Li xMinerva Teichert (1888–1976), Laj Alma nakub’sin ha’ sa’ li ha’ Mormon, 1949–1951, óleo en masonite, 35⅞ x 48 pulgadas. Museo de Arte, Universidad de Brigham Young, 1969

30 noviembre–6 diciembre

Moroni 1–6

“Re te’kanaaq sa’ li tiikil b’e”

Laj Moroni kiraj naq li k’a’aq re ru kixtz’iib’a “taawanq xloq’al” choq’ reheb’ li ani te’wanq xyu’am sa’ roso’jikeb’ li kutan (Moroni 1:4). Naq nakawil ru Moroni 1–6, k’oxla rik’in tijok li k’a’ru taawanq xnimal xloq’al choq’ reheb’ li nakatzol.

Xtz’iib’ankil li nakak’oxla

Xkanab’ankileb’ chi wotzok

Wan naq eb’ li komon sa’ li tzoleb’aal mas wi’chik naq te’ruuq chixwotzb’al lix na’leb’eb’ chirix li xe’xtzol wi nak’eeman reheb’ junjunq hoonal re xjultikankil li xe’ril ru. Taaruuq taawoksi junjunq k’asal sa’ xtiklajik li tzoleb’aal re xnumsinkil li aatin sa’ xjolomileb’ li ch’ol sa’ Moroni 1–6. (A’in naru ajwi’ tixtenq’aheb’ li komon li ink’a’ xe’ril ru sa’ ochoch.) Chirix a’an, kanab’eb’ li komon chi sik’ok sa’eb’ li ch’ol a’in re xtawb’al jun raqal li nawulak chiruheb’ ut li te’raj xwotzb’al rik’ineb’ li rech aj komon sa’ li tzoleb’aal.

Xkʼutbʼal li tzolʼlebʼ

Moroni 2–6

Tento te’b’aanumanq li k’ojob’anb’il k’anjel re li tijonelil jo’ chanru taqlanb’il xb’aan li Qaawa’.

• Wi eb’ li komon sa’ laa tzoleb’aal (malaj eb’ li ani raarookeb’ xb’aaneb’) yookeb’ chixkawresinkil rib’ re xk’ulb’al jun k’ojob’anb’il k’anjel re li tijonelil, maare usaq raj xnumsinkil li kixk’ut laj Moroni chirixeb’ li k’ojob’anb’il k’anjel sa’ Moroni 2–6. Eb’ li komon te’ruuq chi k’anjelak chi ka’kab’il re xb’aanunkileb’ li k’utb’esink jo’eb’ li tz’iib’anb’il arin. (1) Laa wiitz’in ok re chi k’ojob’aak sa’ li tijonelil. K’a’ru li na’leb’ taak’e raj re li natawman sa’ Moroni 3? (2) Laa wamiiw sa’ jalan chik paab’aal naxpatz’ k’a’ut naq tento xk’ulb’al li loq’laj wa’ak rajlal xamaan. K’a’ raj ru taaye re? (chi’ilmanq Moroni 4–5). (3) Laa rab’in ok re chi kub’eek xha’, a’b’an ink’a’ naxnaw ma kawresinb’il. Chan raj ru taatenq’a? (chi’ilmanq Moroni 6:1–3). Chirix xb’aanunkileb’ li k’utb’esink, eb’ li komon te’ruuq chi aatinak chirix li xe’xtzol. Te’ruuq ajwi’ chixwotzb’al xnawom xch’ooleb’ chirix chan ru naq eb’ li k’ojob’anb’il k’anjel jo’eb’ a’in xe’xnach’ob’resiheb’ rik’in li qaChoxahil Yuwa’ ut li Jesukristo.

• Re xtikib’ankil li aatinak chirix li kawresink-ib’ choq’ re li kub’iha’, taaruuq taakanab’ jun komon chixch’olob’ankil chan ru naq xkawresi rib’ choq’ re junaq xteneb’ankil sa’ xyu’am, jo’ li xik sa’ mision, li sumlaak, li ok jo’ yuwa’b’ej, malaj jun ak’ trab’aaj. Chan ru naq li kawresink-ib’ a’an chanchan li kawresink-ib’ choq’ re li kub’iha’, jo’ ch’olob’anb’il sa’ Moroni 6:1–3? (chi’ilmanq ajwi’ Mosiah 18:8–10; Tzol’leb’ ut Sumwank 20:37). K’a’ut naq aajeleb’ ru li na’leb’ sa’eb’ li raqal a’in choq’ re li kub’iha’? Chan ru taqanaw ma kawresinb’ilo re xk’ulb’al li k’ojob’anb’il k’anjel a’in? Waklesi xch’ooleb’ li komon sa’ li tzoleb’aal chi k’oxlak chirix chan ru naq yookeb’ chixyu’aminkileb’ li na’leb’ a’an chalen chaq naq xe’kub’e xha’ ut k’a’ru naru te’xb’aanu re chaab’ilo’k. Taaruuq ajwi’ taak’e xb’oqb’aleb’ chixtz’iib’ankil li na’leb’ neke’xk’ul ut chirilb’al a’an chi kok’ aj xsa’.

