Laj Moroni natz’iib’ak chiruheb’ li perel ch’iich’ oor, xb’aan laj Dale Kilborn

2–8 noviembre

Mormon 7–9

“Nekexwaatina chanchan naq wankex chiwu”

Numsiheb’ laa musiq’anb’il na’leb’ xatz’iib’a naq xattzolok sa’ Mormon 7–9 chiru li xamaan a’in. K’a’ruheb’ li raqal sa’eb’ li ch’ol a’in li nakaweek’a naq us raj xnumsinkil rik’in laa tzoleb’aal?

Xtz’iib’ankil li nakak’oxla

Xkanab’ankileb’ chi wotzok

Re xk’eeb’al xhoonaleb’ li komon sa’ li tzoleb’aal chixwotzb’al k’a’ruhaq xe’xtzol sa’ junesal malaj sa’ junkab’al, taaruuq taawaklesi xch’ooleb’ chixnumsinkil sa’ junpaat Mormon 7–9 ut chixwotzb’al jun ch’ol aatin (malaj raqal) li neke’xb’antioxi chiru naq laj Mormon malaj laj Moroni naq ke’xsik’ ru xtz’iib’ankil chiruheb’ li perel ch’iich’.

Xkʼutbʼal li tzolʼlebʼ

Mormon 7:8–10; 8:12–22; 9:31–37

Nim xloq’al lix Hu laj Mormon.

• Re xtikib’ankil li aatinak chirix lix nimal xloq’al lix Hu laj Mormon, taaruuq tat-aatinaq chirix chan ru naqab’is xtz’aq malaj xloq’al junaq k’a’aq re ru. Chan ru naq xnawb’al lix loq’al k’a’ruhaq naxjal chan ru naqoksi? Eb’ li komon sa’ li tzoleb’aal te’ruuq chi sik’ok sa’ Mormon 8:12–22 ut chixwotzb’al li kixye laj Moroni chirix lix loq’al lix Hu laj Mormon (“li tz’iib’anb’il esil a’in”). Te’ruuq ajwi’ chixwotzb’al li xe’xk’ul sa’ xyu’ameb’ li xk’ut chiruheb’ lix loq’al lix Hu laj Mormon. Chan ru naru naqak’ut naq wan xloq’al lix Hu laj Mormon choq’ qe?

  

  Lix Hu laj Mormon naxkutanob’resiheb’ li tzol’leb’ k’utb’ileb’ sa’ li Santil Hu.

• Re xtenq’ankileb’ li tzolb’ileb’ aab’aan chixk’eeb’al reetal chan ru naq lix Hu laj Mormon ut li Santil Hu neke’xk’am rib’, taaruuq taakanab’eb’ chirilb’al ru Mormon 7:8–10 ut chixk’osb’al ru li raatin laj Mormon chirixeb’ li wiib’ chi tz’iib’anb’il esil a’in rik’in tz’aqal li raatineb’ a’an (“li tz’iib’anb’il esil li taawulaq rik’ineb’ laj Gentil chi chalenaq chaq rik’ineb’ laj Judio” na’aatinak chirix li Santil Hu). K’oxla xyiib’ankil xjalam-uuch wiib’ li sirso li neke’xk’uli rib’ sa’ xyiheb’ chiru li pizarron ut taatz’iib’a Li Santil Hu sa’ xb’een li jun ut Lix Hu laj Mormon sa’ xb’een li jun chik. Eb’ li komon te’ruuq chixtz’iib’ankil chan ru naq li Santil Hu a’an chanchan lix Hu laj Mormon sa’ li jachal reheb’ li sirso li wotzb’il xb’aan xkab’icha’leb’, ut chan ru naq jalaneb’ sa’ li jun jachal chik re li junjunq sirso. (Li video “La Biblia y el Libro de Mormón” sa’ ChurchofJesusChrist.org naru natenq’an.) Malaj ut, k’oxla xtz’iib’ankil chi tustu junjunqeb’ li yaalil na’leb’ re li evangelio chiru li pizarron ut xkanab’ankileb’ li komon chi sik’ok sa’ li K’utul Raqal reheb’ li Loq’laj Hu re xtawb’aleb’ li raqal sa’ lix Hu laj Mormon ut li Santil Hu li neke’xtenq’aheb’ chixtawb’aleb’ ru li yaalil na’leb’ a’an.

Mormon 8:1–11

Naru naq tiiko chi paab’ank us ta qajunes wanko.

