laj Mormon natz’iib’ak chiruheb’ li perel ch’iich’ oor

Laj Mormon naxk’oseb’ ru li perel ch’iich’, xb’aan laj Tom Lovell

26 octubre–1 noviembre

Mormon 1–6

“Nawaj raj naq tinruuq chixq’unb’esinkil eech’ool chejunilex … re naq teejal eek’a’uxl”

Naq nakawil ru Mormon 1–6, sik’eb’ li yaalil na’leb’ li neke’ru chixtenq’ankileb’ li komon sa’ laa tzoleb’aal chi kanaak chi tiikeb’ chi paab’ank sa’ xq’ehil li maa’usilal, jo’ kixb’aanu laj Mormon.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Wan naq ch’a’aj b’ayaq chiruheb’ li komon xwotzb’al lix na’leb’eb’ xb’aan naq maak’a’ xhoonaleb’ re xtusub’ankileb’ lix k’oxlahom. Re xtenq’ankileb’ rik’in a’in, k’e junjunq k’asal reheb’ re te’xtz’iib’aheb’ li na’leb’ xe’xk’ul naq xe’xtzol Mormon 1–6 sa’ rochocheb’; chirix a’an, kanab’eb’ chi wotzok.

reetalil li k’utuk

Xkʼutbʼal li tzolʼlebʼ

Mormon 1–6

Naru toowanq chi tiik qach’ool us ta wan li maa’usilal chiqasutam.

• Naab’aleb’ reheb’ li tzolb’ileb’ aab’aan neke’xtaw ru li kixnumsi laj Mormon sa’ xyalb’al xq’e chi wank chi tiik xch’ool sa’ jun ruchich’och’ nujenaq rik’in maa’usilal. Maare te’ruuq chixwotzb’al li xe’xtzol rik’in li kixb’aanu laj Mormon. Re xtikib’ankil li aatinak chirix a’in, taaruuq taakanab’eb’ li komon sa’ li tzoleb’aal chixtawb’aleb’ li raqal li neke’xye resileb’ lix chaab’ilal laj Mormon ut te’xtz’iib’aheb’ chi tustu chiru li pizarron (chi’ilmanq, jo’ eetalil, Mormon 1:2–3, 15–16; 2:1, 23–24; 3:1–3, 12, 17–22). Chan ru naq eb’ li chaab’ilal a’in ke’xtenq’a laj Mormon chi kanaak chi kaw rib’ sa’ musiq’ej? Chan ru naru toohe’xtenq’a chi wank jo’ laj Mormon?

  neke’xpleeti rib’ chirib’ileb’ rib’ laj Nefita ut eb’ laj Lamanita

  Li pleet, xb’aan laj Jorge Cocco

• Laj Mormon kitz’iib’ak chi kok’ aj xsa’ choq’ reheb’ li ani wankeb’ sa’ li qakutan. K’a’ru naru taqatzol rik’in li raatin choq’ qe sa’ Mormon 3:17–22 ut 5:10–24? K’e re li junjunq komon sa’ li tzoleb’aal jun ch’ina setb’il hu tz’iib’anb’il wi’ li ch’ol aatin “Lix na’leb’ laj Mormon choq’ qe,” ut waklesi xch’ooleb’ chixtawb’aleb’ li esil sa’eb’ li raqal a’in li toj aajeleb’ ru sa’ li qakutan. Chan ru naru taqak’anjela lix na’leb’ laj Mormon re tookanaaq chi kaw qib’ sa’ musiq’ej sa’ li ruchich’och’ anajwan?

