li Jesus natijok rik’ineb’ laj Nefita

Lix tij li Kristo, xb’aan laj Derek Hegsted

9–25 octubre

3 Nefi 27–4 Nefi

“Moko kiru ta kiwan junaq tenamit li sa wi’chik xch’ool”

Xtzolb’al 3 Nefi 27–4 Nefi aajunes, a’an li kawresink-ib’ jwal nim xchaab’ilal choq’ re li k’utuk. Eb’ li tzol’leb’ ut na’leb’ sa’ li tusleb’ aatin a’in naru tate’xtenq’a chixk’anjelankil li musiq’ejil na’leb’ nakak’ul naq yookat chi tzolok.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Re xtenq’ankileb’ li tzolb’ileb’ aab’aan chixwotzb’aleb’ li na’leb’ xe’xk’ul naq yookeb’ chi tzolok sa’ junesal, taaruuq taakanab’eb’ chixtawb’al jun li b’ich li naxk’am rib’ rik’in jun yaalil na’leb’ xe’xtzol sa’ 3 Nefi 27–4 Nefi. Te’ruuq chixwotzb’aleb’ li b’ich xe’xtaw ut chan ru naq eb’ li b’ich a’in neke’xk’am rib’ rik’in li yaalil na’leb’ xe’xtzol sa’eb’ li loq’laj hu.

reetalil li k’utuk

Xkʼutbʼal li tzolʼlebʼ

3 Nefi 27:1–22

Lix Iglees li Jesukristo k’ab’a’inb’il rik’in lix k’ab’a’ a’an ut kab’lanb’il sa’ xb’een lix evangelio.

• Li aatinak chirix lix k’ab’a’ li Iglees naru tixnimob’resi lix b’antioxihomeb’ li komon sa’ laa tzoleb’aal chirix lix wanjikeb’ jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. K’oxla xkanab’ankileb’ li komon sa’ li tzoleb’aal chixyeeb’al xk’ab’a’eb’ junjunqeb’ li molam ut chixch’olob’ankil chan ru naq lix k’ab’a’eb’ li molam a’an neke’xk’ut xyaalal k’a’ru xk’anjel li molam. Chirix a’an, eb’ li komon te’ruuq chirilb’al ru 3 Nefi 27:1–12 re xtawb’al k’a’ru kixk’ut li Kolonel chirix lix k’ab’a’ lix Iglees. Te’ruuq ajwi’ chixwotzb’al k’a’ru xyaalalil choq’ reheb’ naq komoneb’ sa’ lix Iglees li Kristo. K’a’ru naraj naxye xk’ulb’al lix k’ab’a’ a’an sa’ qab’een laa’o?

• A’in jun chik na’leb’ li texxtenq’a chi aatinak chirix lix aajelil ru lix k’ab’a’ lix Iglees li Kolonel. Chirix aatinak chirixeb’ li yaalil na’leb’ neke’tawman sa’ 3 Nefi 27:1–22, taaruuq taatz’iib’a chixjunil lix k’ab’a’ li Iglees chiru li pizarron. Chirix a’an, eb’ li komon sa’ li tzoleb’aal te’ruuq chixsik’b’aleb’ ru li aatin sa’ li k’ab’a’ej ut chixyeeb’al chan ru naq li junjunq aatin nokoxtenq’a chixnawb’al aniho ut k’a’ru naqapaab’. Naru taak’anjelaq eere li raatin li Awa’b’ej M. Russell Ballard sa’ “Xkomon chik li k’anjeleb’aal.” K’a’ut naq aajel ru roksinkil lix k’ab’a’ li Iglees naq naqawotz li qapaab’aal rik’ineb’ li qas qiitz’in?

