Laj Eter naxmuq rib’ sa’ xtehelal jun pek, xb’aan laj Gary Ernest Smith

23–29 noviembre

Eter 12–15

“Rik’in li paab’aal natz’aqob’resiik ru chixjunil li k’a’aq re ru”

Li rajom li tusleb’ aatin a’in maawa’ xtaqlankil li tento taak’ulmanq sa’ li tzoleb’aal. A’an jun tenq’ rochb’een li na’leb’ taak’utb’esimanq chawu—moko naxk’ul ta xna’aj li k’utb’esinb’il na’leb’. Kanab’ naq li Musiq’ej tatxb’eresi sa’ li tzolok ut li kawresink-ib’, ut chirix a’an, il ma naru naq li kok’ k’anjel sa’ li tusleb’ aatin te’xtenq’aheb’ li komon sa’ li tzoleb’aal chixtawb’aleb’ ut chixwotzb’aleb’ li aajel ruhil na’leb’ sa’ Eter 12–15.

Xtz’iib’ankil li nakak’oxla

Xkanab’ankileb’ chi wotzok

Re xtenq’ankileb’ li tzolb’ileb’ aab’aan chixwotzb’al li xe’xtzol sa’eb’ li loq’laj hu sa’ junesal malaj sa’ junkab’al, taaruuq taatz’iib’a chiru li pizarron eb’ li ch’ol aatin jo’ “Laa’in xintzol naq …” “Laa’in wan xnawom inch’ool chirix …” ut “Laa’in xink’ul …” Kanab’eb’ li komon chixwotzb’al jun na’leb’ sa’ Eter 12–15 li taaruuq tixtz’aqob’resi ru jun reheb’ li ch’ol aatin tz’iib’anb’il chiru li pizarron.

Xkʼutbʼal li tzolʼlebʼ

Eter 12:2–22

Taqak’ul li qanawom chirix li yaal naq naqak’anjela li qapaab’aal chirix li Jesukristo.

• Re xtenq’ankileb’ li komon sa’ li tzoleb’aal chixk’oxlankil k’a’ru naraj naxye xk’anjelankil li qapaab’aal chirix li Jesukristo, taaruuq taapatz’ reheb’ k’a’ruheb’ li na’leb’ malaj aatin neke’chal sa’ xk’a’uxleb’ naq neke’rab’i li aatin k’anjelak. (Taaruuq taasik’ li aatin a’an sa’ jun xtusulal aatin.) K’a’ru naxk’ul li qajunxaqalil naq nokok’anjelak chi kaw? Chan ru naru taqajuntaq’eeta li na’leb’ a’in rik’in li paab’aal? Chan ru naru “taqak’anjela qapaab’aal” chirix li Kristo? Eb’ li komon sa’ li tzoleb’aal te’ruuq chi sik’ok sa’ Eter 12:2–22 ut chi aatinak chirix chan ru naq eb’ li tenamit sa’eb’ li raqal a’in ke’xk’anjela xpaab’aaleb’. Chan ru naru taqataaqe li ke’xb’aanu eb’ a’an? Jo’ chanru naxye sa’eb’ li raqal a’in, k’a’ru nachal rik’in xk’anjelankil li qapaab’aal chirix li Jesukristo?

• Eb’ li esilal chirix li paab’aal sa’ Eter 12:7–22 chanchaneb’ xkomoneb’ chik li musiq’anb’il seraq’ xetzol sa’ komonil sa’ lix Hu laj Mormon. Maare eb’ li komon sa’ li tzoleb’aal te’ruuq chixwotzb’al jalaneb’ chik li esilal chirix li paab’aal ut li k’a’ru neke’xtzol rik’ineb’ (junjunqeb’ chik naru neke’tawman sa’ Hebreos 11). Te’ruuq ajwi’ chixwotzb’al li esilal chirix li paab’aal sa’ resilaleb’ lix junkab’al malaj sa’ xyu’ameb’ ajwi’ a’an. Chan ru naq eb’ li esilal a’in neke’xkawob’resi lix paab’aaleb’ chirix li Jesukristo ut li qaChoxahil Yuwa’?

• Nujenaq Eter 12 rik’in musiq’anb’il ut yaalil na’leb’ chirix li paab’aal. Eb’ li komon te’ruuq chixtawb’aleb’ li raqal sa’ li ch’ol a’in neke’xtaw wi’ xna’leb’eb’ chirix li paab’aal. Chirix a’an, te’ruuq chixtz’iib’ankil li neke’xtaw chiru li pizarron.

Eter 12:1–9, 28, 32

Li paab’aal nak’amok sa’ li “xyo’oninkil jun ruchich’och’ li chaab’il wi’chik.”