• Wi nakatzoleb’ li saaj, taaruuq taawoksi lix b’aanuhom laj Mormon re xtenq’ankileb’ chixtawb’al ru naq naru te’wanq jo’ aj jolominel tiikeb’ xch’ool naq toj saajeb’. Wi nakatzoleb’ li ak ninqeb’, taaruuq taawoksi lix b’aanuhom a’an re xtikib’ankil li aatinak chirix chan ru xtenq’ankileb’ li saaj chi wank jo’ chaab’il aj jolominel. Re xtikib’ankil li aatinak, taaruuq taakanab’ junjunq reheb’ li komon chirilb’al wi’chik ru Mormon 1 ut lix komoneb’ chik chirilb’al wi’chik ru Mormon 2 re te’xk’e reetal naq kiwan laj Mormon chi jolomink naq toj saaj. K’a’ruheb’ lix chaab’ilal kiwan li ke’tenq’an re chi wank jo’ jun nim aj jolominel? Eb’ li komon sa’ li tzoleb’aal te’ruuq chixwotzb’al reetalil li xnimal ru wankilal neke’ril rik’ineb’ li kok’al ut saaj li tiikeb’ xch’ool. Te’ruuq ajwi’ chi aatinak chirixeb’ hoonal naq kanab’anb’ileb’ a’an—malaj li saaj neke’xnaw ru—chi jolomink rik’ineb’ li chaab’ilal li chanchaneb’ li re laj Mormon.

Mormon 2:10–15

Li jalb’a-k’a’uxlej naraj ru li yotʼbʼil chʼoolej ut li tuulanil musiqʼej.

• Re xtzolb’al chan ru naq jalan li rahil ch’oolejil li nak’amok sa’ li jalb’a-k’a’uxlej rik’in li rahil ch’oolejil li ink’a’ nak’amok sa’ li jalb’a-k’a’uxlej, naru teeril ru Mormon 2:10–15 sa’ komonil ut tex’aatinaq chirixeb’ li patz’om jo’eb’ a’in: K’a’ru lix k’anjel li “raho’k ch’oolej” sa’ li jalb’a-k’a’uxlej? Chan ru naq jalan li “rahok ch’oolej … re xjalb’aleb’ xk’a’uxl” rik’in li “raho’k ch’oolej reheb’ li k’eeb’ileb’ sa’ tojb’a-maak”? K’a’ruheb’ li k’oxlahom ut b’aanuhom li naru toohe’xtenq’a chi wank “chi yot’b’il qach’ool ut tuulan qamusiq’ ”?

Mormon 3:12

Naru taqaraheb’ li qas qiitz’in, us ta ink’a’ naqak’ulub’a chixjunil li neke’xsik’ ru xb’aanunkil.

• Jo’ laj Mormon, naab’al reheb’ li komon sa’ laa tzoleb’aal neke’xnaweb’ ru li kristiaan li jalaneb’ lix paab’ahom. Chan raj ru tatruuq chiroksinkil li kixk’ul laj Mormon re xk’utb’al chiruheb’ li komon sa’ li tzoleb’aal naq tento taqaraheb’ li qas qiitz’in us ta jalaneb’ qik’in? K’oxla rilb’al ru Mormon 3:12 sa’ komonil ut aatinak chirixeb’ li hoonal naq laj Mormon kixk’ut naq naxraheb’ li ani ke’tz’eqtaanank re li raatin ut li ke’xpo’resi xch’ool chiru li Dios chi ajb’il xb’aaneb’ (chi’ilmanq, jo’ eetalil, Mormon 1:16–17; 2:12). K’a’ru naru te’xwotz li komon sa’ li tzoleb’aal chirix xraab’aleb’ li ani jalaneb’ xpaab’ahom ut xna’leb’eb’? Naru taatawmanq xkomoneb’ chik li na’leb’ sa’ li raatin li Awa’b’ej Dallin H. Oaks sa’ “Xkomon chik li k’anjeleb’aal.”

Mormon 6:17

Xaqxo li Jesukristo chi teeto xtel re qak’ulb’al.

