’ te’k’oxlaq chirix li naqak’ul anajwan li chanchan li ke’xk’ul a’an. K’a’ru naqatzol sa’ 3 Nefi 1:8–21 ut 5:1–3 chirix li Qaawa’ ut eb’ lix yeechi’ihom? Re xnimob’resinkil li aatinak, texruuq chixnumsinkil sa’ junpaat jun b’ich chirix xkanab’ankil qib’ chiru li Dios, jo’ “Bʼar wan xhiilal li waam?” (Eb’ li B’ich, 67). Eb’ li komon sa’ li tzoleb’aal te’ruuq chixwotzb’al lix numsihomeb’ naq us xe’el xb’aan xpaab’ankil ut xkanab’ankil rib’ chiru li Dios, us ta kiwan xch’a’ajkilaleb’.

3 Nefi 1:4–15; 5:12–26; 6:10–15; 7:15–26

Laa’o lix tzolom li Jesukristo.

• Laj Mormon kixye, “K’ehomaq reetal, laa’in jun xtzolom li Jesukristo” (3 Nefi 5:13). Re xtz’ilb’al rix k’a’ru naraj naxye wank jo’ jun tzolom rik’in laa tzoleb’aal, taaruuq taakanab’eb’ chi sik’ok sa’ 3 Nefi 1:4–15; 5:12–26; 6:10–15; ut 7:15–26 re xtawb’al chan ru lix ch’ooleb’, lix paab’aaleb’, ut lix b’aanuhomeb’ lix tzolom li Kristo. K’oxla xkanab’ankileb’ li komon chiru junpaat chixk’oxlankil ut chixtz’iib’ankil k’a’ru naru te’xb’aanu re chaab’ilo’k jo’ jun xtzolom li Jesukristo.

3 Nefi 2:11–12; 3:12–26; 5:24–26

Naq neke’xch’utub’ rib’ li tiikeb’ xch’ool, li Qaawa’ naru tixkawob’resiheb’ ut tixkoleb’ rix.

• Jun raqal xyaalal k’a’ut naq eb’ laj Nefita ke’ru chixq’axb’aleb’ ru laj elq’ re laj Gadianton, a’an naq ke’xjunaji rib’ rik’ineb’ laj Lamanita li jalb’ileb’ xch’ool ut ke’xtaaqe lix musiq’anb’il b’eresihom laj Lajoneus naq “te’xch’utub’ rib’ ” sa’ li tenamit Tzarahemla (3 Nefi 3:22). K’a’ raj ru taaruuq te’xtzol li komon sa’ laa tzoleb’aal rik’in li na’leb’ a’in? Taaruuq taakanab’eb’ chixwotzb’al lix numsihomeb’ naq xe’kawob’resiik xb’aaneb’ li ani tiikeb’ xch’ool wankeb’ sa’ xsutameb’. Chirix a’an, taaruuq taakanab’eb’ li komon chixnumsinkil 3 Nefi 3:12–26 re xtawb’al k’a’ut naq ke’xch’utub’ rib’ laj Nefita, ut k’a’ruheb’ li osob’tesink ke’xk’ul. Chan ru naqak’uleb’ li osob’tesink a’in naq naqach’utub’ qib’ rik’ineb’ li komon sa’ li qajunkab’al malaj sa’eb’ li qateep ut uq’ej? K’a’ chik ru naru taqatzol chirix li ch’utub’ank-ib’ sa’ 3 Nefi 5:24–26?

• Rilb’al ru 3 Nefi 3 taaruuq tixtenq’aheb’ li komon sa’ li tzoleb’aal chirilb’al naq k’a’jo’ wi’chik xnimal qametz’ew naq ch’utch’uuko sa’ tiikilal. Maare tatruuq chixk’oxlankil xk’utb’al jun k’a’aq re ru li naxk’ut chan ru naq li k’a’ru q’un xmetz’ew naru taanimanq xmetz’ew naq junajinb’il rik’in xkomon chik li k’a’aq re ru. Kanab’eb’ li komon sa’ li tzoleb’aal chixk’oxlankil naq patz’b’il reheb’ naq te’xq’unb’esi xch’ooleb’ laj Nefita chirix k’a’ut naq us ch’utlaak sa’ komonil, jo’ ch’olob’anb’il sa’eb’ li raqal 12–26. Maare te’ruuq chi k’anjelak sa’ kok’ ch’uut re aatinak chirix chan ru xb’aanunkil a’in, jo’ chanru xe’ril ru sa’eb’ li raqal a’in. Kanab’eb’ chixwotzb’al lix na’leb’eb’. Jo’ tzoleb’aal, texruuq chi aatinak chirixeb’ li patz’om jo’eb’ a’in: K’a’ruheb’ li ch’a’ajkilal naqanumsi laa’o li naru te’juntaq’eetamanq rik’ineb’ laj elq’ re laj Gadianton? Chan ru naru taqak’uub’ li qajunkab’al ut li teep wanko wi’ choq’ kolb’a-ib’ na’ajej?

3 Nefi 3:1–13

Ink’a’ raj taqaxuwa laj Satanas.