• Chirix xch’olob’ankil naq lix Iglees tento naq “kab’lanb’il sa’ xb’een lix evangelio” (3 Nefi 27:10), li Kolonel kixch’olob’ k’a’ru lix evangelio. Maare tatruuq chixkanab’ankileb’ li komon sa’ li tzoleb’aal chixwotzb’al chan raj ru te’xch’olob’ k’a’ru li evangelio chiru junaq ramiiweb’. Chirix a’an, tatruuq chixkanab’ankileb’ chi sik’ok sa’ 3 Nefi 27:13–22 re xtawb’al chan ru naq li Kolonel kixch’olob’ xyaalal lix evangelio. Chan ru naru naqaye chi k’osb’il ru li kixye li Kolonel? Naq naqatz’il rix chan ru naq li Kolonel kixch’olob’ xyaalal lix evangelio, k’a’ruheb’ li na’leb’ naqak’ul chirix xyu’aminkil li evangelio sa’ li qayu’am wulaj wulaj?

3 Nefi 29–30

Lix Hu laj Mormon a’an jun reetalil naq yoo chi tz’aqob’resiik ru lix k’anjel li Dios sa’ roso’jikeb’ li kutan.

• Maare taaruuq taatikib’ aatinak chirix 3 Nefi 29–30 rik’in aatinak chirixeb’ li eetalil. Qayehaq, eb’ li komon sa’ li tzoleb’aal te’ruuq chixyeeb’al resileb’ li eetalil li neke’xk’ut chiqu naq chal re li hab’ malaj naq yoo chi chalk li saq’ehil malaj li hab’alq’e. Chirix a’an, te’ruuq chirilb’al ru 3 Nefi 29:1–3 re xtzolb’al li k’a’ru eetalinb’il rik’in lix k’utunik lix Hu laj Mormon, “li yehom a’in” k’ab’a’inb’il xb’aan laj Mormon (chi’ilmanq ajwi’ 3 Nefi 21:1–7). K’a’ruheb’ li esil kixk’e li Qaawa’ sa’ 3 Nefi 29:4–9 reheb’ li “te’xtz’eq chirix” malaj “te’xtz’eqtaana” lix k’anjel li Dios sa’ roso’jikeb’ li kutan? Chan ru naq rilb’al ru lix Hu laj Mormon wulaj wulaj naxkawob’resi li qapaab’aal chirix li k’a’ru “tz’eqb’il chirixeb’ ” malaj “tz’eqtaananb’il xb’aaneb’ ” li kristiaan sa’ li qakutan laa’o? Maare taawaj xkanab’ankileb’ li tzolb’ileb’ aab’aan chirilb’al ru lix b’oqom li Qaawa’ sa’ 3 Nefi 30 ut chixwotzb’al chan ru naq lix Hu laj Mormon naxtenq’aheb’ chixk’ulub’ankil li b’oqok a’an.

4 Nefi

Li jalok ch’oolej choq’ re li Jesukristo ut lix evangelio nak’amok sa’ li junajil ut li sahil ch’oolejil.

• Li esil sa’ 4 Nefi naxk’ut xyaalal li sahil ch’oolejil li naru taachalq sa’ li qayu’am—sa’ junesal, jo’ junkab’al, ut jo’ teep malaj oqech—naq naqayal qaq’e re naq jalb’ilaq chi tz’aqal qach’ool choq’ re li Jesukristo. K’oxla xkanab’ankileb’ li komon chi sik’ok sa’ 4 Nefi 1:1–18 ut chixtz’iib’ankil chiru li pizarron eb’ li osob’tesink li ke’chal rik’ineb’ li tenamit naq chixjunileb’ ke’jale’ xch’ool choq’ re li Qaawa’. Chan ru naq lix jalajikeb’ xch’ool kixjal chan ru naq ke’wan chirib’ileb’ rib’? Maare eb’ li komon sa’ li tzoleb’aal te’ruuq chixwotzb’al chan ru naq li evangelio naxk’ameb’ li osob’tesink chanchaneb’ a’an sa’ xjunkab’aleb’ malaj sa’ li teep. Re xtenq’ankileb’ li komon chixtawb’al ru chan ru naru toowanq jo’eb’ li tenamit sa’ 4 Nefi ut chan ru naru taqanimob’resi li junajil ut li sahil ch’oolejil sa’ xyanqeb’ li wankeb’ chiqasutam, taaruuq taawil ru li raatin li Elder D. Todd Christofferson sa’ “Xkomon chik li k’anjeleb’aal.” Eb’ li komon sa’ li tzoleb’aal taaruuq te’xk’e reetal ma yalb’ileb’ xq’e chixb’aanunkil li oxib’ chi na’leb’ yeeb’ileb’ resil xb’aan li Elder Christofferson.

