laj Jose, li xMaria, ut li k’uula’al Jesus sa’ xna’ajeb’ li xul

K’e reetal lix Karneer li Dios, xb’aan laj Walter Rane

21–27 diciembre

Li Ralankil

“Aʼan taachalq saʼ li ruchichʼochʼ re xtojbʼal rix lix tenamit”

Naq yookat chi tzolok chirix lix yo’lajik li Jesukristo chiru li xamaan a’in, k’oxla chan ru naq naru taatenq’aheb’ li tzolb’ileb’ aab’aan chixkawob’resinkil xnawom xch’ooleb’ chirix li Jesukristo ut lix tojb’al rix li maak xb’aan. Junjunq reheb’ li na’leb’ sa’ li tusleb’ aatin a’in naru tate’xtenq’a.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li komon chi wotzok chi ka’kab’il malaj sa’ kok’ chuut chirix chan ru naq li tzolok chirix li Jesukristo sa’ lix Hu laj Mormon chiru li chihab’ a’in xkawob’resi xpaab’aaleb’ chirix li Jesukristo ut li raatin.

reetalil li k’utuk

Xkʼutbʼal li tzolʼlebʼ

1 Nefi 11:13–23; Helaman 14:1–13; 3 Nefi 1:4–22

Li Jesukristo kiyo’la re taawanq choq’ aj Kolol qe.

• Chan ru naru taawoksi lix Hu laj Mormon re xtzolb’aleb’ li komon sa’ li tzoleb’aal chirix xsantilal li k’a’ru kik’ulman sa’ xyo’lajik li Kolonel? Taaruuq taak’uub’ li tzoleb’aal sa’ oxib’ ch’uut ut taak’e re li junjunq ch’uut jun reheb’ li raqal a’in sa’eb’ li loq’laj hu re te’ril ru sa’ komonil: 1 Nefi 11:13–23; Helaman 14:1–13; ut 3 Nefi 1:4–22. Kanab’eb’ li ch’uut chi aatinak chirix li nak’utman sa’eb’ li raqal a’in chirix lix yo’lajik li Kolonel. Chirix a’an, li junjunq ch’uut te’ruuq chixwotzb’al rik’in chixjunil li tzoleb’aal li xe’aatinak wi’. K’a’ut naq nim xwankil naq wan qik’in lix nawom lix Hu laj Mormon chirix lix yo’lajik li Kolonel?

• Aajel ru xnawb’al chirix lix yo’lajik li Kristo, a’b’an k’a’jo’ wi’chik x’aajelil ru xnawb’al k’a’ut naq kiyo’la. Chan ru naru taatenq’aheb’ li tzolb’ileb’ aab’aan chixk’oxlankil li wankilal aj tojol-ix wan rik’in li Jesukristo? Maare eb’ li komon sa’ li tzoleb’aal te’ruuq chixwotzb’al junjunq li seraq’ ut li esilal xe’xtzol chiru li xamaan a’in (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Waklesi xch’ooleb’ chixwotzb’al chan ru naq li xe’xtzol xchamob’resi lix b’antioxihomeb’ chirix lix yo’lajik li Kolonel ut lix wankilal aj tolol-ix.

• Re xtikib’ankil jun aatinak chirixeb’ li maatan k’eeb’ileb’ qe xb’aan li Dios sa’ xk’ab’a’ li Ralal, taaruuq taakanab’ junjunq li komon sa’ li tzoleb’aal chi aatinak chirixeb’ li maatan xe’xk’ul sa’ li Ralankil. Chan ru naqak’ut li qab’antioxihom chirixeb’ li maatan naqak’ul? Chirix a’an, eb’ li komon te’ruuq chirilb’al ru li raatin li Awa’b’ej Thomas S. Monson li wan sa’ “Xkomon chik li k’anjeleb’aal” ut te’aatinaq chirixeb’ li kaahib’ maatan na’aatinak wi’ li Awa’b’ej Monson. K’a’ru xk’anjel li Kolonel sa’eb’ li maatan a’in? Chan ru naru taqak’ut li qab’antioxihom chiru li qaChoxahil Yuwa’ chirixeb’ li maatan a’in?

• Naq yooqex chi aatinak chirix li Ralankil, k’oxla xkanab’ankileb’ li komon sa’ li tzoleb’aal chixwajb’ankil malaj chixb’ichankileb’ li b’ich chirix li Ralankil. Taaruuq ajwiʼ taatz’il rix junjunq reheb’ li k’anjeleb’aal sa’ “Xkomon chik li kʼanjelebʼaal.”