• Li hu tz’iib’anb’il xb’aan laj Giddianhi, aj jolominel reheb’ aj elq’ re laj Gadianton, kitaqlaak reheb’ laj Nefita re xka’ch’inob’resinkil xch’ooleb’ ut re xb’alaq’inkileb’. Maare eb’ li komon taaruuq te’xk’e reetal li raatin sa’ 3 Nefi 3:2–10 ut te’xjuntaq’eeta rik’in chan ru naq laj Satanas naxyal qab’alaq’inkil sa’ li kutan a’in. K’a’ru naqatzol rik’in lix sumehom laj Lajoneus, li xb’eenil aj raqol aatin sa’ xb’eeneb’ laj Nefita?

Xb’oqb’aleb’ chi tzolok sa’ kab’l

Re xwaklesinkil xch’ooleb’ li tzolb’ileb’ aab’aan chirilb’al ru 3 Nefi 8–11 choq’ re li tzoleb’aal sa’ jun xamaan, ye reheb’ naq sa’ 3 Nefi 11 wan “li jun chi na’leb’ q’axal nim” tz’iib’anb’il resil sa’ lix Hu laj Mormon—lix k’anjel li Jesukristo sa’ xyanqeb’ laj Nefita (chi’ilmanq Xtikib’ankil lix Hu laj Mormon).

Xkomon chik li kʼanjelebʼaal

Tenq’ank chixkawob’resinkil xpaab’aaleb’ li tasal tenamit yookeb’ chi nimank.

Li Elder Valeri V. Cordón re li Setenta ki’aatinak chirix oxib’ na’leb’ re xtenq’ankileb’ li tasal tenamit yookeb’ chi nimank chi kanaak chi tiik sa’ li evangelio.

1. “Q’axal wi’chik yalb’ilaq qaq’e ut anchalaq qach’ool sa’ li qochoch. … Li k’utuk chi chaab’il chaab’il k’a’jo’ x’aajelil ru re xk’uulankil li evangelio sa’ li qajunkab’al, ut naraj naq yalb’ilaq qaq’e chi anchal qach’ool. Naab’al sut xk’eeman qab’oqb’al re taqatzoleb’ li loq’laj hu sa’ junesal ut rik’in qajunkab’al wulaj wulaj. Naab’aleb’ li junkab’al li ak yookeb’ chixb’aanunkil a’in, osob’tesinb’ileb’ wulaj wulaj rik’in xnimal chik li junajil, ut neke’xjilosi rib’ chi mas wi’chik rik’in li Qaawa’.”

2. “Li kawil eetalink sa’ li ochoch. … Moko tz’aqal ta yal raatinankileb’ li qalal qak’ajol chirix x’aajelil ru li sumlaak sa’ li santil ochoch, li kuyuk sa’, malaj xloq’oninkil li hilob’aal kutan. Tento naq toohe’ril chixsik’b’al li qahoonal re tooxik rajlal sa’ li santil ochoch chi kok’ aj xsa’ jo’ naru chiqu. Tento naq te’ril naq k’eek’o qach’ool chi kuyuk sa’ rajlal ut chixloq’oninkil chixjunil li hilob’aal kutan.”

3. “Eb’ lix na’leb’ li qaxe’ qatoon. … Sa’ li qajunkab’al, tento taqatz’eqtaana yalaq na’leb’ kanab’anb’il chaq xb’aaneb’ li qayuwa’ li nokoxram chixloq’oninkil li hilob’aal kutan malaj chixtzolb’aleb’ li loq’laj hu ut chi tijok rajlal kutan sa’ li qochoch. Tento taqaram li ulul ch’iich’ sa’ li qochoch re naq ink’a’ taa’ok li pornografia ut xkomoneb’ chik li yib’ ruhil wankilal. Re xpleetinkileb’ li na’leb’ kanab’anb’il chaq xb’aan li ruchich’och’ sa’ li qakutan, tento taqoksiheb’ li loq’laj hu ut li raatineb’ li yo’yookil profeet re xk’utb’al chiruheb’ li qalal qak’ajol aniheb’ a’an, k’a’ut naq wankeb’ sa’ li yu’am a’in, ut lix loq’laj k’anjel li Jesukristo” (“Li aatinob’aal re li evangelio,” Jolomil ch’utub’aj-ib’ re abril 2017; tiqb’il xkawil li aatin).

Xchaab’ilob’resinkil li qak’utum

Tenq’aheb’ li wankeb’ xch’a’ajkilal. Wan naq aajel ru choq’ reheb’ li komon li wankeb’ xch’a’ajkilal naq taakanab’eb’ chi tz’aqonk re te’reek’a naq raab’ilaqeb’. K’oxla xk’eeb’al xb’oqb’aleb’ chixb’aanunkil k’a’ruhaq sa’ jun li tzolok chal re malaj k’e reetal naq wan ani taak’amoq chaq reheb’ sa’ iglees. Maakanab’ xyalb’al aaq’e wi sa’ xtiklajik ink’a’ nakate’xk’ul. (Chi’ilmanq Li k’utuk jo’ li Kolonel, 8–9.)