• Choq’ reheb’ li maak’a’ xyo’onihomeb’ naq taaruuq te’kuye’q lix maakeb’, li raatin laj Mormon chirix li Kolonel li naxqali “chi teeto xtel re eek’ulb’al” taaruuq tixk’ojob’eb’ xch’ool. K’oxla rilb’al ru Mormon 6:17 sa’ komonil ut xk’utb’al jun xjalam-uuch li Jesukristo chi teeto xtel (jo’ Libro de obras de arte del Evangelio, ajl 66). K’a’ru naxk’ut li raqal a’in chirix li rajom li Kolonel re qatenq’ankil? Taaruuq ajwi’ teeb’icha jun b’ich sa’ komonil li nak’utuk chirix a’in, jo’ “Chalqex rikʼin li Kolonel” (Eb’ li B’ich, 68). Taaruuq ajwi’ taawotz resil li kixk’ul li Awa’b’ej Russell M. Nelson sa’ “Xkomon chik li k’anjeleb’aal” ut taakanab’eb’ li komon sa’ li tzoleb’aal chi aatinak chirix chan ru naru taqatenq’aheb’ li qas qiitz’in chixnawb’al naq naru taa’uxq li jalb’a-k’a’uxlej.

reetalil li tzolok

Xb’oqb’aleb’ chi tzolok sa’ kab’l

Taaruuq taapatz’ reheb’ li komon naq te’k’oxlaq chirix li te’xtz’iib’a raj sa’ jun hu taqlanb’ilaq raj rik’ineb’ li kristiaan sa’ junaq kutan chalel. Sa’ Mormon 7–9 naqil ru li ke’xtz’iib’a laj Mormon ut laj Moroni k’iila cient chihab’ chaq, choq’ reheb’ li kristiaan sa’ li qakutan.

reetalil li kʼanjelebʼaal

Xkomon chik li kʼanjelebʼaal

Xraab’aleb’ li jalan lix paab’ahomeb’.

Li Awa’b’ej Dallin H. Oaks kixye:

“Tento naq chiqajunilo taqataaqe li k’utb’il sa’ li evangelio, naq taqaraheb’ li qas qiitz’in, ut naq ink’a’ toowech’oq. Eb’ li neke’taaqenk re li Jesukristo tento naq te’wanq choq’ reetalil li chaab’il ch’oolej. Tento taqara chixjunileb’, ut taqab’iheb’ chi us, ut taqa’oxloq’i lix paab’ahomeb’. Us ta ink’a’ junaqik li taqapaab’, ink’a’ raj tooch’a’ajko’q. Li qapaab’ahom ut li qaatin ink’a’ raj taayeemanq rik’in wech’ok-ib’. Chaab’ilaq raj qana’leb’ sa’ xch’olob’ankil ut xk’anjelankil li paab’anb’il qab’aan, ut sa’ xwaklesinkil li qana’leb’. Naq laa’o naqab’aanu a’in, naqatz’aama naq jalaneb’ ink’a’ te’po’q xch’ool rik’in li k’a’ru naqapaab’ chi anchal qach’ool, ut rik’in naq naqak’anjela li qapaab’aal jo’ qak’ulub’. Naqaj raj naq chiqajunilo taqab’aanu li kixye li Kolonel: “Jo’ teeraj te’xb’aanu li winq eere, chi jo’kan teeb’aanu reheb’ ” (Mateo 7:12).

“Wi sa’ raqb’a-aatin ink’a’ naxaqab’aak li paab’anb’il qab’aan, tento taqak’ulub’a a’an chi maak’a’ li josq’il, ut chi chaab’il qach’ool rik’ineb’ li ink’a’ neke’xk’ulub’a li qana’leb’ ” (“Xraab’al qib’ naq jalan jalanq li qana’leb’,” Jolomil ch’utub’aj-ib’ re octubre 2014).

Naru na’ux li jalb’a-k’a’uxlej.