• Wankeb’ tana’ li komon sa’ laa tzoleb’aal li neke’reek’a naq xjunes wankeb’ sa’ xyalb’aleb’ xq’e chixyu’aminkil li evangelio. K’a’ru taaruuq te’xtzol rik’in laj Moroni li taaruuq tixtenq’aheb’? K’oxla xkanab’ankileb’ li tzolb’ileb’ aab’aan chirilb’al ru Mormon 8:1–11 ut chixk’oxlankil li taawulaq raj chiruheb’ xpatz’b’al re laj Moroni re te’xtzol chan ru naq a’an kikana chi tiik chi paab’ank us ta ch’a’aj li kiwan wi’. K’a’ru naxk’e xkawilal xch’ooleb’ chirix li kixb’aanu a’an? Naq neke’xwotzeb’ lix k’oxlahom, waklesi xch’ooleb’ li komon chixwotzb’al chan ru naq eb’ a’an malaj anihaq chik li neke’xnaw ru xkana chi tiik chi paab’ank, us ta xe’reek’a naq xjunes wankeb’. Chan ru naq li Qaawa’ xtenq’aheb’?

Mormon 8:26–41; 9:1–30

Lix Hu laj Mormon kitzʼiibʼaman choqʼ re li qakutan.

• Naq ak raqe’k re li tzolok chirix lix Hu laj Mormon chiru li chihab’ a’in, maare eb’ li komon sa’ li tzoleb’aal te’ruuq chi k’oxlak chirix k’a’ut naq neke’reek’a naq kitz’iib’aman li hu a’in choq’ re li qakutan. Taaruuq taatikib’ li aatinak rik’in rilb’al ru li raatin li Awa’b’ej Ezra Taft Benson sa’ “Xkomon chik li k’anjeleb’aal.” Eb’ li komon te’ruuq chiroksinkileb’ lix patz’om li Awa’b’ej Benson sa’ xtzolb’al Mormon 8:26–41. K’a’ut naq li Qaawa’ kixmusiq’a laj Moroni chixtz’iib’ankileb’ li aatin a’in sa’ li tz’iib’anb’il esil? Chan ru nokoxtenq’a lix tz’iib’ahom a’an sa’ li qakutan?

• Jo’ k’utb’il sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, wan li raatin laj Moroni sa’ Mormon 9:1–30 li na’aatinak chirix xmaak’a’il li paab’aal chirix li Jesukristo sa’ li qakutan. Maare taakuub’eb’ li tzolb’ileb’ aab’aan sa’ oxib’ ch’uut ut taakanab’ li junjunq ch’uut chixtawb’aleb’ li na’leb’ li neke’xtenq’aheb’ sa’eb’ li raqal a’in: 1–6 (li k’a’ru nachal xb’aan ink’a’ xpaab’ankil li Kristo), 7–20 (lix aajelil ru xpaab’ankil naq li Dios a’an jun Dios re k’utb’esinb’il na’leb’ ut sachb’a-ch’oolej), ut 21–30 (lix na’leb’ laj Moroni choq’ qe).

• Us ta tz’iib’anb’il Mormon 9:1–6 choq’ reheb’ “li ink’a’ neke’paab’ank re li Kristo,” naru taak’anjelaq qe chiqajunil xk’oxlankil naq xaqxooqo chiru rilob’aal li Dios sa’ junaq kutan re taaraqe’q aatin chiqix. Kanab’eb’ li tzolb’ileb’ aab’aan chixnumsinkileb’ li raqal a’in re xtawb’aleb’ li aatin malaj ch’ol aatin li neke’xch’olob’ k’a’ru te’reek’a laj maak sa’ li kutan a’an. K’a’ru naru taqab’aanu re naq ink’a’ taqeek’a a’an? Eb’ li komon sa’ li tzoleb’aal maare te’xtaw li chaab’il na’leb’ sa’ li seraq’ xb’aan li Awa’b’ej Boyd K. Packer sa’ “Xkomon chik li k’anjeleb’aal.”

• Wankeb’ naab’al sa’ li kutan a’in li neke’xpaab’ naq maak’a’eb’ chik li sachb’a-ch’oolej. Chan ru naru taawoksiheb’ lix k’utum laj Moroni re xtenq’ankileb’ li tzolb’ileb’ aab’aan chixpaab’ankil naq wan jun li “Dios re sachb’a-ch’oolej”? Taaruuq taatikib’ rik’in xkanab’ankileb’ li komon chixnumsinkil Mormon 9:7–26 re xtawb’aleb’ li sachb’a-ch’oolej kirelaji qe laj Mormoni naq te’qapaab’. K’a’ru naqatzol sa’eb’ li raqal a’in chirix li Dios ut lix k’anjel sa’ li qakutan laa’o? K’a’ru tento taqab’aanu re naq li Dios tixk’anjelaheb’ li sachb’a-ch’oolej? (chi’ilmanq Mormon 9:20–21). K’a’ruheb’ li sachb’a-ch’oolej ak xqil?

Xb’oqb’aleb’ chi tzolok sa’ kab’l

Ma wankeb’ li komon sa’ laa tzoleb’aal li neke’k’oxlak chirix chan ru te’ruuq chixnimob’resinkil lix paab’aaleb’ chirix li qaChoxahil Yuwa’ ut li Jesukristo? Wi jo’kan, k’e xb’oqb’aleb’ chirilb’al ru Eter 1–5 re xtawb’al chan ru taaruuq chi nimank lix paab’aaleb’.