Perel re xjolomil li aatin saʼ lix Hu laj Mormon; Xtikib’ankil lix Hu laj Mormon; 2 Nefi 25:23, 26; 33:4, 10

Lix Hu laj Mormon naxch’olob’ xyaalal li Jesukristo.

• Naq raqe’k re lee tzolb’al chirix lix Hu laj Mormon sa’ li Dominkil Tzoleb’aal, taaruuq taak’e xhoonaleb’ li tzolb’ileb’ aab’aan chixk’oxlankil li k’a’ru xe’xtzol chirix li Jesukristo sa’ lix Hu laj Mormon chiru li chihab’ a’in. Re xtikib’ankil li aatinak chirix a’an, taaruuq teeril ru 2 Nefi 25:23, 26 ut 33:4, 10 sa’ komonil, jo’ ajwi’ junjunq raqal sa’ Xtikib’ankil lix Hu laj Mormon ut li perel re xjolomil aatin. Taaruuq ajwi’ taawotz jun li seraq’ malaj jun raqal li xjilosink aawe rik’in li Jesukristo, toja’ naq taak’e junjunq k’asal reheb’ li komon re te’xwotz li seraq’ malaj raqal xe’wulak chiruheb’. Ch’olob’ lix nawom aach’ool chirix lix Hu laj Mormon, ut k’e xhoonaleb’ li tzolb’ileb’ aab’aan chixb’aanunkil ajwi’ a’an.

reetalil li tzolok

Xb’oqb’aleb’ chi tzolok sa’ kab’l

Re xwaklesinkil xch’ooleb’ li komon sa’ li tzoleb’aal chirilb’al ru li Tzol’leb’ ut Sumwank, taaruuq taawotz jun li raqal mas nawulak chawu malaj li xak’ul rik’in xtzolb’al li Tzol’leb’ ut Sumwank.

reetalil li kʼanjelebʼaal

Xkomon chik li kʼanjelebʼaal

Eb’ li k’anjeleb’aal chirix li Ralankil.

• Mateo 1:18–25; 2; Lukas 2

• Libro de obras de arte del Evangelio, eb’ li ajl 28, 29, 30, 31, 81

• Eb’ li jalam-uuch re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al

• “Ha nacido un Salvador—Video de Navidad” (video, ChurchofJesusChrist.org)

• “Nuevas de gran gozo: El nacimiento de Jesucristo” (video, ChurchofJesusChrist.org)

• Navidad.ComeUntoChrist.org

• Eb’ lix ch’utam li Xb’eenil Awa’b’ejil re li Ralankil (ChurchofJesusChrist.org/broadcasts/first-presidency-christmas-devotionals)

Eb’ li maatan re li Kolonel.

Li Awa’b’ej Thomas S. Monson kixye:

“Nink’oxla chan ru naq sa’ ka’pak’alil wan li na’leb’ chirix li Ralankil. Wankeb’ li si maatan tertookeb’ xtz’aq, ch’ina-us lix lanb’aleb’ rix ut wilomeb’ sa’ li k’ayib’aal hu b’ar wi’ tz’iib’anb’il li aatin, “Choq’ re li ani ak wan chixjunil k’a’ru re.” Sa’ jun reheb’ li hu kiwil jun li nimla ochoch, lanlo rik’in jun mama’il k’aam, ut jun mama’il eetalil li naxye: “Choq’ re li Ralankil.” Aran ajwi’ xwileb’ li b’atz’uul letzb’il wi’ li lemtz’ q’ol terto xtz’aq, jun viaaj chiru palaw choq’ re li nawulak chiru li viajik, ut jun viaaj wankeb’ wi’ li mama’il tzuul sa’ Suisa choq’ re li nawulak chiru b’eek. Jo’ chanru a’an, wilom xjalam-uuch li oxib’ aj q’e, yookeb’ chi b’eek toj Belen chi wan chirixeb’ li kameey eb’ li si lanb’il chi ch’ina-us. Jun reheb’ yoo chixyeeb’al re li rochb’een, “Ninye aawe, Baltazar, rik’in xk’eeb’aleb’ li si a’in, maare yooko chixtikib’ankil jun na’leb’ li taanimanq chi numtajenaq.” …

“Chiru junpaataq chiqakanab’eb’ li k’ayib’aal hu re Ralankil, ut xk’ihaleb’ li maatan li wankeb’ chi k’ay aran. Chiqakanab’eb’ ajwi’ li utz’u’uj choq’ re li qana’, li korb’aat choq’ re li qayuwa’, li ch’ina muneek, li ch’ina b’eleb’aal ch’iich’, li b’aqlaq ch’iich’, ut chiqab’eresi li qana’leb’ rik’ineb’ li maatan a’an li k’eeb’ileb’ xb’aan li Dios, li ink’a’ te’oso’q. Laa’in xinsik’ ru yal kaahib’ reheb’ li k’iila maatan wankeb’: …