• Eb’ li tenamit sa’ lix Hu laj Mormon ke’xk’ab’a’i rib’ jo’ aj Nefita malaj jo’ aj Lamanita—ut naab’aleb’ chik aj “-ita”—chiru k’iila cient chihab’, a’ut chirix lix k’anjel li Kolonel sa’ xyanqeb’, maak’a’eb’ chik li jachal a’in. Chirix rilb’al ru 4 Nefi 1:17 sa’ komonil, maare eb’ li komon sa’ li tzoleb’aal te’ruuq chixwotzb’al li neke’xk’oxla chirixeb’ li jar paay chi aj “-ita” malaj chi ch’uut li wankeb’ sa’ li qatenamit sa’ li kutan a’in. K’a’ru naru taqab’aanu re numtaak sa’ xb’een li jachok-ib’ ut chi ok chi “junajo, ralal xk’ajolo li Kristo”? (raqal 17).

• K’a’ru naru te’xtzol li komon sa’ li tzoleb’aal rik’in lix t’anikeb’ li ke’wan choq’ jun tenamit Sion, jo’ yeeb’il resil sa’ 4 Nefi? Taaruuq taakanab’eb’ chi sik’ok sa’ 4 Nefi 1:19–34 re xtawb’al k’a’ru kixk’e chi oso’k li sahil ch’oolejil ut li junajil ke’wan wi’ li tenamit chiru haye’ 200 chihab’ chirix naq ke’ula’aniik xb’aan li Kolonel. K’a’ruheb’ li yaalil na’leb’ sa’eb’ li raqal a’in li naru toohe’xtenq’a chixk’eeb’al reetaleb’ li k’oxlahom ut li b’aanuhom li tento te’jale’q sa’ li qayu’am ut sa’ li qatenamit?

reetalil li tzolok

Xb’oqb’aleb’ chi tzolok sa’ kab’l

Sa’ Mormon 1–6 tz’iib’anb’il resileb’ li rahil na’leb’ li ke’k’amok sa’ lix sachlijikeb’ laj Nefita. Re xwaklesinkil xch’ooleb’ li tzolb’ileb’ aab’aan chirilb’aleb’ ru li ch’ol a’in, k’e xb’oqb’aleb’ chixsik’b’al li k’a’ru neke’xk’e reetal chirixeb’ laj Nefita li naqil chi uxmank sa’ li qakutan laa’o.

reetalil li kʼanjelebʼaal

Xkomon chik li kʼanjelebʼaal

Lix k’ab’a’ lix Iglees li Kristo.

Li Awa’b’ej M. Russell Ballard kixye:

“Naab’al ink’oxlahom chirix k’a’ut naq li Kolonel kixk’e choq’ xk’ab’a’ lix Iglees jun k’ab’a’ej li nim roq. Naru naqak’oxla naq nim roq, a’ut wi naqak’oxla jo’ jun ch’olob’ank chirix k’a’ru li Iglees, naqak’e reetal xch’ina-usal, naq k’osb’il ru, ch’olch’o, ut saqen ru. Chan raj ru taaruuq naq jun ch’olob’ank taawanq chi ch’olch’o wi’chik ut chi saqen wi’chik ru chiru a’an, a’ut toj yeeb’il rik’in yal junjunqeb’ li aatin?