Li Awa’b’ej Russell M. Nelson kixwotz a’in:

“Sa’ li chihab’ xnume’ naq li Elder David S. Baxter ut laa’in wanko sa’ b’e re xik sa’ jun ch’utub’aj-ib’ re oqech, xooxaqli sa’ jun li restaurante. Moqon naq yooko chi sutq’iik sa’ li qab’eleb’aal ch’iich’, xnach’o qik’in jun ixq li xooxb’oq. … A’an xpatz’ qe ma laa’o li elder sa’ li Iglees. Hehe’ xqaye re. Chi ink’a’ ramb’il li raatin, a’an xseraq’i qe resil lix rahil yu’am, nujenaq rik’in maak. Sa’ li hoonal a’an, 28 chihab’ wan re, ut q’axal ra xch’ool. Xreek’a naq maak’a’ xloq’al, ut maak’a’ aj-e lix yu’am. Naq yoo chi aatinak, x’ok chi k’utunk lix chaab’ilal li raam. Rik’in xya’al ru, xpatz’ qe ma toj wan yal ta jun miin raqal xyo’onihom, ma wan chan raj ru taa’elq sa’ xmaak’a’il li yo’onihom wan wi’.

“ “Hehe’,” chanko re, “wan li yo’onink. Li yo’onink laq’lo rik’in li jalb’a-k’a’uxlej. Naru tatjalaaq. Naru “tatchalq rik’in li Kristo, ut taatz’aqloq aawe aawu rik’in” [Moroni 10:32]. Xqelaji re naq ink’a’ tixb’ay rib’ chixb’aanunkil [chi’ilmanq Alma 13:27; 34:33]. X’ok chi yaab’ak ut xb’antioxin qe.

“Naq li Elder Baxter ut laa’in xqachap wi’chik qab’e, xqak’oxla li xqak’ul aran. Xjultiko’ qe li na’leb’ k’eeb’il re jun aamej li maak’a’ xyo’onihom xb’aan laj Aaron, li kixye, “Wi taajal aak’a’uxl chirix chixjunil laa maak, ut taakub’si aawib’ chiru li Dios, ut taapatz’ xk’ab’a’ rik’in paab’aal … taak’ul laa yo’onihom li ajb’il aab’aan” [Alma 22:16]. …

“… Re li ixq li 28 chihab’ xyu’am li b’aqlenb’il rib’ sa’ xsululil li maak, ut re li junjunq qe, laa’in ninye naq naru taa’uxq li ki’il osob’tesink re li jalb’a-k’a’uxlej. Nachal rik’in xjalb’al qach’ool chi junajwa chirix li Qaawa’ ut lix santil k’anjel.”

Jo’kan ajwi’, li Awa’b’ej Nelson kixye; “Jultikeb’ ajwi’ qe laj maak li ilb’ileb’ xb’aan laj jolominel reheb’, laj Mormon, li kixtz’iib’a: “Maak’a’ inyo’onihom, xb’aan naq kinnaw lix raqb’a-aatin li Qaawa’ li taachalq sa’ xb’eeneb’; xb’aan naq ink’a’ ke’xjal xk’a’uxl chirix lix maa’usilaleb’; ke’xyal ru b’an re xkolb’al lix yu’ameb’ chi ink’a’ neke’xpatz’ xk’ab’a’ li ani kiyo’ob’tesink chaq reheb’ ” (Mormon 5:2)” (“El arrepentimiento y la conversión,” Liahona, mayo 2007, 102–105).

Xchaab’ilob’resinkil li qak’utum

Li musiq’ejil k’iik na’uxman sa’ kab’l. Rajlal xamaan, wankeb’ 166 hoor reheb’ li komon sa’ laa tzoleb’aal naq moko wankeb’ ta sa’ li iglees. Chiru li hoonal a’an, neke’xk’ul lix musiq’ejil numsihom xjuneseb’ rib’ b’ar wi’ neke’tzolok chirix li evangelio. Oksiheb’ li patz’om li te’xwaklesi xch’ooleb’ li komon chixwotzb’al li xe’xtzol chiru li xamaan sa’ junesal ut sa’ junkab’al (chi’ilmanq Li k’utuk jo’ li Kolonel, 18).