“Xb’een, li maatan re yo’laak. Li maatan a’in k’eeb’il qe chiqajunjunqal. Laa’o koo’osob’tesiik chi elk chaq sa’ li qachoxahil ochoch re xk’ulb’al li qajunxaqalil ut re xk’utb’al rik’in xchaab’ilal li qayu’am naq wanq qak’ulub’ejil re naq junaq kutan toosutq’iiq rik’in li Dios, ut rik’ineb’ li raarookeb’ qab’aan, sa’ jun li choxahil awa’b’ejihom. … Teneb’anb’il sa’ qab’een xk’utb’al li qab’antioxihom rik’in li naqab’aanu chiru li qayu’am. …

“Xkab’, li maatan re tuqtuukilal. Sa’ xyi li choqink sa’ li ruchich’och’ wanko wi’, lix choqinkileb’ li ch’iich’, xk’ihal li aatin na’el sa’ li puktesib’aal aatin, ut xnimal xlaatz’al li qahoonal—jo’ ajwi’ li k’iila ch’a’ajkilal li wan sa’ li ruchich’och’—chixjunil a’in naru nokoxch’a’ajkila, nokoxrahob’tesi, ut naxtawasi qametz’ew chixkuyb’al. …

“Wan jun li ki’iiqank re li rahil ch’oolejil ut li k’aynaq rik’in li rahilal, li naxk’ojob’ chixjunqal li ch’a’ajkilanb’il ch’oolej ut naxq’axtesi li maatan re tuqtuukilal. “Li tuqtuukil usilal ninkanab’ eerik’in, lin tuqtuukil usilal nink’e eere; ink’a’ nink’e eere kama’ naxk’e li ruchich’och’. Misachk eech’ool chi k’oxlak, chi moko chexxiwaq” (Jwan 14:27). …

“Rox, li maatan re rahok. “At Tzolonel, b’ar wank tz’aqal li xnimal ru qataqlankil sa’ li Chaq’rab’?” kixpatz’ laj nawol chaq’rab’ li ki’aatinak rik’in li Jesus. Kichaq’ok li Jesus ut kixye: “Taara li Qaawaʼ laa Dios chi anchal laa chʼool, chi anchal laa waam, ut chi anchal laa kʼaʼuxl.

“Aʼan li xbʼeen ut xnimal ru chaqʼrabʼ.

“Li xkabʼ chanchan ajwiʼ aʼan: Taara laa was aawiitzʼin joʼ naq nakara aawibʼ laaʼat” (Mateo 22:36–39). …

“Xkaa, li maatan re li yu’amej—a’an ajwi’ li wankilal sa’ xb’een li kamk. Sa’ lix k’uub’anb’il na’leb’ li qaChoxahil Yuwa’ k’utb’esinb’il chi tz’aqal tz’aqal li rahok. Chixjunil li naqara, jo’ li qajunkab’al, li qamiiw, lix sahil qach’ool, li qana’leb’, lix nawom qach’ool, te’oso’q raj wi ta maak’a’ li qaYuwa’ ut li Qaawa’ Jesukristo, li Ralal. Jun reheb’ li k’oxlahom ut tz’iib’ahom q’axal raab’il sa’ li ruchich’och’ a’in, a’an li santil ut yaalil aatin: “Xb’aan naq li Dios k’a’jo’ naq kixra li ruchich’och’: kixk’e chaq li Ralal jun chirib’il re naq chixjunil li taapaab’anq re, ink’a’ taasachq, wan b’an xyu’am chi junelik” (Jwan 3:16)” (“Los dones y los regalos,” Liahona, julio 1993, 68–72).

Xchaab’ilob’resinkil li qak’utum

Us ajwi’ xyeeb’al, “ink’a’ ninnaw.” Us ta tento taayal aaq’e chixsumenkil yalaq patz’om wan reheb’ li tzolb’ileb’ aab’aan chirix li evangelio, li Qaawa’ naxnaw naq ink’a’ nakanaw chixjunil li k’a’aq re ru. Naq ink’a’ nakanaw xsumenkil junaq patz’om, naru nakakanab’eb’ li wankeb’ sa’ li tzoleb’aal chi sik’ok sa’ komonil re xtawb’al xsumenkil sa’eb’ li loq’laj hu ut chixwotzb’al li neke’xtaw. (Chi’ilmanq Li k’utuk jo’ li Kolonel, 24.)