“Li junjunq aatin saqen ru ut aajel ru. Li aatin Li naxch’olob’ naq junaj ru lix k’anjel li Iglees li k’ojob’anb’il wi’chik sa’ xyanqeb’ li jun ch’ol chik chi paab’aal sa’ ruchich’och’.

“Eb’ li aatin xIglees li Jesukristo neke’xch’olob’ naq re li Jesukristo li Iglees [chi’ilmanq 3 Nefi 27:8]. …

“Eb’ li aatin sa’ roso’jikeb’ li kutan neke’xch’olob’ naq juntaq’eet li Iglees a’in rik’in li Iglees li kixxaqab’ li Jesukristo sa’ lix k’anjel sa’ ruchich’och’ ut li kixk’ojob’ chi ak’il sa’eb’ li roso’jik li kutan a’in. Naqanaw naq kiwan jun xtz’eqtaanankil li paab’aal, malaj jun q’etok paab’ank, jo’kan naq ki’ajman ru jun xk’ojob’ankil wi’chik lix yaalil ut tz’aqal Iglees sa’ li qakutan.

“Laj Santil Paab’anel naraj naxye naq eb’ li komon neke’xtaaqe li Kristo ut neke’xyal xq’e chixb’aanunkil li rajom, chi ab’ink chiruheb’ lix taqlahom, ut chixkawresinkileb’ rib’ re te’wanq wi’chik rik’in a’an ut li qaChoxahil Yuwa’ sa’ junaq kutan. “Eb’ laj Santil Paab’anel a’aneb’ li neke’xsik’ xsantob’resinkil lix yu’ameb’ rik’in li ok sa’ sumwank naq te’xtaaqe li Kristo” (“La importancia de un nombre,” Liahona, noviembre 2011, 80).

K’a’ru taa’ajmanq ru re xkab’lankil li tenamit Sion?

Li Elder D. Todd Christofferson kixk’ut: “Li Sion, a’an Sion xb’aan lix ch’ooleb’, lix chaab’ilaleb’, ut lix tiikilaleb’ li neke’wan aran [chi’ilmanq Moises 7:18]. … Wi taqaj xxaqab’ankil Sion sa’eb’ li qochoch, li uq’ej, li teep, ut li oqech, tento naq taawanq qik’in li chaab’ilal a’in. Aajb’ilaq ru (1) naq toowanq sa’ junajil, chi junaj li qach’ool ut chi junaj li qak’a’uxl; (2) naq toosantob’resiiq sa’ junesal ut sa’ komonil, naq toowanq choq’ santil tenamit; ut (3) naq taqatenq’aheb’ li neb’a’ ut li maak’a’ wan reheb’ chi anchal qametz’ew toj reetal naq maak’a’aq chik li neb’a’il sa’ qayanq. Ink’a’ tooruuq chixb’ayb’al qib’ sa’ xb’aanunkileb’ li k’a’aq re ru a’in toj reetal naq ak chalenaq Sion—xb’aan naq taachalq Sion ka’ajwi’ rik’in naq ak yookeb’ chi uxmank” (“A Sión venid,” Liahona, noviembre 2008, 38).

Xchaab’ilob’resinkil li qak’utum

Oksi jalan jalanq paay chan ru naq nakatk’utuk. Wan naq ink’a’ ch’a’aj yal xb’aanunkil jun paay chi k’utuk, a’ut jalan jalanq paay chi k’utuk naru naxtenq’a chixjunqaleb’ li komon sa’ li tzoleb’aal. K’oxlaheb’ li paay chi k’utuk yookat chiroksinkil—ma nakawoksiheb’ li seraq’, li kok’ k’anjeleb’aal, li jalam-uuch, ut xkomon chik li na’leb’? (chi’ilmanq Li k’utuk jo’ li Kolonel, 7).