laj Nefi natz’iib’ak chiruheb’ li perel ch’iich’ oor

Li xMinerva Teichert (1888–1976), Laj Moroni: Lix ch’otojik aj Nefita, 1949–1951, óleo en masonite, 34¾ x 47 pulgadas . Museo de Arte, Universidad de Brigham Young, 1969

7–13 diciembre

Moroni 7–9

“Li Kristo chiwaklesinq aawe”

Laa k’anjel a’an xtenq’ankileb’ li kristiaan chi nach’ok rik’in li Dios, ink’a’ yal xk’utb’al jun tzolom. Kawresi aawib’ choq’ re li Dominkil Tzoleb’aal rik’in rilb’al ru Moroni 7–9 chi wankeb’ sa’ aach’ool li komon sa’ laa tzoleb’aal, ut chasik’eb’ li na’leb’ li te’tenq’anq reheb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li komon sa’ li tzoleb’aal chixnumsinkil Moroni ch’ol 7, 8, malaj 9 re xtawb’al jun yaalil na’leb’ nawulak chiruheb’. Eb’ li komon te’ruuq chixwotzb’al li na’leb’ xe’xtaw ut chan ru xe’osob’tesiik xb’aan.

reetalil li k’utuk

Xkʼutbʼal li tzolʼlebʼ

Moroni 7:3–19

“Li kʼaʼru re li Dios nabʼoqok ut naqʼunbʼesink chʼoolej chixbʼaanunkil rajlal li chaabʼil.”

• Re wank jo’ jun xtzolom li Jesukristo, tento naq tooruuq chixtz’ilb’al rix b’ar wan li us ut li ink’a’ us. Maare li aatinak chirixeb’ li yaalil na’leb’ sa’ Moroni 7:3–19 taaruuq tixtenq’aheb’ li komon sa’ li tzoleb’aal re naq ink’a’ te’tz’iloq-ix “chi ink’a’ us” (Moroni 7:18). Re xkawresinkileb’ rib’ choq’ re li aatinak, lix yijach li tzoleb’aal te’ruuq chi sik’ok sa’eb’ li raqal a’in re xtawb’al li na’leb’ naxk’e laj Mormon chirix chan ru xtz’ilb’al rix b’ar wan li k’a’ru nachal rik’in li Dios, ut li jun yijach chik te’ruuq chixsik’b’al chan ru xtz’ilb’al rix b’ar wan li k’a’ru nachal rik’in laj tza. Chirix a’an, te’ruuq chi aatinak chirix li xe’xtaw ut chixwotzb’al li k’a’ru nab’oqok reheb’ “chixb’aanunkil li chaab’il, ut chixraab’al li Dios, ut chi k’anjelak chiru” (Moroni 7:13). Chan ru taqayu’ami lix na’leb’ laj Mormoni sa’ li naqasik’ ru xb’aanunkil wulaj wulaj? Chan ru naru taqasik’ ru li us ut taqak’ut ajwi’ li qarahom choq’ reheb’ li ink’a’ neke’xyu’ami li evangelio?

• Wankeb’ naab’al li neke’xpatz’, “Chan ru naru tinnaw naq jun ink’oxlahom musiq’anb’il xb’aan li Dios malaj naq yal k’oxlanb’il inb’aan laa’in?” Taaruuq taatz’iib’a li patz’om a’an chiru li pizarron ut taakanab’eb’ li komon chi sik’ok sa’ Moroni 7:13–16 re xtawb’aleb’ li na’leb’ li te’ruuq chi tenq’ank chixsumenkil li patz’om a’in. Chan ru naru toohe’xtenqa li raqal a’in chixk’eeb’al reetal li choxahil na’leb’ li musiq’anb’il? Usaq raj xch’olob’ankil naq “lix Musiq’ li Kristo” nawb’il ajwi’ ru jo’ lix saqen li Kristo, ut wan naq nayeeman naq a’an li reek’ob’aal qach’ool. Naru ajwi’ taa’oksimanq li raatin li Awa’b’ej Gordon B. Hinckley sa’ “Xkomon chik li k’anjeleb’aal” ut li video “Modelos de luz: Distinguir la luz” (ChurchofJesusChrist.org).