  

  Ebʼ li kʼojobʼanbʼil kʼanjel nekeʼbʼaanuman rikʼin lix wankil li tijonelil.

Moroni 4–5

Xk’ulb’al li loq’laj wa’ak nokoxjilosi rik’in li Jesukristo.

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al wan junjunq li kok’ k’anjel re tzolok chirix li loq’laj wa’ak. Maare tatruuq chixk’eeb’al xb’oqb’al junjunq li komon naq te’xb’aanu li kok’ k’anjel a’in sa’ rochocheb’ ut naq te’chalq sa’ li tzoleb’aal chi kawresinb’il re xwotzb’al li xe’xtzol. Taaruuq ajwi’ taakanab’eb’ li komon sa’ li tzoleb’aal chixwotzb’al chirib’ileb’ rib’ li neke’xb’aanu re xkawresinkileb’ rib’ a’an ut lix junkab’aleb’ re reek’ankil lix santilal li loq’laj wa’ak.

• Lix k’ihaleb’ qe ak qab’ihomeb’ li tij re li loq’laj wa’ak k’iila sut, a’b’an ma nokok’oxlak chirix lix yaalalileb’ li raatinul? Re xtenq’ankileb’ li tzolb’ileb’ aab’aan chixk’oxlankileb’ li tij a’in, taaruuq taak’e junjunq k’asal reheb’ re xtz’iib’ankileb’ li wiib’ chi tij re li loq’laj wa’ak rik’in ka’ajwi’ li najultiko’ reheb’. Chirix a’an, kanab’eb’ chixjuntaq’eetankil li xe’xtz’iib’a rik’in Moroni 4:3 ut 5:2. K’a’ru li mas xjultiko’ reheb’? K’a’ru li ink’a’ xjultiko’ reheb’? Ma xe’xk’e reetal k’a’ruhaq chirixeb’ li tij a’in li ink’a’ xe’xk’e reetal junxil? Kanab’eb’ li komon sa’ li tzoleb’aal chixwotzb’aleb’ li aatin ut ch’ol aatin sa’eb’ li tij re li loq’laj wa’ak li neke’wulak chiruheb’ malaj li neke’tenq’ank reheb’ chireek’ankil lix santilal li k’ojob’anb’il k’anjel a’in. Re xnimob’resinkil lix b’antioxihomeb’ li komon chirix li loq’laj wa’ak, k’oxla xkanab’ankil jun komon sa’ li tzoleb’aal chixb’ichankil malaj chixwajb’ankil jun b’ich chirix li loq’laj wa’ak. Taaruuq ajwi’ taak’ut li video “Recordale siempre” (ChurchofJesusChrist.org).

Moroni 6:4–9

Eb’ lix tzolom li Jesukristo neke’rileb’ lix komon.

• K’oxla roksinkil jun jaljookil ru aatin re xtenq’ankileb’ li tzolb’ileb’ aab’aan chixtawb’al ru lix aajelil ru li “ch’olaniik xb’aan lix chaab’il aatin li Dios” (Moroni 6:4). Qayehaq, k’a’ paay chi ch’olanihom na’ajman ru choq’ re jun iyaj malaj choq’ re jun k’uula’al? K’a’ru nak’ulman naq ink’a’ nakach’olani li k’a’ru naraj ru ch’olaniik? Chan ru naq eb’ li ak’ komon ut li toje’ xe’sutq’i sa’ li Iglees chanchaneb’ jun li q’een malaj jun li k’uula’al li naraj ru ch’olaniik? Eb’ li komon te’ruuq chi sik’ok sa’ Moroni 6:4–9 re xtawb’aleb’ li na’leb’ chirix chan ru te’ruuq “chixch’olaninkil” rib’ chirib’ileb’ rib’ sa’ musiq’ej. Te’ruuq ajwi’ chixtawb’al xna’leb’eb’ sa’ “Xkomon chik li k’anjeleb’aal.” Taaruuq taawotz li xak’ul naq jun laa wech aj paab’anel xk’anjelak chawu. Maare eb’ li komon sa’ li tzoleb’aal te’wanq xch’ool chixwotzb’al li xe’xk’ul eb’ a’an.

• Li tz’iib’anb’il sa’ Moroni 6:4–9 taaruuq tixtenq’aheb’ li tzolb’ileb’ aab’aan chixtawb’al ru chan ru naq noko’osob’tesiik naq “nokok’ehe’ sa’ ajl sa’ xyanq li tenamit re lix iglees li Kristo” ut naq nokowulak sa’eb’ li ch’utam re li iglees. Chan raj ru tooruuq chixch’olob’ankileb’ li osob’tesink a’in re anihaq li naxpatz’ k’a’ut naq aajel ru jun iglees li k’uub’anb’il? Maare eb’ li komon sa’ li tzoleb’aal te’ruuq chi sik’ok sa’eb’ li raqal a’in re xtawb’al li k’a’ru te’ruuq chixwotzb’al. Malaj te’ruuq chixtz’iib’ankil chi tustu junjunq li osob’tesink neke’xk’ul jo’ komon sa’ li Iglees (chi’ilmanq D. Todd Christofferson, “K’a’ut naq wan li Iglees,” Jolomil ch’utub’aj-ib’ re octubre 2015). K’a’ru naru taqab’aanu re naq li qech aj paab’anel “te’jultikamanq ut te’ch’olaniiq xb’aan lix chaab’il aatin li Dios” naq “nokoch’utla chi kok’ aj xsa’ ”? (Moroni 6:4–5).

