li Kristo naxk’ut rib’ chiruheb’ laj Nefita

Re taaruuq teenaw, xb’aan laj Gary L. Kapp

14–20 diciembre

Moroni 10

“Chalqex rik’in li Kristo, ut chitz’aqloq eere eeru rik’in”

Eb’ li komon sa’ laa tzoleb’aal maare wan k’a’ru chaab’il xe’xk’ul chiru li chihab’ a’in rik’in rilb’al ru lix Hu laj Mormon. Oksi li xe’xk’ul re xwaklesinkil xch’ool chixjunileb’ sa’ li tzoleb’aal chixtzolb’aleb’ li loq’laj hu.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Taaruuq taakanab’eb’ li komon chixk’oxlankil naq laj Moroni yoo chirula’aninkil li tzoleb’aal. K’a’ raj ru te’xye re chirix li kixtz’iib’a sa’ Moroni 10? Ma wan junjunq li raqal jwal neke’wulak chiruheb’? Maare te’ruuq chixwotzb’al li xe’xk’ul rik’ineb’ li raqal a’an.

reetalil li k’utuk

Xkʼutbʼal li tzolʼlebʼ

Moroni 10:3–7

Naru tinnaw li yaal rik’in xwankil li Santil Musiq’ej.

• Eb’ li komon sa’ li tzoleb’aal taaruuq te’xk’ul chik xkomon lix na’leb’eb’ wi te’xtz’il rix Moroni 10:3–5 chi timil timil. Re xtenq’ankileb’, taaruuq taatz’iib’aheb’ li aajel ruhil ch’ol aatin wankeb’ sa’eb’ li raqal a’in chiru kok’ setb’il hu ut taajek’iheb’ rik’in li junjunq komon malaj rik’in kok’ ch’uut chi komon. Kanab’eb’ chi k’oxlak malaj chi aatinak chirix k’a’ru naraj naxye li ch’ol aatin, jo’ ajwi’ li naru te’xb’aanu re xk’anjelankil sa’ xyu’ameb’. Chirix a’an, texruuq chirilb’al ru Moroni 10:3–5 sa’ komonil, ut texxaqliiq naq nekeril ru jun reheb’ li ch’ol aatin li xe’xtzol re naq eb’ li komon te’ruuq chixwotzb’al xna’leb’eb’ chirix.

• Re xwaklesinkil xch’ooleb’ li tzolb’ileb’ aab’aan chixwotzb’al li xe’xk’ul rik’in xk’anjelankil lix b’oqom laj Moroni sa’eb’ li raqal a’in, taaruuq taakanab’eb’ chixk’oxlankil naq yookeb’ chixwaklesinkil xch’ool jun ramiiweb’ malaj jun komon sa’ xjunkab’aleb’ re tixtaw xnawom xch’ool chirix lix Hu laj Mormon. Chan raj ru te’roksi Moroni 10:3–7? K’a’ru li xe’xk’ul eb’ a’an li taaruuq raj te’xwotz? Chan ru naru taqatenq’aheb’ li qas qiitz’in chixtawb’al ru k’a’ru naraj naxye xnawb’al k’a’ruhaq “rik’in lix wankil li Santil Musiq’ej”? (Moroni 10:5).

Moroni 10:8–25

“Meetz’eqtaana xyaalaleb’ li maatan naxk’e li Dios.”

• K’a’ut naq li tijom “meetz’eqtaana xyaalaleb’ li maatan naxk’e li Dios” k’a’jo’ wi’chik x’aajelil ru sa’ roso’jikeb’ li kutan a’in? (Moroni 10:8). Waklesi xch’ooleb’ li komon sa’ li tzoleb’aal chixk’oxlankil li patz’om a’in naq neke’ril ru Moroni 10:8–18. Re tenq’ank chixkawob’resinkil lix paab’aaleb’ li tzolb’ileb’ aab’aan chirixeb’ li musiq’ejil maatan, taaruuq taakanab’eb’ chixwotzb’al resileb’ li ani xe’oksink reheb’ li junjunq maatan li natawman sa’ Moroni 10:9–16. Li esilal neke’xwotz naru neke’chal rik’ineb’ li loq’laj hu, li resilal li Iglees, malaj lix yu’ameb’. (Naru xtawb’al junjunq li esilal li wankeb’ sa’ lix Hu laj Mormon sa’ “Xkomon chik li k’anjeleb’aal.”) Texruuq ajwi’ chi aatinak chirix chan ru naq junjunq reheb’ li maatan li yeeb’ileb’ resil sa’eb’ li raqal a’in ke’k’utman naq ki’el chi kutankil lix Hu laj Mormon. K’a’ut naq aajel ru naq li ani nasik’ok re xnawom xch’ool chirix lix Hu laj Mormon tixpaab’ naq wankeb’ musiq’ejil maatan? K’a’ru naqab’aanu chi jo’q’ehaq re “xtz’eqtaanankil xyaalaleb’ ” li maatan a’in sa’ li qayu’am? Chan ru naq eb’ li maatan a’in nokohe’xtenq’a chi “chalk rik’in li Kristo, ut chitz’aqloq qe qu”? (chi’ilmanq Moroni 10:30–33).