Moroni 7:21–48

Eb’ laj taaqenel re li Jesukristo neke’xsik’ li paab’aal, li yo’onink, ut li tz’aqal rahok.

• Re xtenq’ankileb’ li tzolb’ileb’ aab’aan chixtawb’al chan ru neke’xk’am rib’ li paab’aal, li yo’onink, ut li tz’aqal rahok, taaruuq taak’ut jun ch’ina chunleb’aal oxib’ li roq (malaj jun xjalam-uuch a’an) ut taakanab’eb’ li komon sa’ li tzoleb’aal chi k’oxlak chirix chan ru naq li paab’aal, li yo’onink, ut li tz’aqal rahok chanchaneb’ li oxib’ li roq li chunleb’aal (chi’ilmanq li raatin li Awa’b’ej Dieter F. Uchtdorf sa’ “Xkomon chik li k’anjeleb’aal”). Taaruuq taakanab’eb’ chixsik’b’al ru jun reheb’ li oxib’ chi na’leb’ a’an ut te’xsik’ li kixk’ut laj Mormon chirix sa’ Moroni 7:21–48. Aatinanqex chirixeb’ li patz’om jo’eb’ a’in: K’a’ut naq aajel ru naq wan qe li paab’aal ut li yo’onink re taqak’ul li maatan re li tz’aqal rahok? Chan ru naq li junjunq reheb’ li na’leb’ a’in nokoxlaq’ab’ rik’in li Kristo? K’a’ut naq aajeleb’ ru li na’leb’ a’in choq’ re jun xtzolom li Jesukristo? K’a’ raj ru taa’uxmanq qik’in wi ta taasachq li qapaab’aal? li qayo’onihom? li tz’aqal rahok? K’e xhoonaleb’ li komon chixtz’iib’ankileb’ li na’leb’ neke’xk’ul.

Moroni 8:4–21

Xtawb’al ru li yaalil tzol’leb’ naru tooxtenq’a chixsik’b’al ru li us.

• Maare ink’a’ taa’ajmanq naq tex’aatinaq sa’ laa tzoleb’aal chirix k’a’ut naq ink’a’ us xkub’sinkil xha’eb’ li k’uula’al, a’ut li raatin laj Mormon chirix li na’leb’ a’in naru tixtenq’aheb’ li komon chixk’eeb’al reetal naq xiwxiweb’ li b’alaq’il tzol’leb’. Re xk’utb’al chan ru naq lix Hu laj Mormon “naxsach li b’alaq’il tzol’leb’ ” (2 Nefi 3:12), taaruuq taakanab’eb’ li komon sa’ li tzoleb’aal chirilb’al ru Moroni 8:4–21 sa’ kok’ ch’uut malaj sa’ junesal. Lix yijach li tzoleb’aal te’ruuq chixsik’b’aleb’ li tzol’leb’ kireek’a laj Mormon naq ink’a’ tawb’ileb’ ru xb’aaneb’ li kristiaan, jo’ lix tojb’al rix li maak xb’aan li Jesukristo (chi’ilmanq li raqal 20) ut li teneb’aak (chi’ilmanq li raqal 10). Li jun yijach chik te’ruuq chixsik’b’al li kik’ulman rik’in naq ink’a’ ke’xtaw ru. Li junjunq ch’uut te’ruuq chixwotzb’al rik’in li tzoleb’aal li k’a’ru xe’xtaw. K’a’ru neke’xk’ut li raqal a’in chiqu chirix lix aajelil ru xtzolb’al ut xyu’aminkil li yaalil tzol’leb’? B’ar naru taqataw lix tzol’leb’ li Kristo chi ch’olob’anb’il chi us? Chan ru naru taqanaw naq yaal li naqataw ru chirix li tzol’leb’?