• Ma wan anihaq sa’ laa tzoleb’aal li naru tixch’olob’ k’a’ut naq aajel ru li xaqleb’ sa’ jun jukub’? Taaruuq taak’ut xjalam-uuch jun li jukub’ ut lix xaqleb’ (malaj taayiib’ xjalam-uucheb’ chiru li pizarron) ut tat-aatinaq chirix k’a’ raj ru taa’uxq rik’in jun jukub’ maak’a’ xxaqleb’. K’a’ru na’ux qik’in naq maak’a’ li qayo’onihom? Eb’ li komon te’ruuq chirilb’al ru Eter 12:4 ut chi aatinak chirix chan ru naq li yo’onink chanchan “jun xaqleb’ choq’ re li qaam.” Te’ruuq ajwi’ chirilb’al ru Eter 12:1–9, 28, ut 32 ut chixwotzb’aleb’ li na’leb’ xe’xk’ul chirix li yo’onink. K’a’ru li tento taqayo’oni? (chi’ilmanq Eter 12:4; Moroni 7:41; chi’ilmanq ajwi’ Jwan 16:33).

Eter 12:23–29

Rik’in li rusilal li Jesukristo, naru taak’ehe’q li k’a’ru q’un xmetz’ew choq’ kawilal.

• Re xtenq’ankileb’ li tzolb’ileb’ aab’aan chixtawb’aleb’ ru li yaalil na’leb’ kixtzol laj Mormon chirix xq’unal li metz’ew ut li kawilal sa’ Eter 12, taaruuq taakanab’eb’ li komon chixk’oxlankil anihaq li maare naka’ch’ino’ xch’ool xb’aan xq’unal lix metz’ew. Chirix a’an, kanab’eb’ li komon chi sik’ok sa’ Eter 12:23–29 re xtawb’aleb’ li na’leb’ li te’ruuq chixtenq’ankil li ani xe’xk’oxla wi’. Wi ta wan arin laj Moroni anajwan, k’a’ raj ru tixye re xwaklesinkil xch’ool li kristiaan a’an? Eb’ li komon sa’ li tzoleb’aal te’ruuq ajwi’ chixwotzb’al li xe’xk’ul sa’ xyu’ameb’ naq li Kolonel xtenq’an “chixk’eeb’al li k’a’ru q’un xmetz’ew choq’ kawilal chiruheb’ ” (Eter 12:27). Chan ru naq jalan li jalaak a’in rik’in li chaab’ilob’resink-ib’ naru tixb’aanu junaq chi ink’a’ naxkanab’ rib’ chiru li Kolonel? Re xtawb’al xkomon chik li na’leb’ chirix a’in, chi’ilmanq li raatin li Awa’b’ej Henry B. Eyring sa’ “Xkomon chik li k’anjeleb’aal.”

• Li kixk’ul laj Moroni, a’an jun reheb’ naab’aleb’ li seraq’ sa’eb’ li loq’laj hu li neke’xk’ut chan ru naq li rusilal li Kolonel naru tixk’e xq’unal qametz’ew choq’ kawilal. Maare usaq raj xk’uub’ankil li tzoleb’aal sa’ kok’ ch’uut ut xkanab’ankil li junjunq ch’uut chixsik’b’al ru anihaq sa’eb’ li loq’laj hu li wan junaq xq’unal lix metz’ew, ut aatinak chirix chan ru naq li Qaawa’ kixkawob’resi li kristiaan a’an. Naru xtawb’al xk’ab’a’eb’ junjunqeb’ li taaruuq tex’aatinaq wi’ sa’ “Xkomon chik li k’anjeleb’aal.” Taaruuq ajwi’ taaye reheb’ li komon naq te’xtz’il rix li k’a’ru naraj naxye li aatin “usilal” sa’ li K’utul Raqal reheb’ li Loq’laj Hu malaj sa’ Leales a la Fe (eb’ li perel 95–97). Chan ru naq eb’ li esilal sa’eb’ li loq’laj hu neke’xk’ut xyaalal li wankilal li wan rik’in li rusilal li Kolonel? Chan ru naqak’ul li wankilal a’in sa’ li qayu’am?

• Wan naq naqak’e reetal lix q’unal li qametz’ew ut li kawilal naqil rik’in anihaq chik; laj Moroni kireek’a ajwi’ naq q’un xmetz’ew chiru li ras laj Jared (chi’ilmanq Eter 12:24). K’a’ut naq xiwxiw xjuntaq’eetankil qib’ rik’ineb’ jalan kristiaan? Jo’ chanru li naxye sa’ Eter 12:26–27, chan ru naraj li Qaawa’ naq naqileb’ lix q’unal li qametz’ew? (chi’ilmanq ajwi’ li raatin li Awa’b’ej Henry B. Eyring sa’ “Xkomon chik li k’anjeleb’aal.” Chan ru naraj a’an naq naqileb’ xq’unaleb’ xmetz’ew li qas qiitz’in? (chi’ilmanq Eter 12:26).

Eter 13–15

Xtz’eqtaanankileb’ li profeet nak’amok sa’ li xiwxiw re li musiq’ej.