• Re xtz’ilb’aleb’ rix li musiq’ejil maatan yeeb’ileb’ resil sa’eb’ li raqal a’in, naru xtz’iib’ankil chiru li pizarron eb’ li patz’om jo’ K’a’ruheb’ li musiq’ejil maatan? Ani aj-e neke’k’ehe’? K’a’ut naq neke’k’ehe’? ut Chan ru naqak’uleb’? Chirix a’an, kanab’eb’ li komon sa’ li tzoleb’aal chi sik’ok sa’ Moroni 10:8–25 re xtawb’al xsumenkileb’. (Naru taa’oksimanq ajwi’ li raatin li Awa’b’ej Brigham Young ut li raatin li Awa’b’ej Dallin H. Oaks sa’ “Xkomon chik li k’anjeleb’aal.”) Rochb’eeneb’ li musiq’ejil maatan li tusub’anb’ileb’ sa’eb’ li raqal 9–16, k’a’ruheb’ chik “lix maatan li Dios” li qak’ulum laa’o malaj li xoo’osob’tesiik wi’? (Moroni 10:8). Maare taawaj xwotzb’al li k’a’ru kixk’ut li Elder Bruce R. McConkie: “Eb’ li musiq’ejil maatan maak’a’eb’ rajlankil ut k’iila paay wan. Eb’ li tz’iib’anb’ileb’ sa’ li k’utb’esinb’il aatin yal neke’wan choq’ reetalileb’ li choxahil usilal naxk’e jun Dios aj uxtaan reheb’ li neke’rahok re ut neke’k’anjelak chiru” (A New Witness for the Articles of Faith [1985], 371).

Moroni 10:30–33

Naru taatz’aqloq we wu xb’aan li rusilal li Jesukristo.

• K’a’ru nakaweek’a naq tixtenq’aheb’ li wankeb’ sa’ laa tzoleb’aal chixk’ulub’ankil lix b’oqom laj Moroni chi “chalk rik’in li Kristo, ut chitz’aqloq qe qu”? (Moroni 10:32). Maare xb’ichankil jun li b’ich chirix li na’leb’ a’in, jo’ “Kim, taaqehin” (Eb’ li B’ich, 66), taaruuq tixk’e xb’oqb’al li Musiq’ej sa’ li yookex chi aatinak wi’, ut eb’ li komon te’ruuq chixwotzb’al yalaq k’a’ru neke’ril sa’ li b’ich li naxk’am rib’ rik’ineb’ li yaalil na’leb’ neke’tawman sa’ Moroni 10:30–33. K’a’ru naqatzol sa’eb’ li raqal a’in ut sa’ li b’ich a’in chirix k’a’ru naraj naxye li chalk rik’in li Kristo? K’a’ru naraj naxye naq “tz’aqal qe qu rik’in li Kristo”? (chi’ilmanq ajwi’ Tzol’leb’ ut Sumwank 76:50–53, 69). Wotz li nakaweek’a chirix k’a’ru naraj naxye “xtz’aqob’resinkil qe qu sa’ xk’ab’a’ li Jesus” (Tzol’leb’ ut Sumwank 76:69), ut waklesi xch’ooleb’ li komon chixwotzb’al li neke’reek’a chirix a’an.

• Rik’in naq a’in li roso’jik sut tex’aatinaq jo’ tzoleb’aal chirix lix Hu laj Mormon sa’ li chihab’ a’in, maare usaq raj xkanab’ankileb’ li komon chixwotzb’al li k’a’ru xe’reek’a ut li k’a’ru xe’xtzol naq xe’xtz’il rix li hu a’an. Re xtenq’ankileb’ li komon chixb’aanunkil a’an, taaruuq teeril ru Moroni 10:32–33 sa’ komonil ut taakanab’eb’ li komon chi k’oxlak chiru junpaataq chirix chan ru naq lix Hu laj Mormon xtenq’aheb’ chi chalk rik’in li Kristo. Taaruuq taapatz’: Chan ru naq lix Hu laj Mormon xtenq’an chixnimob’resinkil li qarahom choq’ re li Dios? Chan ru naq xooxtenq’a chixkanab’ankil qib’ chi tz’aqal chiru li rusilal li Kristo? Chan ru naq xooxtenq’a re naq ink’a’ “xqatz’eqtaana xyaalal” lix wankil li Kolonel? Kanab’eb’ li komon sa’ li tzoleb’aal chixwotzb’al xnawom xch’ooleb’ chirix lix Hu laj Mormon ut chan ru naq naxk’ut xyaalal li Jesukristo.

reetalil li tzolok

Xb’oqb’aleb’ chi tzolok sa’ kab’l

Re xtenq’ankileb’ li komon sa’ li tzoleb’aal chirajb’al xtzolb’al li Tzol’leb’ ut Sumwank sa’ li chihab’ chal re, taaruuq taanumsi Moroni 10:9–16 ut taach’olob’ naq neke’k’utun chixjunileb’ li maatan a’in sa’ li Iglees anajwan. Naq taqil ru li Tzol’leb’ ut Sumwank, taqak’e reetal chan ru naq ke’oksiman lix maatan ut lix wankil li Dios re xb’aanunkil lix k’anjel sa’ roso’jikeb’ li kutan.

reetalil li kʼanjelebʼaal

Xkomon chik li kʼanjelebʼaal

Eb’ li musiq’ejil maatan li ke’k’utb’esiman sa’ lix Hu laj Mormon.