• Maare usaq choq’ re laa tzoleb’aal xtaaqenkil li kixb’aanu laj Mormon naq kixtenq’aheb’ li ras riitz’in chixsik’b’al ru xb’aanunkil li us, rik’in xk’utb’al li yaalil tzol’leb’ chiruheb’. Taaruuq taab’aanu a’in rik’in xkanab’ankileb’ li komon chixk’oxlankil anihaq sa’eb’ li loq’laj hu li kixsik’ ru xb’aanunkil li ink’a’ us. K’a’ru li yaalil tzol’leb’ li tixtenq’a raj a’an re naq ink’a’ tixsik’ ru xb’aanunkil wi’chik li ink’a’ usil na’leb’ a’an? K’e junjunq k’asal reheb’ li komon re xtawb’aleb’ li raqal sa’eb’ li loq’laj hu malaj li aatin k’eeb’il sa’ jun jolomil ch’utub’aj-ib’ li te’xtenq’a raj li kristiaan a’an chixtawb’al ru li yaalil tzol’leb’. Taaruuq taapatz’ reheb’ li komon naq te’xwotz li k’a’ru xe’xtaw.

Moroni 9:25–26

Naru naqataw li yo’onink rik’in li Kristo, maak’a’ naxye chan ru naq wanko.

• Lix roso’jikil tz’iib’ahom laj Mormon choq’ re li ralal sa’ Moroni 9:25–26 naru tixtenq’aheb’ li komon sa’ li tzoleb’aal chixtawb’al li yo’onink rik’in li Kristo, sa’eb’ ajwi’ li hoonal naq chanchan naq maak’a’ li yo’onink. Maare taaruuq taatikib’ rik’in xkanab’ankileb’ li komon chixwotzb’al k’a’ut naq maare kika’ch’ino’ xch’ool laj Moroni. Chirix a’an, te’ruuq chirilb’aleb’ ru li raqal a’in ut chixtz’iib’ankil chi tustu chiru li pizarron eb’ li yaalil na’leb’ kiraj laj Mormon naq tixjayali wi’ rib’ laj Moroni. Chan ru naq eb’ li yaalil na’leb’ a’in naru “toohe’xwaklesi” sa’ li qakutankil? Eb’ li komon sa’ li tzoleb’aal te’ruuq ajwi’ chixwotzb’al resil li “ruxtaan ut xnajtil li royb’enihom” li Dios li neke’ril sa’ xyu’ameb’. Malaj te’ruuq chixwotzb’al xna’leb’eb’ re xtenq’ankil rib’ chirib’ileb’ rib’ re naq wanq li Kolonel “sa’ li qak’a’uxl chi junelik,” sa’eb’ ajwi’ li hoonal naka’ch’ino’ wi’ qach’ool (raqal 25).

reetalil li tzolok

Xb’oqb’aleb’ chi tzolok sa’ kab’l

Re xwaklesinkil xch’ooleb’ li tzolb’ileb’ aab’aan chirilb’al ru Moroni 10, taaruuq taaye reheb’ naq a’anaq jun chaab’il hoonal re xk’oxlankil chan ru naq xe’ak’ob’resiik lix nawomeb’ xch’ool chirix lix yaalalil lix Hu laj Mormon naq xe’xtzol chiru li chihab’ a’in.

reetalil li kʼanjelebʼaal

Xkomon chik li kʼanjelebʼaal

Ma nachal rik’in li Musiq’ej?

Re xsumenkil li patz’om “Chan ru naq naqak’e reetal lix musiq’ahom li Musiq’ej?” li Awa’b’ej Gordon B. Hinckley kixyaab’asi Moroni 7:13 ut kixye: “Nink’oxla naq moko ch’a’aj ta, … Ma naxq’unb’esi qach’ool chixb’aanunkil li us, chi wank chi xaqxo, chixb’aanunkil li tiik ru, chi wank xchaab’ilal qach’ool, chi k’ehok chi anchal qach’ool? Wi jo’kan, a’an lix Musiq’ li Dios” (Teachings of Gordon B. Hinckley [1997], 260–61).