• Rik’in naq jwal aajeleb’ ru li yaalil na’leb’ neke’k’utman sa’ Eter 12, maare ink’a’ taasik’ ru roksinkil naab’al li hoonal sa’ li tzoleb’aal re xtzolb’aleb’ li ch’ol 13–15. A’ut maare us xkanab’ankil jun li komon sa’ li tzoleb’aal chixyeeb’al chi k’osb’il ru li nak’ulman sa’eb’ li ch’ol a’in. Re xtenq’ankileb’ li tzolb’ileb’ aab’aan chixtawb’aleb’ li chaab’il na’leb’ sa’ li esilal a’in, taaruuq taakanab’eb’ chixtz’aqob’resinkil ru li ch’ol aatin a’in “chi jo’kan naqil …” rik’in jun na’leb’ neke’xtzol rik’in lix t’anikeb’ laj Jaredita. Chan ru naq lix t’anikeb’ a’an chanchan lix t’anikeb’ laj Nefita? (chi’ilmanq, jo’ eetalil, Eter 15:19 ut Moroni 8:28). K’a’ru naraj li Qaawa’ naq taqatzol sa’eb’ li esilal a’in, ut k’a’ru naru taqab’aanu re ink’a’ toot’ane’q jo’eb’ laj Jaredita? Eb’ li komon sa’ li tzoleb’aal te’ruuq ajwi’ chixtz’ilb’al rix chan ru naq lix raqik lix hu laj Eter naxk’ul rib’ rik’in Omni 1:19–22; Mosiah 8:8; ut Mosiah 28:11–18.

Xb’oqb’aleb’ chi tzolok sa’ kab’l

Sa’ li xamaan chal re, eb’ li komon sa’ li tzoleb’aal te’ok chi tzolok sa’ lix hu laj Moroni. Maare taawulaq chiruheb’ li komon xnawb’al naq laj Moroni ink’a’ kixnaw naq tixtz’iib’a xkomoneb’ chik lix na’leb’ chirix xraqik lix hu laj Eter, a’b’an kikana chi yo’yo us ta kixk’oxla naq taakamsiiq. Chiru li xamaan a’in te’ok chirilb’al ru li roso’jikil aatin kimusiq’aak wi’ laj Moroni chixtz’iib’ankil rub’elaj lix kamik.

Xkomon chik li kʼanjelebʼaal

Re chaab’ilo’k sa’ musiq’ej, tento taqileb’ xq’unal li qametz’ew.

Li Awa’b’ej Henry B. Eyring kixk’ut a’in chirix Eter 12:27: “Laj Moroni kixye naq rik’in “rab’inkil li aatin a’in, kik’ojob’aak xch’ool” (Eter 12:29). Eb’ li aatin a’in naru te’xk’ojob’ qach’ool chiqajunil. Eb’ li ani ink’a’ neke’xk’e reetal lix q’unaleb’ xmetz’ew ink’a’ neke’xik chi uub’ej. Xk’eeb’al reetal lix q’unal aametz’ew a’an jun osob’tesink, xb’aan naq nakatxtenq’a chi wank chi tuulan aach’ool ut chixsutq’isinkil aawib’ rik’in li Kolonel. Li Musiq’ej moko ka’aj ta wi’ naxk’ojob’ aach’ool, a’an ajwi’ li k’a’ru naxk’e xwankil lix tojb’al rix li maak chixjalb’al anihat laa’at. Rik’in a’an li k’a’ru q’un xmetz’ew nawulak choq’ kawilal” (“Lin tuqtuukilal usilal ninkanab’ eerik’in,” Jolomil ch’utub’aj-ib’ re abril 2017).

Eb’ li esilal: Neke’kawob’resiik li q’uneb’ xmetz’ew.

• Laj Enok (Moises 6:31–34; 7:13)

• Laj Moises (Exodo 4:10–12; 14:31)

• Laj Gedeon (Jueces 6:12–16; 8:22–23)

• Laj Pedro (Lukas 5:8–10; 22:55–62; Hechos 4:13–21)

• Laj Moroni (Eter 12:23–29)

• Laj Jose Smith (Jose Smith—Resilal 1:28; Tzol’leb’ ut Sumwank 35:17; 135:3)

Xchaab’ilob’resinkil li qak’utum

Taakʼut li “k’a’ut.” “Wan naq eb’ li komon sa’ li tzoleb’aal—ut k’a’jo’ wi’chik eb’ li saaj—neke’raj xnawb’al chan ru naq eb’ li xb’eenil na’leb’ re li evangelio neke’k’anjelak sa’ xyu’ameb’ malaj k’a’ut naq tento te’xpaab’ jun li taqlahom. A’b’anan, wi neke’xtaw ru lix junelikil k’uub’anb’il na’leb’ li qaChoxahil Yuwa’ choq’ re xsahileb’ xch’ool li ralal xk’ajol a’an, saqen chik sa’ xk’a’uxleb’ li rajb’aleb’ li xb’eenil na’leb’ ut li taqlahom, ut naniman li rajomeb’ chi paab’ank” (Li k’utuk jo’ li Kolonel, 20).