Xb’oqb’aleb’ chi tzolok sa’ kab’l

Maare mas wi’chik te’wanq xch’ool li tzolb’ileb’ aab’aan chirilb’al ru Moroni 7–9 chiru li xamaan chal re wi taaye reheb’ naq wan aran wiib’ li hu kixtz’iib’a laj Mormon choq’ re li ralal re naq taakanaaq chi tiik chi paab’ank sa’eb’ li ch’a’ajkil kutan.

Xkomon chik li kʼanjelebʼaal

Ch’olaninb’il xb’aan li raatin li Dios.

Li Elder Jeffrey R. Holland kixye: “Lix k’ihaleb’ li neke’chal sa’ iglees ink’a’ neke’chal yal re xtzolb’al junjunq li ak’ na’leb’ chirix li evangelio malaj re rilb’aleb’ li ramiiweb’, us ta aajel ru chixjunil a’an. Neke’chal b’an re reek’ankil li Musiq’ej. Neke’raj li tuqtuukilal. Neke’raj naq kawob’resinb’ilaq lix paab’aaleb’ ut naq ak’ob’resinb’ilaq lix yo’onihomeb’. Sa’ jalan chik aatin, neke’raj ch’olaniik xb’aan lix chaab’il aatin li Dios, neke’raj kawob’resiik xb’aan lix wankilal li choxa” (“Venido de Dios Como Maestro,” Liahona, julio 1998, 27).

Li Awa’b’ej Gordon B. Hinckley kixch’olob’ naq xch’olaninkileb’ li ak’ komon rik’in li raatin li Dios “a’an li qak’anjel chiqajunjunqal. A’an xk’anjel laj tzolol ochochnal ut li ixq aj ula’ [anajwan aj ilol komon winq ut ixq] A’an xk’anjel li obispil, li molam re li tijonelil, li Komonil re Tenq’ank, li saaj winq ut li saaj ixq, ut jo’kan ajwi’ li Tzoleb’aal reheb’ li Kok’al.

“Laa’in xintz’aqon sa’ jun ch’utam re kuyuk sa’ ut ch’olob’ank sa’ li domingo xnume’. Jun saaj winq o’laju malaj waqlaju chihab’ xyu’am xxaqli chiqu ut xye naq xk’ehom xch’ool chi kub’eek xha’.

“Toja’ naq chi junjunqil, eb’ li saaj winq sa’ lix molameb’ laj tzolonel xe’xaqli re xyeeb’al lix rahomeb’ choq’ re a’an, re xyeeb’al re naq yoo chixb’aanunkil li us, ut re xk’eeb’al chixnaw naq xaqxooqeb’ chixk’atq ut eb’ a’an te’xtenq’a. Jwal ch’ina-us rab’inkileb’ li saaj winq a’an chixyeeb’al li aatin re xb’antioxinkil ut xwaklesinkil xch’ool li ramiiweb’. Nink’oxla naq chixjunileb’ li saaj winq a’an, jo’ ajwi’ li xkub’e xha’ sa’ li xamaan xnume’, te’xik sa’ mision.

“Toje’ chaq xpatz’man we, “K’a’ru li naxk’e chaweek’a li sahil ch’oolejil q’axal nim naq nakawil lix k’anjel li Iglees anajwan?”

“Insumehom: “Li q’axal nim xsahilal choq’ we, a’an rilb’al li k’a’ru naxb’aanu li evangelio choq’ reheb’ li kristiaan. Narak’ob’resi chan ru neke’ril li yu’am. Naxk’e reheb’ jun nawom maajun wa xe’reek’a. Naxtaqsi xnaq’eb’ ru rik’in li k’a’ru chaab’il ut sant. Sachb’a-ch’oolejil rilb’al li k’a’ru na’uxman rik’ineb’. Neke’ilok wan wi’ li Kristo ut neke’ajsiik ru.”

“… Nin’elajink re li junjunq eere naq textenq’anq sa’ li k’anjel a’in” (“Los Conversos y Los Hombres Jóvenes,” Liahona, julio 1997, 54).

Xchaab’ilob’resinkil li qak’utum

Sik’ laa musiq’ankil aajunes. Sa’ xna’aj rilb’aleb’ li tusleb’ aatin a’in jo’ na’leb’ li tento taataaqe, oksiheb’ jo’ jun xyo’leb’aal na’leb’ li taatenq’anq aawe re taak’ul aamusiq’ankil naq nakak’oxla li rajomeb’ ru li ani nakatzoleb’.