Li paab’aal, li yo’onink, ut li tz’aqal rahok

Li Awa’b’ej Dieter F. Uchtdorf kixjuntaq’eeta li paab’aal, li yo’onink, ut li tz’aqal rahok rik’in jun li ch’ina chunleb’aal oxib’ li roq, ut kixch’olob’ naq li oxib’ chi na’leb’ a’in “neke’xxaqab’ chi k’ojk’o li qayu’am, maak’a’ naxye ma nokonume’ chiruheb’ li na’ajej b’uq’ux malaj yokos ru sa’ li qayu’am. …

“Li paab’aal, li yo’onink, ut li tz’aqal rahok neke’xk’am rib’, ut naq nanima jun reheb’, neke’nima lix komon ajwi’. Li yo’onink nachal xb’aan li paab’aal, xb’aan naq wi maak’a’ li paab’aal, maak’a’ li yo’onink. Jo’kan ajwi’ li paab’aal nachal xb’aan li yo’onink, xb’aan naq li paab’aal a’an “xtoonal li k’a’ru na’oyb’eniman.”

“Aajel ru li yo’onink choq’ re li paab’aal jo’ ajwi’ li tz’aqal rahok. Naq nach’inaak li paab’aal xb’aan li q’etok chaq’rab’, li ka’ch’ino’k sa’ ch’oolej, ut li b’ayok-ib’, aran wan li yo’onink re xwaklesinkil li qapaab’aal. Naq li josq’il malaj xmaak’a’il li kuyum neke’xyal xsachb’al li tz’aqal rahok, li yo’onink naxkawob’resi li rajom qach’ool ut nokorelaji chirilb’aleb’ li qas qiitz’in chi ink’a’ naqak’oxla k’a’ru taqak’ul laa’o. A’ yaal jo’ xlemtz’unkil li qayo’onihom, jo’kanaq xnimal li qapaab’aal. Naq k’a’jo wi’chik naq kawaq li qayo’onihom, k’a’jo’ wi’chik ajwi’ naq saqaq ru li tz’aqal rahok wan qik’in” (“El poder infinito de la esperanza,” Liahona, noviembre 2008, 21, 23).

“Li saq ruhil rahok narahok wiʼ li Kristo.”

Li Elder Jeffrey R. Holland ki’aatinak chirix wiib’ lix yaalalil li ch’ol aatin “li saq ruhil rahok narahok wi’ li Kristo”:

“Li jun … a’an li rahok aj uxtaan ut aj kuyunel tento te’xra wi’ rib’ chirib’ileb’ rib’ lix tzolom li Kristo. …

“Li jun chik a’an li rahok ink’a’ nalaj, tz’aqal xnimal ru, ut aj tojol-ix li nokoxra wi’ li Kristo. … A’an li rahok a’an—lix saqen ruhil rahom choq’ qe—li maak’a’ raj too’ok wi’ wi ta maak’a’ qik’in” (Christ and the New Covenant: The Messianic Message of the Book of Mormon [1997], 336).

Xchaab’ilob’resinkil li qak’utum

Tenq’aheb’ li tzolb’ileb’ aab’aan chixsik’b’al xjuneseb’ li musiq’ejil na’leb’. Naq nakatk’utuk, ruuchil yal xk’utb’al li na’leb’ chiruheb’, tenq’aheb’ li tzolb’ileb’ aab’aan chixtawb’al ru xjuneseb’ rib’ lix yaalil na’leb’ li evangelio. … Naq wankeb’ xpatz’om, wan naq q’axal us wi’chik xk’utb’al chiruheb’ chan ru xtawb’al xsumenkil xpatz’omeb’ xjuneseb’ ” (Li k’utuk jo’ li Kolonel, 28). Qayehaq, taaruuq taaye reheb’ li komon naq te’sik’oq sa’ Temas del Evangelio sa’ topics.ChurchofJesusChrist.org, wan wi’ li chaab’il na’leb’ chirix k’iila tzol’leb’.