• Li k’utuk rik’in li Musiq’ej: laj Nefi ut laj Lehi (Helaman 5:17–19)

• Li paab’aal q’axal nim: laj Alma, laj Amulek, laj Ammon, ut xkomoneb’ chik (Eter 12:13–22)

• Li k’irtesink: laj Alma (Alma 15:5–11)

• Li xninqal ru sachb’a-ch’oolej: Li oxib’ chi tzolom (3 Nefi 28:19–22)

• Li aatinak jo’ profeet: laj Lehi (2 Nefi 1:6–7)

• Rilb’aleb’ li anjel: laj Amulek (Alma 10:7–10)

• Xjaltesinkil ru li jalanil aatinob’aal: laj Mosiah (Mosiah 28:11–16)

Lix ch’olob’ahom li Awa’b’ej Brigham Young chirixeb’ li musiq’ejil maatan.

“Paab’aal. Naq nakapaab’eb’ li na’leb’ re li evangelio, ut nakataw li paab’aal, a’an jun maatan k’eeb’il xb’aan li Dios, a’an naxk’e xkomon chik li paab’aal, naxtiq li paab’aal sa’ xb’een li paab’aal. …

“Li maatan re k’irtesink. Wankin arin re xch’olob’ankil xyaalal naq k’iila cient li winq, li ixq, ut li kok’al xe’k’irtesiik xb’aan lix wankil li Dios, rik’in naq xk’ehe’ li uq’ej sa’ xb’eeneb’, ut naab’aleb’ wilom chi waklesiik chaq sa’ rokeb’aal li kamk ut chi sutq’isiik chaq sa’ xnub’aal li junelik q’e kutan; ut junjunq reheb’ ak elenaqeb’ xmusiq’eb’ sa’ xjunxaqalileb’, a’ut ke’sutq’i chaq. Ninch’olob’ xyaalal naq wilomeb’ li yaj chi k’irtesiik rik’in xk’eeb’al li uq’ej, jo’ chanru yeechi’inb’il xb’aan li Kolonel. …

“Li aatinak jo’ profeet, li k’utb’esinb’il na’leb’, ut li nawom. Chixjunjunqal li winq ut ixq naru taawanq choq’ aj k’utb’esinel, ut naru taawanq xnawom xch’ool chirix li Jesus, a’an ajwi’ li musiq’ej re profeetil aatin, ut naru taaril lix na’leb’ ut li rajom li Dios choq’ re, naru tixtz’eqtaana li maa’us, ut naru tixsik’ ru li k’a’ru us” (Enseñanzas de los Presidentes de la Iglesia: Brigham Young [1997], 266–267).

“Chechapaq eerib’ chiru li junjunq chi chaab’il maatan.”

Li Awa’b’ej Dallin H. Oaks ki’aatinak chirix chan ru naq xsik’b’aleb’ li musiq’ejil maatan kirosob’tesi lix na’: “Rik’in naq kamenaq lix b’eelom, lin na’ wan k’a’ru maak’a’ re. K’a’jo’ naq kitijok re xk’ulb’al li naraj ru re xtz’aqob’resinkil ru li teneb’anb’il wi’ sa’ xk’iresinkileb’ lix oxib’ chi kok’al! Yoo chi sik’ok, wan xk’ulub’ejil, ut ki’osob’tesiik! Ke’sumeek lix tij chi naab’al paay ru, ut kixk’uleb’ ajwi’ li musiq’ejil maatan. Naab’aleb’ ke’wan re, a’ut li mas neke’jultiko’ we, a’aneb’ li maatan re paab’aal, re xnawom ch’oolej, ut re xchaab’ilal li na’leb’ ” (“Spiritual Gifts,” Ensign, septiembre 1986, 72).

Xchaab’ilob’resinkil li qak’utum

Kanab’ xhoonalil re te’wotzoq li ani yookeb’ chi tzolok. “Naq eb’ li komon sa’ li tzoleb’aal neke’xwotz li k’a’ru yookeb’ chixtzolb’al, moko ka’aj ta wi’ neke’reek’a li Musiq’ej ut neke’xkawob’resi lix nawomeb’ xch’ool, neke’xwaklesi ajwi’ xch’ooleb’ li jun ch’ol chik li komon sa’ li tzoleb’aal re te’xtaweb’ li yaalil na’leb’ xjuneseb’ rib’ ” (Li k’utuk jo’ li Kolonel, 30).