Xkomon chik li kʼanjelebʼaal

Lix Hu laj Mormon kitzʼiibʼaman choqʼ re li qakutan.

Li Awa’b’ej Ezra Taft Benson kixye:

“Maajun wa kiwan li hu rik’ineb’ laj Nefita, chi moko eb’ laj Lamanita re najter q’e kutan. Li hu a’an tz’aqal choq’ qe laa’o. …

“Li junjunq aj tz’iib’ahom re lix Hu laj Mormon kixch’olob’ xyaalal naq yoo chi tz’iib’ak choq’ reheb’ li tasal tenamit toj te’chalq [chi’ilmanq 2 Nefi 25:21; Jakob 1:3; Mormon 7:1; 8:34–35]. …

“Wi ke’ril li qakutan, ut ke’xsik’ ru li k’a’ru q’axal nimaq xloq’al choq’ qe laa’o, ma moko jo’kan ta naq tento taqatz’il rix lix Hu laj Mormon? Tento naq rajlal taqapatz’ qib’, “K’a’ut naq li Qaawa’ kixmusiq’a laj Mormon (malaj laj Moroni malaj laj Alma) chixtz’iib’ankil a’in sa’ li esil? K’a’ru naru tintzol rik’in li tz’iib’anb’il li tinixtenq’a sa’ inyu’am sa’ li kutan a’in?” (“El Libro de Mormón: La [piedra] clave de nuestra religión,” Liahona, octubre 2011, 55–56).

Naru naq maak’a’aq li qatz’ajnil.

Li Awa’b’ej Boyd K. Packer ki’aatinak chirix jun kutan naq chiru waqib’ kutan wan chi b’eek sa’ jun li tren jwal tiq ut nujenaq chi sib’ rochb’een jun ch’uut chi aj puub’, ut maak’a’ chan ru atink chi moko xjalb’al li raq’. Naq kixaqli li tren chiru junpaat, xkoheb’ chi wa’ak sa’ jun wa’leb’aal.

“Laatz’ aran, jo’kan naq kooxaqli sa’ jun najtil tzol chi kristiaan, yooko chiroyb’eninkil naq taak’ehe’q qana’aj re chunlaak. Laa’in chaq li xb’een, xaqxookin chixk’atq junjunqeb’ li ixq chaab’ileb’ li raq’. Us ta ink’a’ kixsutq’isi rib’, li ixq wan chiwu kixk’e reetal naq wanko aran.

“Kixsutq’isi rib’ ut kooril. “Toja’ naq kinixka’ya chinjunxaqalil. Aran xaqxookin, tiqtookin sa’ li aq’ej tz’aj, mochmo, ut nujenaq rik’in tiqob’ ut ab’aq. Kixye, “Aay, k’a’jo’ xtz’ajnileb’ li winq a’in!” Chixjunileb’ ke’ok chiqaka’yankil.

“Ch’olch’o naq ink’a’ kiraj naq wanko aran; laa’in ajwi’ ink’a’ kiwaj wank aran. Tz’ajin kiweek’a chanchan li waq’, ink’a’ sa kiweek’a, ut kinxutaanak.”

Chirix a’an, li Awa’b’ej Packer kiril ru Mormon 9:4 ut kixjuntaq’eeta li k’a’ru kixk’ul rik’in li wank chi tz’aj sa’ musiq’ej chiru rilob’aal li Dios. Kixch’olob’ xyaalal naq ka’ajwi’ rik’in lix tojb’al rix li maak xb’aan li Jesukristo taaruuq chi ok chi saq ru sa’ musiq’ej, toja’ naq kixye:

“Ma naru taak’oxla chan ru kiweek’a naq kintaw ru naq wi tintaaqe yalaq taqlahom k’eeb’il xb’aan laj Tojol-ix, maajun wa tento tinnumsi li rahilal li nachal rik’in li wank chi tz’aj sa’ musiq’ej? K’oxla li k’ojk’ookil ch’oolej, li ach’ab’aak, ut li waklesinb’il ch’oolej li taachalq aawik’in naq nakawil lix yaalalil lix tojb’al rix li maak ut xnimal lix loq’al choq’ aawe rajlal kutan” (“Lavados y purificados,” Ensign, mayo 1997, 9–10).

Xchaab’ilob’resinkil li qak’utum

Tijon chirixeb’ li komon sa’ laa tzoleb’aal. Ma wan anihaq sa’ laa tzoleb’aal li ch’a’ajkilanb’il? Jo’ chanru naq li Kolonel kitijok chirix laj Pedro (chi’ilmanq Lukas 22:31–32), laa’at naru tattijoq chirixeb’ li tzolb’ileb’ aab’aan re naq te’kawob’resiiq (chi’ilmanq Li k’utuk jo’ li Kolonel, 6).